1. ¿Piri aneli Jesús echi discípulos echi jubá rawé jitra, alí piri busuréliami iyali?

 KECHO bijí mukuyá echi Jesús, echi naó discípulos ko nárili: “¿Churigata galá machiboa mapalí ke ʼme ayó níima echalí ne jubá suwibálawachi rawé?” (Mat. 24:3). A keʼré japi echi discípulos ko machinali chúriká machimea japi ma mulipi suwábitami nima japi riká nokali nulayá echi judíos. Jesús ko ke bi ruyeli japi ikimea echalí, nalí ayénachó aneli japi ikimea ma jubá rawé. Echi ko anili: “Ke wesi galá machí chu kilíbuko rawé echirigá ikimea. Echi oʼwéala Riosi kapitánawala ripá riwigachi muchúami tarapé machí. Ayena cho Nijé [...] ketásini machí. Chopi echi Onorúami biʼnélipi galá machí”. Jiti la, iyali jepuná busuréliami: “Sinibí tibusi” alí “¡Galá ʼnátaga muchisi!” (Mar. 13:32-37).

2. ¿Chúsiá echi cristianos judíos bachá siglo piréami, we aʼlá nátaka o sayeka mochisa riweili?

² Echi cristianos judíos bachá siglo piréami, sinibí we aʼlá nátaka o sayeka mochisa riweili jiti omérima niyubia. Jesús ko we aʼlá ruyeli echi discípulos piri we aʼlá inésaré jiti machimea chu kabú suwábitami nima japi riká nulá echi judíos. Echi ko jéaneli: “Mapalítamo ma ritiwá wikabé sontarsi ne noligá jáwami echoʼná Jerusalémachi [...], echalí galá machisí mapu ke me ayó [...] suwábarami níima”. Ma echi riká ikíachi, Jesús ko aneli japi “waminá mikabé júmsama” (Luc. 21:20, 21). Japi a nijéwili ko, a niyúbili jiti júmisili japalí echi romanos kecho najúchili Jerusalén.

3. ¿Piri ta binepo jena binelíwami?

 ³ Tamujé ayénachó ma piré jubá rawé japalí suwábitami nima echi chati namuti. Jiti bela, tamujé ayénachó we aʼlá sayeka mochísaré japi riká echi cristianos bachá siglo piréami. Jenaʼí binelíwami, ati binepo chúriká ti inésaré echi namuti japi ikísimi omáana Wichimóbachi. Ayénachó binepo chúriká aʼlá tibuka nokiboa aboi niraa alí chúriká iʼwérili nokiboa nóchilia Jeobá, kecho séachi Jeobá rawéwala.

4. ¿Chúsiá ata machinálisaré echi namuti japi ikísimi omáana Wichimóbachi?

⁴ Ati we machinali echi namuti japi ikísimi omáana Wichimóbachi, jiti echi riká ti machiboa chúriká ikísimi echi profecías. Japi riká, Jesús ko ruyeli jaré namuti japi tamó iʼwírima machiyá, japi ma mulipi Satanás ke nulama alí suwábitami nima echi chati namuti (Mat. 24:3-14). Echi apóstol Pedro ayénachó tamó aneli japi aʼlá inea mochibo chúriká ikísimi japi aní echi profecías, jiti echi riká aminabi bichíwipo (2 Ped. 1:19-21). Alí echi jubá libro japi osali echi apóstol Juan, jériká aní: “Echi Walubela Riosi Onorúami jeʼná jerigá riwírali echi Walubela Jesucristo, mapurigá [...] machírama echi jaré Binói níwala galá bichíyami pagótami [...] mapurigá aboni galá machimea suwaba mapurigá ke ʼme ayó echirigá ikimea” (Apoc. 1:1). Jiti la, ati machinali japi ikísimi jenaʼí Wichimóbachi, jiti ta inénali achi ikísimi japi riká aní echi profecías. Alí ati kaníliré raʼicha echi jitra jarecho hermanos yúa.

5. Japalí ti raʼicha echi profecías jitra, ¿chúsiá we aʼlá nátika raʼichásaré, alí piri ta nokisáré? (Ayénachó iné echi fotos).

⁵ Japalí ti raʼicha jarecho yúa japi ikísimi japi riká aní echi profecías, ati we aʼlá nátika raʼichásaré. ¿Chúsiá? Jiti ta ke aninali japi ta aboi nata alí ke ti nakí japi tamujé jitra echi congregación rojama. Japi riká, ati kipúboré japi jaré weli jáwami aní chúriká nokimea jiti omáana Wichimóbachi ma kilí pirélipo. Echi riká ikíachi, ke ti sapú natásaré achi ma ikísimi japi riká aní 1 Tesalonicenses 5:3. Nalí, ati sinibí inésaré echi kulíwami namuti japi buyali. Suwaba japi ta raʼicha nísaká japi riká ruyeli echi organización, ata iʼwíripo jiti echi congregación napawika nima alí chopi riká natama (1 Cor. 1:10; 4:6).

