BINELÍWAMI 3
CANCIÓN sjj 124 Sinibí nijéwami nipo
Jeobá mi iʼwírima japalí mi ikisaa namuti we jilírami
“Echi ko isima japi mi ke wichimea” (IS. 33:6).
JAPI TA JITRA BINEPO
Piri ti nokisáré jiti Jeobá tamó iʼwírima japalí ti ikí namuti we jilírami.
1, 2. ¿Piri namuti jilírami ikiméaré japi Jeobá nijéwami ju?
KE SAYINÁ ati ikibóaré namuti japi we chati ju. Ma inepo jaré ejemplos. Siné rawé bilé doctor aneli bilé hermano we nijéwami, Luis riwéami, a japi olá cáncer alí japi kuabi michá bitélima. Monika we kanílika iyénili nóchilia Jeobá echi kunala yúa, japi anciano nili. Nalí siné rawé echi ko machili japi cha isiá biteili wiká bamíali. Olivia ko biléana simili, jiti japoná echi biteili nawama riweili bilé huracán. Japalí echi ku nawali, echi kalila kárika najúa wilili. Ke sayiná, sinéami echi ikili namuti we jilírami. ¿Ami echi riká cho ikili siné kaachi?
2 Japi ta Jeobá nijéwami ju, ayénachó ti ikí namuti jilírami alí ti nayú japi riká jarecho pagótami. Ayénachó, ati anachásaré japalí echi pagótami japi kichí Onorúami puéblowala tamó najati alí sayeri. A bichíwali ju japi Jeobá ko ke chewi jiti ke ikiboa chati namuti, nalí echi ko anili japi a tamó iʼwírima (Is. 41:10). Jiti echi tamó iʼwiri, ati oméripo kanila pirea, aʼlá nátika nokayá alí echi nijewia tákoré ikiyé namuti we jilírami. Jenaʼí binelíwami ati binepo naó namuti japi Jeobá isimí jiti tamó iʼwírima anachia echi karú ikiwáami. Ayénachó binepo piri ta nokisáré jiti narepo echi iʼwírila japi echi tamó iyá.
JEOBÁ TAMUJÉ TIBUMA
3. ¿Piri ta jilí niráboré nokayá japalí ti ikí namuti jilírami?
3 Namuti jilírami. Japalí ti ikí namuti we jilírami, a keʼré japi ta jilí niraa aʼlá natia alí nokayá jaré namuti. ¿Chúsiá? Jiti ta we risoa nili, we ti nata echi jitra, jiti la ti ke machí piri ta nokiboa. Echi riká nílili echi okuá hermanas japi ta ma raʼíchiki echoná bachá párrafo. Olivia jéaní: “Japalí echi huracán kárika najúnili nijé kalila, we ni risoa nilie alí ni ke machiyé piri ni isima”. Japalí Monika raʼicha japi olali echi kunala, jéaní: “We ni risoa níliki alí ni nilie japi riká ko bilé tamí ichela sulala. Ke ni jiwera nilie isiá echi namuti japi ni sinibí isié. Ke ni siné mayéi japi ni echi riká ikimea”. ¿Chúriká tamó iʼwiri Jeobá japalí ti ke omeria nili anachia echi namuti jilírami?
4. ¿Piri tamó ané Jeobá echoná Filipenses 4:6, 7?
4 Japi Jeobá isimí. Echi ko aní japi isima japi ta “kilí ologá pirélabo” (leeri Filipenses 4:6, 7). Echi ko aniwáami ju japi ta kilí nílipo jiti ta Jeobá amígowala ju. Alí jepuná ko wabé aʼlá ju jiti echoná Biblia aní japi Jeobá “ne wabé simírami ʼyemi mi kuʼwira”. ¿Ami siné kaachi we mi nalaka raʼíchili Jeobá yúa alí miná ko we mi kilí nílili? Jeobá isili japi mi we kilí nílima.
5. ¿Chúriká tamó iʼwírima Jeobá jiti tamujé sulala alí natáala kilí nílima?
5 Echoná Filipenses 4:7 ruyé japi Jeobá isimí japi ta kilí nílipo. Nalí ayénachó jéaní: “ʼYemi mi echirigá tibútama sulachí niráa, ayénachó [...] máputamo sinibí galabé niráa ʼnatabo”. Echi raʼíchali “tibútama” echi sontarsi néeli japalí jaré echi, tibuli echoná ciudad jiti ke cha olárami nima. Echi pagótami japi echoná pireili, omérili we aʼlá ochiyá jiti aʼlá machiyé japi echi sontarsi tibúa jali echoná yéwichi. Echi riká cho, japalí Jeobá isimí japi tamujé sulala alí natáala kilí nílima, tamujé ko ma ti ke majaa (Sal. 4:8). Japi riká Ana, tákoré echi namuti jilírami japi ta ikí wilí rojorá, tamujé ko ati omero kilí niya (1 Sam. 1:16-18). Echi riká nísaká, echi tamó iʼwírima we aʼlá natia alí nokayá japi aʼlá ju.
