BINELÍWAMI 4
CANCIÓN sjj 18 Matétarabá jiti ta niyúbitami nipo
Jiti Jesús mukuli tamujé jitra, ¿piri ta biné?
“Riosi ma tamujé tamí machírali mapurigá Binói tamujé tamí ne wabé simírami galeli” (1 JUAN 4:9).
JAPI TA JITRA BINEPO
Jiti Jesús mukuli tamujé jitra, ¿piri ta biné echi cualidades jitra japi olá Jeobá alí Jesucristo?
1. ¿Chúriká tamó iʼwiri néwalayá sinibí bamíali japalí Jesús mukuli?
¿KECHI ko we natéami ju echi chiliwéliami japi nokali Jeobá alí Jesús tamujé jitra? (2 Cor. 9:15). Matétarabá jiti Jesús mukuli tamujé jitra, ati oméripo we aʼlá Jeobá amígowala niya alí sinibí pirelia. Nirú wiká namuti japi ta jitra matétara iyabo Jeobá, echi japi nijili Jesús jiti mukumea tamujé jitra jiti we tamó galé (Rom. 5:8). Jiti ta ke riwepo matétara nijía alí we natéami niraa inea japi nokali Jeobá alí Jesús tamujé jitra, Jesús ko nulali japi sinibí bamíali newalabo japalí echi mukuli (Luc. 22:19, 20).
2. ¿Piri ta binepo jenaʼí binelíwami?
2 Jepuná bamíali echalí rawé sábado 12 inárachi abril bamíali 2025, ati newalabo japalí Jesús mukuli. Alí sinéami tamujé iʼwérili nokinali simíaya. We aʼlá nima japi echalí ati iʼwérili nokiboa kilí niraa natia japi nokali Jeobá alí Jesús tamujé jitra. Jenaʼí binelíwami inepo piri ta biné Jeobá jitra alí Jesús japi nokali tamujé jitra. Alí echoná biléala binelíwami binepo chúriká tamó iʼwiri alí chúriká néwariwélitipo japi ta matétara iyá.
JITI JESÚS MUKULI TAMUJÉ JITRA,¿PIRI TA BINÉ JEOBÁ JITRA?
3. ¿Chúriká bilepi rijoi sébali aʼlá isíami omérili niyubia wiká millones pagótami? (Ayénachó iné echi dibujos).
3 Jiti Jeobá nijili Jesús jiti mukumea tamujé jitra, ata biné japi Jeobá ko wachíniga isíami ju (Deut. 32:4). ¿Chúsiá ti echi riká aní? Japi riká Adán ke nijéwili Onorúami, sinéami echi kúchuwala ayénachó ke sébali aʼlá nokáami ju alí suwí (Rom. 5:12). Jeobá ko júali Jesús jiti mukumea tamujé jitra alí echi riká ti sébali aʼlá nokáami nipo alí ma ke suwiboa. Nalí, ¿chúriká bilepi rijoi sébali aʼlá isíami omérili niyubia wiká millones pagótami? Echi apóstol Pablo jériká ruyeli: “Wikabé pagótami echirigá wabé chati oláami niráa niwárami níili mapujiti echi bilepi rijói [Adán] ketasi nijéwali Riosi. Aʼlí ne wikabé pagótami ayénachó galá narétami níima Riosi jiti, mapurigá ku wikawárami niráa, mapujiti echi bilepi Jesucristo ne galá nijéwali Riosi” (Rom. 5:19; 1 Tim. 2:6). Jepuná ko aniwáami ju japi tamujé ko ke sébali aʼlá nokáami ju alí suwí, jiti bilepi rijoi japi sébali aʼlá isíami nili, ke nijéwili Onorúami. Echi riká cho jiti niyúbitami nipo, ati newaleli bilepi rijoi sébali aʼlá isíami japi nijéwima Onorúami.
Bilepi rijoi isili japi ta ke sébali aʼlá nokáami nipo alí suwiboa, alí bilepi rijoi tamó niyúbili. (Iné echi párrafo 3).
4. ¿Chúsiá Jeobá ke riweli japi echi Adán kúchuwala japi nijéwami ju sinibí pirélima?
4 Nalí, ¿achi ne bichíwali mukusaa riweili Jesús tamó niyúbimia? ¿Wechi ke aʼlá nímili japi Jeobá riwema japi echi Adán kúchuwala japi nijéwami ju sinibí pirélima? A keʼré japi tamujé jitra aʼlá nímili Jeobá echi riká isílaká, nalí ata newalásaré japi Jeobá ko sinibí wachíniga isíami ju. Jiti la ke isili japi riká ko ke namú ikila japalí Adán ke nijéwili.
5. ¿Chúsiá ti bichíwisaré japi Jeobá ko sinibí isima japi aʼlá ju?
