Echi leériami ko machinali
Echoná oselí La Atalaya michá junio bamíali 2020, echoná binelíwami “Que tu nombre sea santificado”, ¿piri kulíwami namuti ta bineli echi Onorúami riwalá jitra alí japi echi bi nulásaré?
Echoná binelíwami ata bineli japi nirú bilepi bi namuti japi sinéami tamujé alí echi ángeles we natéami niraa inésaré: japi ke cha riká raʼichárami nima Jeobá riwalá jitra alí japi sinéami machimea japi ke bichíwali ju echi namuti chati japi aniri Jeobá jitra. Alí echoná jonsa machina jarecho okuá namuti: 1) japi Jeobá bi ju japi we aʼlá machí nulayá; 2) achi tamujé ne sulachí jonsa nijéwami ju Jeobá.
¿Nalí chúsiá jipi ko aniwá japi wabé natéami ju echi Jeobá riwalá alí japi ke cha riká raʼichárami nima echi jitra? Ma binepo bikiá namuti.
Satanás cha riká raʼíchili Onorúami riwalá jitra echoná Edén alí ke riwé echi riká isiá.
Bilé, echoná Edén Satanás ko sayérili Jeobá cha riká raʼíchika echi riwalá jitra. Japi nárili Satanás echi Eva, echi nili japi riká ko aniyá japi Jeobá ke aʼláala ju alí japi echi nulali we jilí nili nijéwilia. Miná ko, Satanás anili japi ke bichíwali ju japi Jeobá anili, echi jitra echi ko ruyá anili japi Jeobá ikaléami ju. Echalí jonsa echi ko najítili “echi Diablo”, japi aniwáami ju “ikaléami”, jiti echi ko cha riká raʼíchili Jeobá jitra (Juan 8:44). Jiti Eva bichíwili japi Satanás anili, ma ke nijéwili Jeobá alí echi riká ayénachó sayérili alí ma ke nakili japi echi nulama (Gén. 3:1-6). Jipi rawé, Satanás cha riká raʼicha Onorúami riwalá jitra; ikaleka raʼicha jiti jarecho mayema japi Jeobá ke aʼláala ju. Alí echi pagótami japi bichiwi japi Satanás aní, we jilí niraa nijewia Jeobá. Jiti la, japi ta Jeobá nijéwami ju we ti cha riká iné japalí ikaleka raʼicháliwa Onorúami riwalá jitra. Echi ikaléwami isimí japi ta we risoa nilia pirélipo alí japi nirúlima wiká namuti chati jenaʼí Wichimóbachi.
Okuá, Jeobá ko isima japi ma ke cha riká raʼichárami nima echi riwalá jitra jiti sinéami kanílika pirélipo. Echi ko ju japi Jeobá wabé natéami niraa iné. Jiti la echi ko isima japi ma ke cha riká raʼichárami nima echi riwalá jitra (Ezeq. 36:23). Japalí Jesús binérili chúriká raʼichásaré Onorúami yúa, echi ko jéanili: “Kiti riwé japi echi pagótami cha riká raʼichama mujé riwalá jitra”. Echi riká néwariwélitili chu iyiri nalí wabé natéami ju japalí ti raʼíchika tani Jeobá (Mat. 6:9, TNM). Echi Biblia aní wisabé niraa japi we natéami ju japi walubéala niraa anepo echi Onorúami riwalá. Ma inepo jaré ejemplos. “Nokisí japi echi Jeobá riwalá walubéala anérami nima, jiti echi riká anérami nísaré” (1 Crón. 16:29; Sal. 96:8). “Wikaránisi Jeobá jiti echi riwalá walubéala anérami nima” (Sal. 66:2). “Sinibí ni walubéala anema mujé riwalá” (Sal. 86:12). Ayénachó japalí Jesús asali echoná templo, tánili Jeobá: “Mujé Binói waminabi wabé walubéraga anérami níima”. Alí Jeobá ko je ku aneli: “Mani wabé walubérali Nijé Binói niráa, chópini auchecho siné waminabi wabé walubérama” (Juan 12:28). a
Bikiá, Jeobá ko nakí japi binoy riwalá sinibí walubéala anérami nima. Ma simírisa echi mili bamíali japalí Jesús nulasa, echi pagótami ma ke néwariwélitima achi ne sulachí jonsa nijéwami ju Jeobá. ¿Chúsiá? Jiti echi pagótami ma sébali aʼlá nokáami nima alí echalí ko ma néwariwélitili japi nijéwami nili Jeobá japalí Satanás sutanárami nili. Jiti la echi pagótami ko a omérima sinibí pirea. Nalí, ¿piri natama echi ángeles alí echi pagótami echi Onorúami riwalá jitra? Echalí ma sinéami machimea japi Jeobá nalí wabé aʼlá nuláami ju, alí ripá rewegachi alí jenaʼí Wichimóbachi sinéami napawika nijéwima Jeobá. Alí, ¿piri ikimea echi Onorúami riwalá jitra?
Ma ke bilé cha riká raʼichama echi Onorúami riwalá jitra alí sinéami machimea japi ke bichíwali nili echi chati namuti japi aniri Jeobá jitra. Sinéami japi Jeobá nijéwami ju ripá rewegachi alí jenaʼí Wichimóbachi, we natéami niraa inema echi Onorúami riwalá. ¿Chúsiá? Jiti inema japi Jeobá aminabi isima wiká namuti we aʼláala. Japi riká, jiti Jesús ke niráami ju, echi ko iyama echi Onorúami Gobiérnowala binoy Onolá, “echirigá echi Bilepi Walubela Riosi suwaba omérami níima suwaba yuwa” (1 Cor. 15:28). Miná ko, echi japi pirélima jenaʼí Wichimóbachi we kaníliami nima japi riká ko Onorúami kúchuwala (Rom. 8:21). Alí Jeobá ko ma isima japi riká nakili ne chokichí jonsa, japi echi kúchuwala ripá piréami alí jenaʼí Wichimóbachi, sinéami napawika nima japi riká téemala (Efes. 1:10).
¿Alí chu nílima sinéami echi Jeobá téemala japalí echi riká ikisaa? Echi ripá piréami alí jenaʼí Wichimóbachi, aminabi we inílima walubéala anea echi Onorúami riwalá japi riká osali David: “Walubéala anérami nima Onorúami Jeobá [...]. Walubéala anérami nima echi riwalá ne sinibí” (Sal. 72:18, 19). Ata sinibí binepo wiká kulíwami namuti japi ta jitra walubéala anepo echi Jeobá riwalá.
Echi Jeobá riwalá aniwáami ju suwaba japi riká isíami ju Jeobá. Jiti la, japalí ti nata echi riwalá jitra, ayénachó ti nata japi echi ko we galéami ju (1 Juan 4:8). Sinibí ta newalabo japi Jeobá néwariwéliti japi we tamó galé japalí tamujé niwali, nijili binoy Nolá Jesús alí iʼwérili isili néwariwélitia japi wachíniga nuláami ju. Alí inepo chúriká Jeobá aminabi nijí wiká namuti aʼláala jiti we tamó galé. Ayénachó sinibí nirúlima wiká namuti japi ta jitra aminabi mulíwinalipo tamujé Onolá Jeobá alí wikaránipo walubéala anea echi riwalá (Sal. 73:28).