Raʼichá Jeobá yúa japalí mi chéami ma ku kilí nílisa alí echi ko tibuma mujé sulala alí mujé natáala. (Iné echi párrafos 4 aminá 6).
6. ¿Piri nokiboa jiti Onorúami tamó iʼwírima kilí niya? (Ayénachó iné echi imágenes).
6 Japi tamujé nokisáré. Japi riká echi pagótami japi pireili echoná ciudad, omérili tania bilé sontarsi japi echi tibuma, tamujé ayénachó omeri anea Jeobá japi tamujé tibuma. Sinibí raʼichabo echi yúa japalí ti yena ma ku kilí nili (Luc. 11:9; 1 Tes. 5:17). Echi riká nokali Luis alí echi upila Ana japalí Luis aneri japi ma jaré michá bi bitélima. Echi ko jéanili: “Japalí ti ikí jepuná iyiri namuti, we jilí ju natia piri ti nokiboa. Nalí raʼichia Jeobá yúa we tamó iʼwírili jiti kilí nílipo tákoré jilí nili”. Okuánika echi anijoli japi wisabé niraa raʼíchili Jeobá yúa alí tánili japi echi iʼwírima ke wiká namuti natia, kilí niya ne sulachí jonsa alí aʼlá machiká nokayá jaré namuti. Echi ko nílili japi Jeobá a iyali japi echi tánili. Ami echi riká cho ikiyáaká, kiti riwé raʼichia Jeobá yúa alí mujé ko inema chúriká Jeobá mi iʼwiri jiti mi kilí nílima mujé sulala alí mujé natáala (Rom. 12:12).
JEOBÁ KO ISIMA JAPI TA KU KILÍ NÍLIPO
7. ¿Chuti níliporé japalí ti ikí namuti jilírami?
7 Namuti jilírami. Ati ikiyáaká namuti we jilírami, a keʼré japi ta ke aʼlá nátika nokiboa jaré namuti. Alí ti níliporé japi riká ko wikáami iyenia echoná nasipa mar japoná echi baʼwí we jiwérami nokewi barco. Echi riká nílili Ana japalí Luis mukuli. Echi ko jéaní: “Isini kaachi we ni omona nilie alí ni binoy ku natimái. Nalí isini kaachi ko ni iyoa nilie jiti Luis ma ke tamí yúa biteili”. Ayénachó aní japi isini rawé bineli ka nílili alí risiyá nilie jiti ayénachó isísaré echi nóchali japi Luis isili. Echi ko nílili japi riká ko atiyá echoná nasipa mar japoná we nokea maní echi baʼwí. ¿Chúriká tamó iʼwiri Jeobá japalí ti ma ke omeria nili?
8. ¿Piri tamó ané Jeobá echoná Isaías 33:6?
8 Japi Jeobá isimí. Echi ko tamó ané japi tamó iʼwírima jiti ta ke wichiboa (leeri Isaías 33:6). Japalí bilé barco iná japoná echi baʼwí we nokea maní, a keʼré japi we jiwérami nokema anajumi niraa. Jiti la echi barco olá namuti echoná rilemi japi anajúchina uchuka siri echoná rilemi baʼwírili. Echi iʼwiri japi echi barco ke me jiwera nokema alí echi riká echi pagótami japi echoná siri we kanílika simía alí ke majaa. Nalí jiti echi namuti iʼwírima japi echi barco ke me jiwera nokema, wabé aʼlá ju japi echi barco inama echoná baʼwírili. Echi riká cho, ati nakiyáaká japi Jeobá tamó iʼwírima jiti bilé namuti we jilírami ke tamó jiwera nokéwima, ati aminabi “inárisaré”, echi ko aniwáami ju japi ta ke riwésaré nóchilia Jeobá.
We aʼlá binea japi aní echi publicaciones mi iʼwírima jiti mi ku kilí nílima. (Iné echi párrafos 8 alí 9).
9. ¿Chúriká tamó iʼwiri echi namuti japi Jeobá nijí néeka echi organización? (Ayénachó iné echi imágenes).
