BINELÍWAMI 32
CANCIÓN sjj-S 44 Una súplica ferviente
Jeobá ko nakí japi sinéami ku roʼima echi yúa
“Jeobá ko [...] ke nakí japi ke wesi suwábitami nima, nalí nakí japi sinéami ku roʼima echi yúa” (2 PED. 3:9, TNM).
JAPI TA JITRA BINEPO
Piri aniwáami ju ku roʼía Jeobá yúa, chúsiá we natéami ju japi ta echi riká nokiboa alí chúriká iʼwiri Jeobá echi pagótami ku roʼía echi yúa.
1. ¿Chu isimí echi pagótami japi ku roʼí Jeobá yúa?
JAPALÍ ti noká bilé namuti we chati, we natéami ju japi ta ku roʼipo Jeobá yúa. Echoná Biblia aní japi echi pagótami japi ku roʼí Jeobá yúa, echi ko we omona nili ne sulachí jonsa echi jitra japi isili, we kichí echi chati namuti japi isili, riwé echi riká isiá alí iʼwérili isimí jiti ma ke checho ku echi riká isima (Mat. 3:8; Hech. 3:19; 2 Ped. 3:9, TNM).
2. ¿Chúsiá sinéami ta machisáré piri ta nokisáré jiti ku roʼipo Jeobá yúa? (Nehemías 8:9-11).
2 Sinéami pagótami machisáré piri nokisáré jiti ku roʼima Jeobá yúa. ¿Chúsiá? Jiti sinibí rawé ata noká namuti japi ke aʼlá ju. Jiti ta Adán alí Eva kúchuwala ju, ke ti sébali aʼlá nokáami ju alí ti suwí (Rom. 3:23, TNM; 5:12, TNM). Jiti la sinéami ta newalé ku roʼía Jeobá yúa. Jaré pagótami japi we bichíyami nili, japi riká echi apóstol Pablo, ayénachó we jilí nirali nokayá japi aʼlá ju (Rom. 7:21-24). Nalí echi ko ke aniwáami ju japi ta suwaba rawé omona nílipo jiti ta ke sébali aʼlá nokáami ju. Jeobá ko tamó wikawi alí nakí japi ta we kanílipo. Natabo echi judíos jitra japi pireili japalí Nehemías biteili (leeri Nehemías 8:9-11). Jeobá ko ke nakiyé japi wabé omona nílima echi chati namuti jitra japi nokali, nalí japi we kanílika echi nóchilima. Echi ko we aʼlá machí japi ta we kaníliami nipo ati ku roʼísaká echi yúa alí ti riwésaká cha nokayá, jiti la tamó bineri jepuná jitra. Ati we aʼlá machí japi Jeobá we galéami ju alí tamó ku wikáwima ata riwésaká cha nokayá.
3. ¿Piri binepo jena binelíwami?
3 Jenaʼí binelíwami binepo jarecho namuti japi aniwáami ju ku roʼía Jeobá yúa. Bachá, binepo piri binérili Jeobá echi israelitas jepuná jitra. Miná ko, chúriká iʼwírili Jeobá echi pagótami jiti riwema cha nokayá. Alí upá ko, piri bineli echi Jesús najátowala jepuná jitra.
PIRI BINÉRILI JEOBÁ ECHI ISRAELITAS JAPI ECHI WIKAWI ECHI CHA NOKÁAMI
4. Ke nijéwisaká echi israelitas, ¿achi aniwáami nili japi Jeobá ma ke siné ku wikáwima?
4 Japalí Jeobá anili japi echi israelitas echi puéblowala nima, echi ko isili bilé katúwiliami echi yúa. Jeobá ko aneli japi sinibí tibuma alí iʼwírima a nijéwisaká japi echi nulá, alí jéaneli: “Suwaba jepuná nulalíwami japi ni mi nulé jipi, ke nóchili ju nijéwilia alí ke jilí ju japi mi riwimea” (Deut. 30:11, 16). Nalí echi ke nijéwisaká, japi riká olayá jarecho dioses, Jeobá ko ma ke iʼwírima alí risoa ikimea riweili. Echi riká ikisáaká, ¿achi aniwáami nili japi Jeobá ma ke siné ku wikáwima? Ke tasi, jiti echi nulalíwami anili japi a omérima ku roʼía Jeobá yúa alí ku nijewia (Deut. 30:1-3, 17-20). Echi ko aniwáami nili japi riwésaká cha nokayá, Jeobá ko a ku wikáwima alí checho ku iʼwírima.
