BINELÍWAMI 5
CANCIÓN sjj-S 108 El amor leal de Jehová
Echi namuti aʼláala japi ta naré jiti Jeobá we tamó galé
“Cristo Jesús nawali jenaʼí wichimóbachi niyúbimia echi cha nokáami” (1 TIM. 1:15, TNM).
JAPI TA JITRA BINEPO
Echi namuti aʼláala japi ta naré jiti Jeobá nijili binoy Nolá jiti mukumea tamujé jitra alí chúriká néwariwélitipo japi ti matétara iyá Jeobá.
1. ¿Piri ta nokisáré jiti kanílitipo Jeobá?
NATÁ japi mi chiliwé bilé namuti we baʼóami mujé amígowala alí japi omérima we néea. ¿Kechi ko we mi omona nílima ke néesaká alí jariwésaká? Nalí mujé ko we kanílima japalí echi mi matétara iyá alí japalí mi ritiwá japi we nee echi namuti japi mujé iyali. Japi riká jepuná ejemplo, echi riká cho isili Jeobá nijía binoy Nolá Jesús tamujé jitra. ¡Alí echi ko we kanili japalí ti néwariwéliti japi ta matétara nijí echi chiliwéliami jitra japi tamó iyali alí jiti we tamó galé! (Juan 3:16, TNM; Rom. 5:7, 8).
2. ¿Piri ta binepo jenaʼí binelíwami?
2 A keʼré japi ma simírisa wiká bamíali, ma ke natéami niraa inepo japi nokali Jeobá alí Jesús tamujé jitra. Tákoré ti kanili echi jitra japi echi nokali, a keʼré japi ta ma ke newalabo, japi riká ko jariwea echi chiliwéliami japi tamó iyali bilé amigo. Jiti ke echi riká nokiboa, ata sinibí natásaré japi Jeobá alí Jesús nokali tamujé jitra. Jenaʼí binelíwami binepo echi namuti aʼláala japi ta naré jipi alí pe aminana jiti Jesús mukuli tamujé jitra. Ayénachó binepo chúriká sinibí néwariwélitipo japi ta matetara iyá Jeobá jiti we tamó galé, nalí wabé echalí Conmemoración kaachi.
ECHI NAMUTI AʼLÁALA JAPI TA NARÉ JIPI
3. Jiti Jesús mukuli tamujé jitra, ¿piri namuti aʼláala ati naré jipi?
3 Jipi ma ti aʼláala namuti naré jiti Jesús mukuli tamujé jitra. Japi riká, Jeobá tamó wikawi echi namuti japi ta ke aʼlá noká. Alí echi riká isimí jiti binoy nakí, ke ko jiti iʼwérili ju japi echi riká isima. Echoná bilé canción, David jériká anili: “Oh, Jeobá, mujé ko we aʼláala ju alí ku wikáwiami” (Sal. 86:5; 103:3, 10-13).
4. ¿Jépuká jitra mukuli Jesús? (Lucas 5:32; 1 Timoteo 1:15).
4 Jaré ko nata japi Jeobá ke echi wikáwisaré echi chati namuti jitra japi nokali. Alí a bichíwali ju japi Jeobá ke tamó wikáwisaré. Echi riká cho nátili echi apóstol Pablo alí anili japi ke anérami nísaré apóstol jiti chati namuti isili. Nalí miná ko Pablo jéanili: “Jiti Onorúami we tamí galé tákoré ni ke namú isili echi naremia, echi riká ni ju” (1 Cor. 15:9, 10, TNM). Japalí ti ne bichíwali omona nili echi chati namuti jitra japi ta nokali alí ti riwé cha nokayá, Jeobá tamó wikawi. ¿Chúsiá? Ke ju jiti Jeobá tamó wikáwisaré, nalí echi riká isimí jiti echi ko we tamó galé. Jiti la, ati omona nílisaká jiti ta nata japi Jeobá ke tamó wikáwisaré, newalabo japi echi ko ke nijili echi binoy Nolá jiti niyúbima echi pagótami aʼlá nokáami, nalí jiti niyúbima echi pagótami japi ke aʼlá nokáami ju alí omona nili echi chati namuti jitra japi nokali (leeri Lucas 5:32; 1 Timoteo 1:15, TNM).
