BINELÍWAMI 48
CANCIÓN sjj 97 Onorúami Raʼicháala ko we natéami ju
Japi ta biné echi jitra japi isili Jesús japalí wiká muwéwili echi panes
“Nijé Binói ju echi koʼwáami mápuni nijá mapurigá echi pagótami sinibí pirélama. Siʼnéami mapu ikí tamí yuwa siko, tarapé siné ʼlochema” (JUAN 6:35).
JAPI TA JITRA BINEPO
Japi ta biné echi milagro jitra japi oserúa chukú echoná Juan capítulo 6, japalí Jesús wiká muwéwili echi panes alí echi rochí jiti kóʼama wiká pagótami.
1. Chabé, ¿chúsiá we natéami nili echi pan?
CHABÉ echi pan nili japi wabé koʼali echi pagótami (Gén. 14:18; Luc. 4:4, TNM). Jiti la, isini kaachi echi Biblia nee echi raʼíchali pan, ruyemia suwaba echi koʼwáami (Mat. 6:11, TNM; Hech. 20:7, nota japi mi binema). Alí okuá echi milagros jitra japi Jesús isili, echi pan nili echi namuti wabé natéami japi néeli (Mat. 16:9, 10). Ma binepo bilé echi milagros jitra japi oserúa chukú echoná Juan capítulo 6, alí inepo piri ta biné echi jitra jipi rawé.
2. ¿Chu kabú miles pagótami newaleli koʼwáami?
2 Echi apóstoles we risiyá nílili jiti we nawesia éenili, jiti la Jesús alí echi apóstoles baʼónami simárili taa barco mochika echoná mar echomí Galilea, alí séali mulipi echoná ciudad Betsaida jiti omérima isabia (Mar. 6:7, 30-32; Luc. 9:10). Nalí japalí séali echoná, wiká miles pagótami sili Jesús inemia. Jesús ko ke aneli echi japi ku simama, echi ko nalí ikírili raʼichia echi Onorúami Gobiérnowala jitra alí ku saʼweli echi japi nayúami nili. Alí japi riká ma aʼlí nílisili, echi discípulos ko nárika nokáliré chúriká nokimea echi pagótami olamia echi koʼwáami. Jaré ko a oláliré japi okema, nalí wikabéala simasa riweili echoná pueblo ralisia echi koʼwáami (Mat. 14:15; Juan 6:4, 5). ¿Piri isili Jesús?
JESÚS KO ISILI JAPI WIKÁ MUWEMA ECHI PAN
3. ¿Piri aneli Jesús echi apóstoles japi nokimea echi pagótami jitra? (Ayénachó iné echi dibujo).
3 Jesús ko jéaneli echi apóstoles: “Ketasi arigá ʼwérali ju mapu aboni ku simama. ¡ʼYemi aboni ʼyasi mapurigá aboni koʼmea!” (Mat. 14:16). Kóʼaya echi pagótami jilí nima riweili jiti 5,000 rijoi nili, alí tarásaká echi umukí yúa alí echi kuuchi, a níliré 15,000 pagótami (Mat. 14:21). Andrés ko jéanili: “Jenaʼí atí bilé towí mapu malí kúuchi pani niwa, echi sebara anilíwami niwárami. Échiko ayénachó niwa okuá kúuchi rochí. ¡Chopi echikipi koʼwáami ketasi chirigá sebama mapurigá jeʼná wikabé pagótami koʼmea!” (Juan 6:9). Echi pan cebada jitra niwárami, bilé pan nili japi we koʼali echi pagótami alí ke me natéami nili, alí echi rochí a keʼré wakichéami nili alí akáami. Nalí tákoré olali echi, ke omérima riweili kóʼaya wikabé pagótami.
Jesús ko iyali echi pagótami japi newaleli alí ayénachó binérili. (Iné echi párrafo 3).
4. ¿Piri tamó bineri japi aní Juan 6:11-13? (Ayénachó iné echi fotos).
4 Jiti Jesús we simá isíami nínalie, echi ko aneli echi pagótami japi kuabi niraa napawika mochima echoná asalárili (Mar. 6:39, 40; leeri Juan 6:11-13). Ma echi riká anesa echi pagótami, Jesús ko matétara iyali echi Onolá echi pan jitra alí echi rochí. We aʼlá nili japi echi riká isima jiti Onorúami nima riweili japi iyama koʼwáami echi pagótami. Japi riká isili Jesús, tamó bineri japi ta raʼichásaré Jeobá yúa kecho bijí koʼyá matétara iyamia, tákoré ti awénili muchuwi o jarecho yúa. Miná ko, Jesús isili japi nachutárami nima echi koʼwáami alí tákoré sinéami echi pagótami koʼali japalí chéami posali, waʼlú koʼwáami ripili. Jiti la, Jesús ko nulali japi ku napabúrami nima jiti ke miná wichimea alí che siné néerami nima. Echi riká tamó binérili japi ta aʼlá néesaré echi namuti japi ta olá. Echi wénwala omeri che binea echi kúchuwala yúa jepuná milagro jitra, binérimia japi raʼichásaré Jeobá yúa kecho bijí koʼyá, we simá nokáami nísaré jarecho yúa alí nijíami nísaré.