6. ¿Piri ta biné japi riká aní 2 Pedro 3:11-13?

⁶ (Leeri 2 Pedro 3:11-13). Echi apóstol Pedro tamó iʼwiri jiti ta aʼlá nátika nokiboa japalí ti biné echi profecías. Echi ko tamó ané japi ta sayeka mochibo “mapuyénasí sebama echi Walubela Riosi níwala rawé”. ¿Chúsiá? Ke ju jiti ta machinali echi rawé alí echi hora japalí Jeobá pama echi Armagedón, nalí jiti ta iʼwérili nokinali nóchilia Jeobá kecho bijí séachi echi rawé. Ayénachó ati nokinali suwaba echi namuti japi aʼlá ju jiti ta we galé Jeobá (Mat. 24:36; Luc. 12:40). Jiti echi riká nokiboa, ati aʼlá tibuka nokisáré ibili niraa.

7. ¿Piri aniwáami ju “galá ʼnagá muchisi”? (Lucas 21:34).

⁷ Jesús ke bi aneli echi discípulos japi inema echi namuti japi ikísimi omáana Wichimóbachi, nalí japi ayénachó aboi  sayeka mochima. Echi riká ti machí jiti Jesús jéanili: “Sinibí galá ʼnagá muchisi” (leeri Lucas 21:34). ¿Piri aniwáami ju “galá ʼnagá muchisi”? Japi ta aboi aʼlá tibuka nokiboa jiti ke bilé namuti isima japi ta riwepo Jeobá amígowala niya, alí ayénachó iʼwérili nokiboa ke isimia echi namuti. Echi riká ti nokisáaká, Jeobá ko sinibí tamó galema (Prov. 22:3; Jud. 20, 21).

8. ¿Piri busuréliami iyali Pablo echi cristianos?

⁸ Echi apóstol Pablo aneli echi cristianos japi aʼlá tibuka mochísaré aboi niraa. Jiti bela, jériká aneli echi cristianos Éfeso piréami: “Sinibí galá ʼnatasi mapu churigátamo ologá pirélabo. Ketasi ologá pirélasi mapurigá echi auché jaré mapu ke galá machíami ju” (Efes. 5:15, 16). Satanás ko wiká namuti nee jiti ta riwepo nijewia Jeobá. Jiti bela, Jeobá tamó ané echoná Bíbliachi japi aminabi iʼwérili nokiboa machiyá piri ju japi echi galé (Efes. 5:17, TNM).

9. ¿Chúriká ti machiboa chu iyiri ju echi namuti japi Jeobá nakí?

⁹ Echoná Biblia ke oserúa chukú ibili niraa echi namuti japi isimí japi ta riwepo Jeobá amígowala niya. Jiti bela, isini kaachi ati aʼlá nátika nokisáré bilé namuti jiti ke oserúa chukú echoná Biblia. Jiti aʼlá nokiboa, ati aʼlá machisáré chu iyiri ju echi namuti japi Jeobá nakí. Nalí, ¿chúriká ti machiboa? Ati we aʼlá binésaré japi aní echi Onorúami Raʼicháala alí kilí niraa natásaré japi aní echoná. Ati we aʼlá machisáaká japi Jeobá nakí alí ti iʼwérili nokisáaká natia japi riká Jesús, sinibí ti we aʼlá nátika nokiboa tákoré echoná Biblia ke oserúa chukú japi ta nokisáré (1 Cor. 2:14-16). We be nalí, nirú jaré namuti japi ta aʼlá machí japi ta nokisáré, nalí jarecho ko ke me.

10. ¿Piri ju jaré chati namuti japi ta ke nokisáré?

¹⁰ Jaré namuti japi ta ke nokisáré ko ju, isiá japi riká ko korúa bilecho, we bajía o waʼlú koʼyá, cha riká raʼichia, inea películas o jarecho si namuti japoná machina nakóayami alí pornografía (Sal. 101:3). Echi Diablo, japi sinibí tamó sayeri, iʼwérili isimí jiti riwepo Jeobá amígowala niya (1 Ped. 5:8). Ke ti aʼlá tibuka nokisáaká, Satanás ko isima japi tamujé natáala alí tamujé sulala kilipi niraa korúkami nima, ikaléami, nakichíami alí niráami (Gál. 5:19-21). A keʼré japi ne kulí ko, ke me nílipo o natabo echi chati namuti, nalí ke ti sapú riwésaká nilia alí natia echi chati namuti, miná ko we jilí nima riwea (Sant. 1:14, 15).

11. ¿Piri ju bilé namuti japi ta jitra we aʼlá tibuka nokisáré, alí chúsiá?

