1. ¿Piri mi iʼwírima jiti mi kanílima binea echi profecías japi uchuwi echoná Biblia?

 “WE NI kanili binea echi profecías japi uchuwi echoná Biblia”, echi riká aní bilé remalí Ben riwéami. ¿Achi mi echi riká cho nili? ¿O we mi nasina echi iyiri binea o we mi jilí niraa inámilia? Ami echi riká níliaká, ke mi echi riká natama ma mi we aʼlá inámisaká chúsiá Jeobá nakili japi echoná Biblia oserúa chukumea echi profecías.

2. ¿Piri ta binepo jena binelíwami?

² Jenaʼí binelíwami inepo chúsiá we natéami ju japi ta aʼlá machiboa echi profecías japi uchuwi echoná Biblia alí piri ta newalé jiti binepo. Miná ko binepo okuá profecías japi osali Daniel alí chúriká tamó iʼwiri jipi aʼlá inamia japi aniwáami ju.

3. ¿Piri ta nokisáré jiti we aʼlá inámipo echi profecías japi Bíbliachi uchuwi?

³ Jiti ta aʼlá inámipo echi profecías ata iʼwírili tánisaré Jeobá. Ma inepo jepuná ejemplo: natá japi mi simí bilé ciudad japoná mi ke raʼewi, nalí mi yúa iyena bilé amigo japi we aʼlá machí echoná. Echi ko a machí kumi timí jari alí ayénachó suwaba echi calles. Jiti la, ¡we aʼlá nili japi mujé amígowala mi yúa simili! Echi riká cho, Jeobá ju japi riká echi amigo japi we aʼlá machí japi chu ikimea pe aminana. Jiti la, japi riká ti we aʼlá inámipo echi profecías, ata ke niraka tánisaré Jeobá japi tamó iʼwírima (Dan. 2:28; 2 Ped. 1:19, 20).

4. ¿Chúsiá Jeobá nakili japi oserúa chukumea echi profecías echoná Biblia? (Jeremías 29:11; ayénachó iné echi foto).

⁴ Japi riká bilé onolá, Jeobá ko nakí japi echi kúchuwala kanílika pirélima pe aminana (leeri Jeremías 29:11).  Nalí be, Jeobá ko ke ju japi riká echi wénwala japi piré jenaʼí Wichimóbachi, jiti Jeobá we aʼlá machí japi ikimea pe aminana. Echi ko nakili japi echoná Biblia oserúa chukumea echi profecías jiti echi riká machiboa echi namuti we natéami japi ikiméaré (Is. 46:10). Jiti la, ati aní japi echi profecías ko ju japi riká echi chiliwéliami japi Jeobá tamó iyá jiti we tamó galé. Nalí be, ¿chúriká ti machiboa japi ne bichíwali echi riká ikimea?

5. ¿Piri biné echi kúruwi alí iwé japi riká isili Max?

⁵ Wiká kúruwi alí iwé japi Testigos ju alí simía echoná escuela, olá compañeros japi ke riwiwi echi Biblia. A keʼré japi echi aní alí noká isima japi echi ma ke me bichiwia nílima japi aní echi Biblia. Ma inepo japi ikili bilé hermano Max riwéami. Echi ko jéaní: “Japalí ni remalí ke, ani chotásiki natia achi echi religión japi nijé wénwala tamí binerie a ne bichíwali ju alí achi echi Biblia a Onorúami Raʼicháala ju”. ¿Piri nokali echi wénwala? Max jéaní: “Echi ko we kilí nili tamí yúa, tákoré ke kanilie machiyá japi riká nijé natie”. Echi Max wénwala ruyeli suwaba japi echi machinalie néeka echi Biblia, alí Max ayénachó isili jaré namuti. Echi ko binoy bineli echi profecías alí raʼíchili jarecho kúruwi yúa japi echi bineli. Alí, ¿piri ikili? Max ko jéaní: “Miná ko ma ni echi riká isisa, ani bichíwiki japi echi Biblia a Onorúami Raʼicháala ju”.

6. ¿Piri ta nokisáré ati ke me bichiwia níliaká, alí chúsiá?