5. ¿Chúriká néwariwélitili Jeobá japi ke riweli iʼwiria echi puéblowala japalí ke nijéwami nili? (2 Reyes 17:13, 14).
5 Echi israelitas wisabé niraa ke nijéwili Jeobá. Echi ko ke bi olali jarecho dioses, nalí ayénachó nokali namuti we chati. A bichíwali ju japi echi ko risoa nílili echi jitra japi nokali, nalí Jeobá ko sinibí iʼwírili jiti ku roʼima echi yúa alí ku nijéwima. Jiti la júali wiká profetas jiti anema japi omona nílima echi jitra japi nokayé alí riwema cha nokayá (leeri 2 Reyes 17:13, 14).
6. ¿Chúriká néeli Jeobá echi profetas binérimia binoy puéblowala japi we natéami nili japi ku roʼima echi yúa? (Ayénachó iné echi imagen).
6 Jeobá ko wisabé niraa júali echi profetas jiti anema echi pueblo japi aʼlá ku nokimea. Japi riká, néeka echi profeta Jeremías, echi ko anili: “Ku roʼí, Israel rasíami […]. Ke ni emi iyoka inema, jiti ni sinibí galéami ju [...]. Ke ni sinibí iyoa ripima. Mujé ko aní bi japi mi ke aʼlá isili, jiti mi ke nijéwili kimi Onorúamiwala Jeobá” (Jer. 3:12, 13). Alí néeka echi profeta Joel, anili: “Tamí yúa ku roʼisi ne sulachí jonsa” (Joel 2:12, 13). Ayénachó Jeobá isili japi Isaías animea: “Ku biʼwasi; riwesi cha nokayá, ma ni ke inénali echi chati namuti japi timí noká” (Is. 1:16-19). Alí néeka echi Ezequiel, nárili: “¿Wechi ni a kanili japalí bilé cha isíami mukusaa? [...]. Nijé ko nalí kanili japalí riwé cha isiá alí bijí bité”. “Ke ni kanili japalí bilé mukusaa […]. Jiti la ku roʼisi tamí yúa alí pirélisi” (Ezeq. 18:23, 32). Jeobá ko we kanili japalí echi pagótami riwé cha nokayá jiti nakí japi sinibí pirélima. Japi riká ti ma ineli, Jeobá bachá ju japi iʼwiri echi pagótami alí ke kilí buwea atí japi aboi natama ku roʼimia echi yúa. Ma inepo jaré ejemplos.
Jeobá ko néeli wiká profetas iʼwírimia echi puéblowala jiti riwema cha nokayá. (Iné echi párrafos 6 alí 7).
7. ¿Piri binérili Jeobá echi puéblowala néeka echi profeta Oseas alí echi upila?
7 Ma inepo piri binérili Jeobá echi puéblowala néeka echi profeta Oseas alí echi upila, Gómer. Echi mukí ko nasawili bilecho yúa alí miná ko riweli Oseas bilecho rijoi jitra. ¿Achi Jeobá nátili japi Gómer ke siné riwema cha isiá? Ke tasi, jiti Jeobá japi we aʼlá machí japi chúriká ju echi pagótami, aneli Oseas: “Checho simiyá, galé echi mukí japi galérami ju bilecho rijoi jitra alí japi nasawí bilecho rijoi yúa, japi riká Jeobá galé echi pueblo Israel tákoré nijewi jarecho dioses” (Os. 3:1; Prov. 16:2). Gómer ko a bijí cha isié, nalí Jeobá ko aneli Oseas japi echi bachá nima japi isima ku wikawia alí ku napawía echi yúa. a Jepuná ejemplo jitra japi a ne bichíwali ikili, Jeobá ko binérili echi puéblowala japi echi ko bichíwili japi a omérima riwea cha nokayá. Tákoré echi pueblo a bijí nokayé namuti we chati, Jeobá ko ke riweli galea alí ke riweli júulia echi profetas iʼwírimia jiti ku roʼima echi yúa alí riwema cha nokayá. Jiti la, ¿achi aniwáami ju jepuná japi Jeobá “japi we aʼlá machí tamujé sulala” iʼwírima bilé japi a bijí we cha isimí jiti ku roʼima echi yúa? (Prov. 17:3). Ma inepo echi jitra.
