1. Japi riká aní Hebreos 12:1, ¿piri ta nokisáré jiti ta sunibo jumia alí sinibí pirélipo?

 ECHONÁ Biblia aní japi sinéami cristianos júmiami ju. Alí echi japi a suní jumia sinibí bitélima (2 Tim. 4:7, 8). Ata iʼwérili nokisáré jumia, jiti ma mulipi ju japoná ti chéami sibabo. Echi apóstol Pablo japi ayénachó máami nili alí a sunili, anili jaré namuti japi tamó iʼwírima jiti tamujé ayénachó sunibo. Jéanili: “Miná pásaré suwaba muruka [...] alí we anáchaka júmipo echoná júmaliwachi japi bachami nirú tamujé yúa” (leeri hebreos 12:1, TNM).

2. Japalí Pablo osali japi ta “miná pásaré suwaba muruka”, ¿piri ruyá anili?

² Japalí Pablo osali japi ta “miná pásaré suwaba muruka”, ¿piri ruyá anili? Echi ko ke ruyá anili japi ta ke bilé iyiri namuti apéripo, nalí japi ta ke apéripo echi muruka japi ke me natéami ju. Echi namuti isimí japi ta ke me aʼlá oméripo jumia alí japi ta risiboa. Jiti ta aminabi júmipo echoná carrera, ati pásaré echi muruka japi ta ke newalé. Nalí nirú jaré muruka japi ta newalé alí japi ta ke pásaré, ati pásaká ma ti ke oméripo sunía echi carrera (2 Tim. 2:5). Ma inepo chu iyiri ju echi muruka japi ta a newalé.

3. a) Japi riká aní Gálatas 6:5, ¿piri nokisáré ibili cristiano? b) ¿Piri binepo jenaʼí binelíwami, alí chúsiá?

³ (Leeri Gálatas 6:5, TNM). Jenaʼí versículo Pablo ko raʼíchili japi ibili cristiano “apérisaré echi aboi níwala  muruka”. ¿Piri ruyá anili? Echi nóchali japi Jeobá tamó ané alí japi ta ibili nokisáré. Jenaʼí binelíwami binepo chu iyiri ju echi namuti japi ta ibili nokisáré alí piri tamó iʼwírima echi riká nokayá. Ayénachó raʼichabo jaré muruka jitra japi ke me natéami ju alí chúriká nokiboa jiti oméripo miná paya. We natéami ju japi ta ke apéripo echi muruka japi ta ke omeri, nalí japi ta apéripo echi muruka japi ta a omeri. Jiti echi riká oméripo seaya japoná ti sibabo alí sinibí pirélipo.

4. Japi ta katúwika nokali Jeobá yúa, ¿chúsiá ke betéami ju nokayá echi nóchali? (Ayénachó iné echi imágenes).

⁴ Japi ta katúwika raʼíchili Jeobá yúa. Japalí ti katúwili Jeobá yúa, ati aneli japi ta sinibí echi nijéwipo alí nokiboa japi echi nakí. Jiti la ti nokisáré japi riká ti ma anili. Tákoré echi ko bilé nóchali we natéami ju, ke betéami ju nokiwá. ¿Chúsiá? Jiti Jeobá tamó niwali jiti nokiboa japi echi nakí (Apoc. 4:11). Alí tamó niwali jiti machinálipo echi alí  nijéwipo, ayénachó Jeobá tamó niwali japi riká echi binoy ju. Jiti la, ati oméripo echi muliwia alí kanilia nokayá japi echi nakí (Sal. 40:8). Nalí ke echi bi ju, ati nokisáaká japi Jeobá nakí alí japi Jesús isili, ati kilí nílipo (Mat. 11:28-30).

5. ¿Piri mi iʼwírima jiti mi a omérima isiá japi riká mi katúwili Jeobá yúa? (1 Juan 5:3).

⁵ ¿Piri mi iʼwírima aperia echi muruka? Bilé, aminabi we galea Jeobá. Ami natásaká japi echi isili mi jitra alí echi namuti aʼláala japi mi iyama pe aminana, mujé ko aminabi we galema Jeobá. Alí ke mi jilí nirama nijewia japi echi nulá (leeri 1 Juan 5:3). Okuá, isí japi riká Jesús isili. Echi ko isili japi Jeobá nakili jiti sinibí iʼwírili tánili alí ke siné wikáwili echi aʼláala namuti japi echi iyama (Heb. 5:7; 12:2, TNM). Japi riká isili Jesús, jiwérili tani Jeobá alí we aʼlá bichiwi japi mujé sinibí bitélima pe aminana. Ami aminabi we galésaká Jeobá alí mi isísaká japi riká Jesús isili, ami omérima isiá japi riká mi katúwili Jeobá yúa.