⁶ Ami níliaká japi riká Max japi mi ke me bichiwia nili japi echi Biblia a ne bichíwali ju, kiti chibi la. Nalí ami isísaré bilé namuti jiti mi ke echi riká nílima. ¿Chúsiá? Jiti japalí ti ke me bichiwia nili, echi ko ju japi riká echi óxido. Jiti echi óxido isimí japi bilé namuti we natéami o bilé fierro, kilipi niraa sitánima alí miná ko ma ke aʼlá nima. Echi riká cho ju japalí ti ke me bichiwa nili, ke ti namú nokisáaká, pe aminana ma ti ke bichíwipo. Jiti la, ¿piri mi isísaré? Bachá nárika isí: “¿Achi ni bichiwi japi aní echi Biblia japi ikimea pe aminana?”. Ke mi machiyáaká, ami binésaré japi aní echi profecías japi Bíbliachi uchuwi alí japi ma ikili. Alí, ¿piri mi iʼwírima jiti mi echi riká isima?

7. ¿Chúriká bineli Daniel echi profecías? (Daniel 12:10; ayénachó iné echi foto).

⁷ Daniel ko we aʼlárika isili japalí bineli echi profecías. ¿Chúsiá? Echi ko bineli jiti machinalie ne sulachí jonsa echi bichíwali. Ayénachó Daniel ke niráami nili, jiti echi ko machili japi Jeobá isimí japi aʼlá inámima echi japi nijéwami ju japi echi nulá (Dan. 2:27, 28; leeri Daniel 12:10). Echi ko néwariwélitili japi ke niráami nili japalí iʼwírili tánili Jeobá (Dan. 2:18). Daniel ayénachó we aʼlá bineli echi Onorúami Raʼicháala, japi riká suwaba echi libros japi niruili echalí (Jer. 25:11, 12;  Dan. 9:2). Tamujé ru, ¿chúriká nokiboa japi riká Daniel?

8. ¿Chúsiá jaré pagótami biné echi profecías japi Bíbliachi uchuwi, nalí tamujé chúsiá ti binésaré?

⁸ Natá chúsiá mi biné echi Biblia. ¿Achi mi biné echi profecías japi Bíbliachi uchuwi jiti mi machinali echi bichíwali? A echi riká nísaká, Jeobá mi iʼwírima (Juan 4:23, 24; 14:16, 17). Nalí jaré pagótami ko biné echi Biblia jiti riwinali jaré namuti japi néwariwéliti japi echi Biblia ke Onorúami Raʼicháala ju. Echi riká noká jiti mayé japi echi riká aboi omérima aniyá chu iyiri namuti aʼlá ju alí chu iyiri ko ke. Nalí ke echi riká nokiboa japalí ti biné echi profecías. Ayénachó jiti we aʼlá inámipo, ati newalé bilecho namuti we natéami.

9. ¿Chúriká ti nísaré jiti we aʼlá inámipo echi profecías japi Bíbliachi uchuwi?

⁹ Kiti niráami nii. Jeobá ko aní japi iʼwírima echi japi ke niráami ju (Sant. 4:6). Jiti la, ati iʼwírili tánisaré Jeobá jiti aʼlá inámipo echi profecías. Ayénachó ke ti niráami nísaká, ati narepo echi iʼwírili japi tamó iyá echi pioni aʼlá nijéwami, jiti echi ju japi Jeobá nee jiti tamó iyama japi ta newalé binemia echi jitra (Luc. 12:42). Alí jiti Jeobá we aʼlá nátika isimí suwaba namuti, ati machí japi Jeobá ko nee bilepi organización jiti tamujé iʼwírima inamia echi namuti bichíwali japi oserúa uchuwi echoná Biblia (1 Cor. 14:33, TNM; Efes. 4:4-6).

10. ¿Piri mi biné Esther jitra?

¹⁰ We aʼlárika biné echi Biblia. Natá chu iyiri profecía mi machinali alí echi jitra biné. Echi riká isili bilé hermana Esther riwéami. Echi ko we inili machinalia echi profecías japi jitra raʼicha chu kabú nawama riweili echi Mesías. Echi ko jéaní: “Japalí ni 15 bamibi, ani binoy niraa binénilie achi echi profecías ne bichíwali oserúami nili kecho nawáachi Jesús jenaʼí Wichimóbachi”. Alí biché, ¿piri isili? Echi ko chotásili leeria echi Rollos del mar Muerto, alí japi bineli iʼwírili jiti aminabi we bichíwima. Esther jéaní: “Jaré jepuná rollos a oserúami nili kecho nawáachi Jesús jenaʼí Wichimóbachi. Jiti la ni bichiwi japi echi profecías japi oserúa uchuwi echoná, Onorúami níwala ju”. Ayénachó jéaní: “Jaré namuti wisabé ni niraa leériki jiti ni aʼlá inámima”. Nalí echi ko kanílili jiti we jiwérili isili. Alí japalí we aʼlá bineli jarecho profecías, echi ko jéaní: “Nijé binoy we aʼlá machiki japi echi Biblia ne bichíwali aní”.