Nárika isí: “¿Achi ni isimí japi riká Jesús alí ni raʼicha Jeobá yúa kecho bijí koʼyá?”. (Iné echi párrafo 4).
5. Inesa echi milagro japi isili Jesús, ¿piri nokali echi pagótami, nalí piri isili Jesús?
5 Echi pagótami we kanílili echi milagros jitra japi isili Jesús alí jiti we aʼlá binériami nili. Echi ko aʼlá machiyé japi Moisés anili japi Onorúami wilama riweili bilé profeta japi we natéami nima, jiti la a keʼré japi echi ko nárika nokali achi Jesús nili echi profeta (Deut. 18:15-18). Echi riká nísaká, echi pagótami ko nátiliré japi Jesús we aʼlá nuláami nima, jiti omérima iyayá koʼwáami sinéami pagótami Israel piréami. Echi jitra a keʼré japi echi pagótami “ʼwérali tonáali, walula silíami niráa wilábiya” (Juan 6:14, 15). Jesús a nijéwilaká, echi ko iʼwiria isímili echi políticos judíos japi nulérami nili echi romanos jitra. Nalí ke echi riká isili. Echi Biblia aní japi Jesús “waminá waná ripá rabó simili”. Tákoré iʼwérili anérami nili, Jesús ke iʼwírili echi política. ¡We aʼlá tamó binérili japi riká ti nokisáré!
6. ¿Chúriká nokiboa japi riká Jesús? (Ayénachó iné echi dibujo).
6 A bichíwali ju japi jipi echi pagótami ke tamó anema japi wiká muwéwipo koʼwáami o japi saʼwepo echi nayúami alí ke cho tamó jawánilima japi riká isélikami, nalí a keʼré japi tamó iʼwérili anema japi iʼwíripo votárika o bilecho namuti nokaká bilé partido político jitra, japi echi mayé japi aʼlá nulama. Nalí Jesús we aʼlá tamó binérili japi riká ti nokisáré. Echi ko ke iʼwírili echi política. Alí pe aminana echi ko anili: “Nijé Gobiérnowala ke jenaʼí wichimóbachi nirúami ju” (Juan 17:14, TNM; 18:36, TNM). Japi ta cristianos ju, ati natásaré alí nokisáré japi riká Jesús echi política jitra. Tamujé ko iʼwiri echi Onorúami Gobiérnowala bi, ata nawesa echi jitra alí ti tani Onorúami japi ma nulama jenaʼí Wichimóbachi (Mat. 6:10, TNM). Inepo piri ta jarecho namuti biné echi milagro jitra japi isili Jesús wiká muwewia echi panes.
Jesús ko ke iʼwírili echi política alí ti echi riká cho nokisáré. (Iné echi párrafo 6).
PIRI ANIWÁAMI JU ECHI MILAGRO ECHI PANES JITRA
7. ¿Chu iyiri bilecho milagro isili Jesús, alí piri anijoli echi apóstoles? (Juan 6:16-20).
7 Ma kóʼasa echi miles pagótami, Jesús aneli echi apóstoles japi ku simama echomí Capernaúm taa barco mochika alí echi ko ripá rabó simili jiti echi pagótami ke echi wilama japi riká silíami (leeri Juan 6:16-20). Japalí echi apóstoles taa barco mochika sírili, we jiwérami ikéami ukuli alí echi baʼwí we nokeli. Jiti la Jesús baʼwichi moba wiliá simili japoná sírili echi apóstoles alí aneli echi apóstol Pedro japi echi riká cho isima (Mat. 14:22-31). Japalí Jesús ma móoli echoná taa barco, ma ke ikali. Inesa echi namuti, echi discípulos anijoli: “¡Ne bichíwali Mujemi biʼnélipi Riosi Ranala ju!” (Mat. 14:33). a Nalí japi riká ruyeli Marcos, tákoré echalí echi riká anijoli, echi ko a bijí ke aʼlá inamie piri aniwáami nili echi milagro echi panes jitra (Mar. 6:50-52). Echi ko ke inamie japi Jeobá jiwérali iyali Jesús jiti isima echi milagros. Pe aminana, Jesús checho raʼíchili echi milagro jitra japalí wiká muwéwili echi pan, tamó binérimia namuti we natéami.
8, 9. ¿Chúsiá echi wikabé pagótami simíali aasia Jesús? (Juan 6:26, 27).
