BINELÍWAMI 34
CANCIÓN sjj 107 Jeobá ko bineri chúriká galéami nipo
¿Chúriká néwariwéliti echi ancianos japi we galé echi japi cha nokali?
“Onorúami [...] mi iʼwírinali ku roʼía echi yúa, jiti we aʼláala ju” (ROM. 2:4, TNM).
JAPI TA JITRA BINEPO
Piri noká echi ancianos echoná congregación muchúwami iʼwírimia echi japi isili bilé namuti we chati.
1. Japalí bilé pagótami isisa namuti we chati, ¿piri isínali Onorúami?
ECHONÁ binelíwami 33, ata bineli japi Pablo aneli echi congregación Corinto chúriká nokimea echi rijoi yúa japi isili namuti we chati. Japi riká echi rijoi ko ke riweli cha isiá, echi ko machibúrami nili echoná congregación jonsa. Nalí, japi riká aní Romanos 2:4, Onorúami ko iʼwírinali echi cha isíami jiti ku roʼima echi yúa. Alí, ¿chúriká nee Jeobá echi ancianos iʼwírimia echi cha isíami jiti ku roʼima echi yúa?
2, 3. ¿Piri ta nokisáré ati machisáaká japi bilé hermano isili bilé namuti we chati, alí chúsiá?
2 Natabo japi ta machí japi bilé hermano isili bilé namuti we chati japi jitra a keʼré machibúrami nima echoná congregación jonsa. Echi riká ikisáaká, ¿piri ta nokisáré? Jiti echi ancianos omérima iʼwiria, echi ko bachá machisáré piri namuti ju japi ikili. Jiti la, ati anésaré echi hermano japi raʼichama echi ancianos yúa alí iʼwírili tánima (Is. 1:18; Hech. 20:28; 1 Ped. 5:2).
3 Nalí, ¿piri ta nokiboa echi hermano ke ruyénalaká echi ancianos japi ikili? Jiti ta nakí japi echi iʼwíritami nima, tamujé simásaré raʼichamia echi ancianos yúa. Echi riká ti néwariwélitipo japi ta galé echi hermano alí japi ta ke nakí japi riwema Jeobá. Ke nijéwisaká, echi ko ma ke Jeobá amígowala nímiré alí isímiré japi cha riká raʼichárami nima echi congregación jitra. Jiti la, tákoré we jilí ju, tamujé ko ke majásaré alí raʼichásaré echi ancianos yúa jiti ta we galé Jeobá alí echi hermano (Sal. 27:14).
CHÚRIKÁ IʼWIRI ECHI ANCIANOS ECHI JAPI ISILI BILÉ NAMUTI WE CHATI
4. ¿Piri nokinali echi ancianos japalí napawí raʼichamia echi cha isíami yúa?
4 Japalí bilé hermano isisa namuti we chati, echi ancianos ko ané bikiá ancianos we aʼlá nátami echoná congregación muchúwami japi niwama bilé comité a jiti napawima raʼichamia echi cha isíami yúa. Jepuná ancianos ko ke niráami nísaré, alí tákoré iʼwírinali echi cha isíami, echi ko newalásaré japi ke omeri iʼwérili anea japi riwema cha isiá (Deut. 30:19). Echi ko aʼlá machí japi ke sinéami echi cha nokáami a ku nijéwinalima echi busuréliami japi Jeobá iyá, japi riká isili echi silíami David (Gén. 4:6-8; 2 Sam. 12:13). Nalí tákoré echi riká ju, echi ancianos ko iʼwérili nokinali iʼwiria echi cha isíami jiti ku roʼima Jeobá yúa. ¿Piri newalásaré echi ancianos japalí napawí echi cha isíami yúa?
5. ¿Piri newalásaré echi ancianos japalí napawí raʼichamia echi cha isíami yúa? (2 Timoteo 2:24-26; ayénachó iné echi dibujo).
5 Echi ancianos ko iné echi cha isíami japi riká bilé boʼwá we natéami Jeobá níwala japi wikali (Luc. 15:4, 6). Jiti la, japalí napawí echi cha isíami yúa, ke iyoka raʼichi alí ke risoa ané. Echi ancianos ke wiká namuti bi nari jiti machinali japi ikili. Echi ko nalí noká japi riká aní 2 Timoteo 2:24-26 (TNM, leeri). Echi ko sinibí we galéami ju, simá nokáami alí kilí raʼíchami, jiti iʼwérili nokinali jiti echi cha isíami ne sulachí jonsa omona nílima echi chati namuti jitra japi isili.
