BINELÍWAMI 2
CANCIÓN sjj 132 Ma ti bilepi niraa ju
Emi rijoi upéami, we natéami niraa inesi emi jubila
“Emi rijoi upéami [...] we natéami niraa inesi echi”(1 PED. 3:7, TNM).
JAPI TA JITRA BINEPO
Chúriká omeri echi kunala néwariwélitia echi upila japi we natéami niraa iné, echi namuti jitra japi aní alí noká.
1. ¿Chúsiá Jeobá niwali echi niwíkami?
JEOBÁ ko ju echi Onorúami kaníliami alí nakí japi tamujé ayénachó kaníliami nipo (1 Tim. 1:11, TNM). Jiti la, echi ko tamó iyali wiká namuti aʼláala jiti kanílika pirélipo (Sant. 1:17). Bilé echi ko ju echi niwíkami. Japalí bilé rijoi alí bilé mukí niwí, echi ko aní japi sinibí anakupi galema, riwíwima alí tibuma. Alí iʼwérili nokisáaká sinibí we galea anakupi niraa, echi ko we kaníliami nima (Prov. 5:18).
2. ¿Chúriká piré wiká niwíkami jipi rawé?
2 Nalí be, jipi rawé wiká niwíkami ke noká japi riká anili japalí niwili, jiti la ke kaníliami ju. Echi Organización Mundial de la Salud aní japi wiká kunala wipisó echi jubila, cha riká raʼichi o we risoa níliti. A keʼré japi simárika noká echi yúa japoná wiká pagótami muchuwi, nalí ke echi riká noká japalí awénili mochisa. Ayénachó wiká niwíkami ke kanila piré jiti echi kunala iné pornografía.
3. ¿Chúsiá jaré kunala risoa olá echi jubila?
3 ¿Chúsiá jaré kunala risoa olá echi jubila? Echi riká nokayéeré jiti echi onolá wipisoe echi iyela, jiti la ke cha riká inéiré echi riká isiá. Jarecho ko piré japoná echi pagótami nata japi echi rijoi néwariwélitisaré echi upila jépuká nuláami ju. O a keʼré japi ke binéritami nili chúriká kilí nima. Alí jarecho ko ke aʼlárika nata echi umukí jitra alí echi nasawíliami, jiti we iné pornografía. Ayénachó wiká we machíami aní japi echi COVID-19 jitra, jepuná namuti aminabi we nirúlisili. Nalí ke nirú bilé namuti japi jitra echi kunala risoa olama echi upila.
4. ¿Piri namuti jitra aʼlá tibuka nokisáré echi cristianos japi upéami ju, alí chúsiá?
4 Echi cristianos japi upéami ju aʼlá tibuka nokisáré jiti ke cha riká natama echi umukí jitra japi riká nata echi pagótami japi ke nijéwami ju. a ¿Chúsiá? Jiti japi riká nata bilé pagótami, miná ko echi riká isimí. Natabo japi ikili echi congregación japi wilili echomí Roma echalí bachá siglo, japoná sinéami ungidos nili. Pablo ko jériká oseli jepuná cristianos: “Ma ke tasi pirélisi japi riká echi pagótami jenaʼí wichimóbachi piréami” (Rom. 12:1, 2, TNM). Na raʼíchali jitra, ata machí japi jaré cristianos a bijí nokayá pireili japi riká nokayé echi pagótami japi ke nijéwami nili. Jiti la Pablo aneli japi sinúrika niraa ku natásaré alí nokisáré. Jipi rawé echi cristianos japi upéami ju, ayénachó nijéwisaré na busuréliami. Nalí be, we ti omona nili machiyá japi jaré cristianos chotásimi natia alí nokayá japi riká echi pagótami ke nijéwami alí risoa olá echi jubila. b ¿Chúriká nakí Jeobá japi nokimea echi kunala echi jubila yúa? Echi texto japoná machibúrami ju na binelíwami, ruyé jepuná namuti.
5. Japi riká aní 1 Pedro 3:7, ¿chúriká nokisáré echi kunala echi upila yúa?
5 (Leeri 1 Pedro 3:7, TNM). Jeobá ko nulé echi kunala japi we natéami niraa inema echi upila. Bilé kunala néwariwéliti japi we natéami niraa iné echi upila, japalí we galéami ju alí we simárika isimí echi yúa. Jenaʼí binelíwami binepo jaré namuti japi chúriká echi kunala néwariwélitima japi we natéami niraa iné echi upila. Nalí bachá binepo piri namuti isimí japi echi upila ke natéami ka nílima.
KITI NOKISÍ ECHI NAMUTI JAPI ISIMA JAPI EMI JUBILA KE NATÉAMI KA NÍLIMA
6. ¿Chúriká iné Jeobá echi rijoi japi wipisó o risoa olá echi jubila? (Colosenses 3:19).