CHÚRIKÁ IʼWIRI JEOBÁ ECHI CHA NOKÁAMI JITI RIWEMA CHA NOKAYÁ
8. ¿Piri isili Jeobá iʼwírimia Caín jiti riwema cha isiá? (Génesis 4:3-7; ayénachó iné echi dibujo).
8 Caín ko nili echi ne bacháwala Adán alí Eva ranala. Alí echi ko ma ke sébali aʼlá isíami ochérili. Ayénachó echoná Biblia aní japi Caín “olalila wabé chati níili” (1 Juan 3:12). A keʼré japi echi jitra Jeobá ko “ke galeli japi isili Caín alí ke nareli echi chiliwéliami japi nijili. Jiti la Caín ko we iyoli alí we sinútili”. ¿Piri isili Jeobá? Echi ko raʼíchili echi yúa (leeri Génesis 4:3-7). Jeobá ko we simárika aneli japi echi iʼwírima a riwésaká cha isiá alí japi chu ikimea ke nijéwisaká. Nalí Caín ke nijéwili Jeobá alí ke riweli japi echi iʼwírima. ¿Piri isili Jeobá japalí Caín ke nijéwinali? ¿Achi nátili japi ma ke siné iʼwírima bilecho jiti riwema cha isiá? ¡Ke tasi!
Jeobá ko we simárika aneli Caín japi isísaré. Aneli japi echi iʼwírima alí japi chu ikimea ke riwésaká cha isiá. (Iné echi párrafo 8).
9. ¿Chúriká iʼwírili Jeobá echi David jiti riwema cha isiá?
9 Jeobá ko we galeli echi silíami David. Echi Biblia ruyé japi echi ko kanílitili echi Jeobá sulala (Hech. 13:22). Nalí David isili namuti we chati. Echi ko nasawili bilé mukí yúa japi kunéami nili alí nulali japi miʼárami nima echi kunala, alí echi Moisés Nulalila anili japi bilé echi riká isísaká, mukusaa riweili (Lev. 20:10; Núm. 35:31). We be nalí, jiti Jeobá ko we aʼláala ju, echi ko iʼwírili David jiti riwema cha isiá alí júali echi profeta Natán jiti raʼichama echi yúa, tákoré ke néwariwélitili japi omona nílili echi chati namuti jitra japi isili. b Natán ko néeli bilé ejemplo iʼwírimia David. Echi riká David ko machili japi isili namuti we chati alí we omona nílili (2 Sam. 12:1-14). Echi ko osali bilé salmo japi néwariwéliti japi we omona nílili (Sal. 51, raʼíchali japi ripá uchuwi). Alí jipi chéami echi salmo ku kaníliti echi pagótami japi nokali namuti we chati alí iʼwiri jiti riwema cha nokayá. ¿Kechi ko ti we kanili machiyá japi Jeobá we simárika iʼwírili David jiti riwema cha isiá?
10. ¿Chumi inili machiyá japi Jeobá kilí buwéami ju alí tamó ku wikawi?
