1. ¿Chúriká mi nata japi ju Jeobá?

 ¿AMI siné kaachi nátili chúriká ju Jeobá? Japalí mi echi yúa raʼicha, ¿chúriká mi nata japi ju echi? Tákoré ti ke ritiwá Jeobá, echi Biblia ruyé wiká sinúrika japi riká ju echi. Isini kaachi riwá “rayénali alí escudo”, alí “bilé naʼí we ratábami” (Sal. 84:11; Heb. 12:29, TNM). Echi profeta Ezequiel anili japi Jeobá ju japi riká bilé rité zafiro riwéami, bilé namuti we ratábami alí japi riká bilé olimí we baʼóami (Ezeq. 1:26-28). Machiyá echi jitra, ati níliporé japi ta ke oméripo muliwia echi o majaa níliporé.

2. ¿Chúsiá jaré we jilí niraa muliwia Jeobá?

² Jiti ta ke ritiwá Jeobá, ati jilí niráboré natia japi echi tamó galé. O echi namuti japi ta ikili chabé —japi riká ke ti oláliré bilé onolá japi tamó galeli— echi isímiré japi natabo japi Jeobá ke siné tamó galema. Nalí Jeobá ko we aʼlá machí japi ta nili alí suwaba echi namuti japi ta ikili chabé. Jiti Jeobá ko nakí japi ta machiboa japi we tamó galé, echi ko tamó ruyé echoná Biblia japi chúriká ju binoy.

3. ¿Chúsiá ti binepo Jeobá jitra alí japi chu yena galéami ju?

³ Japalí echi Biblia raʼicha Jeobá jitra, echoná ko aní japi echi ko “ne wabé galéami ju” (1 Juan 4:8). Suwaba japi echi isimí néwariwéliti japi we galéami ju. Jeobá ko wabé galéami ju, jiti la we galé sinéami. Ke bi galé echi pagótami japi nijéwami ju, nalí ayénachó japi ke nijewi echi (Mat. 5:44, 45). Jenaʼí binelíwami binepo Jeobá jitra alí japi chu yena galéami ju. Ati aminabi binésaká echi jitra, ati aminabi we galepo.

JEOBÁ WE TAMÓ GALÉ

4. ¿Chumi nili natia japi Jeobá wabé galéami ju? (Ayénachó iné echi foto).

⁴ Jeobá ko “ne wabé galéami” ju (Sant. 5:11). Echoná Biblia  aní japi Jeobá ko ju japi riká bilé iyela we galéami (Is. 66:12, 13). Natá bilé iyela japi we galeka tibú echi ranala japi taa muchi ju. Echi ko mutú alí we simárika raʼichi. Japalí echi taa muchi nalá, echi iyela ko sapú maa iyamia japi newalé. Echi riká cho, Jeobá ayénachó tamujé yúa atí japalí ti omona muchuwi. Jiti la echi salmista jériká osali: “Japalí ni we risoa nilie, mujé isié japi ni ku kilí nílima” (Sal. 94:19).

5. ¿Chumi nili machiyá japi Jeobá we galéami ju alí chúsiá?

⁵ Jeobá ko ke siné riwé japi echi galé (Sal. 103:8). Echi ko ke siné tamó riwé galea tákoré ti isini ke aʼlá nokayé. Wisabé niraa echi israelitas ko omonáritili Jeobá; nalí japalí echi ko ku wikáwili tanie Jeobá, echi ko néwariwélitie japi a bijí we galéi. Siné kaachi echi ko aneli binoy puéblowala japi we natéami niraa inéi alí japi we galéi (Is. 43:4, 5). Jeobá a bijí we galéami ju alí ti machí japi echi ko ayénachó we tamujé galé. Tákoré ti nokayé namuti we chati, echi ko ke siné tamó riwé. Ati wikáwili tánisaká echi alí ti iʼwírili tánisaká, echi ko ke riwema tamó galea. Alí echi ko tamó ané japi tamó ku wikáwima (Is. 55:7). Echi Biblia aní japalí Jeobá tamujé ku wikawi, ayénachó tamó ku “kanílatama sulachí niráa” (Hech. 3:19).

6. ¿Piri ta biné Jeobá jitra japi riká aní Zacarías 2:8?