8 Echi wikabé pagótami japi Jesús kóʼali, nakili japi Jesús aminabi echi iyama japi newaleli. A bichíwali ju japalí echi pagótami ineli japi Jesús alí echi apóstoles ma simíali, echi ko baʼalínala rawé móoli jarecho barcos japi sírili Tiberíades jonsa alí simíali echomí Capernaúm aasia Jesús (Juan 6:22-24). Nalí, ¿achi echi riká nokali jiti aminabi kipúnalie echi Onorúami Gobiérnowala jitra? Ke tasi. Japi echi nakili ko nili japi Jesús echi iyama echi pan. ¿Chúriká ti machí jepuná?
9 Ma inepo japi ikili japalí echi pagótami sili Jesús yúa mulipi echoná Capernaúm. Jesús ko aneli japi echi nakili ko nili japi echi iyama koʼwáami. Ruyeli japi echi ko “galá posaka koʼwali” echi koʼwáami japi we sapú chokoli. Alí aneli japi iʼwérili nokimea olamia “echi koʼwáami mapu sinibí niráa tibima, echi mapu ʼyemi mi ʼyama mapurigátamo sinibí pirélabo” (leeri Juan 6:26, 27). Ayénachó aneli japi binoy Onolá nima japi iyama echi koʼwáami. Echi pagótami ke mayea níliliré japi Jesús echi riká animea. Nalí, ¿chu iyiri koʼwáami nili echi, alí chúriká omérima riweili olayá?
10. ¿Piri nili echi namuti aʼláala japi nokisaa riweili echi pagótami jiti omérima sinibí pirea?
10 A keʼré japi echi judíos ko nátili japi nokisaa riweili namuti aʼláala jiti omérima olayá echi koʼwáami, alí mayéliré japi echi namuti aʼláala ko nili japi anili echi Moisés Nulalila. Nalí Jesús ko aneli: “Riosi chopi nakí máputamo jeʼná jerigá olabo: Ne galá tamí bichíisi, mapujiti Riosi Binói tamí júuli jenaʼí wichimóbachi” (Juan 6:28, 29). Echi ko nalí bichíwisa riweili echi japi Onorúami júali. Alí Jesús ma raʼíchili chabé echi jitra (Juan 3:16-18, 36, TNM). Alí pe aminana checho raʼichama riweili echi jitra japi ta nokisáré jiti oméripo sinibí pirea (Juan 17:3).
11. ¿Chúriká néwariwélitili echi judíos japi natia mochili echi koʼwáami bi jitra japi okema? (Salmo 78:24, 25).
11 Echi judíos ke bichíwili japi Jesús binérili japi chu iyiri nili echi aʼláala namuti japi Onorúami nakili japi nokimea. Jiti la echi ko nárili Jesús: “¿Alí chu iyiri milagro mi isima jiti ta inepo alí mi bichíwipo?” (Juan 6:30, TNM). Alí miná ko aneli Jesús japi echi kiʼyáwala japi pireili japalí biteili Moisés, iyárami nili echi maná japi nili japi riká pan (Neh. 9:15; leeri Salmo 78:24, 25). Jiti la ti machí japi echi judíos natia mochili echi koʼwáami bi jitra japi okema. Ayénachó ke aneli Jesús japi echi ruyema piri ju echi ne bichíwali pan echoná ripá siyónachi nirúami, japi nili japi riká maná alí japi isimí japi sinibí pirélima (Juan 6:32, TNM). Jiti la ke inámili echi namuti japi Jesús echi binérinalie. ¿Piri ta biné jepuná jitra?
JAPI WABÉ NATÉAMI JU TAMUJÉ JITRA
12. ¿Chúriká néwariwélitili Jesús piri namuti wabé natéami ju?
12 Jepuná ko ju bilé namuti we natéami japi ta biné echoná Juan capítulo 6: ata wabé natéami niraa inésaré nijewia Onorúami alí echi amígowala niya. Japalí Jesús ke nijéwili japi anili Satanás, néwariwélitili japi wabé natéami ju nijewia Onorúami echi koʼwáami yúa (Mat. 4:3, 4). Alí echoná nawésali japi nijili echoná ripá kawírili asaká, binérili japi wabé natéami ju Onorúami amígowala niya (Mat. 5:3, TNM). Jiti la, ati nárika nokisáré: “¿Achi ni néwariwéliti japi ni wabé natéami niraa iné Onorúami amígowala niya alí ke ko echi namuti japi ni newalé?”.
13. a) ¿Chúsiá ke chati ju japi ta kanila okebo? b) ¿Chu iyiri busuréliami anili Pablo japi ta nijéwisaré? (1 Corintios 10:6, 7, 11).
