• “Ani nili japi riká ko nijé kunala wiká umukí yúa ochiyá”.

• “Ani nili japi we tamí risoa níliti, japi ni ke baʼóami ju alí japi ni ke natéami ju”.

• “Ani we risoa nili. Ke bilé ité japi ni yúa raʼichama echi namuti jitra”.

• “Ani chotásiki natia japi Jeobá ko ke tamí natéami niraa iné”.

Jepuná raʼíchali we aʼlá ruyé japi nili bilé mukí japalí echi kunala iné pornografía. Alí echi kunala ichípika echi riká isiá asálaká ma wiká michá o bamíali, a keʼré japi echi upila nílima japi ma ke siné ku bichíwima echi. Bilé mukí jéanili: “Isini kaachi ko, ani ke machiyá nili nijé kunala alí ni nárika isié piri auché jaré namuti ke tamí ruyéiré”.

¿Achi mujé kunala ma iné echi pornografía? a Jepuná artículo niwárami ju nátika echi hermanas japi echi kunala echi riká isimí. Jenaʼí ruyema jaré busuréliami japi mi ku kanílitima, japi mi anema japi Jeobá ke mi bineli riwé alí japi mi iʼwírima aminabi Jeobá amígawala niya. b

A bichíwali ju japi mujé ko ke omeri isiá japi mujé kunala ke isima jaré namuti, nalí ami omeri isiá jaré namuti jiti mi kilí nílima. Jenaʼí nirú jaré namuti japi mi omeri isiá.

Kiti natá japi mujé iyiri ju. Isini kaachi echi upila nílimiré japi echi iyiri ju jiti echi kunala iné pornografía. Japi riká, Alice c nátili japi echi ko ju bilé mukí ke me baʼóami alí nárika isié: “¿Chúsiá nijé kunala wabé baʼori inea jarecho umukí alí tamí ko ke?”. Alí jaré upila nílimiré japi echi iyiri ju japi aminá cha ikimea echi namuti jitra japi echi nili. Daniela ko aní: “We ni iyoe japalí nijé kunala aminabi inéi echi pornografía. We ni omona nili alí ni nilie japi nijé ju japi isimí japi ku rojapo”.

Ami echi riká cho níliaká, newalá japi Jeobá ko ke animea japi mujé iyiri ju echi namuti jitra japi isimí mujé kunala. Santiago 1:14 aní: “Siʼwinárigá echi jaré pagótami chopi nijéwaga olá mapurigá aboni chati sitíi olárama, mapalí aboni arigá  we nakí echirigá chati sitíi olánala” (Rom. 14:12; Filip. 2:12). Ayena, Jeobá ko ke aní japi mujé iyiri ju. Echi ko nalí we natéami niraa iné japi mi nijéwami ju (2 Crón. 16:9).

Tákoré mujé kunala we kanili inea echi pornografía, ke aniwáami ju japi mujé bilé mukí ke baʼóami ju. Machiyá jepuná we mi iʼwírimiré. Echi machíami aní japi echi pornografía isimí japi echi rijoi natama alí isínalima wiká namuti echi nasawíliami jitra japi ke bilé mukí omero isiá.

Kiti we natá echi namuti. Catherine aní japi ke omérili riwea natia echi namuti japi isimí echi kunala japalí iné pornografía. Frances aní: “Sinibí japalí ni ke machí kumi atí nijé kunala, ani we nati suwaba rawé”. Jarecho upila aní japi riwela nili japalí jarecho hermanos alí hermanas yúa muchuwi jiti echi a keʼré japi machí echi namuti jilírami japi ikí echi kunala yúa. Jarecho ko aní japi awénili ka nili jiti nata japi ke bilé inami japi ikí.

Ke chati ju japi mi echi riká nílima, nalí aminabi mi we natásaká a keʼré japi mi risoa nílima. Jiti la wabé aʼlá ju japi mi aminabi mulíwima Jeobá jiti echi mi iʼwírima anachia (Sal. 62:2; Efes. 6:10, TNM).