9 Japi tamujé nokisáré. Ati wiká namuti nátiaká japalí ti ikí namuti we jilírami, iʼwérili nokiboa nokayá echi namuti japi tamó iʼwiri muliwia Jeobá. A keʼré japi ta ke omeri nokayá japi riká chabé, nalí newalabo japi Jeobá ko ke siné tamó tani japi ta ke omeri nokayá (ayénachó iné japi aní Lucas 21:1-4). Kiti siné riwé bineli niraa binea alí natia japi mi biné. Néeka echi organización, Jeobá ko tamó iyá wiká artículos alí videos we baʼóami japi tamó iʼwírima kilí niya japalí ta ikí namuti jilírami. Jiti mi riwimea japi mi newalé, ami omeri néea echi aplicación JW Library®, echi Índice de Publicaciones Watch Tower alí Guía de estudio para los testigos de Jehová. Monika, japi ta jitra ma raʼíchili, anili japi néeli echi namuti japalí we omona nílili wiká namuti natia. Japi riká, isini kaachi echi ko aali echi raʼíchali “ira”, “traición” o “lealtad”, alí leérili japalí chéami ma kilí nílili. Echi ko jéaní: “Japalí ni chotásiki binea, a ni we sawiliwia nilie. Nalí japalí ni aminabi leerie, ani ku kilí nilie japi riká ko Jeobá tamí mutúa. Alí japalí ni leerie ani machiyé japi Jeobá aʼlá machí japi ni nili alí tamí iʼwírili”. Jeobá ayénachó omeri mi iʼwiria jiti mi ku kilí nílima japalí chéami ma ke mi olama echi namuti jilírami (Sal. 119:143, 144).
JEOBÁ TAMUJÉ IʼWÍRIMA
10. ¿Chuti níliporé japalí ti ikí namuti we jilírami?
10 Namuti jilírami. Japalí ti ikí namuti we jilírami, nirúlimiré jaré rawé japi ta ma ke jiweria nílipo tamujé ripokala alí natáala. A keʼré japi nílipo japi riká bilé japi we jiwérami máami nili, nalí jipi ko ma ke omeri jiti kojoní biléana ronola. Alí ati we jilí niraa níliporé nokayá echi nóchali japi ta chabé ko ke jilí nirali o ke ti newa níliporé nokinalia echi nóchali japi ta chabé ko we kanílili nokayá. Japi riká Elías, ati pe boʼináliporé bi ochiyá (1 Rey. 19:5-7). ¿Piri tamó ané Jeobá japi isima japalí ti ke jiweria nili?
11. ¿Piri che jaré namuti isimí Jeobá tamó iʼwírimia? (Salmo 94:18).
11 Japi Jeobá isimí. Echi ko aní japi tamó iʼwírima (leeri Salmo 94:18). Japi riká echi japi máami nili apoli ronola newalé japi bilé iʼwírima, echi riká cho a keʼré japi tamujé ayénachó newalebo japi bilé tamó iʼwírima jiti aminabi nóchilipo Jeobá. Japalí ti echi nili, Jeobá ko jériká tamó ané: “Nijé Jeobá japi mujé Onorúamiwala ju, ani mi chapiká inama watoná sikala; nijé ju japi ni mi ané: ‘Kiti majaa. Nijé mi iʼwírimaʼ” (Is. 41:13). Japalí echi silíami David ikili namuti jilírami alí najátarami nili, echi ko machili japi Jeobá echi yúa asali, jiti la jéanili: “Mujé watoná sikala tamí chapí jiti ni ke wichimea” (Sal. 18:35). Nalí, ¿piri ti nokisáré jiti Jeobá tamó iʼwírima?
Riwé japi mujé téemala, amigos alí echi ancianos mi iʼwírima. (Iné echi párrafos 11 aminá 13).
12. ¿Jépuká néema Jeobá tamó iʼwírimia japalí ti we omona nili?
12 Wisabé niraa Jeobá ko isimí japi jarecho pagótami tamó iʼwírima jiti ke wichiboa. Japi riká, siné kaachi David ko we siwea nílili, nalí echi amígowala Jonatán simili inesia alí iʼwérili iyali (1 Sam. 23:16, 17) Alí, Elías iʼwírimia, Jeobá ko néeli Eliseo jiti iʼwírima echi namuti jitra japi newaleli (1 Rey. 19:16, 21; 2 Rey. 2:2). Alí tamujé iʼwírimia, Jeobá ayénachó nee tamujé téemala, amigos alí echi ancianos. Nalí a bichíwali ju, japalí ti we omona nili, tamujé ko awénili mochínali. Sinéami ta echi riká ikí. Nalí, ¿piri ta nokisáré jiti Jeobá tamó iʼwírima?
13. ¿Piri nokiboa jiti riwepo japi Jeobá tamó iʼwírima? (Ayénachó iné echi imágenes).
13 Japi tamujé nokisáré. Iʼwérili nokiboa ke awénili mochía. Japalí ti awénili muchuwi, ati we nata tamujé aboi jitra, ayénachó echi namuti japi ta ikí. Alí echi isímiré japi ta ke aʼlá nokiboa (Prov. 18:1). A bichíwali ju japi sinéami tamujé isini kaachi newalebo awénili mochía alí wabé japalí ti we risoa ikisaa. Nalí, ati wisabé niraa echi riká nokisáaká awénili mochía, ati ke riwea riwélipo japi Jeobá tamó iʼwírima. Jiti la, tákoré tamujé jitra we jilí ju, riwepo japi tamujé téemala, amigos alí ancianos tamó iʼwírima. Natabo japi Jeobá ju japi nee echi pagótami tamó iʼwírimia (Prov. 17:17; Is. 32:1, 2).
