BINELÍWAMI 50
CANCIÓN sjj 135 Jeobá aní: “Kipú japi ni mi ané”
Wénwala: iʼwírisi emi kúchuwala aminabi bichiwia
“Jiti timí aboi machimea japi Onorúami nakí we aʼláala ju, we natéami alí we tamó kaníliti” (ROM. 12:2, TNM).
JAPI TA JITRA BINEPO
Jaré namuti japi iʼwírima echi wénwala jiti aʼlá raʼichama echi kúchuwala yúa alí jiti iʼwírima echi aminabi bichiwia Onorúami alí japi aní echi Biblia.
1, 2. ¿Piri nokisáré echi wénwala japalí echi kúchuwala nárisa jaré namuti japi ta jitra bichiwi japi riká aní echi Biblia?
WIKÁ wénwala aní japi olayá kúchuwala we nóchali ju. Jiti la, ami kúchuwami nísaká alí mi iʼwérili isíaká iʼwiria jiti bichíyami nima, a timí ané japi mi we aʼlá isimí (Deut. 6:6, 7). Japalí aminabi ochérisimi, a keʼré echi ko nárima jaré namuti we natéami japi ta jitra bichiwi japi riká aní echi Biblia, ayénachó echi namuti jitra japi Jeobá nulá japi aʼlá ju alí japi ke aʼlá ju.
2 Echi riká nokisaa, mujé ko natámiré japi mujé kúchuwala ma ke me bichiwi Onorúami alí japi aní echi Biblia. Nalí echi ko newalé mi naria jiti aboi natama piri bichíwima (1 Cor. 13:11). Jiti la, ke ti majásaré japalí echi kuuchi tamó nárisa echi namuti japi ne sulachí jonsa machinali. Nalí ati natásaré japi echi riká ti oméripo bineria jiti aboi natama japi bichíwima.
3. ¿Piri binepo jena binelíwami?
3 Jena binelíwami inepo chúriká omeri echi wénwala iʼwiria aboi kúchuwala 1) jiti aboi natama japi bichíwima, 2) jiti machimea japi we natéami ju nijewia japi aní echi Biblia alí 3) jiti ruyema jarecho japi echi bichiwi. Ayénachó inepo jaré aʼláala namuti echi náriwami jitra japi nari echi kúchuwala alí jaré namuti japi omérima nokayá echi wénwala aboi kúchuwala yúa jiti aminabi raʼichama japi ta jitra bichiwi.
IʼWÍRISI EMI KÚCHUWALA JITI ABOI NATAMA JAPI BICHÍWIMA
4. ¿Piri nárimiré emi kúchuwala, alí chúsiá?
4 Echi cristianos japi kúchuwami ju, aʼlá machí japi echi kúchuwala ke ochérili ma bichíyami niya. Emi ko ke ochérili bichiwia Jeobá alí ke cho emi kúchuwala. Jiti la aʼlá ju japi echi nárima: “¿Chúriká ni machí japi Onorúami a bité? ¿Achi ni omeri bichiwia japi aní echi Biblia?”. Alí echi Biblia aní japi echi cristianos we aʼlá natásaré alí we aʼlá machisáré achi aʼlá ju echi suwaba namuti japi bichiwi (Rom. 12:1, TNM; 1 Tes. 5:21). Nalí be, ¿chúriká timí omeri iʼwiria emi kúchuwala jiti aminabi bichíwima Jeobá?
5. ¿Piri omeri nokayá echi wénwala iʼwírimia echi kúchuwala aminabi bichiwia japi aní echi Biblia? (Romanos 12:2).