Japi riká echi boʼwá niséami chabé piréami, echi ancianos ayénachó iʼwérili noká iʼwiria echi cha nokáami, japi ju japi riká boʼwá Jeobá níwala japi wikali. (Iné echi párrafo 5).
6. ¿Piri noká echi ancianos kecho napawía raʼichamia echi cha isíami yúa? (Romanos 2:4).
6 Echi ancianos ko biné jiti japi nokimea nima japi riká Jeobá nakí. Echi ko sinibí nata japi anili Pablo japi “Onorúami [...] iʼwírinali ku roʼía echi yúa, jiti we aʼláala ju” (leeri Romanos 2:4, TNM). Jiti la echi ko iʼwérili noká aʼláala niya japi riká isimí Jeobá echi cha isíami yúa. Alí ke wikawásaré japi echi ko ju japi riká niséami alí nokisáré japi riká isimí Cristo alí japi echi nulá (Is. 11:3, 4; Mat. 18:18-20). Kecho bijí napawía raʼichamia echi cha isíami yúa, echi ancianos ko napawika raʼicha Jeobá yúa tánimia japi echi iʼwírima jiti omérima iʼwiria echi pagótami jiti inílima ku roʼínalia echi yúa. Ayénachó aa echoná Biblia alí echoná publicaciones echi namuti jitra japi isili, alí tani Jeobá japi echi iʼwírima inamia japi chu inili echi pagótami. Echi ko nata echi namuti japi isíliré japi echi pagótami ke aʼlá natama alí miná ko isima echi chati namuti (Prov. 20:5).
7, 8. ¿Chúriká omeri echi ancianos kilí buwéami niya japi riká Jeobá japalí napawí raʼichamia echi cha isíami yúa?
7 Echi ancianos kilí buwéami ju japi riká Jeobá. Echi ko newalá chúriká isili Jeobá echi cha nokáami yúa chabé piréami. Japi riká, Jeobá ko kilí niraa raʼíchili Caín yúa alí aneli japi a ku iʼwírima, nalí ayénachó aneli japi chu ikimea ke nijéwisaká (Gén. 4:6, 7). Alí iʼwírimia David, Jeobá ko júali echi profeta Natán, alí echi ko néeli bilé ejemplo jiti David natama japi cha isili (2 Sam. 12:1-7). Ayénachó Jeobá ko wisabé niraa júali echi profetas iʼwírimia echi puéblowala japi we rasíami nili (Jer. 7:24, 25). Echi ko ke buweli japi echi cha nokáami omona nílima echi jitra japi nokali alí miná ko iʼwírimia, nalí bachá iʼwírili alí aneli japi riwema cha nokayá japalí a bijí echi riká nokayé.
8 ¿Chúriká omeri nokayá echi ancianos japi riká isimí Jeobá japalí iʼwiri echi cha isíami? “Sinibí ne galá kilí niráa” niya, japi riká aní 2 Timoteo 4:2. Echi ko sinibí anachásaré alí kilí niraa raʼichásaré jiti iʼwírima echi cha isíami jiti aʼlá ku isima. Echi ancianos iyoka raʼichásaká, echi pagótami ko riwémiré kipúa alí ke ku roʼínalimiré Jeobá yúa.
9, 10. ¿Piri omeri nokayá echi ancianos iʼwírimia echi japi cha isili?
9 Echi ancianos iʼwérili noká machiyá piri namuti isili japi echi hermano isima namuti chati. Japi riká, ¿piri namuti isili japi ma ke me aʼlá Jeobá amígowala nílisima? ¿Achi kilipi niraa riweli binea echi Biblia alí nawesia? ¿Achi ma ke me raʼicha Jeobá yúa alí ne sulachí jonsa niraa? ¿Achi ke riweli chati namuti natia? ¿Achi napawili echi pagótami yúa japi ke aʼlá nokáami ju? ¿O achi kipuli alí ineli echi namuti japi ke aʼlá ju? ¿Achi inami japi chu inílitili Jeobá echi chati namuti japi isili?
10 Echi ancianos aʼlá natama piri namuti nárima echi hermano japi echi iʼwírima natia piri namuti isili japi echi ko kilipi niraa ma ke me aʼlá Jeobá amígowala nílisima alí isima echi chati namuti. Nalí echi ancianos we simárika raʼichásaré echi yúa alí ke nárisaré echi namuti japi ke newalé machiyá (Prov. 20:5). Japi riká isili Natán David yúa, echi ko omeri néea ejemplos iʼwírimia echi hermano jiti machimea chúsiá japi echi isili we chati nili. A keʼré japi echi ko omona nílima echi chati namuti jitra japi isili alí ku roʼínalima Jeobá yúa, japalí ne kulí napawí raʼichamia echi yúa.