6. ¿Chúsiá ti nijéwisaré japi Jeobá nulé echi téemala japi nokisáré? (Ayénachó iné echi imágenes).

⁶ Iʼwiria mujé téemala. Jiti aminabi júmipo echoná carrera alí sinibí pirélipo, ati we rasíruka galésaré Jeobá alí Jesús tamujé téemala yúa (Mat. 10:37). Nalí jepuná ko ke aniwáami ju japi ta ke tibúsaré tamujé téemala jiti oméripo nóchilia Jeobá. Ati kanílitinalaká Jeobá alí Jesús, ati nijéwisaré japi echi tamó nulé japi iʼwíripo tamujé téemala (1 Tim. 5:4, 8). Echi niwíkami anakupi galésaré alí riwíwisaré, echi wénwala galésaré alí binérisaré echi kúchuwala, alí echi kúchuwala nijéwisaré echi wénwala. Echi riká nokisáaká, Jeobá ko machí japi we kanila pirélima (Efes. 5:33; 6:1, 4, TNM).

7. ¿Piri mi iʼwírima nijewia japi Jeobá nulé echi téemala?

⁷ ¿Piri mi iʼwírima aperia echi muruka? Ami onolá nísaká, niwíkami o ranala ma, we aʼlá bichiwi japi echi busuréliami japi uchuwi echoná Biblia mi iʼwírima. Kiti natá japi wabé aʼlá ju japi riká mujé binoy nata, japi riká nata echi pagótami japoná mujé bité o japi bineri echi pagótami jenaʼí Wichimóbachi piréami japi anéliwa japi we machí (Prov. 24:3, 4). Biné echi publicaciones jiti echoná mi riwimea jaré namuti japi mi iʼwírima machiyá chúriká mi isima japi riká aní echoná Biblia. Japi riká echi oselí “Niwíkami alí kúchuwala ata mi kaníliami nipo” alí echi libro “We mi kanílika bitélima sinibí” echoná binelíwami 49 alí 50, a nirú busuréliami japi iʼwírima echi niwíkami, echi wénwala alí echi kúruwi alí iwé jiti machimea piri nokimea japalí ikí namuti jilírami. b We aʼlá nijewi echi busuréliami japi uchuwi echoná Biblia, tákoré mujé téemala ke echi riká noká. Ami echi riká isísaká, a timí we aʼlá pirélipo alí Jeobá mi iʼwírima (1 Ped. 3:1, 2).

8. ¿Piri ta ikibóaré ati nokisáaká japi ke aʼlá ju?

⁸ Japi ikí japalí ta ke aʼlá noká. Jeobá ko riwé japi ta ibili natabo echi namuti japi ta nokiboa, alí echi ko nakí japi ta kaníliami nipo. Nalí ati nokisáaká japi  chati ju, echi ko ke isima japi ta ke risoa nílipo (Gál. 6:7, 8, TNM). Jiti la, ati anisáaká bilé namuti ke bachá aʼlá natasa o ati nokisáaká japi ke aʼlá ju, ati risoa nílipo. Isini kaachi nílipo japi tamujé iyiri ju o ke kanílipo echi namuti jitra japi ta nokali. Machiyá japi tamujé iyiri ju japi ta ikí, tamó iʼwírima aniyá echi namuti chati japi ta nokali alí japi ta riwepo echi riká nokayá. Ayénachó tamó iʼwírima jiti iʼwérika nokiboa ma ke echi riká nokayá. Ati nokisáaká suwaba jepuná namuti, ati aminabi júmipo echoná carrera alí sinibí pirélipo.

9. ¿Piri mi iʼwírima ami ke aʼlá isílaká? (Ayénachó iné echi imágenes).

⁹ ¿Piri mi iʼwírima aperia echi muruka? Ami machisáré japi mi ke omérima ku nakuliwia japi mi isili. Kiti me natá echi namuti jitra alí kiti aní japi jarecho iyiri nili japi mi isili. Wabé aʼlá ju japi mi natama japi mi ke aʼlá isili, alí iʼwérili mi isísaré aʼlá ku isiá. Ami we omona níliaká echi namuti jitra japi mi isili, ne sulachí jonsa raʼichá Jeobá yúa, ruyé japi mi isili alí tani japi mi ku wikáwima (Sal. 25:11; 51:3, 4). Ami cha olásaká jarecho, ku wikáwili tani. Alí ami newaléaká, iʼwírili tani echi ancianos (Sant. 5:14, 15, TNM). Biné echi namuti jitra japi mi isili alí ma ke che echi riká isí. Ami we aʼlá machisáré japi Jeobá ko simá isima mi yúa alí mi iʼwírima (Sal. 103:8-13).