¹¹ Natabo bilecho namuti japi ta we aʼlá tibuka nokisáré: ke napawía echi yúa japi ke nijewi Jeobá. Japi riká, japalí ti nocha bilé yúa japi ke testigo Jeobá ju. Jiti ta nakí japi we aʼlá natama echi testigo Jeobá jitra, ati simá nokáami ju alí ti iʼwiri echi. A keʼré japi ti isini echi yúa koʼá alí miná ko ma ti sinibí echi riká noká. Isini echi compañero cha riká raʼicha alí ne kulí ko ke ti kanili echi iyiri kipúa. Nalí ti sinibí kipúsaká, miná ko ma ke cha nílipo kipúa japi echi aní. Siné rawé, echi ko tamó bayé japi ta echi yúa simabo koʼasia alí ti aní japi ayena. Ke wilí simírimiré jiti ma nokiboa japi riká echi. A bichíwali ju japi ta riwiwi alí simá nokáami ju sinéami yúa, nalí ati we napawísaká echi pagótami yúa japi ke nijewi Jeobá, pe aminana a ti nokiboa japi riká echi noká  (1 Cor. 15:33). Ati we aʼlá tibúsaká aboi niraa japi riká anili Jesús, ke ti wilí simáripo echi pagótami yúa japi ke riwiwi japi Jeobá nulá (2 Cor. 6:15, TNM). Ati we aʼlá nátami nipo alí ke nokiboa japi chati ju.

12. ¿Piri nóchali nuleli Jesús echi discípulos?

¹² ¿Achi kilí alí ke namú nokayá ripímiliré echi discípulos japalí jonsa séachi echi jubá rawé? Ke, jiti Jesús ko iyali bilé nóchali. Nuleli japi nawesama echi aʼláala raʼíchali echoná Jerusalén, Judea, Samaria alí “suníami ne wabé mikabéana jenaʼí wichimóbachi” (Hech. 1:6-8). Waʼlú nóchali nili japi olali. Nalí, echi a iʼwérili nokisáaká nokayá echi nóchali, echi ko aʼlá nokimea riweili kecho séachi jubá rawé.

13. ¿Chúsiá we natéami ju japi ta natabo piri ta nokayá piré? (Colosenses 4:5, TNM).

¹³ (Leeri Colosenses 4:5, TNM). Jiti we aʼlá tibuka nokiboa, we natéami ju japi ta natabo piri ta nokayá piré. Jiti japi riká aní Eclesiastés 9:11, “sinéami karú ikí isini kaachi”, alí ayénachó ke ti machí chu kabú ati suwibóiré.

14, 15. ¿Piri ta nokisáré kecho séachi echi Jeobá rawéwala? (Hebreos 6:11, 12; ayénachó iné echi foto).

¹⁴ Echi ne wabé natéami namuti japi ta omeri nokayá jipi ko ju, nóchilia Jeobá  alí iʼwérili nokayá echi amígowala niya (Juan 14:21). Ati ke riwésaré nokayá echi nóchali japi Jeobá tamó nulé (1 Cor. 15:58, TNM). Echi riká ti nokisáaká, japalí séachi Jeobá rawéwala o ati mukusáaká, ke ti aniboa ‘¿Chúsiá ni ke aminabi iʼwérili isili nóchilia Jeobá?’ (Mat. 24:13; Rom. 14:8).

¹⁵ Japi riká Jesús anili chabé, jipi a bijí tamó iʼwiri jiti nawisárami nima echi Onorúami Gobiérnowala omáana Wichimóbachi. Néeka echi organización japi Jeobá wilali jenaʼí Wichimóbachi, Jesús ko tamó bineri alí tamó iyá japi ta jitra nawisabo echi raʼíchali aʼláala (Mat. 28:18-20). Nalí, japi tamujé nokisáré ko ju, iʼwérili nokayá nawesia, bineria alí aʼlá tibuka nokayá japalí chéana Jeobá suwábima suwaba echi chati namuti. Ke ti siné riwepo bichiwia japi ta buwea piré ati nokisáaká japi riká aní Hebreos 6:11, 12 (leeri).

16. ¿Piri ta nokinali?

¹⁶ Jeobá ko ma aʼlá machí chu kabú suwábima echi chati namuti alí echi Satanás. Japalí ma sebasa echalí rawé, echi ko isima japi ikimea suwaba echi profecías japi ta leeri echoná Biblia. Tákoré ti isini kaachi tamujé ko nili japi ke sapú nawá echi Jeobá rawéwala, echi ko ke wilí sika nawama (Hab. 2:3). Jiti la, ati nokinali japi riká aní Miqueas 7:7: “Sinibí ni Jeobá buwea asimea. Ani kilí niraa buwema japi Onorúami tamí niyúbima”.