JEOBÁ TAMÓ KU KANÍLITIMA
14. ¿Piri namuti isímiré japi ta we majaa nílipo?
14 Namuti jilírami. Isini kaachi a nirúlimiré jaré rawé japalí ti we majaa nílipo. Echoná Biblia nirú historias echi pagótami jitra japi we nijéwami nili Onorúami alí japi anijoli japi isini kaachi we sawilíwili majaa echi sayérala o jarecho si namuti we jilírami (Sal. 18:4; 55:1, 5). Echi riká cho tamujé, ati sayéritami níporé echoná escuela, japoná ti nocha, tamujé téemala o echi Gobierno jitra. Ayénachó ati nayúporé bilé nayulí japi ke saʼwiwáami ju. Japalí ti echi riká ikí, ati níliporé japi riká bilé taa towí japi ke bilé olá japi tibuma. Nalí, ¿chúriká tamó iʼwiri Jeobá?
15. Japi riká aní Salmo 94:19, ¿piri tamó ané Jeobá japi isima?
15 Japi Jeobá isimí. Echi ko tamó ku kaníliti alí isimí japi ta kilí nílipo (leeri Salmo 94:19). Natabo bilé taa tiwé jitra japi we majaa atí alí ke omeri ochiyá jiti we jiwérami ukuyá wilí alí weli ané echi ralamú. Nalí miná ko nawá echi onolá, mutú alí echi ko kilí nili alí ma ochiká ripí. Tákoré a bijí we jiwérami ukuyá wilí, echi ko ma ke majaa jiti binoy onolá echi mutú. Echi riká cho, japalí ti sawiliwi majaa, ati newaléboré japi Jeobá tamujé mutuka iʼwiria riwélima japalí ti chéami ma ku kilí nili. ¿Piri ti nokisáré jiti Jeobá tamó ku kanílitima?
Riwé japi Jeobá mi iʼwírima néeka echi Biblia. (Iné echi párrafos 15 alí 16).
16. Ati nakiyáaká japi Jeobá tamó ku kanílitima, ¿piri ta nokisáré? (Ayénachó iné echi imágenes).
16 Japi tamujé nokisáré. We natéami ju japi ta ke riwepo raʼichia Jeobá yúa alí leeria echi Biblia (Sal. 77:1, 12-14). Ati echi riká nokisáaká, japalí ti ikí namuti we jilírami, ati bachá natáboré iʼwírili tánimia Jeobá. Ruyepo Jeobá echi namuti japi ta jitra we nata, japi tamó majari alí riwepo japi echi tamó iʼwírima alí tamó ku kanílitima néeka echi Biblia (Sal. 119:28). A nirú jaré libros japi echoná Biblia uchuwi, japi we tamó iʼwérili iyama japalí ti we majaa nili, japi riká echi libros Job, Salmos alí Proverbios, alí echi raʼíchali japi Jesús anili echoná Mateo capítulo 6. Ami raʼichásaká Jeobá yúa alí mi leérisaká echi Biblia, ami inema chúriká Jeobá mi ku kaníliti.
17. ¿Piri ti newalásaré?
17 Sinibí natabo jepuná: tákoré ikiyé namuti we jilírami, Jeobá sinibí echoná asimea tamó iʼwírimia. Echi ko ke siné tamó awénili riwema (Sal. 23:4; 94:14). Newalabo japi echi ko tamó ané japi tamó tibuma, isima japi ta ku kilí nílipo, tamó iʼwírima alí tamó ku kanílitima. Isaías ko jéaneli Jeobá: “Ami tibuma echi japi we mi bichiwi, ami isima japi sinibí kilí nílima, jiti echi ko we mi bichiwi” (Is. 26:3). Jiti la, we bichiwi Jeobá alí riwé japi echi mi iʼwírima. Ami echi riká isísaká, mujé ko we jiwérami nima alí mi anachama tákoré mi ikiyé namuti we jilírami.
¿PIRI MI ANIMEA?
-
¿Chu kabú ti wabé newaléboré japi Jeobá tamó iʼwírima?
-
¿Chu iyiri ju echi naó namuti japi riká isimí Jeobá tamó iʼwírimia japalí ti ikí namuti we jilírami?
-
¿Piri nokiboa jiti ta riwepo japi Jeobá tamó iʼwírima?
CANCIÓN sjj-S 12 Jehová, nuestro gran Dios
a Sinúrika ju jaré riwalá.