5. ¿Chúsiá ti ke natásaré japi ta wikáwirami nísaré jiti ta ma nóchili Jeobá?
5 Tákoré ti ma wiká bamibi nóchilia Jeobá, ke ti siné natásaré japi echi jitra Jeobá ko tamó wikáwima echi namuti japi ta ke aʼlá noká. A bichíwali ju japi echi ko we natéami niraa iné japi ta noká echi jitra (Heb. 6:10). Nalí be, Jeobá ke nijili binoy Nolá japi riká ko natetia echi namuti jitra japi ta noká, nalí echi ko bilé chiliwéliami ju. Ati anisáaká japi ta wikáwirami nísaré alí we natéami niraa inérami jiti ta ma echi nóchili, ati aniyá riwélipo japi ta ke newaleli japi Jesús mukumea tamujé jitra (ayénachó iné japi aní Gálatas 2:21).
6. ¿Chúsiá Pablo iʼwérili isili nóchilia Jeobá?
6 Pablo ko aʼlá machiyé japi binoy ke omérima isiá japi Jeobá wikáwima. Nalí, ¿chúsiá iʼwérili isili nóchilia Jeobá? Jiti néwariwélitinilie japi waʼlú matétara iyayé Jeobá jiti echi ko we aʼláala nili echi yúa (Efes. 3:7, TNM). Echi riká cho, tamujé aminabi iʼwérili noká nóchilia Jeobá jiti ta waʼlú matétara iyánali jiti we aʼláala ju tamujé yúa, alí ke ko jiti ta nakí japi echi tamó wikáwima.
7. ¿Chu iyiri ju bilecho namuti aʼláala japi ta naré jiti Jesús ma mukuli tamujé jitra? (Romanos 5:1; Santiago 2:23).
7 Bilecho namuti aʼláala japi ta naré jiti Jesús ma mukuli tamujé jitra, echi ko ju japi ta omeri we aʼlá Jeobá amígowala niya. a Japi riká ti ma bineli echoná binelíwami japi ta kulí ineli, japalí ta ocheri ke ti amigos ju Onorúami yúa. Nalí jiti Jesús ma mukuli tamujé jitra, we ti kilí nílipo Onorúami yúa alí mulíwipo echi (leeri Romanos 5:1, TNM; Santiago 2:23).
8. ¿Chúsiá ti waʼlú matétara iyásaré Jeobá jiti ta omeri echi yúa raʼichia?
8 Bilé namuti we natéami japi ta olá jiti ta Jeobá amígowala ju, echi ko ju japi ta omeri raʼichia echi yúa. Echi ko ke bi kipú japalí bilé raʼicha echi yúa echoná napawíliwachi japoná wiká muchuwi, nalí ayénachó tamó kipú ibili niraa. A bichíwali ju japalí tamujé raʼicha Jeobá yúa ata ku kilí nili, nalí wabé natéami ko ju japi echi riká nokayá tamó iʼwiri aminabi we aʼlá amigos niya echi yúa (Sal. 65:2; Sant. 4:8; 1 Juan 5:14). Japalí Jesús iyénili jenaʼí Wichimóbachi, echi ko sinibí raʼichie echi Onolá yúa jiti aʼlá machiyé japi echi a kipúe alí japi echi riká isiá echi iʼwírima aminabi we mulipi niya echi yúa (Luc. 5:16). Ata waʼlú matétara nijí jiti Jesús mukuli tamujé jitra, jiti echi riká ati omeri Jeobá amígowala niya alí echi yúa raʼichia.
ECHI NAMUTI AʼLÁALA JAPI NAREPO PE AMINANA
9. Echi japi Jeobá nijéwami ju, ¿piri namuti aʼláala narema pe aminana jiti Jesús ma mukuli echi jitra?
9 Echi japi Jeobá nijéwami ju, ¿piri namuti aʼláala narema pe aminana jiti Jesús ma mukuli echi jitra? Jeobá ko isima japi sinibí pirélima. Wiká pagótami ko nata japi ke siné omérima sinibí pirea jiti ma wiká miles bamíali jonsa suwísimi. Nalí Jeobá ko niwali echi pagótami jiti sinibí pirélima. Alí, tákoré jipi rawé we jilí ju bichiwia japi echi pagótami sinibí pirélima, ayénachó we jilí ju bichiwia japi Jeobá nijili binoy Nolá jiti mukumea tamujé jitra (Rom. 8:32).