10. ¿Chúsiá ke aʼlá ju japi nokinálipo echi namuti japi ta ke omeri nokayá? (Gálatas 6:4).

¹⁰ Japalí ti nokinali japi ta ke omeri nokayá. Japalí ti nata japi noká jarecho alí tamujé ko ke omeri echi riká nokayá, echi ko ju japi riká bilé muruka we betéami (leeri Gálatas 6:4). Ati echi riká nátami nísaká, a keʼré japi ta korupo japi jarecho olá alí walúala ka nílipo jarecho yúa (Gál. 5:26). Japalí ta iʼwérili noká nokayá japi riká jarecho, ata risibóaré nokayá japi ta ke omeri. Alí echoná Biblia ruyé japi “echi namuti japi ta nakí alí ke sapú ikí, echi ko nayunti tamujé sulala” (Prov. 13:12). Jiti la, japalí ti ke omeri nokayá japi ta nokinali, ati aminabi omona níliporé. Jepuná isima japi ta ke me jiwera nílipo jumia echoná carrera (Prov. 24:10).

11. ¿Piri mi iʼwírima jiti mi ke isínalima japi mi ke omeri isiá?

¹¹ ¿Piri mi iʼwírima miná paya echi muruka betéami? Ke mi iʼwérili isísaré isiá japi Jeobá ke mi ané; echi ko ke siné mi tánima japi mi isima echi namuti japi mi ke omeri (2 Cor. 8:12). Ami newalásaré japi Jeobá ko ke siné mi anema japi mi isísaré japi riká jarecho noká (Mat. 25:20-23). Echi ko we natéami niraa iné japi mi isimí, japi riká echi nóchali japi mi isimí ne sulachí jonsa, japi mi ke riwé echi nijewia alí japi mi we anáchami ju. Ke mi niráami nísaká, aʼlá mi machimea japi jipi ko ke mi omeri isiá suwaba echi namuti japi riká chabéi, jiti mi nayulú, jiti mi wiká bamíbami ju o jarecho si namuti jitra. Japi riká Barzilái, kiti naré echi nóchali japi mi ma ke omeri isiá ami nayúami nísaká (2 Sam. 19:35, 36). Alí japi riká Moisés, riwé japi jarecho mi iʼwírima alí iyá nóchali jarecho japalí aʼlá nisa (Éx. 18:21, 22). Ke mi niráami nisaáka, ke mi isínalima japi mi ke omeri isiá alí ami omérima maa echoná carrera.

12. ¿Achi ta iyiri ju echi chati namuti jitra japi noká jarecho?

 ¹² Ke iyiri ka nílipo echi chati namuti jitra japi nokali jarecho. Ke ti omeri anea jarecho japi nokimea, ke cho ti omeri isiá japi ke namú ikimea echi chati namuti jitra japi nokali. Japi riká, a keʼré japi bilé ranala riwema nijewia Jeobá alí jepuná ko we omonáritimiré echi wénwala. Echi wénwala japi nata japi aboi iyiri ju echi chati namuti jitra japi isili echi ranala, aminabi we risoa nili; alí Jeobá ko ke nakí japi echi riká nílima (Rom. 14:12).

13. ¿Piri omeri nokayá echi wénwala japalí echi ranala ke aʼlá isisa?

¹³ ¿Piri mi iʼwírima miná paya echi muruka betéami? Newalá japi Jeobá ko tamó riwé japi ta aboi natabo achi ti nijéwipo echi o ke. Echi ko machí japi mujé ke sébali aʼlá isíami ju, jiti la bi nakí japi mi iʼwérili isima we aʼlá onolá niya o iyela ma. Mujé nolá riwésaká nijewia Jeobá, echi binoy iyiri ju, ke tasi mujé (Prov. 20:11). Tákoré mi machí suwaba echi namuti, a keʼré japi mujé ko a bijí nílima japi mi ke aʼlá isili. Ruyé Jeobá japi mi nili alí wikáwili tani. Echi ko machí japi mi ke omeri nakuliwia japi ma ikili chabé. Ayénachó, Jeobá ko ke mi ané japi mi tibúsaré mujé nolá jiti ke risoa ikimea echi chati namuti jitra japi isili. Newalá, mujé ranala a jiwérili isísaká ku muliwia Jeobá, echi ko kanílika ku narema (Luc. 15:18-20).

