1. ¿Piri ta nokisáré sinéami, alí chúsiá isini kaachi a jilí ju?

 SUWABA rawé ati natásaré piri namuti nokiboa. Jaré echi namuti ke newalé japi we natabo, japi riká piri ta okebo alí chúrikó ochiboa. Nalí nirú jarecho namuti japi newalé japi aminabi we aʼlá natabo. Japi riká, chúriká ti nokiboa jiti ke nayupo o japalí ti nayusa, chúriká kaníliami nipo, chúriká nokiboa tamujé téemala yúa alí nóchilia Onorúami. Ati nakí japi echi namuti japi ta nokiboa tamó iʼwírima alí ayénachó tamujé téemala, nalí japi ta wabé nakí ko ju japi Jeobá kanílima (Rom. 12:1, 2).

 2. ¿Piri tamó iʼwírima aʼlá nátika nokayá?

² Jepuná binelíwami binepo bikiá namuti japi tamó iʼwírima aʼlá nátika nokayá: 1) aʼlá machiyá suwaba namuti, 2) aʼlá natia piri nata Jeobá echi namuti jitra alí 3) kilí niraa natia. Ayénachó binepo piri ta omeri nokayá aminabi aʼlá nátami nimia (Prov. 2:11).

AʼLÁ MACHIYÁ SUWABA NAMUTI

 3. Néeka bilé ejemplo ruyé chúsiá we natéami ju japi ta aʼlá machiboa echi namuti kecho bijí echi riká nokayá.

³ Jiti aʼlá nátika nokiboa, ati bachá aʼlá machisáré echi namuti. ¿Chúsiá we natéami ju jepuná? Natabo japi bilé pagótami we nayúami simí echi doctor yúa. ¿Achi echi doctor iyama ówili ke bachá nárisaká piri ikili o piri jitra nayú? Ke tasi. Echi riká cho, tamujé ko we aʼlá nátika nokiboa ati bachá aʼlá machisáaká echi namuti jitra japi ta nokinali. ¿Chúriká ti omeri nokayá?

 4. Japi riká aní Proverbios 18:13, ¿piri ta nokisáré jiti ta machiboa suwaba namuti? (Ayénachó iné echi fotos).

 ⁴ Naria jarecho pagótami tamó iʼwírima machiyá suwaba namuti japi ta machisáré. Japi riká, natabo japi tamó bayeri napawika kanílika simárimia. ¿Achi ta simásaré? Ke ti aʼlá machiyáaká echi japi tamó bayeli o ke ti machiyáaká piri nokimea, ati nárisaré jepuná: “¿Kumi alí chu kabú napawima? ¿Chu kipu pagótami simama? ¿Jépuká inema achi ke chati namuti nokayá? ¿Jépuká simama? ¿Piri namuti nokimea? ¿Achi nirúlima alcohol?”. Machiyá suwaba jepuná namuti tamó iʼwírima aʼlá nátika nokayá (leeri Proverbios 18:13).

 5. ¿Piri ta nokisáré ma ti machisáaká suwaba namuti?

⁵ Ma ti machisáaká suwaba namuti, jipi ko ti aʼlá natásaré suwaba japi ikiméaré. Japi riká, ¿piri nokiboa ati machisáaká japi echoná simama pagótami japi ke nijewi japi aní echi Biblia o waʼlú bajísaká echi alcohol? ¿Achi ti mayé japi echoná chotásima nokayá namuti japi ke aʼlá ju? (1 Ped. 4:3). ¿O piri nokiboa ati machisáaká japi ta ke simabo napawíliwachi o nawisasia jiti ta simabo echoná fiesta? Aʼlá natia suwaba namuti japi ikiméaré, tamó iʼwírima aʼlá nátika nokayá. Nalí jepuná ke bi ju japi ta nokisáré. Ma machisaa piri tamujé nata echi namuti jitra,  jipi ko ata nárika nokisáré piri nata Jeobá echi namuti jitra (Prov. 2:6).

AʼLÁ NATIA PIRI NATA JEOBÁ ECHI NAMUTI JITRA

 6. Japi riká aní Santiago 1:5, ¿chúsiá ti tánisaré Jeobá japi tamó iʼwírima?

⁶ Ati tánisaré Jeobá japi tamó iʼwírima inamia japi riká echi nata. Echi ko aní echoná Biblia japi tamó iʼwírima machíami niya (leeri Santiago 1:5). Echi riká machiboa achi echi namuti japi ta nokinali kanílitima echi o ke.

 7. ¿Chúriká ti omeri machiyá piri nata Jeobá? Ruyé bilé ejemplo.