10. ¿Piri buwé echi ungidos alí echi jaréala boʼwá?
10 Tákoré pe aminana ju japalí ta sinibí pirélipo, Jeobá ko nakí japi ma jipi jonsa echi jitra natabo. Echi ungidos ko we inili pirélinalia ripá rewegachi alí nulánalia Jesús yúa (Apoc. 20:6). Alí echi jaréala boʼwá we inili pirélinalia jenaʼí Wichimóbachi we baʼóachi japoná ma ke risoa nílima (Apoc. 21:3, 4). ¿Achi mi buwé sinibí bitélimia jenaʼí Wichimóbachi? Jepuná ko ke aniwáami ju japi mi ke me natéami ju echi yúa japi ripá pirélima, jiti echi pagótami niwárami nili jiti sinibí pirélima jenaʼí Wichimóbachi. Jiti la jepuná we tamó kanílitima.
11, 12. ¿Chu iyiri ju jaré namuti aʼláala japi ta buwé? (Ayénachó iné echi dibujos).
11 Natá japi chúriká nima pirea echoná Wichimóbachi we baʼóachi. Echi pagótami ma ke nayuma alí ma ke suwimea (Is. 25:8; 33:24). Jeobá ko mi iyama suwaba namuti aʼláala japi mi nakí. ¿Piri mi kanílisa nili binea? ¿Achi mi kanílisa nili aminabi binea echi animales jitra, binea simea bilé namuti o dibujos niwayá? Echoná Wichimóbachi we baʼóachi ati newaléboré kalí niwáami, koʼwáami wásiami, icháami, siwá jáwiami, tibúami alí jarecho si namuti nokáami (Is. 35:1; 65:21). ¡Mujé ko omérima binea suwaba echi namuti japi mi nakí jiti mi sinibí bitélima!
12 ¡We semati nima checho ku narea echi japi ma suwili! (Hech. 24:15). Ayénachó we semati nima aminabi binea Jeobá jitra alí echi namuti japi niwali (Sal. 104:24; Is. 11:9). Nalí wabé aʼlá nima japi ta we kanílika nóchilipo Jeobá jiti ta ma ke nokiboa chati namuti alí ke cha nílipo echi jitra. ¿Achi mi kanílisa nili pe teeli isiá echi chati namuti nalí ke sinibí bitea echoná Wichimóbachi we baʼóachi? Ke tasi (Heb. 11:25). Tákoré we jilí ke, wabé aʼlá ju japi ta jipi iʼwérili nokiboa jiti pirélipo echoná Wichimóbachi we baʼóachi. Newalá japi ke sinibí buwea pirélipo echi Wichimóbachi we baʼóachi, jiti sebama echalí rawé japalí ti ma pirélipo echoná. Suwaba jepuná ikimea jiti Jeobá we tamó galeli alí nijili binoy Nolá jiti mukumea tamujé jitra.
¿Piri namuti aʼláala japi nirúlima echoná Wichimóbachi baʼóachi ami we kanílisa nili isiá? (Iné echi párrafos 11 alí 12).
NÉWARIWÉLITIPO JEOBÁ JAPI TA WAʼLÚ MATÉTARA IYÁ JITI WE TAMÓ GALÉ
13. ¿Chúriká ti néwariwélitipo japi ta waʼlú matétara iyá Jeobá? (2 Corintios 6:1).
13 ¿Chúriká ti néwariwélitipo Jeobá japi ta waʼlú matétara iyá japi isili tamujé jitra? Ata wabé natéami niraa inésaré bachá echi nóchilia (Mat. 6:33, TNM). Echi Biblia jériká aní echi nijéwami jitra: “Ma ketasi olama mapurigá aboni chopi nakí mapujiti echi Walubela Jesucristo mukuli aboni jiti, ayénachó ku owínali, mapurigá aboni sinibí olama mapurigá Binói chopi nakí” (2 Cor. 5:15). Sinibí ta newalásaré japi Jeobá ko we tamó galé, tákoré tamujé ke namú nokali jiti tamó galema (leeri 2 Corintios 6:1, TNM).
14. ¿Chúriká ti néwariwélitipo japi ta bichiwi japi Jeobá nulá?