5 Iʼwérili iyasi jiti aboi inema japi ta bichiwi ne bichíwali ju (leeri Romanos 12:2, TNM). Japalí emi kúchuwala nárisa jaré namuti, ruyé chúriká aboi riwimea echi japi machinali néeka echi Índice de las publicaciones Watch Tower alí echi Guía de estudio para los testigos de Jehová. Echoná Guía de estudio japoná aní “La Biblia”, alí miná ko japoná aní “Inspirada por Dios”, echi ko machimea jaré namuti japi néwariwéliti japi echi Biblia ke bi ju bilé libro japi echi rijoi osali, nalí japi Onorúami Raʼicháala ju (1 Tes. 2:13). Japi riká, omeri aa echi ciudad asiria Nínive riwéami. Chabé, jaré we machíami echi Biblia jitra, aniyé japi echi ciudad ke siné niruili. Nalí mulipi bamíali 1850, jaré pagótami ko riwali japoná wilili echi ciudad, alí echi riká machirúami nili japi echi Biblia ne bichíwali aní (Sof. 2:13-15). Ayénachó omeri aaya chúriká ne bichíwali ikili echi profecías japi anili japi Nínive suwábitami nima, echoná artículo riwéami “¿Ami machiyé?”, echoná oselí La Atalaya echi michá noviembre bamíali 2021. Iʼwérili iyá emi kúchuwala jiti we aʼlá binema japi aní echi oselí japi niwá echi organización alí japi aní jarecho oselí japi niwá echi pagótami japi machíami ju. Jepuná iʼwírima emi kúchuwala aminabi we bichiwia japi aní echi Biblia ne bichíwali ju.
6. ¿Chúriká timí omeri iʼwiria emi kúchuwala jiti aboi natama? Ruyé bilé ejemplo. (Ayénachó iné echi foto).
6 Iʼwírisi emi kúchuwala jiti aboi natama. Echi wénwala sinúrika niraa omeri raʼichia echi kúchuwala yúa Onorúami alí echi Biblia jitra. A timí omeri raʼichia emi kúchuwala yúa, japalí timí simía basalówisia bilé museo japi niwá echi pagótami o echi testigo Jeobá níwala o ayénachó bilé párquechi. Japi riká, japalí timí iné japi aní jaré libros o videos, a timí omeri ruyea jaré namuti chabéwami jitra japi buyaní echoná, echi riká timí iʼwírima echi, aminabi we bichiwia japi echi Biblia ne bichíwali aní. Japi riká, ¿achi echi machí japi echi Onorúami riwalá oserúa chukú echoná bilé rité japi 3,000 bamíali jonsa niwárami nili alí machirúami ju japi riká rité moabita? Echi rité wilí echoná Museo Louvre echoná París (Francia). Ayénachó nirú bilé copia echi rité jitra echoná central mundial echi testigo Jeobá jitra japoná ruyéliwa “La Biblia y el nombre divino”, echomí Warwick (Nueva York). Echoná rité moabita oserúa chukú japi echi silíami Mesá Moab nuláami, ma ke nijéwili echi silíami Israel nuláami. Alí echi riká ju japi riká aní echi Biblia (2 Rey. 3:4, 5). Emi kúchuwala aminabi bichíwima japalí aboi inesa japi suwaba japi aní echi Biblia ne bichíwali ju (ayénachó iné japi aní 2 Crónicas 9:6).
Iʼwírisi emi kúchuwala jiti aboi natama japi bichíwima, riwírika echi namuti chabéwami japi néwariwéliti japi aní echi Biblia ne bichíwali ju. (Iné echi párrafo 6).
7, 8. a) ¿Piri ta biné japalí ti iné echi namuti we baʼóami alí chúriká niwárami nili? Ruyé bilé ejemplo. (Ayénachó iné echi imágenes). b) ¿Chu iyiri náriwami omeri iʼwiria emi kúchuwala aminabi bichiwia japi Onorúami niwali suwaba namuti?
7 Iʼwérili iyasi jiti inema japi Jeobá niwali. Japalí timí basaloa járisa echomí kawírili o nocha machí ayé japoná nirú siwá o japi mi ichali, riwiri emi kúchuwala chúriká niwárami ju jaré namuti alí japi jepuná néwariwéliti japi a nirú bilé japi we machíami ju japi we aʼlárika niwali. Japi riká, jaré científicos chabé jonsa biné japi wiká namuti niwárami ju japi riká ko chitúlami niraa, japi riká jaré galaxias, caracoles, jaré sawá alí echi girasoles. Bilé machíami rijoi Nicola Fameli, ruyeli japalí taráliwa japi chu ikí chitúlami niraa ju echi namuti, a machiwá japi olá jaré números japi anéliwa sucesión de Fibonacci. a
8 Echoná escuela emi kúchuwala binema echi ciencia jitra, alí machimea chúriká niwárami ju wiká namuti. Japi riká, wikabé echi rojá chopi iyiri niraa ocheri. Bachá echi rojá chokila nachaka alí echoná jonsa machina jarecho otowala alí miná ko echi wiká siwita. Japi riká isimí ocheria echi rojá alí jarecho namuti, ne bachá waʼlú niraa alí miná ko kuuchi niraa, anéliwa fractal. Nalí, ¿jépuká isili japi echi riká ochérima echi namuti we baʼóami? ¿Jépuká we aʼlárika niwali echi namuti japi ta iné? Emi kúchuwala we natásaká echi iyiri náriwami, a keʼré japi aminabi we bichíwima japi Onorúami niwali suwaba namuti (Heb. 3:4, TNM). Alí ma inámisa echi namuti, a timí omeri naria jepuná: “Onorúami isílaká tamujé niwayá, ¿achi mi mayé japi aʼlá ju japi echi tamó nulema japi ta nokisáré jiti kaníliami nipo?”. Miná ko a timí omérima riwiria japi echi nulalíwami we natéami oserúa uchuwi echoná Biblia.