6 Kiti wipisosi o risoa olasi. Jeobá ko we kichí echi pagótami japi nakóami ju (Sal. 11:5). Alí wabé kichí japi echi kunala wipisoma o risoa olama echi jubila (Mal. 2:16; leeri Colosenses 3:19). Japi riká aní echi texto japoná machibúrami ju na binelíwami, 1 Pedro 3:7, bilé kunala risoa olásaká echi upila, echi ko ma ke aʼlá Jeobá amígowala nima. Alí a keʼré japi Jeobá ke kipuma japalí echi rijoi echi yúa raʼicha.
7. Japi riká aní Efesios 4:31, 32, ¿chúriká ke siné raʼíchisaré echi kunala aboi jubila? (Ayénachó iné echi “Raʼíchali japi we natéami ju”).
7 Kiti cha riká raʼíchisi. Jaré kunala we iyoka raʼichi echi jubila alí we risoa níliti. Nalí Jeobá ko we kichí japi echi pagótami we iyóami nima, we sinaka raʼíchami alí japi animea raʼíchali japi risoa níliti jarecho, c japi riká aní Efesios 4:31, 32 (leeri). Jeobá ko suwaba iné alí machí chúriká echi kunala raʼichi echi jubila, tákoré awénili muchuwi. Bilé kunala japi we cha riká raʼichi echi upila, ke bi isimí japi ke kanila pirélima japi riká niwíkami, nalí ayénachó isimí japi echi binoy ma ke aʼlá Jeobá amígowala nima (Sant. 1:26).
8. ¿Piri nata Jeobá echi pornografía jitra, alí chúsiá?
8 Kiti inesi pornografía. Jeobá ko we kichí echi pornografía. Bilé kunala japi iné pornografía, isimí japi ma ke aʼlá Jeobá amígowala nima alí ke riwiwi binoy upila. d Jeobá nakí japi echi kunala sinibí we galema aboi jubila bi. Jepuná ko aniwáami ju japi ke siné nasawima bilecho mukí yúa, nalí ayénachó japi ke siné natama echi riká nokayá. Jesús ko anili: “Mapuyíripi rijói chopi we ʼnéniga nakígá yuwa kochinálasága bilé siʼnú mukí yuwa, échiko ma chati olali pachana binói sulálachi niráa” (Mat. 5:28, 29). e
9. ¿Chúsiá Jeobá we kichí japi bilé kunala iʼwérili anema echi upila jiti isima namuti japi ke echi kaníliti japalí nasawí?
9 Kiti iʼwérili anesi emi jubila jiti nokimea namuti japi ke echi kaníliti japalí timí nasawí. Jaré kunala iʼwérili ané echi jubila jiti nokimea namuti japi ke echi kaníliti japalí nasawí, alí japi iníliti japi cha oláliwa o ke galéliwa. Jeobá ko we kichí echi rijoi japi echi riká noká jiti aboi bi nata. Echi ko nakí japi echi kunala we galema aboi jubila, we simá nokáami nima echi yúa alí japi riwíwima japi echi nata alí inili (Efes. 5:28, 29). Nalí, ¿piri isísaré bilé cristiano japi upéami ju, a isíaká bilé jepuná namuti japi ta bineli jenaʼí subtítulo? ¿Piri isísaré jiti sinúrika niraa ku natama alí isima?
CHÚRIKÁ TIMÍ OMERI RIWEA NOKAYÁ ECHI NAMUTI JAPI ISIMÍ JAPI EMI JUBILA KE NATÉAMI KA NÍLIMA
10. ¿Piri omeri binea echi kunala Jesús jitra?
10 ¿Piri iʼwírima bilé cristiano jiti riwema isiá namuti japi risoa olá echi upila o japi iníliti japi ke natéami ju? Iʼwérili isísaré isiá japi riká Jesús. A bichíwali ju japi Jesús ko ke siné niwili, nalí echi namuti japi we simárika isili echi discípulos yúa, aʼlá bineri echi kunala japi chúriká nokisáré echi jubila yúa (Efes. 5:25). Ma inepo jaré namuti japi omeri binea echi kunala, echi jitra japi riká isili Jesús echi apóstoles yúa alí japi riká raʼíchili.
11. ¿Chúriká isili Jesús echi apóstoles yúa?
11 Jesús ko we simá isíami nili echi apóstoles yúa alí riwíwili. Ke siné we jiwérika nuleli. Tákoré echi Nuléami nili alí Binériami, ke siné newa isili japi echi nili walúala nuláami, nalí echi ko ke niráami nili alí we simárika iʼwírili (Juan 13:12-17). Jiti la aneli echi discípulos: “Binesi tamí jitra, jiti ni we kilí ju alí ke niráami. Nijé ko emi iʼwírima jiti timí isábima” (Mat. 11:28-30, TNM). Japalí bilé pagótami kilí ju, ke aniwáami ju japi ke jiwérami ju, echi ko nalí we jiwérami ju jiti iʼwérili isimí ke isiá japi echi isínali.