14 Ayénachó ti néwariwélitipo japi ta we galé Jeobá japalí ti bichiwi echi alí ti nijewi japi echi nulá. ¿Chúriká ti nokiboa? Japalí ti nata chu kilí nokiboa binea echoná escuela o chu iyiri nóchali olabo, ata bachá natásaré piri nata Jeobá echi namuti jitra (1 Cor. 10:31; 2 Cor. 5:7). Japalí ti we bichiwi Jeobá alí ti nijewi japi echi nulá, ati aminabi we bichíyami nipo alí ti aminabi we aʼlá amigos nipo echi yúa. Ayénachó ti aminabi we bichíwipo japi a ikimea japi ta buwea piré (Rom. 5:3-5; Sant. 2:21, 22).
15. ¿Chúriká ti néwariwélitipo japi ta matétara iyá Jeobá Conmemoración kaachi?
15 Jiti néwariwélitipo japi ta waʼlú matétara iyá Jeobá alí Jesús japi nokali tamujé jitra alí jiti we tamó galé, ayénachó ti iʼwérili nokisáré nóchilia Jeobá Conmemoración kaachi. Aboi iʼwérili nokiboa simíaya, nalí ayénachó bayea jarecho (1 Tim. 2:4). Japalí ti echi riká nokisaa, ruyepo chúriká ju echi napawíliwami alí riwíripo echoná jw.org echi videos ¿Chúsiá mukuli Jesús? alí Natáboré echi Jesús mukúala. Alí echi ancianos iʼwérili nokimea bayea echi japi ma chabé jonsa ke napawí tamujé yúa. Echoná ripá rewegachi muchúwami alí sinéami tamujé, we kanílipo bilé echi ku roʼísaká Jeobá yúa (Luc. 15:4-7). Echoná Conmemoración, iʼwérili nokiboa narepia anakupi niraa, nalí wabé echi yúa japi kulí sili o japi chabé jonsa ke napawí tamujé yúa. ¡Iʼwérili nokiboa jiti sinéami we kanílima echalí rawé! (Rom. 12:13).
16. ¿Chúsiá ti natásaré aminabi nóchilimia Jeobá Conmemoración kaachi?
16 ¿Achi ta omeri aminabi nóchilia Jeobá Conmemoración kaachi? Echi riká ti nokisáaká, ati néwariwélitipo Jeobá alí Jesús japi ta matétara iyá japi nokali tamujé jitra. Japalí ti aminabi nawesa, ati aminabi inepo chúriká Jeobá tamó iʼwiri alí ti aminabi bichíwipo echi (1 Cor. 3:9). Ayénachó newalabo leeria echi textos japi uchuwi echoná folleto Examinemos las Escrituras todos los días alí echi recuadro japi chukú echoná Oselí japi binepo echoná napawíliwachi. Ati omeri néea echi versículos japi ta leeri Conmemoración kaachi aminabi binemia.
17. ¿Chúsiá Jeobá ko we kanili mi yúa? (Ayénachó iné echi recuadro “ Chúriká matétara iyabo Jeobá jiti we tamó galé”).
17 Nalí kiti chibi la ke mi omériaká isiá suwaba namuti japi aní jena binelíwami. Natá japi Jeobá ko ke buwé japi mujé chopi iyiri isima japi riká jarecho. Echi ko iné mujé sulala alí we kanili jiti echi ko machí japi mujé we galé echi alí japi mi we natéami niraa iné japi echi isili mujé jitra (1 Sam. 16:7; Mar. 12:41-44).
18. ¿Chúsiá ti waʼlú matétara iyá Jeobá alí Jesús?
18 Jiti Jesús ma mukuli tamujé jitra, ati wikáwirami ju echi namuti jitra japi ta ke aʼlá noká, ati omeri amigos niya Jeobá yúa alí sinibí pirélipo pe aminana. Jiti la, néwariwélitipo japi ta matétara iyá Jeobá jiti we tamó galé alí tamó iyali wiká namuti aʼláala (1 Juan 4:19). Ayénachó néwariwélitipo japi ta matétara iyá Jesús jiti we tamó galeli alí mukuli tamujé jitra (Juan 15:13).
CANCIÓN sjj 154 Wabé galéami nipo