5 Nalí, ¿piri ikimeli Jeobá ke nijílaká Jesús jiti mukumea tamujé jitra, nalí riwélaká japi echi Adán kúchuwala japi nijéwami ju sinibí pirélima? Echi riká isílaká, echi ko ke wachíniga isíami nímili alí echi pagótami ko animeli achi wachíniga isima jarecho namuti jitra. Japi riká, achi nijima echi namuti aʼláala japi anili japi tamó iyama. Nalí a ta machí japi ne echi riká ikimea, jiti Jeobá ma wachíniga isili japalí nijili binoy Nolá jiti mukumea tamujé jitra, tákoré echi ko we galeli. Jiti la ti machí japi Jeobá ko sinibí isima japi aʼlá ju.
6. Jiti Jesús mukuli tamujé jitra, ¿piri bilecho namuti ta biné Jeobá jitra alí chúsiá? (1 Juan 4:9, 10).
6 Jiti Jesús mukuli tamujé jitra, jepuná néwariwéliti japi Jeobá wachíniga isíami ju, nalí ayénachó japi Jeobá we tamó galé (Juan 3:16, TNM; leeri 1 Juan 4:9, 10). Jeobá ko júali binoy Nolá Jesús jiti mukumea tamujé jitra jiti nakí japi ta sinibí pirélipo alí japi ta checho ku nipo echi binoy téemala. Natá jepuná: japalí Adán ke nijéwili, echi ko ma ke nili Jeobá téemala. Alí tamujé echi riká cho ikili. Nalí, jiti Jeobá nijili echi binoy Nolá, echi pagótami japi a bichíyami ju alí nijéwami, checho ku nima Jeobá téemala. Ayénachó jipi Jeobá ko omeri tamó wikawia echi chati namuti japi ta noká alí ati omeri echi amígowala niya alí echi hermanos yúa. ¡Jepuná jitra newaré japi Jeobá we tamó galé! (Rom. 5:10, 11).
7. Jiti Jesús we risoa nílika mukuli tamó niyúbimia, ¿chúriká tamó iʼwiri aminabi aʼlá inamia japi chu yena tamó galé Jeobá?
7 Jiti ta aminabi aʼlá inámipo japi chu yena tamó galé Jeobá, natabo japi chu yena risoa nílili inea japi Jesús we risoa olari. Satanás ko aní japi ke bilé pagótami nijéwima Onorúami japalí ikisaa namuti we jilírami. Néwariwélitimia japi ke echi riká ju, Jeobá ko riweli japi Jesús we risoa nílima kecho mukuyá (Job 2:1-5; 1 Ped. 2:21). Jeobá ko ripá rewegachi jonsa ineli japalí echi pagótami kawélili Jesús jitra, japalí echi sontarsi wipisoli alí michoka uchali echoná tonchi. Ayénachó ineli japalí chéami mukuli binoy Nolá japi we galé (Mat. 27:28-31, 39, TNM). Jeobá ko a omérimili isiá japi Jesús ke miʼlirúami nima. Japi riká, echi ko a omerie iʼwiria japalí echi pagótami anijoli: “Onorúami echi niyúbisaré a echi iʼwírinalaká” (Mat. 27:42, 43, TNM). Nalí a iʼwírilaká, Jesús ko ke mukumeli tamujé jitra alí ke omérimili tamó niyubia. Jiti la Jeobá riweli japi echi Nolá we risoa nílika mukumea.
8. ¿Chúriká ti machí japi Jeobá we risoa nílili japalí miʼari binoy Nolá? (Ayénachó iné echi dibujo).
8 A bichíwali ju japi Jeobá ke iʼwírili jiti echi binoy Nolá ke risoa olárami nima, nalí jepuná ko ke aniwáami ju japi Jeobá ko ke newa inili. Jeobá tamó niwali japi riká ju binoy alí tamujé ko newa iníliami ju, jiti la ti machí japi echi ayénachó newa inili. Echoná Biblia aní japi jaré pagótami risoa nílitili echi (Sal. 78:40, 41). Natabo Abrahán alí Isaac jitra. Jeobá ko aneli Abrahán japi miʼlimea echi nolá Isaac jiti nijima japi riká chiliwéliami (Gén. 22:9-12; Heb. 11:17-19). Natá japi chu yena risoa nílili Abrahán japalí atewia iyénili japoná miʼama echi nolá. ¿Alí Jeobá ru? ¿Chu iníliliré japalí ineli japi echi Nolá Jesús we risoa olari japalí chéami mukuli? Ke ti omeri aʼlá machiyá chu yena we risoa nílili Jeobá. (Iné echoná jw.org echi video Ejemplos de fe: Abrahán [parte 2]).
Jeobá ko we risoa nílili japalí ineli japi echi Nolá we risoa nili. (Iné echi párrafo 8).
