BINELÍWAMI 31
CANCIÓN sjj-S 12 Jehová, nuestro gran Dios
¿Piri isili Jeobá tamó niyúbimia echi pecado jitra alí jiti ma ke suwiboa?
“Onorúami ko wabé galeli echi pagótami, jiti bela nijila ko bilepi binoy Nolá” (JUAN 3:16, TNM).
JAPI TA JITRA BINEPO
Chúriká tamó iʼwiri Jeobá jiti niyúripo echi pecado alí japi isili Jeobá jiti pe aminana sébali aʼlá nokáami nipo alí sinibí pirélipo.
1, 2. a) ¿Piri ju echi pecado, alí jépuká tamó iʼwírima niyuria echi? (Ayénachó iné echi “Raʼíchali japi we natéami ju”). b) ¿Piri ta binepo jena binelíwami alí jaréala binelíwami japi uchuwi jepuná oselí Echi Nawésami? (Ayénachó iné echi “Nota japi inésaré echi leériami” japi chukú jepuná oselichi).
¿AMI kanílisa nili machiyá japi chu yena mi galé Jeobá? Jiti mi machimea, biné japi isili Jeobá mi niyúbimia echi pecado jitra alí jiti mi ma ke mukumea. Echi pecado ko ju a japi riká tamujé sayérala japi ke wesi omeri niyuria bineli niraa. Sinéami tamujé ati ke sébali aʼlá nokáami ju, jiti la ti suwí (Rom. 5:12). Nalí we ti kanili machiyá japi Jeobá iʼwírala jitra, tamujé ko niyúripo echi pecado.
2 Jeobá ko ma 6,000 bamíali jonsa iʼwírisimi echi pagótami jiti echi amígowala nima tákoré ke sébali aʼlá nokáami ju. ¿Chúsiá echi riká isimí? Jiti echi ko we tamó galé. Japalí jonsa tamó niwali echi ko we tamó galeli, alí japi riká we tamó galé, echi ko isili wiká namuti tamó iʼwírimia. Sinéami tamujé suwí jiti ta ke sébali aʼlá nokáami ju alí Onorúami ko ke nakí japi ta suwiboa, nalí japi ta sinibí pirélipo (Rom. 6:23). ¡Ayena, Jeobá ko nakí japi mi sinibí bitélima! Jepuná binelíwami binepo bikiá náriwami jitra: 1) ¿piri isili Jeobá jiti ta sébali aʼlá nokáami nipo alí ma ke suwiboa?, 2) ¿piri nokali chabé echi pagótami mulíwimia Jeobá tákoré ke sébali aʼlá nokáami nili?, alí 3) ¿piri isili Jesús jiti ta sébali aʼlá nokáami nipo alí ma ke suwiboa?
¿PIRI ISILI JEOBÁ JITI TA SÉBALI AʼLÁ NOKÁAMI NIPO ALÍ MA KE SUWIBOA?
3. ¿Chúsiá Adán alí Eva ma ke sébali aʼlá nokáami nili alí suwili?
3 Jeobá ko niwali Adán alí Eva jiti we kanila pirélima. Jiti la iyali bilé kawí we baʼóami, niwítili alí iyali echi nóchali japi we baʼóami niwama jenaʼí kawichí japi riká echi Edén alí japi echi kúchuwala muwésima. Nalí bilepi bi namuti nuleli japi ke nokimea, alí aneli japi ke nijéwisaká, suwimea riweili. Alí sinéami ti ma we aʼlá machí japi ikili: bilé ángel we rasíami japi ke galeli Jeobá alí ke cho Adán alí Eva, isili japi ke nijéwima. Adán alí Eva ke bichíwili echi Onolá Jeobá, nalí bichíwili echi Satanás, alí cha nokali. Jiti la, echalí jonsa ikísili japi riká Jeobá anili japi ikimea riweili: ochérami nílisili alí miná ko suwili (Gén. 1:28, 29; 2:8, 9, 16-18; 3:1-6, 17-19, 24; 5:5).
4. ¿Chúsiá we kichí Jeobá echi pecado, alí chúsiá tamó iʼwiri jiti ta niyúripo echi? (Romanos 8:20, 21).