NASA, ESA, and the Hubble Heritage (STScl/AURA)-ESA/Hubble Collaboration
¿Jépuká niwali echi baʼóami namuti japi nirú jenaʼí Wichimóbachi? (Iné echi párrafos 7 alí 8).
IʼWÍRISI EMI KÚCHUWALA JITI MACHIMEA JAPI WE NATÉAMI JU NIJEWIA JAPI ANÍ ECHI BIBLIA
9. Japalí echi kúchuwala ke aʼlá machí achi natéami ju nijewia echi busuréliami japi aní echi Biblia, ¿piri nárika nokisáré echi wénwala?
9 Emi kúchuwala ke aʼlá machiyáaká achi natéami ju nijewia echi busuréliami japi aní echi Biblia, iʼwérili nokisí machiyá chúsiá echi riká nata. ¿Achi ju jiti ne bichíwali nata japi ke aʼlá ju echi busuréliami japi aní echi Biblia? ¿O achi bi ju jiti ke aʼlá machí chúriká ruyema japalí jarecho nárisa japi echi bichiwi? Bilé namuti japi echi iʼwírima we natéami niraa inea echi busuréliami japi aní echi Biblia, echi ko ju binea echi libro We mi kanílika bitélima. b
10. ¿Chúriká timí omeri iʼwiria emi kúchuwala jiti aminabi we aʼlá Jeobá amígowala nima?
10 Iʼwérili iyasi jiti aminabi we aʼlá Jeobá amígowala nima. Japalí timí biné echi Biblia emi kúchuwala yúa, néesi echi náriwami alí ejemplos japi uchuwi echoná libro We mi kanílika bitélima jiti echi animea japi nata (Prov. 20:5). Japi riká, echoná binelíwami 8 aní japi Jeobá ju japi riká bilé amigo japi tamó ané piri ta nokisáré jiti kanílika pirélipo alí ke namú ikiboa. Ma leérisa japi aní 1 Juan 5:3, a timí omeri naria jepuná: “Jiti Jeobá we aʼláala amigo ju, ¿chuti riká inésaré japi echi tamó ané japi ta nokiboa?”. A keʼré japi ke jilí ju japi echi ruyema, nalí jepuná echi iʼwírimiré inea japi echi namuti japi Jeobá nulá, néwariwéliti japi we tamó galé (Is. 48:17, 18).
11. ¿Piri timí nokisáré jiti emi kúchuwala we natéami niraa inema echi busuréliami japi aní echi Biblia? (Proverbios 2:10, 11).
11 Raʼichasi chúsiá we aʼlá ju nijewia echi busuréliami japi aní echi Biblia. Japalí timí napawika leeri echi Biblia o echi texto diario, raʼichasi chúriká timí iʼwírili nijewia jepuná busuréliami japi riká téemala niraa. Japi riká, ¿achi emi kúchuwala aʼlá inami chúsiá aʼlá ju we nóchami niya alí bichíwika raʼichia? (Heb. 13:18). Ayénachó timí omeri raʼichia chúriká echi busuréliami japi aní echi Biblia tamó iʼwiri jiti ta ke nayupo alí we kaníliami nipo (Prov. 14:29, 30). Raʼichia echi jitra iʼwírimiré emi kúchuwala we natéami niraa inea echi busuréliami japi uchuwi echoná Biblia (leeri Proverbios 2:10, 11).
12. ¿Piri isimí bilé niwíkami iʼwírimia echi ranala jiti we natéami niraa inema echi busuréliami japi aní echi Biblia?