⁶ (Leeri Zacarías 2:8). Jeobá ko aní japi tamujé ko ju japi riká ko echi binoy busila relewala. Echi busila we natéami ju japi ta olá echoná ripokala alí we sapú okolá japalí bilé namuti pachana bakisaa. Jiti la ju japi riká ko Jeobá aniyá: “Japalí bilé emi cha olá, echi ko cha olá bilé namuti japi we natéami ju tamí jitra”. Jiti Jeobá we tamó galé, echi ko we risoa nili japalí tamujé risoa nili alí tamujé tibúnali. Jiti la, ati oméripo anea Jeobá: “Tamí tibú japi riká mujé busila relewala” (Sal. 17:8).

7. ¿Chúsiá ti we bichíwisaré japi Jeobá we tamó galé?

⁷ Jeobá ko nakí japi mi we aʼlá bichíwima japi echi we mi galé. Nalí echi ko machí japi jaré namuti japi ta ikili chabé o japi ta ikí jipi, isima japi ta natabo  japi echi ke tamó galé. Jiti la we natéami ju japi mi bichíwima japi echi we mi galé. ¿Piri namuti mi iʼwírima? Binea chúriká Jeobá néwariwéliti japi we galé Jesús, echi ungidos alí sinéami tamujé. Echi ju japi ta binepo jipi.

JEOBÁ KO NÉWARIWÉLITI JAPI WE GALÉAMI JU

8. ¿Chúsiá Jesús we bichíwili japi Jeobá we galeli echi?

⁸ Jeobá alí binoy Nolá Jesús japi echi we galé, ma wiká bamíali napawika pireili. Jiti la we napawika ju alí we galé anakupi niraa. Ke nirú jarecho japi ma wiká bamíali jonsa napawika piré japi riká echi okuaka. Echoná Mateo 17:5, Jeobá anili japi we galeli Jesús. Echi ko ke bi anili “¡Nijeni ne wabé ganili echi Binói jiti!”, nalí, jiti nakiyé japi sinéami machimea japi we galé Jesús alí japi we natéami niraa inéi japi isié alí japi isima pe aminana, echi ko jéanili: “¡Jeʼná Jesusi Nijé Ranala ju, mapu Nijeni ne wabé galé!” (Efes. 1:7). Jesús ko we aʼlá bichíwili japi Jeobá we galeli echi. Jiti la, echi ko wisabé niraa echi riká anili (Juan 3:35; 10:17; 17:24).

9. ¿Chúriká ruyé echi Biblia japi Jeobá we galé echi ungidos? (Romanos 5:5).

⁹ Jeobá ayénachó ané echi ungidos japi we galé (leeri Romanos 5:5, TNM). Echi bachá raʼicháliami japi riká oserúami nili jepuná versículo, ruyá anili japi Jeobá we galé echi ungidos japi riká ko echi baʼwí japi we jiwérami mawá. ¡We simárika aní jepuná japi Jeobá we galé echi ungidos! Alí echi ungidos ko a machí japi Jeobá we galé echi (Jud. 1, TNM). Sinéami echi ayénachó inili japi riká echi apóstol Juan, japi anili: “Ne galá machisí mapu chuyena tamujé tamí ne wabé simírami galé Riosi [...]. Echijítita Binói kúchuwala niráa anérami ju” (1 Juan 3:1). ¿Achi echi ungidos bi galé Jeobá? Ke. Japi riká ti ma inepo, echi ko néwariwéliti japi we galé sinéami japi echi nijewi.

10. ¿Chúriká néwariwéliti Jeobá japi we tamó galé?

¹⁰ ¿Chúriká néwariwéliti Jeobá japi we tamó galé? Echi ko nijili binoy Nolá Jesús jiti mukumea tamujé jitra. Echi riká ti machí japi echi we tamó galé (Juan 3:16; Rom. 5:8). Jiti Jeobá nijili binoy Nolá, ati oméripo wikáwili tania echi chati namuti jitra japi ta noká alí echi amígowala niya (1 Juan 4:10). Ati we aʼlá natásaká japi nokali Jeobá alí Jesús tamó jitra, ati we aʼlá inámipo japi echi we tamó galé ibili niraa (Gál. 2:20, TNM). Jeobá ko ke echi riká bi isili jiti wachíniga isíami ju, nalí echi ko echi riká isili jiti we tamó galé. Echi ko néwariwélitili japi we tamó galé nijika binoy Nolá Jesús, japi we galeli, alí riweli japi risoa olárami nima alí mukumea tamujé jitra.

11. ¿Piri ta biné japi aní Jeremías 31:3?