Leeria echi Biblia alí natia japi aní echoná mi iʼwírima. ¿Chúsiá? Jiti echoná Biblia nirú ejemplos umukí jitra japi ayénachó ikili echi iyiri namuti alí japi raʼichia Jeobá yúa iʼwírili ku kanilia. Tákoré echi riká nokayá ke iʼwírili jiti ma ke olama karú ikiwáami, nalí a iʼwírili jiti kilí nílima. Natabo Ana jitra japi we omona asali. Echi ko wilí raʼíchili Jeobá yúa alí ku kilí nílili tákoré ke machiyé japi ikimea pe aminana (1 Sam. 1:10, 12, 18; 2 Cor. 1:3, 4).

Iʼwírili tani echi ancianos echoná congregación muchúwami. Echi ko nima “japi riká bilé japi tibú echi iká jitra, japi riká bilé japi tibú echi we jiwérami ukí jitra” (Is. 32:2). A keʼré japi echi ko anema bilé hermana japi mi iʼwírima ku kanilia alí japi mi omérima ruyea suwaba namuti (Prov. 17:17).

¿Achi mi omérima iʼwiria mujé kunala jiti riwema inea echi pornografía? Ayena a keʼré. Echi Biblia aní japi “wabé aʼlá ju okuaka, ke ko bilepi bi” ku kariwea echi namuti jilírami (Ecl. 4:9-12). A nirú jaré namuti japi néwariwéliti japi ke me jilí ju riwea inea echi pornografía alí anakupi ku bichiwia japalí okuaka echi niwíkami anakupi niraa iʼwiri.

 Bilé namuti we natéami japi mi machisáré ko ju, achi mujé kunala iʼwérili isimí riwénalia inea echi pornografía. ¿Achi mi machí japi mujé kunala tani Jeobá japi echi iʼwírima riwea inea echi pornografía alí iʼwírili tani echi ancianos? (2 Cor. 4:7; Sant. 5:14, 15, TNM). ¿Achi ma riweli isiá jaré namuti ke isimia japi chati ju? Japi riká, ¿achi ma ke me iné echi celular alí jarecho si namuti? Alí, ¿achi ma ke isimí jaré namuti japi isima chati isitia? (Prov. 27:12). ¿Achi nakí japi mujé echi iʼwírima alí bichíwali mi ruyé suwaba namuti? A echi riká nísaká, a keʼré japi mujé ko a omérima iʼwiria.

Nalí, ¿chúriká mi omérima isiá? Ma inepo japi isimí Felicia. Echi ko niwika atí Ethan yúa japi taa ka jonsa we kanilie inea echi pornografía. Felicia ko iʼwérili isimí jiti echi kunala ke me jilí nirama echi yúa raʼichia japalí echi checho ku nílisa inénilia echi pornografía. Ethan jériká aní: “Ani omeri raʼichia nijé upila yúa suwaba namuti jitra. Echi ko we simá isíami ju tamí yúa alí tamí iʼwiri jiti ni ke isínilima japi chati ju. Ayénachó iné suwaba namuti japi ni isimí alí tamí iʼwiri aʼlá néea echi internet”. A bichíwali ju japi Felicia we omona nili machiyá japi echi kunala we kanili inea echi pornografía, nalí Felicia aní: “Tákoré ni we iyoa nili alí ni we omona nili, nijé ko machí japi echi ko ke iʼwiri nijé kunala jiti riwénalima inea echi pornografía. Jiti la ti bachá raʼicha japi ikí Ethan, alí echi riká miná ko echi ayénachó tamí iʼwiri jiti ni ke me omona nílima”.

Echi riká nokisáaká okuaka raʼichia iʼwírima echi kunala jiti ke inema echi pornografía. Nalí ayénachó iʼwiri echi upila jiti a ku bichíwima echi. Japalí echi rijoi suwaba ruyé echi upila, japi riká piri ke aʼlá isimí, kumi iyénili o piri isiá asali, jepuná iʼwiri jiti echi upila ke cha riká natama echi jitra.