4 Jeobá ko nakili japi jepuná namuti oserúa ripima echoná Biblia jiti inámipo chúsiá echi we kichí echi pecado. Echi pecado isimí japi tamujé nokiboa namuti japi Jeobá ke galé alí miná ko suwiboa (Is. 59:2). Satanás ko we kichí Jeobá alí echi pagótami, jiti la echi ko isili japi Adán alí Eva chati namuti nokimea, alí echi riká cho isimí tamujé yúa. Jiti la, japalí Adán alí Eva ke nijéwili, a keʼré japi Satanás ko nátili japi ma niyúrili, nalí echi ko ke machili japi chu yena galéami ju Jeobá. Ne chokichí jonsa, Jeobá ko nakili japi Adán alí Eva kúchuwala sinibí we kanila pirélima. Jiti we galé echi pagótami, echi ko sapú nátili chúriká iʼwírima (leeri Romanos 8:20, 21, TNM). Jeobá ko machiyé japi jaré echi pagótami a echi galema alí japi iʼwérili nokimea echi muliwia. Alí jiti we aʼlá Onolá ju, echi ko iʼwírima jiti omérima echi muliwia, jiti sébali aʼlá nokáami nima alí ma ke suwimea. Nalí ma binepo chúriká isima riweili Jeobá jiti echi riká ikimea.
5. ¿Chu kabú alí chúriká anili Jeobá japi iʼwírima echi pagótami? (Génesis 3:15).
5 (Leeri Génesis 3:15). Japi isili Jeobá iʼwírimia echi pagótami ko ju, aniyá japi Satanás miʼárami nima. Japi riká, echi ko anili japi “echi mukí kúchuwala” nima japi miʼlimea Satanás alí japi ku akaréwima suwaba echi namuti chati japi isili Satanás (1 Juan 3:8). Nalí kecho bijí echi riká isiá, bilé echi mukí kúchuwala japi wabé natéami ju, risoa ikimea riweili jiti Satanás isima echi riká olayá alí miʼayá. Jepuná ko we risoa nílitima riweili Jeobá. Nalí tákoré echi riká inílitima, echi ko riweli japi echi riká ikimea jiti machiyé japi echi riká wiká millones pagótami niyúbitami nima echi pecado jitra alí ma ke suwimea.
¿PIRI NOKALI CHABÉ ECHI PAGÓTAMI MULÍWIMIA JEOBÁ TÁKORÉ KE SÉBALI AʼLÁ NOKÁAMI NILI?
6. ¿Piri nokali Abel alí Noé mulíwimia Jeobá?
6 Chabé jonsa Jeobá ko kilipi niraa ruyésili echi pagótami japi ke sébali aʼlá nokáami nili chúriká mulíwima echi. Japalí Adán alí Eva ke nijéwili, echi bachá rijoi japi bichíwili Jeobá, echi ko nili Abel, echi Adán alí Eva ranala. Abel ko we galeli Jeobá, kanílitinali echi alí mulíwinali, jiti la nátili chiliwemia bilé namuti. Alí japi riká echi ko boʼwá niséami nili, chiliweli Jeobá jaré boʼwá japi bachá ochérikami nili. Alí, ¿chu inílili Jeobá? We kanílili Abel yúa alí nareli echi chiliwéliami japi nijili (Gén. 4:4). Miná ko, Jeobá ayénachó kanílika nareli echi namuti japi chiliweli echi pagótami japi echi galeli alí bichíwili, japi riká Noé (Gén. 8:20, 21). Jepuná néwariwélitili japi echi pagótami a omeri muliwia Jeobá alí kanílitia echi, tákoré ke sébali aʼlá nokáami ju. b
7. ¿Piri ta biné echi jitra japi isili Abrahán?
7 Jeobá ko aneli Abrahán, bilecho rijoi we bichíyami, japi isima bilé namuti we jilírami: japi miʼlimea binoy nolá Isaac japi riká chiliwéliami. Abrahán jitra ko we jilí níliré isiá jepuná, nalí echi ko a nijéwili. Japalí ma miʼlimea riké, Jeobá ko aneli japi ke echi riká isima. Japi riká isili Abrahán, bineri echi pagótami japi bichíyami ju bilé namuti we natéami: japi Jeobá ko nijima riweili binoy Nolá japi riká chiliwéliami jiti echi ko we galé echi pagótami (Gén. 22:1-18).
8. ¿Piri ta biné echi chiliwéliami jitra japi echi nulalíwami anili japi nijima riweili? (Levítico 4:27-29; 17:11).
