BINELÍWAMI 33
CANCIÓN sjj 130 We aʼlá wikawabo japi riká Jeobá
¿Chúriká nakí Jeobá japi nokimea echi congregación echi yúa japi isili namuti we chati?
“A bilé isísaká namuti chati, a nirú bilé japi tamó iʼwiri” (1 JUAN 2:1, TNM).
JAPI TA JITRA BINEPO
Piri ta biné echi jitra japi ikili echoná congregación Corinto japalí bilé isisa namuti we chati.
1. ¿Piri nakí Jeobá?
JEOBÁ ko niwali echi pagótami jiti aboi natama japi nokimea. Alí sinibí rawé ati echi riká noká. Nalí echi namuti wabé natéami japi omeri nokayá echi pagótami, echi ko ju katúwika raʼichia Jeobá yúa alí pakoa, alí echi riká Jeobá téemala niya. Jeobá ko nakí japi sinéami pagótami echi riká nokimea. ¿Chúsiá? Jiti echi ko we galé echi pagótami, ayénachó jiti nakí japi we kaníliami nima, japi echi amígowala nima alí sinibí pirélima (Deut. 30:19, 20; Gál. 6:7, 8).
2. ¿Piri nakí Jeobá japi nokimea echi japi noká namuti we chati? (1 Juan 2:1).
2 Jeobá ko ke bilé iʼwérili ané japi echi nóchilima, nalí nakí japi ibili natama japi isima. Nalí be, bilé cristiano japi ma pakótami ju isísaká bilé namuti we chati, ¿chu olárami nísaré? Ke riwésaká echi riká isiá, echi ko machibúrami nísaré echoná congregación jonsa (1 Cor. 5:13, TNM). Nalí, tákoré ma machibúrami nisa, Jeobá ko ne sulachí jonsa nakí japi echi ko checho ku roʼima echi yúa. Jiti la nijili binoy Nolá Jesús jiti ku wikáwirami nima echi japi riwé cha nokayá (leeri 1 Juan 2:1, TNM). Jeobá ko we galéami ju, jiti la iʼwiri echi japi chati namuti nokali alí ané japi riwema cha nokayá (Zac. 1:3; Rom. 2:4, TNM; Sant. 4:8).
3. ¿Piri ta binepo jena binelíwami?
3 Jeobá ko tamó ané piri nata echi chati namuti jitra alí ayénachó echi pagótami jitra japi cha noká. Alí echi ko nakí japi tamujé echi riká cho natabo. Jepuná binelíwami tamó iʼwírima echi riká nokayá. Bachá inepo chúriká nokali echoná congregación Corinto, japalí niruili bilé rijoi japi we cha isiá biteili. Miná ko inepo chu iyiri busuréliami nijili Pablo japi chúriká nokimea echi rijoi yúa japalí ma riweli cha isiá. Alí upá ko binepo chúriká iné Jeobá echi japi noká namuti we chati.
CHÚRIKÁ NOKALI ECHALÍ BACHÁ SIGLO JAPALÍ BILÉ CHA ISIÁ BITEILI
4. ¿Piri namuti ikiyé echoná congregación Corinto? (1 Corintios 5:1, 2).
4 (Leeri 1 Corintios 5:1, 2, TNM). Japalí Pablo ma bisiá niraa simili nawisasia, echi ko machili bilé namuti we chati japi ikiyé echoná congregación Corinto: bilé rijoi nasawía biteili echi onolá mukíwala yúa. Pablo ruyeli japi wabé rasírukami chati nili alí japi echi pagótami japi ke bichíyami nili ke echi riká nokayé. Echi congregación Corinto nátili japi ke chati nili japi isié echi rijoi alí japi aʼlá nili japi a bijí asimea echoná congregación. A keʼré jaré ko nátili japi jepuná namuti néwariwélitie japi Onorúami we natimáami alí wikáwiami ju echi pagótami yúa jiti ke sébali aʼlá nokáami ju. Nalí Jeobá ko we kichí japi nirúlima namuti chati echoná binoy puéblowala. Japi isiá biteili echi rijoi, a keʼré isié japi cha riká raʼichárami nima echi congregación jitra. Ayénachó a keʼré jepuná isima riweili japi jarecho cristianos chati namuti nokimea. Jiti la, ¿chu iyiri busuréliami iyali Pablo echi congregación Corinto?
5. ¿Piri osélili Pablo echi congregación, alí piri ruyá anili? (1 Corintios 5:13; ayénachó iné echi dibujo).
5 (Leeri 1 Corintios 5:13, TNM). Jeobá ko néeli echi apóstol Pablo jiti osimea japi machibúsaré echoná congregación jonsa echi rijoi japi ke riweli cha isiá. ¿Chúriká nokisaa riweili echi cristianos japi nijéwami nili echi rijoi yúa? Pablo ko aneli japi riwésaré napawía echi yúa alí ke cho okésaré echi yúa (1 Cor. 5:11). Japalí ti koʼá bilé pagótami yúa, echi namuti isimí japi ta aminabi raʼichabo alí wilí simáripo echi yúa. Jiti la, Pablo ruyá anili japi echi hermanos echoná congregación, ke napawisa riweili echi cha isíami yúa. Echi riká tibuma echi congregación echi cha isíami jitra (1 Cor. 5:5-7). Ayénachó a keʼré japi jepuná isima japi echi rijoi natama japi omonáritili Jeobá, japi riwela inílima echi chati namuti jitra japi isili, riwénalima cha isiá alí ku roʼínalima Jeobá yúa.