11. ¿Chúriká isili Jesús echi cha nokáami yúa?
11 Echi ancianos iʼwérili noká nokayá japi riká Jesús. Jesús ko nárili Saulo, Tarso bitéami: “Mujé Saulo, ¿churékulami wabé tamí kichiga aʼnajata?”. Echi riká nárili jiti Saulo aʼlá inámima japi we chati nili japi echi isié (Hech. 9:3-6). Alí echoná Apocalipsis 2:20, 21, Jesús ko raʼíchili bilé mukí Jezabel riwéami jitra alí anili: “Nijeni wiʼlibé rawé buweli mapurigá [...] ku roʼwima tamí yuwa”.
12, 13. ¿Piri omeri nokayá echi ancianos jiti buwema japi echi cha isíami ku roʼima Jeobá yúa? (Ayénachó iné echi fotos).
12 Japi riká isili Jesús, echi ancianos ayénachó ke sapú nata japi echi cha isíami ke riwénalima cha isiá. A nirú jaré japi riwénali cha nokayá japalí echi ancianos ne kulí napawí raʼichamia echi yúa, nalí jarecho ko wilí noká. Jiti la echi ancianos omeri napawía echi yúa wisabé niraa. A keʼré japi ne kulí napawisa echi yúa, echi cha isíami nátika ripima japi echi ancianos aneli alí miná ko wikáwili tánima Jeobá ne sulachí jonsa echi yúa raʼíchika (Sal. 32:5; 38:18). A keʼré japalí che siné napawisa echi cha isíami yúa, echi ko sinúrika nima alí sinúrika natama.
13 Jiti echi ancianos iʼwírima echi cha isíami jiti ku roʼima Jeobá yúa, echi ko we natéami niraa inésaré japi echi inili alí we simárika nokisáré echi yúa. Ayénachó tánisaré Jeobá jiti iʼwírima suwaba echi namuti japi noká jiti echi cha isíami aʼlá ku natama alí ku roʼima Jeobá yúa (2 Tim. 2:25, 26, TNM).
Echi ancianos ko omeri wisabé niraa napawía raʼichamia echi cha isíami yúa jiti buwema japi echi riwénalima cha isiá alí ku roʼía Jeobá yúa. (Iné echi párrafo 12).
14. Japalí bilé cha isíami ku roʼisa Jeobá yúa, ¿jépuká isili iʼwiria, alí chúsiá?
14 Japalí bilé cha isíami ku roʼisa, sinéami ti we kanili (Luc. 15:7, 10). Nalí, ¿jépuká isili iʼwiria echi cha isíami jiti ku roʼima? ¿Achi nokali echi ancianos? Newalabo japi Pablo ruyeli japi Onorúami ju japi iʼwiri echi cha isíami ku roʼimia echi yúa (2 Tim. 2:25, TNM). Jiti la Jeobá ju japi iʼwiri echi cha isíami sinúrika ku natia alí ku roʼía echi yúa. Miná ko Pablo ruyé piri namuti aʼlá ikí japalí echi cha isíami ku roʼí Jeobá yúa: jepuná echi iʼwiri aʼlá ku natia, aminabi we aʼlá inamia echi bichíwali alí jiti ma ke checho ku isima echi namuti japi Satanás galé (2 Tim. 2:26, TNM).
15. ¿Chúriká echi ancianos aminabi iʼwírima echi cha isíami japi ma riweli cha isiá?
15 Japalí echi cha isíami ma omona nílili echi chati namuti jitra japi isili alí riweli echi riká isiá, echi ancianos ke riwema simíaya iʼwérili iyasia jiti ma ke isima echi chati namuti, nalí aʼlá namuti ku isima alí aminabi bichíyami nima (Heb. 12:12, 13). Echi ancianos ko ke ruyema jarecho echi namuti japi isili echi hermano. Nalí be, ¿piri namuti aʼlá nímiré ruyea echi congregación?
RAʼAMI “BACHÁAMI SIʼNÉAMI ECHI AUCHÉ JARÉ NAPAWIKA BICHÍYAMI YUWA”
16. ¿Jépuká jitra raʼíchili Pablo echoná 1 Timoteo 5:20 japalí anili echi “bichíyami”?
16 (Leeri 1 Timoteo 5:20). Pablo aneli Timoteo, japi ayénachó anciano nili, japi raʼámima echi cha nokáami “bacháami siʼnéami echi auché jaré napawika bichíyami yuwa”. ¿Jépuká nili echi “bichíyami”? Ke nili suwaba echi congregación, nalí echi kuabi hermanos japi a machíliré japi isili echi hermano, a keʼré jiti echi aboi riwali o jiti echi binoy ruyeli. Jiti la echi ancianos ko ruyema bi jepuná kuabi hermanos japi echi namuti ma akaréwili alí japi echi cha isíami ma raʼámitami nili.