8 Japalí Jeobá iyali echi israelitas echi nulalíwami, echi ko aneli japi chiliwesa riweili jaré namuti jákami jiti wikáwitami nima (leeri Levítico 4:27-29; 17:11). Jepuná chiliwéliami néwariwélitili japi Jeobá nijima bilé chiliwéliami japi sébali aʼlá ku wikáwima echi namuti japi ke aʼlá noká echi pagótami. Jiti la, Jeobá ko isili japi echi profetas ruyema japi echi mukí kúchuwala, japi nili echi bacháwala Onorúami Nolá, we risoa nílima riweili alí mukumea. Echi ko nima riweili japi riká echi namuti jákami japi chiliweli echi israelitas (Is. 53:1-12). Natá jepuná: Jeobá ko nijima riweili binoy Nolá japi we galé japi riká chiliwéliami, jiti niyúbima sinéami echi pagótami echi pecado jitra alí ma ke suwimea. ¡Ayena, Jeobá echi riká cho isili mujé jitra!
¿PIRI ISILI JESÚS JITI TA SÉBALI AʼLÁ NOKÁAMI NIPO ALÍ MA KE SUWIBOA?
9. ¿Piri anili Juan el Bautista Jesús jitra? (Hebreos 9:22; 10:1-4, 12).
9 Echalí bamíali 29, Juan el Bautista riwali Jesús japi Nazaret bitéami nili alí jéanili: “Jeʼná Rijói, echi Riosi níwala Méchuli ju, mapu we omériami ju biʼwayá jenaʼí wichimóbachi piréami chati olalila” (Juan 1:29). Echi riká néwariwélitili japi Jesús nili echi mukí kúchuwala japi wabé natéami nili, japi Onorúami anili japi nawama riweili. Jesús mukumea riweili echi pagótami jitra japi riká chiliwéliami. Jiti la echi pagótami japi ke sébali aʼlá nokáami nili, omérima riweili sébali aʼlá nokáami niya alí ma ke suwiyá (leeri Hebreos 9:22, TNM; 10:1-4, 12, TNM).
10. ¿Chúriká néwariwélitili Jesús japi iʼwírimia nawali echi cha nokáami?
10 Jesús ko we natéami niraa ineli iʼwiria echi pagótami japi we omona nílili echi namuti jitra japi ke aʼlá nokali alí nakiyé japi echi najátowala nima. Echi ko machiyé japi echi pecado isimí japi echi pagótami we risoa nílima. Jiti la echi ko muliwie echi rijoi alí mukí japi machirúami nili japi riká we cha nokáami. Alí Jesús nili japi anili jepuná raʼíchali: “Echi jaré mapu ketasi nayúkako ketasi newalé bilé óyami. Chopi echi jaré nayúkami newalé”. Miná ko jéanili: “Nijeni ketasi bayémiya nawali echi jaré galabé oláami pagótami. Chópini bayémiya nawali echi auché jaré chati oláami” (Mat. 9:12, 13). Alí echi riká isili. Japi riká, japalí echi mukí samibachie Jesús ronola echi ikowala jitra jiti we omona nílili, Jesús ko we simárika raʼíchili alí ku wikáwili japi isili (Luc. 7:37-50). Jesús ayénachó binérili namuti we natéami echi mukí samaritana japi baʼwí turusia nawali, tákoré echi ko we chati namuti isié (Juan 4:7, 17-19, 25, 26). Sinéami pagótami suwí jiti ke sébali aʼlá nokáami ju, nalí Jeobá ko jiwérili iyali Jesús jiti ku jawásima echi rijoi, mukí alí kuuchi japi ma suwili (Mat. 11:5).
11. ¿Chúsiá echi pagótami japi we chati namuti nokáami nili mulíwinalie Jesús?
11 Echi pagótami japi we chati namuti nokáami nili, ayénachó mulíwinalie Jesús. Echi riká nokali jiti Jesús ko we simá isíami nili echi yúa alí inámili japi echi inílili (Luc. 15:1, 2). Jesús ayénachó anéi echi pagótami japi we aʼlá nokayé echi bichiwia (Luc. 19:1-10). Echi ko ne echi riká isili japi riká echi Onolá (Juan 14:9). Echi namuti jitra japi isili alí anili, néwariwélitili japi Jeobá we natimá echi pagótami, we galé alí iʼwírinali jiti sébali aʼlá nokáami nima. Jesús isié japi echi pagótami cha nokáami, inílima riwénalia japi chati ju alí echi najátinalima (Luc. 5:27, 28).