9. Japi riká aní Romanos 8:32, 38, 39, ¿piri ta biné japi chu yena tamó galé Jeobá?
9 Japi isili Jeobá nijía binoy Nolá, ata biné japi ke wesi nirú japi we tamó galé japi riká Jeobá, ke bileti tamujé téemala o bilé amigo tamó galé japi riká Jeobá (leeri Romanos 8:32, 38, 39, TNM). Ayénachó Jeobá wabé simírikami tamó galé, ke ko japi riká tamujé aboi niraa galé. Natá jepuná: ¿achi mi we inili sinibí bitélinalia? Jeobá nalí wabé inili japi mi sinibí bitélima. ¿Achi mi nakí japi mi wikáwitami nima echi ke aʼlá namuti jitra japi mi isimí? Jeobá nalí wabé rasíruka nakí. Echi ko bi nakí japi ta néwariwélitipo japi ta matétara nijí echi jitra japi isili tamujé jitra, nijéwika alí we bichíwika echi. Japi isili Jeobá nijía binoy Nolá jiti mukumea tamujé jitra, néwariwéliti japi we tamó galé. Alí echoná Wichimóbachi we baʼóachi, aminabi we binepo japi chu yena tamó galé Jeobá (Ecl. 3:11).
JITI JESÚS MUKULI TAMUJÉ JITRA,¿PIRI TA BINÉ JESÚS JITRA?
10. a) Kecho mukuyá Jesús, ¿piri nili japi wabé risoa nilie natia? b) ¿Chúriká néwariwélitili Jesús japi ke bichíwali nili japi Satanás aní Jeobá jitra? (Iné echi recuadro “ Jesús iʼwírili jiti ke cha riká raʼichárami nima Jeobá riwalá jitra”).
10 Jesús ko ke nakí japi cha riká raʼichárami nima echi Onolá riwalá jitra (Juan 14:31). Jesús we risoa nilie natia japi a keʼré cha riká raʼichárami nima echi Onolá riwalá jitra, jiti echi ko miʼlirúami nima jiti echi pagótami animea riweili japi cha riká raʼíchili Onorúami jitra. Jiti la jéanili: “Nijé Onolá, a Mujé echirigá nakisáagá, tamí kuʼwiro mapurigani ketasi risúu olárami níima” (Mat. 26:39). Jiti Jesús we nijéwili Jeobá japalí chéami mukuli, néwariwélitili japi echi namuti japi aní Satanás Jeobá jitra, ke bichíwali nili.
11. ¿Chúriká néwariwélitili Jesús japi we galé echi pagótami? (Juan 13:1).
11 Jiti Jesús mukuli tamujé jitra, ata machí japi Jesús we galé echi pagótami, alí wabé galé japi nijéwami ju Jeobá (Prov. 8:31; leeri Juan 13:1). Jesús ko aʼlá machili japalí nawasa jenaʼí Wichimóbachi we risoa ikimea alí mukumea riweili. Nalí ne sulachí jonsa nawésili, binérili alí iʼwírili jarecho. Ke echi riká isili jiti iʼwérili nili japi echi riká isima. Ayénachó echalí rawé japalí ma mukumeli, pasoli echi apóstoles ronola, iʼwérili iyali alí binérili wiká namuti we natéami (Juan 13:12-15). Miná ko, japalí ma mukuyá chukuli echoná tonchi, aneli bilé rijoi japi echi yúa chukuli japi bitélima echoná Wichimóbachi we baʼóachi alí aneli echi Juan japi tibuma echi iyela, María (Luc. 23:42, 43, TNM; Juan 19:26, 27). Jesús ko néwariwélitili japi we galé echi pagótami japalí iyénili nawesia alí japalí mukuli echi jitra.
12. ¿Piri nóchali a bijí isimí Jesús tamujé jitra?
12 Jesús ko “sinepi niráa mukuli” tamujé jitra, nalí jipi a bijí isimí wiká namuti tamó iʼwírimia (Rom. 6:10). Echi ko iʼwérili isimí jiti tamó iyama wiká namuti aʼláala. We nocha japi riká Silíami, Walúala Sacerdote alí nulá echoná congregación (1 Cor. 15:25; Efes. 5:23; Heb. 2:17). Ayénachó napabúsimi echi ungidos alí echi wikabé pagótami, alí sunima napabúa kecho suníachi echi gran tribulación (Mat. 25:32; Mar. 13:27). a Bilecho namuti japi isimí ko ju, iyayá echi japi nijéwami ju japi newalé binemia Jeobá jitra jipi jubá rawé (Mat. 24:45). Alí japalí nulasa echi mili bamíali, echi ko a bijí iʼwérili isima tamó iʼwiria. Jepuná jitra ata biné japi Jeobá ke bi nijili echi Nolá jiti mukumea tamujé jitra, nalí ayénachó jiti isima jarecho wiká namuti tamujé jitra.
