¿Ami we aʼlá leérili suwaba echi binelíwami japi uchuwi echoná oselí Echi Nawésami? Iné achi mi aʼlá machiyá ruyea jepuná náriwami:

¿Chúriká isimí Jeobá echi umukí yúa?

Jeobá ko chopi riká galé echi umukí echi rijoi yúa alí anárika we natéami niraa iné. Echi ko we aʼlá kipú echi umukí alí we natéami niraa iné japi inili alí nata. Ayénachó we bichiwi echi umukí aʼlá nijéwami alí iyá nóchali (w24.01, páginas 15 alí 16).

¿Chúriká ti omeri nokayá japi riká aní Efesios 5:7: “Tarapé siné echirigá chati sitíi olasi ʼyemi, mapurigá aboni chati sitíi olá”?

Echi apóstol Pablo anili japi ta ke napawísaré echi pagótami yúa japi nokimea japi ta jilí nirabo nijewia japi Jeobá nulá, alí ke bi echi pagótami japi ta yúa raʼicha, nalí ayénachó echoná redes sociales (w24.03, páginas 22 alí 23).

¿Chu iyiri ju echi raʼíchali ke bichíwali japi ta ke kipúsaré?

Ati we aʼlá tibuka nokisáré japalí ti ke machisaa achi bichíwali ju bilé namuti japi tamó júulili bilé amigo, japalí nawasa bilé correo japi tamó mayeri japi júali bilé amigo alí japalí bilé tamó mayeri japi binénali echi Biblia, nalí echi ko bilé apóstata ju (w24.04, página 12).

¿Piri ta a machí alí piri ta ke machí japi chúriká Jeobá oyérima echi silíami Salomón alí echi pagótami japi suwábitami nili echoná Sodoma alí Gomorra alí japalí ikili echi waʼlú ukí?

Ke ti machí achi Jeobá ma ke siné ku jawásima echi pagótami japi echi suwábili, nalí a ta machí japi echi ko suwaba aʼlá machí alí we natimáami ju (w24.05, páginas 3 alí 4).

¿Piri tamó bineri japalí aniwá japi Jeobá ju japi riká “bilé waʼlú Rité”? (Deut. 32:4).

Jeobá ko ju japi riká bilé risochí japoná ti omeri moʼiyá. Ati omeri bichiwia echi jiti sinibí isimí japi riká ma anili. Ayénachó echi ko ke noké, jepuná ko aniwáami ju japi ke siné nakulíwima japi riká ju binoy alí japi isima (w24.06, páginas 26 aminá 28).

¿Piri mi iʼwírima kanilia echoná kulíwami congregación?

Bichiwia japi Jeobá tamó iʼwírima japi riká iʼwírili binoy siérvowala chabé piréami, kiti natá japi echi kulíwami congregación chopi riká nísaré japi riká echi congregación japoná mi asali chabé, iʼwérili isí iʼwiria echi nóchali japi nirú echoná kulíwami congregación alí iʼwérili isí olayá kulíwami amigos (w24.07, páginas 26 aminá 28).

¿Piri ta biné echi bikiá historias jitra japi uchuwi echoná Mateo capítulo 25?

Echi historia echi boʼwá alí chibas jitra ati biné japi ta we nijéwami nísaré, echi historia echi makoy iwé jitra tamó bineri japi ta aʼlárika buwea mochísaré, alí echi historia japi raʼicha echi winomí wabé natéami jitra ati biné japi ta we nóchami nísaré (w24.09, páginas 20 aminá 24).

¿Chu yena ripá wilíami nili echi pórtico echi templo jitra japi Salomón niwali?

Jaré oselí japi chabé oserúami nili echi Biblia jitra, echoná 2 Crónicas 3:4 aní japi echi pórtico “120 codos” ripá wilíami nili, echi ko aniwáami ju japi 53 metros ripá wilíami nili. Nalí jarecho oselí japi we aʼlá oserúami nili, aní “20 codos”, japi ju 9 metros ripá wilíami. Nátika japi chu yena runáami nili echi paredes echoná templo, ati machí japi jepuná upáwala ne bichíwali ju (w24.10, página 31).

¿Piri aniwáami ju japi echi siervos ministeriales “bilepi upila olásaré”? (1 Tim. 3:12, TNM).

Ke bi aniwáami ju japi bilepi upila olásaré, ayénachó ke siné nasawísaré bilecho mukí yúa japi ke echi upila ju. Ayénachó sinibí galésaré echi upila alí ke korúsaré jarecho umukí (w24.11, página 19).

¿Chúsiá ta machí japi aní Juan 6:53 ke ruyá aní japi chúriká nokimea echi pagótami newalamia echi Jesús mukúala?

Echoná Juan 6:53, Jesús ko aneli echi pagótami japi okésaré echi sapala alí bajísaré echi lalá. Bamíali 32 echoná Galilea, echi ko aneli jepuná raʼíchali echi judíos japi kecho bichíyami nili echi. Nalí echalí bamíali 33 japalí Jesús ruyeli japi chúriká nokimea newalamia japalí echi mukuli, echi ko bi raʼíchili echi japi nulama riweili echi yúa ripá rewegachi (w24.12, páginas 10 alí 11).