¹¹ Japi riká ti ma ineli, Jeobá ke bi aní japi we tamujé galé, nalí ayénachó néwariwéliti (leeri Jeremías 31:3). Tamó iʼwírili jiti mulíwipo echi jiti we tamujé galé (ayénachó iné japi aní Deuteronomio 7:7, 8). Ke bilé namuti isima japi echi riwema tamó galea (Rom. 8:38, 39, TNM). ¿Chumi nili machiyá jepuná? Ma leéripo Salmo 23, alí iné chu nílili David machiyá japi Jeobá we galeli echi alí japi chu nílima mujé.

¿CHUMI NILI MACHIYÁ JAPI JEOBÁ WE MI GALÉ?

12. ¿Piri jitra raʼicha echi Salmo 23?

¹² (Leeri Salmo 23:1-6). Echoná Salmo 23, David ko we bichíwika anili japi  Jeobá we galeli echi alí japi we simárika tibuli. Anili japi Jeobá ju japi echi niseri, alí ruyeli chúriká isimí Jeobá echi yúa jiti echi amígowala ju. David ko ke majali jiti machili japi Jeobá tibúe alí we bichíwili echi. Ayénachó machili japi Jeobá we galeli alí japi ke siné bineli riwema japi yena ko mukú. Ma binepo chúsiá David we bichíwili Jeobá.

13. ¿Chúsiá David we aʼlá machili japi Jeobá tibúe echi?

¹³ “Sinibí ni olama japi ni newalé”. David ko nílili japi Jeobá we aʼlá tibúe jiti sinibí iyali japi newaleli. Ayénachó we kanílili jiti Jeobá we galeli alí jiti echi amígowala nili. Jiti la, David ko we aʼlá bichíwili japi tákoré ikiyé pe chuwé namuti, Jeobá ko sinibí iyama japi newalé. Echi ko ke me nátili echi namuti jilírami japi ikili, nalí nátili japi Jeobá we galeli, alí echi namuti isili japi we kanílima (Sal. 16:11).

14. ¿Chúriká néwariwéliti Jeobá japi we tamó galé?

¹⁴ Jeobá ko we simárika tamó tibú alí wabé japalí ti ikí namuti we jilírami. Ma binepo japi ikili Claire, a japi aminá simírikami 20 bamíali nocha echoná Betel. Echi ko aní japi we risoa nílili japalí echi téemala ikili jaré namuti we jilírami: echi onolá mochokóala nayuli, bilé echi rejimala riweli testigo Jeobá niya, echi téemala ma ke olali nóchali alí ayénachó echi kalí. ¿Chúriká néwariwélitili Jeobá japi echi tibuli? Claire jéaní: “Jeobá ko sinibí iyali nijé téemala suwaba japi newaleli ibili rawé. Wisabé niraa iyali echi namuti  japi ni ke mayéi japi iyama. Ani newalá japalí Jeobá néwariwélitili japi we tamí galé alí ni we nata echi jitra. Echi tamí iʼwiri jiti ni ke siwema japalí ikí namuti we jilírami”.

15. ¿Chúsiá David ku jiweria nílili? (Ayénachó iné echi dibujo).

¹⁵ “Tamí jiwérali iyá”. David ko ikiyé wiká namuti we jilírami, jiti la isini kaachi siwea nilie (Sal. 18:4-6). Nalí, inea japi Jeobá we simá isíami nili echi yúa alí we galeli, echi iʼwírili jiti ku jiweria nílima. David ko nílili japi riká ko Jeobá echi toyá “echoná asalárili siyónachi” alí jiti “isábima japoná waʼlú baʼwí maní”. Jiti la, echi ko ku jiweria nílili alí aminabi we kanílika nóchili Jeobá (Sal. 18:28-32).

16. ¿Chumi nílili mujé japi Jeobá mi iyali jiwérali?

¹⁶ Japalí ti ikí namuti we jilírami, tamujé ayénachó ati oméripo aniyá: “Matétarabá jiti Jeobá sinibí we galéami ju tamujé ko ke suwábitami nili” (Lam. 3:22; Col. 1:11). Ma inepo japi ikili Rachel. Echi ko we risoa nílili japalí echi kunala riweli Jeobá alí echi, japalí niruili pandemia COVID-19. ¿Chu isili Jeobá echi iʼwírimia? Echi hermana jéaní: “Jeobá ko isili japi ni nílima japi ni we galéliwa. Tamí iyali wiká amigos japi tamí yúa simarie, tamí iyali koʼwáami, tamí júulie mensajes we semati alí textos japi tamí iʼwérili iyali. Ayénachó tamí kanílitili alí tamí newalárili japi Jeobá tamí tibúa asali. Ani sinibí waʼlú matétara iyá Jeobá suwaba echi hermanos jitra japi ju japi riká nijé téemala japi we tamí galé”.

