Ani ochériki bamíali 1927 echoná bilé pueblo taa mulipi Chicago, japi ju Illinois, echomí Estados Unidos. Nijé wénwala ko olali malí kuuchi: Jetha, Don, alí miná ko nijé ochériki, pe aminana ochérili Karl alí Joy. Sinéami ti iʼwérili nokinalie nóchilia Jeobá ne sulachí jonsa. Nijé ochilá Jetha simili echi osá Escuela de Galaad japi niruili, bamíali 1943. Nijé rejimala Don, Karl alí Joy bayeri Betel echomí Brooklyn (Nueva York) bamíali 1944, 1947 alí 1951. Japi nokali echi alí nijé wénwala, we tamí iʼwírili.

Nijé wénwala ko sinibí leerie echi Biblia alí we galéi Onorúami, jiti la tamó binérili jiti tamujé ayénachó galepo Onorúami. Nalí japalí nijé onolá simili nikosia echomí Europa japalí niruili echi Primera Guerra Mundial, echalí jonsa ma ke riwíwiami nílili echi religión. Nijé iyela ko we kanilie jiti nijé onolá ku nawali nikoa iyénisa, jiti la echi ko bayérili echoná iglesia japi riká chabé. Nalí nijé onolá ko jéaneli: “Ani mi yúa simea, nalí ke ni bakimea echoná pachá”. Nijé iyela ko je ku aneli: “¿Chúsiá?”. Alí nijé onolá jéaneli: “Japalí niruili echi guerra, ani ineki chúriká echi líderes religiosos raʼíchika tanie Onorúami echi sontarsi jitra, tákoré echi okuánika japi nakóaye chopi iyiri religión nili. ¿¡Chúriká Onorúami okuánika iʼwírima!?”.

Pe aminana, japalí nijé iyela simili echoná iglesia, okuá testigo Jeobá sili tamujé bitélachi alí iyali nijé onolá echi okuá libros Luz riwéami, japi raʼichie echi libro Apocalipsis jitra. Nijé onolá ko galeli japi aniyé echi libros, jiti la nareli. Japalí nijé iyela ineli jepuná libros, echi ko leérili. Miná ko, siné rawé echi ko riwali bilé anuncio echoná periódico japoná bayéi echi pagótami binemia Biblia jitra néeka echi libros Luz riwéami, jiti la echi ko simili japoná binema. Japalí nawali, echoná wilili bilé mukí ma wiláami. Riwírika bilé echi libros, nijé iyela ko jériká nárili: “¿Jenaʼí ju japoná binéliwa jepuná jitra?”. Echi mukí jéaneli: “¡Ayena, simiró!”. Che siné tarali ko, nijé iyela tamó yúrili echomí. Echalí jonsa ke ti riweki napawía.

Echoná bilé napawíliwachi echi hermano japi nawesie tamí aneki japi ni leérima Salmo 144:15, japoná aní japi Jeobá nijéwami ju, we kaníliami ju. ¡We ni baʼóriki echi texto! Ayénachó we ni baʼóriki  jarecho okuá textos: 1 Timoteo 1:11, japoná aní japi Jeobá we kaníliami ju, alí Efesios 5:1, japi tamó iʼwérili iyá jiti nipo japi riká echi. Jiti la ni machiki japi ni we kanílika nóchilisaré Jeobá alí matétara iyásaré jiti ni omeri echi nóchilia. Alí jepuná okuá namuti ju japi ni iʼwérili isimí isiá sinibí rawé.

Echi congregación japi mulipi wilili ko nili echoná Chicago, japi 32 kilómetros nili echoná jonsa japoná ti pireili. Nalí tákoré we miká nili, ariká ti simíaye napawíliwachi alí ni aminabi binésiki echi Biblia jitra. Ani newalá japi siné kaachi Jetha iyáari bilé comentario. Japalí ni kipuki japi anili, ani nátiki: “Nijé ayénachó machiyé echi namuti. ¿Chúsiá ni ke ayáwili sikala?”. Jiti la, echalí jonsa, ani chotásiki we aʼlá binea japi binéporé echoná napawíliwachi alí niwayá echi comentarios japi ni nijima. Ayénachó ni aminabi we aʼlá Jeobá amígowala nílisiki japi riká nijé rejimala. Alí bamíali 1941 ani pakoki.

Ani newalá echi waʼlú napawíliwami japi niruili bamíali 1942 echomí Cleveland (Ohio). Nijé alí nijé téemala ati ripiki bilé kalí chiní jitra niwárami jarecho hermanos yúa, mulipi japoná nima riké echi waʼlú napawíliwami. Ayénachó simírikami 50 ciudades kipúrami nili echi waʼlú napawíliwami teléfono jitra. Echalí a bijí niruili echi Segunda Guerra Mundial alí echi testigo Jeobá aminabi sayéritami nílisili. Jiti la ma rokojó kaachi, echi hermanos nolérika uchayé echi carros bacháami niraa rawea. Sinéami katúwika nokali jiti ma rokojó kaachi sinibí bilé tibúa ripima ibili cárrochi. Echi hermanos ko rajesa riweili echi luz japi olá echi carros alí pitárisa riweili cha ikíachi. Echi riká, jarecho ko sapú omérima siyá echoná iʼwírisia. Echalí nijé ko nátiki: “Echi Jeobá puéblowala sinibí kárika muchuwi”. Jiti ke namú ikili alí ni kilí nilie, ani omériki aʼlá ochiyá.