11. ¿Chúriká tamó iʼwiri aminabi bichiwia japi echi Biblia ne bichíwali aní?

¹¹ Japalí ta machí japi echi profecías a ikili japi riká oserúami nili, ati aminabi bichiwi Jeobá alí echi namuti japi echi nulá. Ayénachó echi profecías tamó iʼwiri jiti bichíwipo japi ikimea pe aminana alí jiti ta ke siwepo tákoré ikiyé namuti we jilírami. Jenaʼí binepo okuá profecías japi osali Daniel alí japi ma ikísimi jipi rawé. Machiyá japi aniwáami ju tamó iʼwírima jiti we aʼlá nátika nokiboa.

12. Echi hierro japi wisótami nili wicholí yúa, ¿piri aniwáami ju? (Daniel 2:41-43).

¹² (Leeri Daniel 2:41-43). Echi silíami Nabucodonosor rimuli bilé waʼlú estatua japi echi ronola hierro wisótami nili wicholí yúa. Japalí ti biné jepuná profecía jarecho yúa japi osali Daniel alí japi aní Apocalipsis, ati machí japi echi ronola aniwáami ju echi Reino Unido alí Estados Unidos, japi we jiwérami ju jipi rawé. Japalí Daniel ruyeli Nabucodonosor piri aniwáami ju japi echi rimuli, jériká anili: “Echi silíami kukuchimi we jiwérami nima alí kukuchimi ke me jiwérami nima”. ¿Chúsiá kukuchimi ke me jiwérami nima riweili? Jiti echi pagótami japoná echi nulá ke riwema japi nulama japi riká echi nakí. b

13. ¿Piri namuti we natéami ta biné echi profecía jitra?

¹³ Japi anili Daniel echi waʼlú estatua ronola jitra ata biné jaré namuti we natéami. Bilé, japi echi países Estados Unidos alí Reino Unido a néwariwélitili japi we jiwérami ju. ¿Chúriká? Jiti echi okuá países nili japi niyúrili japalí niruili Primera alí Segunda Guerra Mundial. Nalí, ayénachó ke me jiwérami ju alí aminabi ke me jiwérami nílisimí jiti echi pagótami japoná echi nulá we naʼawi anakupi niraa alí echi gobierno yúa. Okuá, ke nirúlima bilecho gobierno japi wabé jiwérami nima japi riká Estados Unidos alí Reino Unido japalí echi Onorúami Gobiérnowala suwábisa suwaba echi gobiernos jenaʼí Wichimóbachi nirúami. Alí tákoré jarecho isélikami sayeri echi países, ke omérima niyuria. Ata machí japi echi riká nima jiti echi profecía aní japi “echi rité”, japi aniwáami ju echi Onorúami Gobiérnowala, mojonama echi estatua ronola (Dan. 2:34, 35, 44, 45).

14. Japalí mi aʼlá inami echi profecía estatua ronola jitra, ¿chúriká mi iʼwiri?

¹⁴ ¿Ami bichiwi japi anili Daniel echi waʼlú estatua ronola jitra a ne bichíwali ju? A echi riká nísaká, mujé ko a néwariwélitima. ¿Chúriká? Ke mi jiwérili isima wiká namuti níwami niya echoná Wichimoba japi ma ke wilí rojorama (Luc. 12:16-21; 1 Juan 2:15-17). Ayénachó, japalí mi we aʼlá inami jepuná profecía, mi iʼwírima we natéami niraa inea alí bineria echi pagótami (Mat. 6:33, TNM; 28:18-20). Alí jipi ma binesa jepuná profecía jitra, aʼlá nima japi mi jériká nárika isima: “Japi ni isimí, ¿achi néwariwéliti japi ni we bichiwi japi echi Onorúami Gobiérnowala suwábima suwaba echi isélikami jenaʼí nirúami?”.

15. ¿Jépuká ju jipi rawé echi silíami sur nuláami alí echi silíami norte nuláami? (Daniel 11:40).

¹⁵ (Leeri Daniel 11:40). Echi capítulo 11 echoná Daniel aní japi echi okuá isélikami anakupi niraa nakó jiti nulánali jenaʼí Wichimóbachi. Japalí ti iné na profecía jarecho yúa japi uchuwi echoná Biblia, ata machí japi jipi rawé “echi silíami norte nuláami” ko ju Rusia alí echi iʼwíriami, alí japi “echi silíami sur nuláami” ko ju echi Reino Unido alí Estados Unidos. c

16. ¿Piri namuti jilírami ikí echi japi Onorúami nijéwami ju alí japi piré japoná nulá “echi silíami norte nuláami”?