12. ¿Chúriká Jesús raʼíchili jarecho?
12 Jesús ko néeli binoy raʼicháala ku kanílitimia jarecho alí iʼwérili iyamia. Echi ko ke siné cha riká raʼíchili echi discípulos (Luc. 8:47, 48). Tákoré echi sayérala cha riká raʼíchili Jesús alí iyótinalie, “echi ko ke cha riká raʼíchika ku nimili” (1 Ped. 2:21-23, TNM). Alí isini kaachi Jesús ko ke tasi namú anili (Mat. 27:12-14). ¡We aʼlá ju japi echi cristianos japi upéami ju echi riká cho nokimea!
13. ¿Chúriká néwariwéliti bilé kunala japi napawika ju echi upila yúa? (Mateo 19:4-6; ayénachó iné echi foto).
13 Jesús ko aneli echi kunala japi bilepi mukí bi olama. Echi ko néeli echi raʼíchali japi anili echi Onolá: “Echi rijoi [...] napawika nima echi upila yúa” (leeri Mateo 19:4-6, TNM). Echi raʼíchali “napawika nima” griego niraa ko ju “japi chébama”. Jepuná ko ruyá aní japi echi kunala alí echi upila we napawika nísaré japi riká ko olayá bilé namuti japi jitra we jiwérami cheba. A rojásaká, okuánika risoa nílima. Bilé kunala we napawika nísaká echi upila yúa, echi ko ke siné inema pornografía. Echi ko we sapú chakena inema jiti ke inema echi chati namuti (Sal. 119:37). Echi ko isima japi riká ko katuwia echi busila yúa jiti ke inema alí koruma bilecho mukí japi ke echi upila ju (Job 31:1).
Echi kunala japi we galé bi echi upila, ke iné echi pornografía. (Iné echi párrafo 13). g
14. ¿Piri namuti isísaré bilé kunala jiti checho ku kanila bitélima echi upila yúa alí jiti ku aʼlá Jeobá amígowala nima?
14 Bilé kunala risoa oláami nísaká o cha riká raʼíchami echi upila, echi ko isísaré jaré namuti jiti ku kanila bitélima echi yúa alí jiti ku aʼlá Jeobá amígowala nima. ¿Chu iyiri ju echi namuti? Bilé, binoy machisáré japi ke aʼlá isimí echi upila yúa. Jeobá ko suwaba iné japi riká isimí alí kipú suwaba raʼíchali japi aní (Sal. 44:21; Ecl. 12:14; Heb. 4:13). Okuá, riwésaré risoa olayá echi upila alí sinúrika ku isísaré (Prov. 28:13). Bikiá, anésaré echi upila alí Jeobá japi ke aʼlá isili alí ku wikáwili tánisaré ne sulachí jonsa (Hech. 3:19). Tánisaré Jeobá japi echi iʼwírima ke cha riká natia, ke cha riká raʼichia alí isiá, alí japi echi iʼwírima jiti riwénalima cha isiá (Sal. 51:10-12; 2 Cor. 10:5, TNM; Filip. 2:13). Naó, isísaré japi riká ma aneli Jeobá alí binésaré kichía echi raʼíchali japi cha níliti jarecho alí risoa oláami niya (Sal. 97:10). Malí, sapú iʼwírili tánisaré echi ancianos echoná congregación muchúwami (Sant. 5:14-16, TNM). Alí, usani, natásaré chúriká isima jiti ke checho ku isima echi namuti chati. Bilé kunala japi iné pornografía ayénachó isísaré jepuná namuti. Jeobá mi iʼwírima ami iʼwérili isísaká ma ke isiá japi chati ju (Sal. 37:5). We be nalí, echi kunala cristianos ke bi riwésaré nokayá namuti japi iníliti echi upila japi ke natéami ju; ayénachó nokisáré namuti japi iníliti echi upila japi a natéami ju. Ma inepo chúriká omeri echi riká nokayá.
CHÚRIKÁ TIMÍ NÉWARIWÉLITIMA EMI JUBILA JAPI TIMÍ WE NATÉAMI NIRAA INÉ
15. ¿Chúriká omeri néwariwélitia bilé kunala japi we galé echi upila?