14. ¿Piri ikiméaré ata wabé risoa nílisaká echi namuti jitra japi ta nokali?

¹⁴ Wabé risoa nilia echi jitra japi ta nokali. Japalí ta ke aʼlá nokisaa, ke chati ju japi nílipo japi tamujé iyiri ju. Nalí wabé risoa nilia nátika japi tamujé iyiri ju, echi ko ju japi riká ko ti bilé namuti we betéami aperia alí Jeobá ko ke nakí japi ta apéripo. ¿Chúriká ti machí japi ma ke aʼlá ju japi ta nili? Japalí ti aminabi wabé  risoa nili echi namuti jitra japi ta nokali tákoré ti ma nawésili, ati omona nili echi jitra alí ti iʼwérili noká ma ke echi riká nokayá. Ma ti echi riká nokisáaká, we bichíwisaré japi Jeobá ko tamó wikáwima (Hech. 3:19). Jeobá ko nakí japi ta ma ke che aminá echi riká nílipo, jiti echi ko machí japi ta echi riká nílisaká, ke kanila pirélipo (Sal. 31:10). Ati we omona nílisaká, a keʼré japi ta siwepo alí riwepo jumia echoná carrera (2 Cor. 2:7).

15. ¿Piri mi iʼwírima kilí nilia ami wabé risoa níliaká echi jitra japi mi isili? (1 Juan 3:19, 20, TNM).

¹⁵ ¿Piri mi iʼwírima miná paya echi muruka betéami? Ami wabé risoa níliaká echi jitra japi mi isili, ami newalásaré japi Jeobá ko a wikáwiami ju (Sal. 130:4). Japalí bilé ne sulachí jonsa omona nili echi chati namuti jitra japi isili, Jeobá ko jériká ané: “Ma ni ke newalama echi chati namuti japi nokali” (Jer. 31:34). Jepuná ko aniwáami ju japalí Jeobá ko wikawi, echi ko ma ke nata echi jitra. A bichíwali ju japi ta risoa nílipo japalí ti ke aʼlá nokisaa, nalí jepuná ke aniwáami ju japi Jeobá ke mi wikáwili. Alí ma ke omériaká olayá nóchali echoná congregación, kiti iyó. Jeobá ko ma ke newalá echi namuti chati japi mujé isili.., ¡mujé echi riká cho isí! (Leeri 1 Juan 3:19, 20, TNM).

16. Japi riká júmiami, ¿piri ta aʼlá machisáré?

¹⁶ Jiti oméripo sinibí pirea, ati nijéwisaré jepuná busuréliami: “[Júmisi] mapurigátamo galá mepo” (1 Cor. 9:24). Ata niyúrinalaká ata aʼlá machisáré piri namuti apérisaré alí piri namuti miná pásaré. Jenaʼí binelíwami ata bineli jaré ejemplos, nalí ke echi bi ju. Ayénachó Jesús ko anili japi isini kaachi koʼyá, bajía alí natia echi namuti jitra japi ikí sinibí rawé, a nímiré japi riká bilé muruka we betéami (Luc. 21:34, TNM, nota). Jepuná textos alí jarecho si, tamó iʼwírima machiyá piri ti nokisáré jiti ke riwepo jumia alí echi riká oméripo sinibí pirea.

17. ¿Chúsiá ti we bichiwi japi ta niyúripo jumia alí oméripo sinibí pirea?

¹⁷ Ati we bichiwi japi ta a niyúripo jumia jiti Jeobá tamó iyama echi jiwérala japi ta newalé alí echi riká oméripo sinibí pirea (Is. 40:29-31). Jiti la kiti riwé maa. Isí japi riká echi apóstol Pablo, echi ko we jiwérika isili jiti omérima niyuria (Filip. 3:13, 14). A bichíwali ju japi ke bilé omérima maa mujé jitra, nalí Jeobá mi iʼwírima. Echi mi iʼwírima aperia echi muruka alí jiti mi miná pama japi mi ke newalé (Sal. 68:19). Jiti Jeobá mi iʼwírima, mujé ko omérima anachia alí mi niyúrima echi carrera.