 ¹⁶ Japoná echi nulá, echi “silíami norte nuláami” we najati echi japi Onorúami nijéwami ju. Jaré Testigos we wipisori alí erta muchuwáari jiti nijéwami ju Jeobá. Nalí echi ko ke siwé alí aminabi bichiwi tákoré echi riká isié echi “silíami norte nuláami”. ¿Chúsiá? Jiti machí japi echi profecía japi osali Daniel anili japi echi riká ikimea riweili (Dan. 11:41). d Machiyá jepuná namuti tamó iʼwírima aminabi bichiwia japi ikimea pe aminana alí jiti ke riwepo nijewia Jeobá.

17. ¿Piri namuti jilírami ikí echi japi Onorúami nijéwami ju alí japi piré japoná nulá echi “silíami sur nuláami”?

¹⁷ Chabéi, echi “silíami sur nuláami” ayénachó sayérili echi Onorúami puéblowala. Japi riká, kulí chotasia echi siglo  veinte erta muchuwáari wiká hermanos alí machí awátami nili echoná escuela jonsa jaré kuuchi japi Testigos nili. Tákoré jipi ma ke echi riká ju, ne kulí jaré bamíali echi Testigos ikí jarecho namuti jilírami japi néwariwéliti achi nijéwami ju echi Onorúami Gobiérnowala. Japi riká, japalí nirú campañas japi noká echi política, a keʼré japi bilé cristiano a inílima iʼwírinalia bilé partido político o bilé candidato ma. A bichíwali ju japi echi ke simea votárisia, nalí japi echi nata alí japi inili a nakiméeré japi bilé echi niyúrima. Nalí jiti ne bichíwali ke iʼwíripo echi política, ati we aʼlá tibuka nokisáré japi riká ti nata alí japi ta inili (Juan 15:18, 19; 18:36, TNM).

18. ¿Chu ti nili inea nakóachi “echi silíami norte nuláami” “echi silíami sur nuláami” yúa? (Ayénachó iné echi imágenes).

¹⁸ A keʼré japi echi pagótami japi ke bichiwi echi profecías japi aní echi Biblia, majaa nílima inea nakóachi “echi silíami sur nuláami” “echi silíami norte nuláami” yúa (Dan. 11:40, nota). Echi okuá isélikami olá wiká namuti japi jitra nakóliwa. Jiti la, a omeri suwabia suwaba japi ikí nirú jenaʼí Wichimóbachi. Nalí Jeobá ko ke riwema japi echi riká nokimea (Is. 45:18). Jiti la japalí ti echi ipú, tamujé ke ti majaa nili, nalí ti aminabi we bichiwi jiti ta machí japi ma mulipi nawama echi Onorúami Rawéwala.

19. ¿Piri ta newalásaré echi profecías jitra?

¹⁹ Ke ti machí chúriká ikimea jaré profecías japi Bíbliachi uchuwi. Ayénachó echi profeta Daniel ke inámili piri aniwáami nili echi japi binoy osali (Dan. 12:8, 9). Nalí, tákoré ke ti aʼlá inami suwaba japi riká ikimea bilé profecía, echi ko ke aniwáami ju japi ke siné ikimea. Japi riká ma isili chabéi, ata machí japi Jeobá jipi ayénachó tamó ruyésima echi namuti japi ikimea japalí ti machisáré (Amós 3:7).

20. ¿Chu iyiri profecías ma mulipi ikimea alí piri ti nokisáré?

²⁰ Echi “pagótami jenaʼí wichimóbachi piréami jeanigá pirélama mapu aboni ma we galá kilí ologá piré” (1 Tes. 5:3). Echalí nima japalí echi isélikami jenaʼí Wichimóbachi nirúami, kárika suwábima echi religiones japi ke bichíwali ju (Apoc. 17:16, 17). Miná ko sayérima echi Onorúami puéblowala (Ezeq. 38:18, 19). Alí ma upá ko chotásima echi Armagedón (Apoc. 16:14, 16). Ati we aʼlá bichiwi japi suwaba jepuná ma mulipi ikimea. Kecho bijí séachi echalí rawé, ati néwariwélitipo japi ti matétara iyá Jeobá binea echi profecías jitra alí iʼwiria jarecho jiti echi riká cho nokimea.