KITI SINÉ RIWÉ BINEA
13. ¿Piri namuti mi iʼwírima aminabi binea japi chu yena mi galé Jeobá alí Jesús?
13 Kilí niraa natia japi nokali Jeobá alí Jesús tamujé jitra, mi iʼwírima aminabi machiyá japi chu yena tamó galé echi okuánika. A keʼré japi mi omérima leeria bilé o jaré Evangelios na bamíali Conmemoración kaachi. Iʼwérili isí ke binea wiká namuti sinepi niraa, nalí kilí alí kuabi niraa binea echi namuti japi mi iʼwírima aminabi galea Jeobá alí Jesús. Alí kiti wikawá ruyea jarecho echi namuti japi mi binésimi.
14. Japi riká aní Salmo 119:97, ¿piri ta nokisáré aminabi binemia echi namuti we natéami jitra japi aní echi Biblia? (Ayénachó iné echi foto).
14 Ami ma wiká bamíali olásaká japalí mi jonsa pakoli, a keʼré japi mi nata achi mi bijí binema che wiká namuti jepuná jitra: japi Jeobá wachíniga isíami ju, japi we galéami ju alí japi nijili echi Nolá jiti mukumea tamujé jitra. Nalí echi namuti jitra ati sinibí binepo wiká namuti. ¿Piri mi iʼwírima aminabi binea? Leeri alí biné jepuná namuti jitra néeka suwaba echi libros alí oselí japi ta olá. Ami riwisáaká bilé texto japi mi ke aʼlá inami, aa chu aniyá echi oselí. Alí miná ko, echalí rawé natá echi namuti japi mi bineli Jeobá alí echi Nolá jitra, alí japi chu yena we mi galé echi okuánika (leeri Salmo 119:97).
Tákoré ti ma wiká bamíali olá japalí ti jonsa pakoli, ati omeri aminabi wabé natéami inea japi nokali Jeobá alí Jesús tamujé jitra. (Iné echi párrafo 14).
15. ¿Chúsiá ta aminabi áasaré echi namuti we natéami japi aní echi Biblia?
15 Kiti siwé ke mi sinibí binésaká bilé kulíwami namuti japalí mi biné echi Biblia. ¿Chúsiá? Jiti binea echi Biblia ju japi riká ko aa echi oro. Wiká pagótami jaré rawé o wiká horas noká aaya echi oro. Nalí echi ko kilí buwé alí iʼwérili noká aaya jiti echi jitra ko we natéami ju tákoré echi oro we taa ke. Echi namuti japi ta biné echoná Biblia wabé natéami ju echi oro yúa (Sal. 119:127; Prov. 8:10). Jiti la, kilí nii alí kiti riwé leeria alí binea echi Biblia (Sal. 1:2).
16. ¿Chúriká ti oméripo nokayá japi riká Jeobá alí Jesús?
16 Japalí mi biné, natá chúriká mi isima echi namuti japi mi biné. Japi riká, ami omeri wachíniga isíami niya japi riká Jeobá, japalí mi simá isimí sinéami yúa. Ayénachó mi galéami nima japi riká Jesús galeli echi Onolá alí echi pagótami, ami iʼwérili isísaká nijewia Jeobá alí iʼwiria echi hermanos tákoré we jilí ke, alí nawesia jiti jarecho ayénachó machimea echi aʼláala namuti japi narema jiti Jesús mukuli tamujé jitra.
17. ¿Piri ta binepo biléala binelíwami?
17 Ata aminabi aʼlá inámisaká alí ti we natéami niraa inésaká japi Jeobá alí Jesús nokali tamujé jitra, ati aminabi we galepo echi alí ayénachó echi tamó aminabi we galema (Juan 14:21; Sant. 4:8). Jiti la, iʼwérili nokiboa aminabi we aʼlá binea japi nokali tamujé jitra. Echoná biléala binelíwami binepo piri namuti aʼláala narepo jiti Jesús mukuli tamujé jitra alí piri ta nokisáré jiti ta néwariwélitipo japi ta waʼlú matétara nijí echi jitra.
CANCIÓN sjj 107 Jeobá ko bineri chúriká galéami nipo
a Echoná Efesios 1:10 Pablo ko raʼíchili japi napabúrami nima echi namuti echoná ripá rewegachi. Alí echoná Mateo 24:31 alí Marcos 13:27, Jesús ko raʼíchili japi napabuma echi chapirúami. Japalí Pablo alí Jesús raʼíchili napabúa jitra, echi ko ke chopi iyiri ruyá anili. Pablo ko ruyá anili japalí Jeobá chapí echi japi nulama Jesús yúa. Alí Jesús raʼíchili japalí echi ungidos japi ripí jenaʼí Wichimóbachi, torúami nima echoná ripá rewegachi ma gran tribulación kaachi.