10 Jeobá ko we kichí suwaba echi chati namuti japi noká echi pagótami (Sal. 5:4, 5). Nalí echi ko machí japi ta ke sébali aʼlá nokáami ju, alí jiti we tamó galé, echi ko tamó iʼwírinali jiti ke chati namuti nokiboa. Echi ko sinibí iʼwérili isimí iʼwiria echi japi wabé cha isíami ju jiti riwema cha isiá alí ku roʼima echi yúa. ¡We ti kanili machiyá jepuná! Japalí ti nata japi Jeobá we kilí buwéami ju alí japi tamó wikawi, ati we inili ke riwénalia echi nijewia alí sapú wikáwili tania japalí ti cha nokisaa. Jipi ko ma inepo piri bineli echi Jesús najátowala jepuná namuti jitra.
PIRI BINELI ECHI JESÚS NAJÁTOWALA JAPI CHÚRIKÁ JEOBÁ WIKAWI ECHI JAPI RIWÉ CHA NOKAYÁ
11, 12. ¿Chu iyiri historia ruyeli Jesús binérimia japi echi Onolá ko sinibí ku wikáwiami ju? (Iné echi dibujo).
11 Japalí nawama riweili echi Mesías jenaʼí Wichimóbachi, Jeobá ko isili japi Juan el Bautista nawésima echi pueblo alí anema japi ku roʼima echi yúa. Alí japalí Jesús chotásili nawesia, echi ko ayénachó binérili echi pagótami japi we natéami ju ku roʼía Jeobá yúa (Mat. 3:1, 2; 4:17).
12 Japalí Jesús nawesia iyénili, echi ko binérili japi echi Onolá we wikáwiami ju. Echi riká isili japalí ruyeli echi historia bilé onolá jitra alí echi nolá. Jepuná remalí simili echi bitélachi jonsa alí we chati namuti isili. Nalí miná ko aʼlá ku nátili alí ku roʼili echi onolá yúa. ¿Piri isili echi onolá? Jesús ko anili, japalí “echi tabéala ranarúami abijí mikabé ʼnaka inálachi, echalí echi binói onolá galá riwisáa, arigá ne wabé natimali [...] we ʼmaga natépali, ayena cho wabé kaníliga narépali”. Echi nolá ko ku simíami nili echi bitélachi anemia echi onolá japi echi pióniwala nima. Nalí echi onolá ko we inilie ku wikáwinalia alí ku narea japi riká téemala. Echi ko anili: “Jeʼná keni raná [...] waminá wikáami níili, chopi mata ku riwali” (Luc. 15:11-32). Kecho bijí nawayá jenaʼí Wichimóbachi, a keʼré japi Jesús ko wisabé niraa ineli japi Jeobá we natimá echi cha nokáami. Jiti la echi ko we simárika ruyeli japi Jeobá ko we wikáwiami ju.
Echoná historia japi Jesús ruyeli, echi onolá maa mutumia echi nolá japi miná simili nalí jipi ko ku nawayá inari echoná bitichí. (Iné echi párrafos 11 alí 12).
13, 14. ¿Piri bineli Pedro echi namuti jitra japi isili, alí piri binérili echi jitra? (Ayénachó iné echi dibujos).
13 Echi apóstol Pedro bineli wiká namuti echi Jesús jitra japi chúriká Jeobá ku wikawi echi japi ku roʼí echi yúa. Echi ko wisabé niraa ke aʼlá isili, nalí Jesús ko sinibí ku wikáwili. Japi riká, bisiá niraa anili japi ke machili Jesús alí we omona nílili echi jitra (Mat. 26:34, 35, 69-75). Nalí japalí ma ku owínisa, Jesús ko newa ikili Pedro yúa japalí bineli asali (Luc. 24:33, 34; 1 Cor. 15:3-5). Jesús ko aʼlá machiyé japi Pedro we omona nílili echi jitra japi isili, jiti la echi ko iʼwérili iyali alí aneli japi ma ku wikáwili (iné japi aní Marcos 16:7 alí echi nota de estudio riwéami “y a Pedro”).
