ECHI arqueólogos riwali wiká millones ladrillos echoná Babilonia japi néerami nili niwamia echi ciudad. Echi arqueólogo Robert Koldewey anili japi echi ladrillos niwairi echi horno japi jali “machí ayé echoná ciudad japoná echi wicholí we aʼlá nili alí japoná niruili wiká kuu japi jitra ikósima”.

Echi oserúami japi chabé niruili, anili japi echi weli nuláami echoná Babilonia néeli echi hornos ikósimia jarecho. Paul-Alain Beaulieu, japi profesor ju Asiriología jitra echomí Universidad de Toronto, jéaní: “Jaré oserúami babilonios [...] ruyé japi echi silíami nulali japi ikósitami nima jaré pagótami japi ke nijéwinali”. Bilé oserúami japi niruili japalí biteili echi silíami Nabucodonosor, aní: “Suwábisi, ikósisi, wasesi, [...] japoná wásiliwa echi koʼwáami [...], niwasi japi riká molí. Echi naʼí suwábima sinéami echi”.

Jepuná ko newalari echi Biblia leériami japi ikili chabé japi riká aní echoná Daniel capítulo 3, japi echi silíami Nabucodonosor niwali bilé waʼlú estatua oro jitra niwárami, echoná machí ayé Babilonia japi ipórachi nili Dura riwéami. Japalí echi bikiá remalí hebreos Sadrac, Mesac alí Abednego, ke chokóbika uchúpili amachíkimia echi waʼlú estatua, Nabucodonosor ko we iyoli. Jiti la nulali japi kicháosa niraa waʼlú rajérami nima echi horno jiti echoná awátami nima echi bikiá remalí. Nalí echi ko ke namú ikili jiti bilé ángel tibuli jiti ke suwimea (Dan. 3:1-6, 19-28).

Echi ladrillos japi riwairu echoná Babilonia, ayénachó néwariwéliti japi echi Biblia ne bichíwali aní. Jaré echoná ladrillos oserúami uchuwi jaré raʼíchali jéaníami: “Nabucodonosor, japi silíami ju echoná Babilonia [...]. Nijé isili niwayá echi palacio, jenaʼí japoná nijé bité [...]. Jiti nijé téemala sinibí nulama jenaʼí”. Jena raʼíchali ne sojí chopi riká ju japi riká aní Daniel 4:30, japoná echi Nabucodonosor jériká anili: “¿Wechi ko ke ju na echi Walúala Babilonia, japi nijé binoy niwaki nijé binoy jiwérala jitra jiti jarecho we simárika raʼichama tamí jitra?”.