12 Steve, japi bité echomí Francia, ruyé chúriká echi alí echi upila iʼwiri echi ranala Ethan, jiti inema japi echi nulalíwami japi Jeobá iyá, néwariwéliti japi we tamó galé. Echi ko aní: “Ati echi nari jepuná: ‘¿Chúsiá Jeobá tamó ané japi ta nijéwipo jepuná busuréliami? ¿Chúriká néwariwéliti jepuná busuréliami japi echi ko we tamó galé? ¿Alí piri mi ikimea ke mi nijéwisaká?ʼ”. Raʼichia jepuná jitra iʼwírili Ethan jiti binoy inílima nijéwinalia echi busuréliami japi Jeobá aní. Steve ayénachó aní: “Tamujé ko nakí japi Ethan aʼlá machimea japi echi busuréliami japi aní echi Biblia, wabé aʼlá ju echi busuréliami yúa japi aní echi pagótami”.
13. ¿Chúriká timí omeri bineria emi kúchuwala jiti nijéwima japi aní echi Biblia? Ruyé bilé ejemplo.
13 Binérisi emi kúchuwala jiti nijéwima echi busuréliami japi aní echi Biblia. A timí omeri echi riká nokayá japalí echi maestros iyá bilé tarea emi kúchuwala japi riká leeria bilé libro. A keʼré japi echoná libro raʼichama jaré pagótami jitra japi we nakóami ju o japi noká echi nasawíliami chati. A timí omeri anea emi kúchuwala japi we aʼlá nima japi inema chúriká noká echi pagótami alí japi riká aní echi busuréliami japi aní echi Biblia (Prov. 22:24, 25; 1 Cor. 15:33; Filip. 4:8). Jepuná iʼwírimiré jiti ruyema japi echi bichiwi echi maestros alí compañeros japalí anisaa echi namuti japi bineli echoná libro.
IʼWÍRISI EMI KÚCHUWALA JITI RUYEMA JARECHO JAPI ECHI BICHIWI
14. ¿Piri namuti majaa nílimiré ruyea echi kúruwi alí iwé echoná escuela, alí chúsiá?
14 Isini kaachi jaré kúruwi alí iwé majaa nili ruyea japi bichiwi. Echi riká iníliré japalí echoná escuela binéliwa echi evolución jitra, jiti wiká maestros bineri echi jitra japi riká ko ne bichíwali ka. Jiti la, ¿chúriká timí omeri iʼwiria emi kúchuwala jiti ke majaa nílima ruyea japi bichiwi?
15. ¿Piri iʼwírima echi kúruwi alí iwé jiti aminabi bichíwima japi bichiwi?
15 Iʼwírisi jiti aminabi bichíwima japi bichiwi. Emi kúchuwala ke riwela nílisaré bichiwia japi nirú bilé japi isili niwayá suwaba namuti (2 Tim. 1:8). Wiká científicos ayénachó nata japi echi namuti japi ikí nirú ke aboi buyali. Japalí ritiwá chúriká niwárami ju echi namuti, echi ko aní japi newaré japi bilé we machíami isili niwayá. Jiti la ke bichiwi echi evolución japi wikaná escuelas binériwa omáana Wichimóbachi. Nalí echi kúruwi alí iwé ayénachó omeri aminabi bichiwia, echi natásaká chúsiá jarecho hermanos alí hermanas bichiwi japi echi namuti japi ikí nirú niwárami nili. c
16. ¿Chúriká echi wénwala omeri iʼwiria echi kúchuwala jiti aʼlá machimea ruyea japi a nirú bilé japi niwali suwaba namuti? (1 Pedro 3:15; ayénachó iné echi foto).
16 Iʼwírisi jiti aʼlá machimea ruyea japi a nirú bilé japi niwali suwaba namuti (leeri 1 Pedro 3:15). We aʼlá nima japi timí napawika binema echi artículos riwéami “¿Creación o evolución?” japi uchuwi echoná jw.org echoná sección “Los jóvenes preguntan”. Miná ko nárisi chu iyiri namuti echoná uchúwami, echi iʼwírima ruyea jarecho japi a nirú bilé japi niwali suwaba namuti alí raʼichasi chúriká omérima ruyea. Newalárisi emi kúchuwala japi ke naʼáwima echi compañeros yúa. Nalí bilé a kipúnalaká, a omeri ruyea bilé ejemplo japi ke jilí ju. Japi riká, bilé compañero animéeré: “Nijé ko bichiwi bi echi namuti japi ni iné alí ni ke iné Onorúami”. Echi riká anisáaká, echi ko omeri anea: “Natá japi mi iyena echoná sierra alí mi echomí ritiwá bilé kalí we semati. ¿Wechi mi natama japi binoy machínali? Japi riká echi kalí ke binoy machínali, nalí a bilé isili niwayá, echi riká cho suwaba namuti japi ikí nirú, a bilé we machíami isili niwayá”.