⁷ Ma iʼwírili tánisa Jeobá, jipi ko ti aʼlá inésaré chúriká tamó iʼwiri. Natabo jepuná ejemplo: japi ta biléana simíali alí ti echomí wikali. A keʼré japi ta iʼwírili tánipo bilé japi echoná bité. Nalí, ¿achi ta ku simabo, echi kecho tamó anésaká japi ta nokisáré? Ke tasi. Japi ta nokiboa ko ju, we aʼlá kipúa japi echi aní. Echi riká cho, ma iʼwírili tánisa Jeobá, jipi ko ti áasaré echoná Biblia japi echi nulá alí echi busuréliami japi echi aní echi namuti jitra. Checho natabo echi ejemplo japi ta raʼíchiki japi tamó bayeri napawika kanila simárimia. Kecho bijí aniyá achi ta simabo o ke, ati natásaré piri aní echi Biblia echi fiestas jitra japoná ke aʼlá nokiwá alí echi pagótami jitra japi nirúlima echoná japi ke aʼlá ju japi ta napawipo echi yúa. Ayénachó ti natásaré japi wabé natéami  ju nijewia echi Onorúami Gobiérnowala alí ke ko nokayá echi namuti japi tamujé nakí (Mat. 6:33, TNM; Rom. 13:13; 1 Cor. 15:33).

 8. ¿Piri ta omeri nokayá ata newaléaká iʼwírili aamia echi namuti japi ta machinali? (Ayénachó iné echi foto).

⁸ Nalí a keʼré japi isini kaachi ati newalebo iʼwírili aamia echi namuti japi ta machinali. Bilé hermano o hermana we machíami tamó iʼwírimiré machiyá chúriká nokiboa. Nalí aʼlá nima japi tamujé aboi ayénachó aapo japi ta machinali. A nirú wiká namuti japi jitra ti omeri binea, japi riká echi Guía de estudio para los testigos de Jehová alí echi libro Textos bíblicos para la vida cristiana. Newalabo japi ta echi riká noká jiti ta nokinali echi namuti japi Jeobá galé.

 9. ¿Chúriká ti machiboa achi echi namuti japi ta nokiboa kanílitima Jeobá? (Efesios 5:17).

⁹ ¿Chúriká ti machiboa achi echi namuti japi ta nokiboa kanílitima Jeobá? Bachá, ati we aʼlá machisáré Jeobá. Proverbios 9:10 aní: “Machiyá echi japi Wabé Biʼwíkami ju, echi ko ju aʼlá inamia”. Jepuná ko aniwáami ju jiti ta aʼlá inámipo achi aʼlá ju japi ta nokiboa, ati aʼlá machisáré chu iyiri ju Jeobá, japi echi isima alí echi namuti japi galé alí kichí. Nárika nokiboa: “Nátika echi namuti japi ni machí Jeobá jitra, ¿achi echi namuti japi ni isima kanílitima echi?” (leeri Efesios 5:17, TNM).

10. ¿Chúsiá ti wabé natéami niraa iné japi aní echi Biblia alí ke ko japi aní tamujé téemala alí echi pagótami?

¹⁰ Jiti kanílitipo Jeobá, isini kaachi ati nokisáré namuti japi ke kanílitima tamujé téemala o amigos. Japi riká, a keʼré japi jaré wénwala anema echi malala japi niwima bilé rijoi yúa japi wiká winomíwami ju o japi a omérima aboi iyayá wiká winomí, tákoré ke me aʼlá Jeobá amígowala ju. Echi riká animéeré jiti nakí japi echi malala olama suwaba namuti japi newalé. Nalí, ¿jépuká iʼwírima echi tiwé aminabi muliwia Jeobá? ¿Piri nata Jeobá echi namuti jitra? Echoná Mateo 6:33 (TNM) tamó ané sinéami cristianos japi ta bachá we natéami niraa inésaré echi Onorúami Gobiérnowala. Tákoré ti we natéami niraa iné tamujé wénwala alí ti riwiwi japi nata echi pagótami japoná ti piré, wabé natéami ju tamujé jitra kanílitia Jeobá.

KILÍ NIRAA NATIA

11. Japi riká aní Filipenses 1:9, 10, ¿piri ta newalé jiti aʼlá nokiboa?

¹¹ Ma binesa japi aní echi Biblia echi namuti jitra japi ta nokinali, jipi ko ti kilí niraa natásaré chu iyiri ju suwaba echi namuti japi ta omeri nokayá jiti echi riká nokiboa (leeri Filipenses 1:9, 10, TNM). Nalí, ¿chúriká ti nokiboa? We aʼlá natabo piri ikimea ati nokisáaká ibili namuti. Isini kaachi ke ti newalebo we natia jiti nokiboa bilé namuti, nalí isini ati ke aʼlá machiyá iníliporé piri wabé aʼlá ju japi ta nokiboa. Echi riká ti ikiyáaká, we aʼlá natia tamó iʼwírima aʼlá namuti nokayá.

12, 13. ¿Chúriká tamó iʼwírima we aʼlá natia kecho bijí narea bilé nóchali?