12. ¿Piri anili Jesús echi binoy mukúala jitra?
12 Jesús ko we aʼlá machiyé japi echi ikimea. Wisabé niraa echi ko aneli binoy najátowala japi riwérami nima alí japi michoka uchá miʼlirúami nima echoná bilé tonchi (Mat. 17:22; 20:18, 19). Ayénachó echi ko machiyé japalí echi ma mukusaa echi pagótami jitra, echi ko niyúbima echi pagótami echi pecado jitra, japi riká anili Juan alí jarecho profetas. Alí binérili japalí echi mukusaa sinéami pagótami omérima echi najatia (Juan 12:32, TNM). Japi bichíwima Jesús alí nokimea japi riká echi isili, omérima riweili muliwia Jeobá alí sébali aʼlá nokáami niya (Rom. 6:14, 18, 22; Juan 8:32). Jiti la Jesús ko ke majáami nili alí we risoa nílika mukuli tamó niyúbimia (Juan 10:17, 18).
13. ¿Chúriká mukuli Jesús, alí piri ta biné Jeobá jitra? (Ayénachó iné echi imagen).
13 Jesús ko riwérami nili bilé echi amígowala jitra, miná ko echi sayérala chapili, we cha riká raʼíchili echi jitra alí wipisoli. Upá ko, echi sontarsi michoka uchali Jesús echoná tonchi jiti mukumea. Jesús ko anáchili suwaba jepuná namuti jilírami, alí Jeobá ko we risoa nílili inea suwaba japi ikiyé echi Nolá. Tákoré we galé, echi ko riweli japi echi riká ikimea. ¿Chúsiá? Jiti we tamó galé. Jesús anili: “Onorúami ko wabé galeli echi pagótami, jiti bela nijila ko bilepi binoy Nolá jiti ta ke suwiboa, alí ti bichíwisakó a ti sinibí pirélipo” (Juan 3:16, TNM).
Jiti ta sébali aʼlá nokáami nipo alí ma ke suwiboa, Jeobá ko riweli japi Jesús mukumea tákoré echi ko we risoa nílili inea echi riká ikíachi. (Iné echi párrafo 13).
14. ¿Piri mi biné echi Jesús mukúala jitra?
14 Jiti Jesús ma mukuli tamujé jitra, jepuná néwariwéliti japi Jeobá we tamó galé. Ayénachó néwariwéliti japi Jeobá ko we mi galé. ¿Kechi ko mi we simá nili machiyá japi Onorúami ko we risoa nílili mi iʼwírimia jiti mi sébali aʼlá isíami nima alí mi ma ke mukumea? (1 Juan 4:9, 10). Jeobá ko tamó iʼwírinali ibili niraa jiti ta echi nijéwipo tákoré jipi ati ke sébali nokáami ju, alí nakí japi pe aminana ma ke nirúlima echi pecado.
15. ¿Piri ta nokisáré jiti ta wikáwitami nipo?
15 Jiti Jesús ma mukuli, Onorúami ko tamó ku wikawi echi namuti japi ta ke aʼlá noká. Nalí jiti Jeobá tamó ku wikáwima, ati nokisáré bilé namuti. ¿Chu iyiri namuti? Juan el Bautista alí Jesús anijoli: “Ku roʼisi, jiti echi Onorúami Gobiérnowala ma mulipi nulama” (Mat. 3:1, 2, TNM; 4:17, TNM). Jiti la, ati mulíwinalaká Jeobá, we natéami ju japi ta ku roʼipo. Nalí, ¿piri aniwáami ju ku roʼía, alí chúriká tamó iʼwiri kanílitia Jeobá tákoré ti ke sébali aʼlá nokáami ju? Biléala binelíwami ruyema jepuná náriwami jitra.
CANCIÓN sjj 18 Matétarabá jiti ta niyúbitami nipo
a RAʼÍCHALI JAPI WE NATÉAMI JU: Echi raʼíchali pecado echoná Biblia ke sinibí chopi iyiri aniwáami ju. Japi riká, isini kaachi aniwáami ju japalí bilé pagótami isimí bilé namuti japi Jeobá aní japi ke aʼlá ju o japalí ke nijewi bilé namuti japi Jeobá tamó nulé. Nalí ayénachó aniwáami ju japi ta ke sébali aʼlá noká jiti ta Adán kúchuwala ju alí jepuná isimí japi ta sinéami suwiboa.