Japalí mi raʼicha mujé compañeros yúa, wabé aʼlá ju japi mi kuabi namuti raʼichama alí japi ke me jilí ju japi inámima. (Iné echi párrafos 16 alí 17). d
17. ¿Chúriká echi wénwala iʼwérili iyama echi kúchuwala jiti ruyema jarecho japi aní echi Biblia? Ruyé bilé ejemplo japi chúriká bilé remalí omeri naria bilecho compañero.
17 Iʼwérili iyasi jiti ruyema jarecho japi aní echi Biblia (Rom. 10:10, TNM). Raʼichia echi Biblia jitra ko ju japi riká ko binea simea. Ne kulí ko a jilí ju alí kuabi namuti simé. Nalí aminabi binésaká alí wisabé niraa simésaká, pe aminana ma ke me jilí nima. Echi riká cho ju japalí ti raʼicha japi ta jitra bichiwi. Ne kulí ko wabé aʼlá ju kuabi namuti raʼichia alí japi ke me jilí ju. Japi riká, echi remalí omeri naria bilecho compañero: “¿Ami machiyé japi echi científicos niwá echi namuti ineka japi nirú jenaʼí kawichí? Nibí jepuná video japi raʼicha echi jitra”. Miná ko omeri riwiria bilé video japi chukú echoná serie riwéami “¿Lo diseñó alguien?”, alí miná ko naria: “Simárika raʼichárami nísaká bilé científico jitra jiti niwali bilé namuti ineka japi ma nirú, ¿jépuká jitra nalí simárika raʼichárami nísaré?”. Echi riká echi remalí omeri iʼwiria echi compañero jiti aminabi machinálima.
IʼWÍRISI EMI KÚCHUWALA JITI AMINABI BICHÍYAMI NIMA
18. ¿Piri omeri nokayá echi wénwala iʼwírimia echi kúchuwala jiti aminabi bichíwima Jeobá?
18 Ati piré japoná wiká pagótami ke bichiwi Jeobá (2 Ped. 3:3). Jiti la, wénwala, japalí timí biné emi kúchuwala yúa, iʼwérili iyasi jiti binema echi namuti jitra japi echi iʼwírima aminabi riwiwia echi Onorúami Raʼicháala alí echi nulalíwami japi aní echoná. Iʼwírisi jiti aboi natama japi bichíwima, ineka echi we baʼóami namuti japi Jeobá niwali. Ayénachó iʼwírisi inamia echi profecías japi aní echi Biblia japi ma ikili. Alí wabé natéami ko ju japi timí napawika raʼíchima Jeobá emi kúchuwala yúa alí japi iʼwírili tánima echi jitra. A timí omeri bichiwia japi Jeobá emi iʼwírima, jiti timí iʼwérili noká iʼwiria emi kúchuwala aminabi bichíyami niya (2 Crón. 15:7).
CANCIÓN sjj-S 133 Sirvamos a Jehová en nuestra juventud
a Ami che machináliaká, iné echoná jw.org echi video Las maravillas de la creación revelan la gloria de Dios.
b Emi kúchuwala ma sunílaká binea echi libro We mi kanílika bitélima, a timí omeri checho ku binea echi yúa jaré binelíwami echoná secciones 3 alí 4, japi raʼicha echi nulalíwami jitra japi aní echi Biblia.
c Iné echi artículo riwéami “Por qué creemos que hay un Creador”, echoná oselí ¡Despertad! echi michá septiembre bamíali 2006, alí echi folleto El origen de la vida. Cinco cuestiones dignas de análisis. Jiti mi inema jarecho ejemplos, iné echoná jw.org echi videos riwéami “Opiniones sobre el origen de la vida”.
d JAPI RUYÉ JAPI MACHINA ECHONÁ FOTO: Bilé towí Testigo raʼicha bilecho compañero yúa japi baʼori echi drones alí riwiri bilé video japi chukú echoná serie “¿Lo diseñó alguien?”.