17. Echi congregación machisáaká echi chati namuti japi isili echi hermano, ¿piri anérami nima, alí chúsiá?
17 Isini kaachi echi congregación machí echi chati namuti japi isili echi hermano o a keʼré japi pe aminana machimea. Echi riká nísaká, ¿jépuká ju echi “bichíyami” japi echi ancianos ruyésaré japi riká anili Pablo? Echi ko ju sinéami japi napawí echoná congregación. Jiti la, bilé anciano anema echi congregación japi echi hermano o hermana raʼámitami nili. ¿Chúsiá echi riká animea? Pablo ko anili: “Mapurigá echi auché jaré bichíyami ayénachó we majama chati sitíi olayá”.
18. ¿Piri noká echi ancianos japalí bilé japi kecho 18 bamíbami ju isisa namuti we chati? (Ayénachó iné echi foto).
18 ¿Chu oláliwa japalí bilé japi ma pakótami ju alí kecho 18 bamíbami ju isisa namuti we chati? Echi ancianos anema okuá ancianos japi napawima echi yúa alí echi wénwala japi Testigos ju. b Echi okuá ancianos nárima echi wénwala piri namuti ma nokali iʼwírimia echi ranala jiti omona nílima echi chati namuti jitra japi isili alí aʼlá ku isima. Alí echi tiwé o towí a kipúsaká alí riwésaká japi echi wénwala iʼwírima, echi okuá ancianos omeri aniyá japi ke newalé japi bilé comité napawima echi yúa. Newalabo japi Jeobá ko nuleli echi wénwala japi galeka raʼámima echi kúchuwala (Deut. 6:6, 7; Prov. 6:20; 22:6; Efes. 6:2-4). Miná ko, echi ancianos isini kaachi raʼichama echi wénwala yúa jiti machimea achi bijí iʼwiri echi towí o tiwé. Nalí, ¿piri nokimea echi ancianos echi towí o tiwé ke omona nílisaká alí ke riwénalaká cha isiá? Echi riká nísaká, bilé comité de ancianos napawima echi yúa alí echi wénwala japi Testigos ju.
Bilé japi kecho 18 bamíbami ju isísaká namuti we chati, okuá ancianos napawima raʼichamia echi yúa alí echi wénwala japi Testigos ju. (Iné echi párrafo 18).
JEOBÁ KO “NE WABÉ NATIMÁAMI JU, NE WABÉ GALÉAMI AYÉNACHÓ”
19. Japalí echi ancianos iʼwiri bilé cha isíami, ¿chúriká noká japi riká isimí Jeobá?
19 Echi ancianos japi nocha echoná comités, iʼwérili nokinali jiti ke nirúlima chati namuti echoná congregación, jiti echi ko ju bilé nóchali japi Jeobá iyali (1 Cor. 5:7). Nalí ayénachó iʼwérili nokinali iʼwírimia echi hermano japi cha isili jiti riwema cha isiá, jiti la sinibí nata japi echi ko a omérima ku roʼía Jeobá yúa. Echi ko noká japi riká Jeobá japi “ne wabé natimáami ju, ne wabé galéami ayénachó” (Sant. 5:11). Natabo echi semati raʼíchali japi echi apóstol Juan osali ma we ochérami ka: “Kini kúchuwala, ani emi osé jepuná jiti timí ke nokimea bilé namuti chati. Nalí a bilé isísaká bilé namuti chati, a nirú bilé japi tamó iʼwiri japi mulipi atí echi Onolá yúa: echi ko ju Jesucristo, japi wachíniga isíami ju” (1 Juan 2:1, TNM).
20. ¿Piri jitra binepo echoná upáwala binelíwami?
20 Isini kaachi echi japi isili namuti we chati, ke riwénali cha isiá. Echi riká nísaká, echi ko machibúrami nísaré echoná congregación jonsa. Nalí, ¿chúriká noká echi ancianos echi riká ikisáaká? Echi jitra binepo echoná upáwala binelíwami.
CANCIÓN sjj 103 Jeobá nijí echi ancianos
a Chabé, echi ancianos japi echi riká nokayé riwéami nili comités judiciales. Nalí jipi ko ma ke echi riká riwéami nima jiti echi ko ke bi oyériami ju, nalí ayénachó noká jarecho nóchali. Jipi ko riwéami nima comités de ancianos.
b Japi aniwá echi wénwala jitra ayénachó echi riká nokisáré echi japi ke wénwala ju nalí japi tibúami ju echi towí alí tiwé jitra.