17. ¿Chúsiá David omérili jéaniyá: “Ke ni bilé iyiri namuti majama”?

¹⁷ “Ke ni bilé iyiri namuti majama, jiti mujé tamí yúa atí”. David ko sayéritami nili echi pagótami jitra japi we chati nili alí wisabé niraa ne sojí miʼlirúami nili. Nalí natia japi Jeobá we galeli echi, iʼwírili jiti ke majama. Echi ko nílili japi riká ko Jeobá echi yúa atiká, jiti la anili japi Jeobá echi iʼwírili jiti ke majama (Sal. 34:4). Tákoré isini kaachi David we majali, nalí ke siweli jiti machili japi Jeobá we galeli.

18. Japalí ti ikí namuti we jilírami japi tamó majari, ¿chúriká tamó iʼwiri machiyá japi Jeobá we tamó galé?

¹⁸ Japalí ti ikí namuti we jilírami japi  tamó majari, ¿chúriká tamó iʼwiri machiyá japi Jeobá we tamó galé? Bilé precursora Susi riwéami, aní chu nílili echi alí echi kunala japalí echi ranala binoy miʼali: “Japalí ti ikí namuti we jilírami, ati we risoa nili alí ti we majaa nili japi ikimea jarecho namuti we chati. Nalí jiti Jeobá we simá isíami ju, ati nili japi ta tibúliwa echi jitra”. Rachel, japi ta jitra raʼíchiki echoná párrafo 16, jéaní: “Siné rokojó japalí ni we omona asali alí we majali, alí ni níliki japi ni ke omérima anachia, nalaka iʼwírili tániki Jeobá. Sapú ni níliki japi riká ko Jeobá tamí mutúa jiti ni ku kilí nílima, japi riká isimí bilé iyela echi taa muchi yúa. Miná ko ma ni ku omériki ochiyá. Ke ni siné wikawama echalí rokojó”. Bilé anciano Tasos riwéami, naó bamíali erta asali jiti ke sontarsi nínali. Echi ko ruyé chúriká Jeobá we simá isili echi tibúa: “We rasíruka wiká tamí iyali japi ni newaleli alí echi tamí iʼwírili jiti ni aminabi we bichíwima echi. Ayénachó tamí jiwérali iyali jiti ni kilí nílima tákoré we jilí nili japoná ni erta asali. Jepuná tamí iʼwírili machiyá japi ni aminabi we bichíwisaká Jeobá, nijé ko aminabi we nílima japi we tamí galé. Jiti la ni chotásiki precursor regular niya tákoré ni erta asali”.

MULÍWIPO JEOBÁ JAPI WABÉ GALÉAMI JU

19. a) ¿Piri jitra ruyepo Jeobá ati bichíwisaká japi echi we tamó galé? b) ¿Chu iyiri textos mi baʼori japi raʼicha japi Jeobá we galéami ju? (Iné echi recuadro “ Textos japi tamó iʼwiri nilia japi Jeobá we tamó galé”).

¹⁹ Echi ejemplos japi ta ma bineki néwariwéliti japi Jeobá ko we galéami ju (2 Cor. 13:11). Echi ko we tamujé galé ibili niraa. Jiti la ti we aʼlá machí japi echi ko ke siné tamó riwema galea (Sal. 32:10). Japalí ti aminabi nata chúriká néwariwéliti japi tamó galé, tamujé ko aminabi we bichiwi echi alí aminabi we mulipi ka nílipo echi yúa. Jiti la ti omeri anea Jeobá ne sulachí jonsa japi ta newalé japi echi tamó galema. Ati omeri ruyea suwaba japi ta nili alí bichiwia japi echi ko aʼlá machí japi ta nili alí japi tamó iʼwírinali (Sal. 145:18, 19).

20. ¿Chúsiá ta mulíwinali Jeobá?

²⁰ Nilia japi Jeobá we tamó galé, echi ko ju japi riká sukalia echoná naʼírali echalí rokojó japalí we ruluwá. Ati we simá nili echoná mochía. Echi riká cho, tamujé sinibí ti mochínali Jeobá yúa. Tákoré Jeobá we jiwérami ju, ayénachó we galéami ju alí simá isíami. ¡We ti kanili machiyá japi Jeobá we tamó galé! Jiti la sinéami jériká ti aninali: “Ani galé Jeobá” (Sal. 116:1).