Echi apóstol Pablo jériká oseli echi Timoteo japi ayénachó anciano nili japi riká echi: “Onorúami, Cristo Jesús alí echi ángeles japi chapirúami ju, iné japi ni mi iʼwérika nulé japi mi isima jepuná namuti sinéami yúa, ke bi jaré yúa” (1 Tim. 5:21, TNM). ¿Jépuká ju “echi ángeles japi chapirúami ju”?

Bachá binepo jépuká ke ju echi ángeles. Ati machí japi Pablo ke ruyá anili japi echi ko ju echi 144,000, jiti japalí oseli Timoteo, echi apóstoles alí jarecho ungidos kecho jawásitami nili jiti pirélima ripá rewegachi japi riká espíritus. Jiti la echi ungidos ke ju “echi ángeles japi chapirúami ju” (1 Cor. 15:50-54; 1 Tes. 4:13-17, TNM; 1 Juan 3:2).

Ke cho ju echi ángeles japi ma ke nijéwili japalí waʼlú ukuli jenaʼí Wichimóbachi. Echi ko najátali Satanás, jiti la Jesús sayérala nílili alí demonios riwéami nílili (Gén. 6:2; Luc. 8:30, 31; 2 Ped. 2:4). Pe aminana, Jesús ko érika achama jepuná ángeles 1,000 bamíali alí miná ko suwábima (Jud. 6; Apoc. 20:1-3, 10).

Echoná 1 Timoteo 5:21 aní japi “echi ángeles japi chapirúami ju”, mulipi jawi Onorúami alí Cristo Jesús yúa, jiti la ti machí japi echi yúa nocha ripá rewegachi alí we aʼlá nijéwami ju.

A nirú wiká miles ángeles japi we aʼlá nijéwami ju (Heb. 12:22, 23). Jiti la ti ke natásaré japi sinéami echi napawika nocha japalí Jeobá iyasa bilé nóchali (Apoc. 14:17, 18). Newalabo japalí Jeobá nuleli bilé ángel japi miʼlimea 185,000 sontarsi asirios (2 Rey. 19:35). Ayénachó Jesús anili japi jaré ángeles rojanama echi namuti chati alí echi pagótami cha nokáami jiti suwábitami nima (Mat. 13:39-41). Alí a keʼré jarecho ángeles napabuma sinéami japi simama ripá rewegachi (Mat. 24:31). Jarecho ángeles ayénachó nulérami ju japi tamó tibuma sinibí, japi riká aní Salmo 91:11 (Mat. 18:10; ayénachó iné japi aní Mateo 4:11 alí Lucas 22:43).

Japi riká ti ineli, “echi ángeles japi chapirúami ju” japi aní 1 Timoteo 5:21 a keʼré nili jaré ángeles japi nochie iʼwiria echi congregaciones. Japalí Pablo anili jepuná, echi ko raʼíchili echi ancianos jitra alí aneli echi hermanos japi riwíwisaré. Alí echi ancianos nokisaa riweili echi nóchali japi iyáari iʼwírimia sinéami hermanos, “ke bi jaré”, alí ayénachó we aʼlá natasa riweili japi nokimea. ¿Chúsiá? Jiti Pablo ayénachó aniri japi “Onorúami, Cristo Jesús alí echi ángeles japi chapirúami ju” iné japalí echi ancianos nocha echoná congregación. Suwaba jepuná jitra ati machí japi jaré ángeles nocha iʼwiria echi congregación alí noká jaré namuti, japi riká tibúa echi japi nijéwami ju, tamó iʼwiri jiti nawisabo alí ané Jeobá japi iné (Mat. 18:10; Apoc. 14:6, TNM).