¿Achi mi mayé japi mi omeri echi riká cho isiá iʼwírimia mujé kunala? Ami mayéaká japi mi a omeri, aʼlá nímili japi timí okuaka leérima jepuná artículo. ¿Piri namuti natásaré isimia mujé kunala? Iʼwérili isísaré riwea inea echi pornografía jiti mi checho ku bichíwima echi. Ayénachó ke iyósaré japalí mujé raʼichánali jepuná namuti jitra, echi ko nalí iʼwérili isísaré aʼlá inamia chumi nili mujé. Alí mujé upila, ¿piri namuti mi natásaré isimia? Ami iʼwérili isísaré iʼwiria mujé kunala alí checho ku bichiwia echi. Alí ayénachó we natéami ju japi timí okuaka machimea chúsiá wiká pagótami we kanili inea echi pornografía alí piri namuti iʼwírima riwea echi riká nokayá. d

 Ami mayéaká japi jilí nima raʼichia echi namuti jitra alí ke naʼáwika, natá japi aʼlá nima japi jaré tarali o michá bilé anciano echoná si asimea ipúa alí emi iʼwírima raʼichia. A timí echi riká nakiyáaká, anesi bilé anciano japi timí okuaka kanili yúa raʼicha. Ami newalásaré japi mujé kunala a riwésaká inea pornografía, a keʼré japi mi wilí isima checho ku bichiwia echi. Nalí kiti siwé. Iʼwérili isí inea echi aʼláala namuti japi timí ma aʼlá ku noká. Kilipi niraa buwé japi pe aminana emi ko checho ku we aʼláala niwíkami nima alí we kanílika pirélima (Ecl. 7:8; 1 Cor. 13:4).

Mujé kunala checho ku inésaká echi pornografía, ¿achi aniwáami ju japi echi ko ke omona nili isía echi namuti o japi ke siné omérima riwea echi riká isiá? Ke tasi. Jiti riwea echi namuti we jilí ju ma echi riká isíami nílaká alí a keʼré japi echi ko sinibí iʼwérili isima aʼlá isiá. A keʼré japi checho ku inema echi pornografía tákoré ma wiká bamíali riweli echi riká isiá. Jiti ke checho ku echi riká ikimea, echi ko aminabi iʼwérili isísaré riwea jaré namuti tákoré echi ko mayé japi ma ke checho ku echi riká isima (Prov. 28:14; Mat. 5:29, TNM; 1 Cor. 10:12). Echi ko “siʼnú ne wabé galabéala niráa [natásaré]” alí we kichísaré “suwaba chati oluwáwami”, japi riká echi pornografía, masturbación alí jarecho si chati namuti (Efes. 4:23; Sal. 97:10; Rom. 12:9). Ami iʼwérili isísaká isiá jepuná namuti, a keʼré japi mi a omérima riwea echi riká isiá. e

¿Alí mujé kunala ke iʼwérili isínalaká riwénilia echi pornografía? Echi riká nísaká, a keʼré japi mi we omona nílima o iyoa ma. Ruyé Jeobá suwaba japi mi nili, echi riká mi isísaká ami kilí nílima (1 Ped. 5:7). Kiti riwé binea, natia japi mi leeri alí raʼichia Jeobá yúa, echi riká mi isísaká ami aminabi mulíwima echi alí Jeobá ayénachó aminabi mulíwima mi yúa. Echoná Salmo 34:18 aní japi “Jeobá ko mulipi atí echi yúa japi omona” alí iʼwírinali jiti ku kanílima. Jiti la, iʼwérili isí we simá isíami niya japi riká Jeobá nakí, iʼwírili tani echi ancianos alí kiti siwé jiti pe aminana a keʼré japi mujé kunala a riwema inea echi pornografía (Rom. 2:4; 2 Ped. 3:9, TNM).