13 Ke chati ju japi tánipo Onorúami echi namuti japi ta newalé alí japi kanílipo echi jitra (Luc. 11:3). Echi Biblia aní japi we aʼlá ju “koʼyá, bajía alí kanilia” jiti ta we jiwérika nóchili alí japi “jepuná ayénachó echi Onorúami ne bichíwali nijí” (Ecl. 2:24; 8:15; Sant. 1:17). Nalí tákoré echi riká ju, ati aʼlá tibuka nokisáré jiti ke wabé natéami niraa inepo echi namuti. Echi ju japi echi apóstol Pablo newalárili echi cristianos. Echi ko osélili echi namuti jitra japi ke aʼlá nokali echi israelitas, japi riká japi nokali mulipi echoná kawírali Sinaí riwéami. Alí aneli echi cristianos japi ke echi riká cho nokimea (leeri 1 Corintios 10:6, 7, 11). Jeobá ko iyali echi koʼwáami japi newaleli echi israelitas, nalí echi ko we korúkami nili, jiti la nokali namuti we chati (Núm. 11:4-6, 31-34). Alí echi riká cho nokali japalí koʼyé alí bajíe amachikia echi becerro oro jitra niwárami (Éx. 32:4-6). Pablo ko néeli echi ejemplo iʼwírimia echi cristianos japi pireili kecho suwábitami kaachi Jerusalén, japi ikimea riweili echalí bamíali 70. Jipi rawé, tamujé ayénachó piré japalí ma mulipi suwábitami nima echi chati namuti, jiti la ti nijéwisaré echi busuréliami japi Pablo anili.
14. ¿Piri aní echi Biblia japi chúriká nima echi koʼwáami echoná Wichimóbachi we baʼóachi?
14 Japalí Jesús tamó binérili japi tánipo Onorúami japi tamó iyama “echi koʼwáami japi ta newalé jipi rawé”, echi ko ayénachó tamó binérili japi jéanepo Onorúami: “Isí japi mi binoy nakí jenaʼí wichimóbachi, japi riká mi isimí ripá rewegachi” (Mat. 6:9-11, TNM). ¿Chúriká mi nata japi nima echalí? Echi Biblia ko aní japi Onorúami ko nakí japi nirúlima wiká koʼwáami jenaʼí Wichimóbachi. Echoná Isaías 25:6-8 aní japalí ma nulasa echi Onorúami Gobiérnowala, we raʼíami koʼwáami nirúlima. Alí echoná Salmo 72:16 jéaní: “Nirúlima wiká koʼwáami jenaʼí wichimóbachi, rabó ayé kawírali ayénachó nirúlima wiká koʼwáami”. ¿Achi mi nata wasia echi koʼwáami japi mi we raʼili o bilecho si wasia japi mi ke siné wásili? ¿Achi mi nata koʼyá echi namuti rakala japi mi ichali? (Is. 65:21, 22). Alí sinéami pagótami japi pirélima echoná Wichimóbachi, olama jepuná namuti alí we kanílima.
15. ¿Piri binésaré echi japi ku jawásitami nima? (Juan 6:35).
15 (Leeri Juan 6:35). ¿Piri ikimea echi pagótami yúa japi koʼali echi pan alí echi rochí japi Jesús wiká muwéwili? A keʼré japalí ku jawásitami nisa echi suwíami, ati machiboa jaré echi, jiti ayénachó jawásitami nima tákoré chabé ke bichíwili Jesús (Juan 5:28, 29, TNM). Echi ko binésaré piri aniwáami ju jepuná namuti japi anili Jesús: “Nijé Binói ju echi koʼwáami mápuni nijá mapurigá echi pagótami sinibí pirélama. Siʼnéami mapu ikí tamí yuwa siko, tarapé siné ʼlochema”. Ayénachó echi ko bichíwisaré japi Jesús isili mukuyá echi jitra. Echalí sinéami japi ku jawásitami nima binéritami nima alí ayénachó echi kuuchi japi ochérima echoná Wichimóbachi we baʼóachi. ¡Wabé ti kaníliami nipo bineria echi pagótami jiti Jeobá amígowala nima alí ke ko koʼyá echi koʼwáami! Ayena, nijewia Onorúami wabé natéami nima.
16. ¿Piri ta binepo biléala binelíwami?
16 Jenaʼí ti bineli jaré namuti bi japi aní Juan capítulo 6. Nalí Jesús a bijí olali wiká namuti japi animea echi sinibí bitéliwami jitra. Echi ko nili bilé namuti japi we natéami niraa ineli echi judíos alí tamujé jitra ayénachó we natéami ju. Echoná biléala binelíwami aminabi binepo japi aní Juan capítulo 6.
CANCIÓN sjj 20 Mujé ko nijili mujé nolá Jesús
a Ami che machináliaká jepuná relato jitra, iné japi aní echi libros riwéami Jesús: el camino, la verdad y la vida, página 131, alí Ejemplos de fe, página 185.