15 Néwariwélitisi japi timí we galé emi jubila. Jaré japi upéami ju we kanila piré jiti iʼwérili noká sinibí rawé néwariwélitia echi jubila japi we galé (1 Juan 3:18). Bilé kunala cristiano echi riká omeri isiá japalí chapí echi upila sikala o kanila mutú. Ayénachó omeri néwariwélitia japi we galé echi upila japalí júuli mensajes echoná celular jéaneka: “We ni mi niwemi” o “¿Chúriká mi atí?”. O isini kaachi omeri osayá jaré raʼíchali we simá aníami echoná bilé tarjeta. Japalí bilé kunala echi riká isimí echi upila yúa, echi ko néwariwéliti japi we natéami niraa iné echi alí isimí japi aminabi we galema anakupi niraa.
16. ¿Chúsiá bilé kunala simárika raʼichásaré echi upila?
16 Anesi japi timí we natéami niraa iné alí matétara iyasi. Bilé kunala néwariwéliti japi we natéami niraa iné echi upila, japalí ané chúsiá we natéami ju echi jitra alí simá níliti echi. Japi riká, echi ko sinibí matétara iyá echi namuti jitra japi isimí echi iʼwiria (Col. 3:15). Japalí bilé kunala simárika raʼicha echi upila alí ané piri namuti jitra we galé echi, echi ko inili japi we galéliwa alí japi we natéami niraa inéliwa (Prov. 31:28).
17. ¿Chúriká néwariwélitima bilé kunala japi riwiwi binoy upila?
17 Simá nokisí emi jubila yúa alí riwíwisi. Bilé kunala japi we galé echi upila, iné japi riká ko bilé namuti we natéami japi Jeobá iyali alí japi ke nirú bilecho japi echi yena natéami ju (Prov. 18:22; 31:10). Jiti la we natéami niraa iné, aʼlá tibú, simá isimí echi yúa alí riwiwi, ayénachó echi riká isimí japalí awénili muchuwi. Japalí nasawí, echi ko ke iʼwérili ané japi isima namuti japi cha nílitima echi, japi riwélitima o inílitima japi cha isimí. f Alí echi kunala ayénachó iʼwérili isimí jiti echi binoy ke cha nílima isiá echi namuti japi Jeobá kichí (Hech. 24:16).
18. ¿Piri nokisáré echi rijoi upéami? (Ayénachó iné echi recuadro “ Naó namuti japi riká echi kunala néwariwéliti japi riwiwi binoy upila”).
18 Emi rijoi upéami, a timí newalásaré japi Jeobá ko ritiwá alí we natéami niraa iné japi riká timí noká néwariwélitimia japi we natéami niraa iné emi jubila. Iʼwérili nokisí ke nokayá echi namuti japi inílitima echi upila japi ke natéami ju, nalí simárika nokisí echi yúa, riwíwisi alí we galesi. Echi riká timí nokisáaká, a timí néwariwélitima emi jubila japi timí we galé alí we natéami niraa iné. Ayénachó emi ko tibúa riwélima echi namuti wabé natéami, japi ju Jeobá amígowala niya (Sal. 25:14).
CANCIÓN sjj 131 “Ke tasi ku rojasi”
a Aʼlá nima japi echi rijoi upéami leérima echi artículo “¿Ami isimí japi riká Jeobá isimí echi umukí yúa?”, japi chukú echoná oselí Echi Nawésami enero 2024.
b Ami risoa olárami nísaká mujé kunala jitra, mi iʼwírima leeria echi artículo “Ayuda para las víctimas de la violencia doméstica”, japi chukú echoná sección riwéami “Otros temas”, echoná jw.org alí echoná JW Library®.
c RAʼÍCHALI JAPI WE NATÉAMI JU: Echi “raʼíchali japi risoa níliti jarecho”, ruyá aní japalí bilé chati namuti ané bilecho cha nílitimia alí omonáritimia. Ayénachó ruyá aní japalí bilé wisabé niraa ané bilecho echi namuti japi ke galé echi jitra. Jiti la aniwáami ju suwaba echi namuti japi bilé kunala binoy nátika aní jiti echi upila ke natéami ka nílima o risoa nílima.
d Iné echoná jw.org alí echoná JW Library echi artículo “La pornografía puede destruir su matrimonio”.
e Echi artículo “¿Piri mi omeri isiá mujé kunala inéaká pornografía?”, japi chukú echoná oselí Echi Nawésami agosto 2023, omeri iʼwiria echi umukí japi echi kunala iné pornografía.
f Echi Biblia ke aní chu iyiri namuti japi noká echi niwíkami japalí nasawí, chati ju o ke chati ju. Echi kunala alí echi upila napawika raʼichásaré chúriká nokimea jiti néwariwélitima japi we natéami niraa iné japi Jeobá nata, jiti echi aboi kanílitima alí jiti ke cha nílima nokayá echi namuti. Alí echi ko ke wesi yúa raʼichama jepuná namuti jitra.
g JAPI RUYÉ JAPI MACHINA ECHONÁ FOTO: Bilé Testigo nochia iyena alí echi compañeros iʼwérili ané japi inema oselí japi uchúwami ju pornografía.