Jeobá ko néeli Pablo jiti osélima echi corintios japi machibuma echoná congregación jonsa echi rijoi japi ke riweli cha isiá. (Iné echi párrafo 5).
6. ¿Piri nokali echi congregación alí echi cha isíami japalí kipuli japi anili echi carta japi Pablo osélili?
6 Japalí Pablo júali echi carta echi congregación Corinto, nátika ripíliré chu inílima echi hermanos leérisa japi aní echi carta. Nalí pe aminana, Tito aneli Pablo japi echi hermanos we aʼlá kipuli alí nokali japi riká anili echi carta (2 Cor. 7:6, 7). Ayénachó ke wilí simírili japalí Pablo júali echi carta, alí echi rijoi ma omona nílili echi jitra japi isili, riweli cha isiá alí ku chotásili nijewia japi Jeobá nulá (2 Cor. 7:8-11). Jiti la jipi ko, ¿piri anéliré Pablo echi congregación?
CHU NOKISAA RIWEILI ECHI CONGREGACIÓN ECHI YÚA JAPI RIWELI CHA ISIÁ
7. ¿Chúriká iʼwírili echi rijoi jiti machibúrami nili echoná congregación jonsa? (2 Corintios 2:5-8).
7 (Leeri 2 Corintios 2:5-8, TNM). Pablo ko anili: “Japi riká timí nokali echi rijoi yúa ma aʼlá ju echi yena castigo iyasa”. Echi ko ruyá anili japi echi castigo iʼwírili echi rijoi jiti riwema cha isiá alí ku roʼínalima Jeobá yúa (Heb. 12:11).
8. Miná ko, ¿piri aneli Pablo echi congregación?
8 Miná ko, Pablo aneli echi congregación chúriká nokisaa riweili echi hermano yúa japi cha isili: “Ku wikáwisi alí ku kanílitisi”. Ayénachó aneli: “Emi ni ané japi timí néwariwélitima japi timí galé echi”. Japi riká ti iné, Pablo ko ke bi nakili japi ku narema echi rijoi echoná congregación, nalí japi anema japi we galé alí japi néwariwélitima japi ne bichíwali ma ku wikáwili. Echi riká, echi rijoi ko inílima japi echi hermanos echoná congregación muchúwami, we kanilie jiti echi ma ku roʼili echoná congregación.
9. ¿Chúsiá jaré jilí niráliré ku wikawia echi rijoi japi riweli cha isiá?
9 ¿Achi we jilí niráliré jaré hermanos ku kanila narea echi japi cha isili? Echi Biblia ko ke aní. We nalí echi riká níliré, jiti echi chati namuti japi isili risoa nílitili suwaba echi congregación, alí a keʼré japi jaré wabé risoa nílitili. A keʼré japi jaré ko nátili japi ke aʼlá nili japi kanílika ku narema echi rijoi japi isili namuti we chati, japalí echi ko iʼwérili nokali nijewia japi Jeobá nulá (ayénachó iné japi aní Lucas 15:28-30). Nalí, ¿chúsiá we natéami nili japi néwariwélitima japi we galéi echi hermano japi ku roʼili echoná congregación?
10, 11. Echi ancianos ke riwélaká ku roʼíami echoná congregación echi rijoi cha isíami, ¿piri ikimeli?
10 ¿Piri ikimeli echi rijoi japi riweli cha isiá echi ancianos ke riwélaká ku roʼíami echoná congregación alí echi hermanos ke simárika nokálaká echi yúa? Echi rijoi japi riweli cha isiá, a keʼré japi wabé omona nílimili. Ayénachó natámiliré japi ma ke siné omérima ku roʼía Jeobá yúa o ma ke iʼwérili isímiliré checho ku Jeobá amígowala niya.
11 Nalí ke echi namuti bi ikimeli. Echi hermanos echoná congregación muchúwami, ke ku wikáwilaká echi rijoi japi riweli cha isiá, ma ke Jeobá amígowala nímili. ¿Chúsiá? Jiti echi ko nokimeli japi riká isimí Satanás japi we chati ju, alí ke ko japi riká Jeobá japi we wikáwiami ju echi yúa japi riwé cha nokayá. Alí Satanás ayénachó néemili echi hermanos isimia japi echi rijoi ma ke siné ku mulíwima Jeobá (2 Cor. 2:10, 11; Efes. 4:27).
12. ¿Chúriká nokisaa riweili echi congregación japi riká isimí Jeobá?