Ma jaré bamíali simírisa, ani ku newalaki echi waʼlú napawíliwami alí ni machiki japi nijé iyela ke siné majali. Echi ko we bichiwie Jeobá alí echi organizaciónwala. Sinibí ni newalama japi riká isili nijé iyela.

Kecho séachi jena waʼlú napawíliwami, nijé iyela ko chotásili precursora regular niya. Jiti la echi ko wabé aʼlá kipuli echi nawésali japi raʼíchili echi precursorado jitra. Japalí ti ma ku sirie bitichí, echi ko anili: “Ani kanílisa nili aminabi precursora niya. Nalí, ¿chúriká ni omérima echi riká isiá alí ayénachó we aʼlá isiá echi nóchali echoná bitichí?”. Tamó nárili achi ti omeri iʼwiria echi, alí ti aneki japi ayena. Jiti la tamó aneli japi ta ibili biʼwabo bilé o okuá cuartos sinibí biʼá kecho bijí koʼyá. Alí japalí ti ma simíaye escuela, nijé iyela ko bakiyé ibili cuarto inesia achi ti aʼlárika riweli alí miná ko simiyé nawisasia. Tákoré bilé mukí we nóchami nili, sinibí we aʼlá tamó tibuli. Japalí ti ku siyé echoná escuélachi jonsa okemia, sinibí echoná asali tamó yúa. Isini kaachi ati simíaye nawisasia echi yúa ma machínisa echoná escuélachi jonsa, alí jepuná tamó iʼwírili machiyá piri noká echi japi precursor ju.

Nijé ko precursor níliki japalí ni 16 bamíbami nili. Tákoré nijé onolá kecho bijí testigo Jeobá nili, echi ko machinalie chúriká ni inílili japalí ni nawesa. Siné rokó ani aneki japi tákoré ni jiwérika isié, ke ni bilé riwali japi binénali echi Biblia tamí yúa.  Ke namú tamí aneli, alí nijé ko náriki: “¿Ami kanílisa nili binea echi Biblia tamí yúa?”. Echi ko natia ripili pe teeli bi alí anili: “Ke ni nata bilé namuti japi ni jitra omeri aniyá japi ke”. Echi riká ju, nijé onolá nili japi ni bachá binérili echi Biblia jitra. Jepuná ko we tamí kanílitili.

Ani chotásiki bineria nijé onolá néeka echi libro “La verdad os hará libres”. Japalí ti aminabi binesie, ani machiki japi bineria nijé onolá tamí iʼwirie aminabi we aʼlá binéami alí binériami niya echi Biblia jitra. Japi riká, siné rokojó, ma sunisa leeria bilé párrafo tamí aneli: “Echi ju japi aní echi libro. Nalí, ¿mujé chumi riká machí japi ne bichíwali ju?”. Ke ni machiki piri ni anema, alí ni aneki: “Jipi ko ni ke machí piri ni mi anema. Che siné binesa, a ni mi ruyema echi respuesta”. ¡Alí echi riká ni isiki! Ani riwaki jaré versículos japi tamí iʼwírili ruyea nijé onolá japi ta jitra bineki. Echalí jonsa, ani bineki we aʼlá binea jiti ni aʼlá binérima nijé onolá. Suwaba jepuná iʼwírili nijé onolá alí tamí, aminabi Jeobá amígowala niya. Nijé onolá ko isili suwaba japi bineli alí pakoli bamíali 1952.

Ani machíniki bitichí jonsa japalí ni 17 bamíbami nili. Echalí Jetha a misionera nílili alí Don bayéritami nili echomí Betel. Okuánika we kanílili nóchilia Jeobá, alí jepuná tamí iʼwérili iyali. Jiti la ni júuliki echi solicitud jiti ni nochama echomí Betel alí ayénachó jiti ni simea echoná Escuela de Galaad, alí ni buweki japi Jeobá animea kumi ni nochama. ¿Piri ikili? Bamíali 1946 tamí bayeli Betel.

Suwaba jepuná bamíali, ani olaki sinúrika nóchali echoná Betel. Jiti la ni bineki wiká namuti kulíwami. Japi riká, ani bineki imprimiria echi libros, taraya echi winomí, alí ayénachó ni bineki ralayá echi namuti japi newaléliwa echoná Betel alí júulia echi namuti jaréanamí. Nalí japi wabé tamí kaníliti jepuná 75 bamíali japi ni ma olá nochia jenaʼí Betel, echi ko ju binea echi adoración matutina alí jarecho nawésali jitra.