¹² Jipi ko natabo jepuná: japi ta aa eena nóchali jiti tamujé alí tamujé téemala olabo japi ta newalé, alí okuaná ti iyáari nóchali. Alí ti nata suwaba echi namuti echi okuá nóchali jitra, japi riká chu iyiri nóchali ju, chúrikó chotasi alí suní, chu yena miká ju alí jarecho si namuti. Ma ti machí japi echoná ke nokiwá namuti japi echi Biblia aní japi chati ju. Alí a keʼré japi ta nochánali biléana jiti ta kanili nokayá japi nokiwá echoná o jiti aminá wiká nateti. Nalí a nirú jarecho namuti  japi ta natásaré kecho bijí aniyá kumi ta nochabo.

¹³ Japi riká, ati nárika nokisáré: “¿Achi echi nóchali isima japi ni ke ikírima simiyá napawíliwachi? ¿Achi isima japi ni ke ikírima iʼwiria nijé téemala kaníliami niya alí muliwia Jeobá?”. Nárika nokayá echi iyiri náriwami, tamó iʼwírima wabé natéami niraa inea nóchilia Jeobá alí iʼwiria tamujé téemala, alí ke ko echi winomí. Echi riká ti oméripo nokayá bilé namuti japi Jeobá galé.

14. ¿Chúriká tamó iʼwírima aʼlá nátami niya alí galéami jiti ke nokiboa namuti japi isima “japi jarecho riwema nokayá japi aʼlá ju”?

¹⁴ Aʼlá nátami niya ayénachó tamó iʼwírima natia japi chu inílima jarecho echi namuti jitra japi ta nokiboa, alí echi riká ke nokiboa namuti japi isima “japi jarecho riwema nokayá japi aʼlá ju” (Filip. 1:10, TNM). Jepuná namuti we natéami ju japalí ti nata chúriká napachabo, siputabo alí tichibo. Japi riká, a keʼré japi tamujé ko natabo bi japi chúriká ti kanili  napachia alí siputia. Nalí, japi riká ti kanili napachia alí siputia cha nílitisaká bilé japi atí echoná congregación o jarecho pagótami, ¿piri ta nokiboa? Aʼlá nátami niya tamó iʼwírima riwiwia japi inili jarecho. Alí jiti ta we galéami ju, ati bachá natabo “echi auché jaré pagótami” jitra alí ti aʼlárika napachabo alí siputabo (1 Cor. 10:23, 24, 32; 1 Tim. 2:9, 10). Echi riká ti nokiboa bilé namuti japi néwariwélitima japi ta we galé jarecho alí riwiwi.

15. ¿Piri ta natásaré kecho nokayá bilé namuti we natéami?

¹⁵ Echi namuti japi ta nokinali we natéami nísaká, ati we aʼlá natásaré piri ta newalebo jiti echi riká nokiboa. Jesús tamó binérili japi ta echi riká nokisáré (Luc. 14:28). Ati natásaré chu kilipi ti nokiboa echi namuti, chu ikí winomí suwábipo alí chu yena ti iʼwérili nokisáré. Isini kaachi aʼlá nima japi ta raʼichabo japi ta yúa piré, jiti echi riká machimea piri omeri isiá ibili niraa tamó iʼwírimia nokayá echi namuti japi ta nokinali. ¿Chúsiá we natéami ju japi ta nokiboa jepuná namuti? Jiti echi riká nokayá tamó iʼwírima machiyá achi nirú jarecho namuti japi ta nokisáré o achi wabé aʼlá ju sinúrika nokayá echi namuti. Ayénachó, ati ruyésaká echi japi ta yúa piré alí ti kipúsaká japi echi aní, echi ko tamó iʼwírimiré nokayá echi namuti japi ta nokinali (Prov. 15:22).

AʼLÁ NÁTIKA ISÍ JITI AʼLÁ NAMUTI IKIMEA

16. ¿Piri ta nokisáré jiti aʼlá nokiboa echi namuti japi ta nokinali? (Ayénachó iné echi recuadro “ Chúriká mi aʼlá nátika isima”).

¹⁶ A ti nokisáaká suwaba echi namuti japi ta ma bineli, jipi ko ti ma omeri aʼlá nátika nokayá. ¿Chúsiá? Jiti ta ma machí suwaba namuti alí ma ti aʼlá nátili japi aní echi Biblia japi iyiri nata Jeobá echi namuti jitra. Jiti la ma ti omeri tania Jeobá japi tamó iʼwírima aʼlá nokayá echi namuti.

17. ¿Jépuká bi ju japi omeri tamó iʼwiria aʼlá namuti nokayá?

¹⁷ A keʼré japi ta chabé ma nokali wiká namuti alí aʼlá ikili. Nalí tákoré echi riká ju, ati newalásaré japi ta sinibí iʼwírili tánisaré Jeobá jiti aʼlá nokiboa alí ke ti natásaré japi tamujé we machíami ju. Jiti ta machíami nipo, ati machisáré suwaba namuti, aʼlá inámisaré alí aʼlá natásaré, alí Jeobá bi ju japi omeri tamó iʼwiria echi riká niya (Prov. 2:1-5). Ayena, Jeobá bi ju japi omeri tamó iʼwiria jiti aʼlá namuti nokiboa japi kanílitima echi (Sal. 23:2, 3).