12 ¿Chúriká nokisaa riweili echi congregación Corinto japi riká isimí Jeobá alí ke ko japi riká isimí Satanás? Kárika ku wikawia echi cha nokáami japi riká isimí Jeobá. Inepo piri osali jaré rijoi echoná Biblia Jeobá jitra. David ko anili: “Oh, Jeobá, mujé ko we aʼláala ju alí ku wikáwiami” (Sal. 86:5). Miqueas ko osali: “Ke nirú bilecho Onorúami japi riká mujé, japi ku wikawi alí ma ke newalá echi chati namuti japi noká mujé puéblowala” (Miq. 7:18). Isaías ayénachó anili: “Echi we cha isíami ma ke che isítalé japi chati ju alí japi cha riká nati ma ke che echi riká natáralé; alí ku roʼítalé Jeobá yúa, jiti echi ko ku natimama echi alí ku wikáwima” (Is. 55:7).
13. ¿Chúsiá we aʼlá nili japi echi ancianos checho ku narema echi rijoi echoná congregación? (Ayénachó iné echi recuadro “ ¿Chu kilí nokali echi ancianos ku narea echi rijoi echoná congregación echomí Corinto?”).
13 Jiti echi congregación Corinto nokimea japi riká Jeobá, echi ko kanila naresa riweili echi rijoi japi riweli cha isiá alí néwariwélitia japi we galé echi. Pablo ko anili japi a ku wikáwisaká echi rijoi, néwariwélitima japi we nijéwami nili (2 Cor. 2:9, TNM). A bichíwali ju japi kuabi michá simírili japalí jonsa machibúrami nili echi rijoi echoná congregación jonsa, nalí echi namuti isili japi echi ko riwema cha isiá. Jiti la echi ancianos ke wilí nokisaa riweili jiti ku narema echi rijoi echoná congregación.
CHÚRIKÁ TI NOKIBOA JAPI RIKÁ JEOBÁ JAPI WACHÍNIGA ISÍAMI JU ALÍ WIKÁWIAMI
14, 15. ¿Piri ta biné echi jitra japi ikili echoná congregación Corinto? (2 Pedro 3:9; ayénachó iné echi foto).
14 Jeobá ko isili japi echi namuti japi ikili echoná congregación Corinto, oserúa ripima echoná Biblia jiti binéritami nipo (Rom. 15:4). Jepuná ko tamó bineri japi Jeobá ko ke riwé japi nirúlima chati namuti echoná binoy puéblowala. Japi riká Jeobá we wikáwiami ju, jaré ko nata japi echi ko riwé japi echi pagótami japi ke riwé cha nokayá, a bijí mochima echoná congregación. Nalí jepuná ko ke bichíwali ju. Tákoré Jeobá we wikáwiami ju, echi ko we kichí japi chati ju alí ke siné sinúrika ku nata echi namuti jitra japi ma anili japi chati ju (Jud. 4). Jeobá ko ke galéami nímili a riwélaká japi echi cha isíami a bijí asimea echoná congregación, jiti echi ko risoa nílitima echi congregación (Prov. 13:20; 1 Cor. 15:33).
15 Echi namuti japi ikili echoná Corinto, ayénachó tamó bineri japi Jeobá ko ke nakí japi ke wesi suwábitami nima. Nalí aʼlá nísaká, echi ko nalí nakí japi niyúbitami nima. Jiti la echi ko iʼwiri echi japi iʼwérili noká checho ku echi amígowala niya alí wikawi echi japi riwé cha nokayá (Ezeq. 33:11; leeri 2 Pedro 3:9, TNM). Jiti la, japalí echi rijoi Corinto bitéami omona nílili echi jitra japi isili alí riweli cha isiá, Jeobá ko néeli echi Pablo anemia echi hermanos japi ku wikáwima echi rijoi alí checho ku narema echoná congregación.
Japalí echi congregación we kanílika ku naré echi japi riwé cha isiá, echi ko noká japi riká Jeobá japi we galéami ju alí wikáwiami. (Iné echi párrafos 14 alí 15).
16. ¿Chumi inili machiyá japi ikili echoná congregación Corinto?
16 Binea japi ikili echoná congregación Corinto, tamó iʼwírili machiyá japi Jeobá we galéami ju, wachíniga isíami alí we aʼláala (Sal. 33:5). ¿Kechi ko jepuná tamó iʼwiri aminabi we inilia walubéala anénalia Jeobá? Sinéami tamujé ke sébali aʼlá nokáami ju alí ti newalé japi Jeobá tamó wikáwima. Jiti la, ati waʼlú matétara iyá Jeobá jiti nijili binoy Nolá tamó wikáwimia echi chati namuti jitra japi ta noká. Ati we kanili machiyá japi Jeobá we galé echi japi nijéwami ju alí nakí japi we aʼlá pirélima.
17. ¿Piri ta binepo echi jaréala binelíwami?
17 Alí jipi rawé bilé isísaká namuti we chati, ¿chúriká omeri nokayá echi ancianos galéami niya japi riká Jeobá alí iʼwiria echi, jiti riwema cha isiá? Alí echi ancianos machibúsaká echi cha isíami o ku narésaká echoná congregación, ¿piri ta nokisáré? Ata binepo jepuná náriwami jitra echoná jaréala binelíwami.
CANCIÓN sjj 109 Galéami nipo ne sulachí niraa