Ani bineki wiká namuti Karl jitra, nijé bonilá, japi bayeri echoná Betel bamíali 1947. We aʼlá binériami nili alí we aʼlá binéami echi Biblia jitra. Siné kaachi ani iʼwírili tániki aʼlá niwayá bilé nawésali japi ni nijima. Ani aneki japi ni olayé wiká namuti japi ni uchánali, nalí ke ni machiyé chúriká. Echi ko tamí iʼwírili nárika bi jepuná: “Joel, ¿piri jitra raʼicha echi nawésali?”. Ani sapú inámiki japi tamí ruyénalie: japi ni bi uchásaré japi wabé natéami ju. Sinibí ni newalá echi japi ni bineki.

Jiti ta kanílika nóchilipo echoná Betel, ati iʼwérili nokisáré nawesia. Echi riká ti nokisáaká, ati aʼlá  namuti ikiboa iʼwiria jarecho alí jepuná tamó iʼwérili iyama. Japi riká, ani newalá siné rawé japalí ti nawesia jawie ma rukáwachi echoná Bronx, echomí Nueva York. Bilé hermano alí nijé ati simíaki inesia bilé mukí japi nareli echi oselí La Atalaya alí ¡Despertad! Ma chotásimia, ati jéaneki: “Jipi rokojó ati nawesia jari echi pagótami bilé busuréliami jitra japi aní echi Biblia”. Echi ko jéanili: “Echi Biblia jitra nísaká, pachá simárisi”. Ati leériki jaré textos echi Onorúami Gobiérnowala jitra alí echi Wichimóbachi we baʼóami japi ma mulipi nima. Ati machiki japi echi mukí we baʼórili jepuná, jiti bilecho tarali echoná si jali jarecho amigos japi echi bayeli. Pe aminana, echi alí echi kunala testigo Jeobá nílili.

Tákoré ni a niwínalie, simírili 10 bamíali japalí ni chéami machiki nijé upila. ¿Piri tamí iʼwírili jiti ni riwimea bilé we aʼlá upila? Ani iʼwírili tániki Jeobá alí ni nárika isiki: “¿Piri ni isínali japalí ma niwisa?”.

Ma simírisa echi waʼlú napawíliwami bamíali 1953 echomí Estadio de los Yankees, ani machiki bilé hermana Mary Aniol riwéami. Echi alí nijé ochilá simíali echoná osá Escuela de Galaad alí jipi ko napawika nawesie. Mary ko we kanílika tamí raʼichie chúriká isié nawesia echomí Caribe japi riká misionera alí echi pagótami japi binérili Biblia jitra. Japalí ti aminabi anakupi machísiki, ati machiki japi okuánika nochánilie Jeobá tiempo completo niraa. Ati aminabi anakupi korúsiki alí ti niwiki echi michá abril bamíali 1955. Mary ko nili bilé chiliwéliami japi Jeobá tamí iyali alí ni bineki wiká namuti echi jitra. Echi ko sinibí we kanílika nochie chuwé nóchali japi nareli. We nóchami nili, iʼwirie jarecho alí sinibí bachá isié japi Jeobá nakí (Mat. 6:33, TNM). Bikiá bamíali ati nóchiki japi riká circuito, alí bamíali 1958 ati bayeri nochamia echomí Betel.

Ani bineki wiká namuti Mary jitra. Japi riká, japalí ti kulí niwiki, ati aniki japi napawika binepo echi Biblia alí ti leerie sinibí rawé 15 versículos niraa. Ma sunisa leeria, ati okuaka raʼichie echi versículos jitra alí ti aniyé chúriká nokiboa japi ta bineli. Wisabé niraa Mary ko tamí raʼichie japi bineli echoná Galaad alí japalí iyénili nawesia japi riká misionera. Jepuná namuti we tamí iʼwírili jiti ni aʼlá machiká isíami nima, we aʼlá niwayá echi nawésali alí aʼlá machiyá chúriká ni iʼwérili iyama echi hermanas (Prov. 25:11).

Nijé upila Mary japi ni we galeli, mukuli bamíali 2013. ¡We ni kanílisa nili checho ku inea echoná Wichimóbachi we baʼóachi! Kecho nawáachi echalí rawé, ani aminabi binénali alí ni bichíwinali Jeobá ne sulachí jonsa (Prov. 3:5, 6). Japalí ni nata japi nokimea echi Jeobá puéblowala echoná Wichimóbachi we baʼóachi, tamí jiwérali iyá alí we tamí kaníliti. Echalí, Jeobá tamó binérima wiká kulíwami namuti alí ti oméripo aminabi binea wiká namuti echi jitra. Jeobá ko wiká namuti tamí binérili alí néwariwélitili wiká sinúrika niraa japi we tamí galé. ¡Ke ni siné omérima natetia suwaba japi Jeobá isili tamí jitra!