14 Pedro we aʼlá machili chu ju we omona nilia japalí cha isisa alí ku wikáwirami nisa, jiti la we aʼlá omérili bineria echi namuti jitra. Pe aminana ma simírisa echi omáwali Pentecostés, nijili bilé nawésali japoná aneli echi judíos japi miʼali echi Mesías, nalí we simárika aneli jepuná: “Echijiti ne siʼnéami ʼyemi siʼnú galabé niráa ʼnátaga ku roʼwisi Riosi yuwa, mapurigá ʼyémitamo ku wikáwarami níibo mapurigátamo chati olali. Aʼlí Riosi sinibí niráa ʼyemi mi kanílatama sulachí niráa” (Hech. 3:14, 15, 17, 19). Japalí Pedro anili “ku roʼwisi Riosi yuwa”, echi ko ruyá anili japi sinúrika ku natásaré, japi riwésaré echi chati namuti alí aʼlá ku nokayá japi Onorúami galé. Echi apóstol anili japi Jeobá ko isima japi riká ko naʼomia suwaba echi chati namuti alí ma ke itélima. Pe aminana, Pedro jériká anili Jeobá jitra: “We kilí buwéami ju emi yúa jiti ke nakí japi ke wesi suwábitami nima, nalí nakí japi sinéami ku roʼima echi yúa” (2 Ped. 3:9, TNM). ¡We ti simá nili machiyá japi Jeobá kárika tamó wikawi, tákoré ti isini kaachi noká namuti we chati!
Echi apóstol Pedro we omona nílili echi jitra japi isili, jiti la Jesús ku wikáwili alí aneli japi we galé. (Iné echi párrafos 13 alí 14).
15, 16. a) ¿Chúriká bineli Pablo japi Jeobá alí Jesús we wikáwiami ju? (1 Timoteo 1:12-15). b) ¿Piri ta binepo biléala binelíwami?
15 Kuabi pagótami ju japi riweli nokayá wiká namuti chati japi riká echi Saulo, Tarso bitéami. Echi ko we kichika najátili echi cristianos. Jiti la a keʼré japi wiká cristianos ke mayeli japi Saulo riwema cha isiá, nalí Jesús ko ke echi riká nátili. Echi alí echi Onolá Jeobá, ineli echi aʼláala cualidades japi olali Saulo. Jesús ko anili: “Nijeni chapili echi Saulo mapurigá binói tamí jiti raʼíchama” (Hech. 9:15). Echi ko ayénachó néeli bilé milagro iʼwírimia Saulo jiti riwema cha isiá (Hech. 7:58-8:3; 9:1-9, 17-20). Miná ko, japalí Saulo ma cristiano nílili alí machirúami nili japi riká echi apóstol Pablo, echi ko wisabé niraa matétara iyali Jeobá alí Jesús jiti we simá nokáami nili echi yúa alí ku wikáwili (leeri 1 Timoteo 1:12-15, TNM). Japi riká we natéami niraa ineli japi nokali Jeobá alí Jesús, echi ko anili japi Onorúami we galéami ju, jiti la iʼwiri echi pagótami jiti ku roʼima echi yúa (Rom. 2:4, TNM).
16 Siné kaachi Pablo ko machili japi echi congregación japi wilili echomí Corinto, riweli japi bilé rijoi isima echi nasawíliami chati. ¿Piri aneli Pablo japi nokisáré? Echi namuti japi aneli tamó bineri japi Jeobá we galéami ju, japi tamó iʼwiri alí japi we natéami ju japi ta wikáwiami nipo. We aʼlá binepo echi namuti jitra che biléala binelíwami.
CANCIÓN sjj-S 33 Echa sobre Dios tu carga
a Chabé, Jeobá ko echi riká aneli Oseas binérimia namuti we natéami echi israelitas. Jipi rawé, japalí bilé pagótami bilecho yúa nasawí japi ke echi upila o kunala ju, Jeobá ko ke ané echi japi ke cha isili japi a bijí echi yúa bitélisaré. Jeobá ko isili japi Jesús ruyema japi echi japi ke cha isili, binoy natama achi riwema echi japi nasawili bilecho yúa (Mat. 5:32; 19:9).
b Iné echi artículo “¿Qué significa para usted el perdón de Jehová?”, echoná oselí La Atalaya 15 inárachi noviembre bamíali 2012, páginas 21 aminá 23, párrafos 3 aminá 10.
