1, 2. ¿Chúsiá echi cristianos ju japi riká bilé edificio we ripá wilíami? (1 Corintios 15:58, TNM).

 NE SOJÍ bamíali 1980 echomí Tokio (Japón), chotásili niwayá bilé edificio japi olali 60 pisos. Japalí simarie echi pagótami nárika nokali achi jiwera wilimea japalí nirúlisa terremotos. Nalí jipi ko a bijí wilí. ¿Chúsiá? Jiti niwárami nili jiti we jiwera wilimea alí jiti lomíami nima, echi namuti iʼwírili jiti ke najuma nirúachi terremotos. Tamujé ayénachó ju japi riká echi edificio we ripá wilíami. ¿Chúsiá echi riká ti aní?

² Japi riká echi edificio japi we jiwera wilí, echi japi cristiano ju jiwérika nísaré jiti nijéwima suwaba japi Jeobá nulá alí jiti ke riwema japi bilé namuti o bilecho isima japi riwema nijewia Jeobá (leeri 1 Corintios 15:58, TNM). Ayénachó “razonable” nísaré, jepuná ko aniwáami ju japi aʼlá nátami nísaré o sinúrika ku isísaré bilé namuti japalí aʼlá nisa echi riká isiá o japalí newalesa (Sant. 3:17). Echi riká ti nísaká ke ti jiwérili nokiboa japi jarecho nokimea japi ke oserúami chukú echoná Biblia alí ke cho nokiboa suwaba japi ta aboi nakí. Jenaʼí binelíwami ata binepo chu kabú bilé cristiano jiwérami nísaré alí ke nokésaré. Ayénachó binepo malí namuti japi isimí Satanás jiti ta ma ke jiwérami nipo alí chúriká ti nokiboa jiti ke riwepo nijewia Jeobá.

3. ¿Chu iyiri nulalíwami tamó iyá Jeobá echoná Hechos 15:28, 29?

³ Jeobá ju echi ne Walúala Nuláami, echi ju japi nijí suwaba echi nulalíwami alí chabé jonsa echi riká isili binoy puéblowala yúa (Is. 33:22). Japi riká, echalí bachá siglo echi japi aʼlá niseri anili bikiá namuti japi ta sinéami cristianos jiwérika nokisáré nijewia: 1) japi Jeobá bi nijéwipo alí ke ko jarecho dioses, 2) riwíwisaré alí natéami niraa inésaré echi la japi riká Jeobá iné alí 3) sinibí we aʼlá nijéwipo Jeobá ke nokayá  echi nasawíliami chati japi riká aní echi Biblia (leeri Hechos 15:28, 29). Japi ta cristianos ju, ¿chúriká nijéwipo jipi echi bikiá namuti japi riká Jeobá nulá?

4. ¿Chúriká ti néwariwélitipo japi ta Jeobá bi nijewi? (Apocalipsis 4:11).

⁴ Ata Jeobá bi nijewi, ke ko jarecho dioses. Jeobá ko nuleli echi israelitas japi echi bi nijéwima (Deut. 5:6-10). Japalí echi Diablo nakili japi Jesús nijéwima echi, Jesús ko anili japi ta Jeobá bi nijéwisaré (Mat. 4:8-10). Jiti la, ke ti olá imágenes alí ke ti amachiki. Ke cho ti natéami niraa iné echi pagótami japi riká ko Onorúami niraa, japi riká echi weli binériami echoná tiyópachi, echi isélikami, echi pagótami japi riʼékiami ju o japi machina echoná televisión. Nalí tamujé ko Jeobá bi nijewi, echi japi niwali suwaba namuti japi ikí nirú (leeri Apocalipsis 4:11).

5. ¿Chúsiá ti we natéami niraa iné echi la japi riká Jeobá iné alí japi echi tamó iwítili?

⁵ Ati we natéami niraa iné echi la japi riká Jeobá iné alí japi echi tamó iwítili. ¿Chúsiá? Jiti Jeobá aní japi echi la jitra tamujé ko piré alí Jeobá isimí japi ta pirélipo (Lev. 17:14). Japalí Jeobá a nakíwili japi echi pagótami okema echi namuti jákami sapala, ayénachó aneli japi ke okésaré echi la (Gén. 9:4). Alí checho echi riká anili japalí iyali nulalíwami echi israelitas (Lev. 17:10). Pe aminana echalí bachá siglo, isili japi echi japi aʼlá niseri nulema sinéami cristianos japi ke néesaré echi la (Hech. 15:28, 29). Jipi ayénachó ti nijewi echi nulalíwami japalí ti nata achi ta narepo echi tratamientos japi olá echi la. b

6. ¿Piri tamó iʼwírima nijewia japi Jeobá nulá echi nasawíliami jitra?

⁶ Ati iʼwérili noká we aʼlá nijewia japi Jeobá nulá echi nasawíliami jitra (Heb. 13:4). Echi apóstol Pablo tamó iyali jepuná busuréliami: “Miʼlisí ibili namuti japi olá emi ripokala”. Jepuná raʼíchali jitra, echi ko tamó iʼwérili iyá jiti jiwérika nokiboa ke nokinalia echi chati namuti. Japi riká, ke ti iné o ke ti noká chuwé namuti japi isima japi ta nokinálipo echi nasawíliami chati (Col. 3:5, TNM; Job 31:1). Alí, japalí ti natasa o inílisa nokinalia echi chati namuti, ati sapú riwé, jiti echi namuti ke isima japi ta riwepo Jeobá amígowala ka.

7. ¿Piri ta nokinálisaré, alí chúsiá?

⁷ Jeobá ko nakí japi ta nijéwami nipo ne sulachí jonsa (Rom. 6:17). Suwaba echi nulalíwami japi Jeobá nijí, sinibí tamó iʼwiri alí ke ti omeri nakuliwia (Is. 48:17, 18; 1 Cor. 6:9, 10). Ati iʼwérili nokinali kanílitia Jeobá alí aniyá japi riká echi salmista: “Ani iʼwérili isima sinibí nijewia japi mujé nulá, japalí ni chéami mukú” (Sal. 119:112). Nalí, ata machí japi echi Satanás iʼwérili isima jiti tamujé ma ke jiwérika nokiboa nijewia Jeobá. ¿Chúriká isimí?

8. ¿Chúsiá Satanás najati alí risoa olá japi Jeobá nijéwami ju?

⁸ Japalí ti najátarami ju. Satanás ko wiká namuti isimí jiti ta ma ke jiwérili nokiboa nijewia Jeobá. Echi ko nakí japi ta ma ke siné Jeobá amígowala nipo (1 Ped. 5:8). Japi riká echi cristianos bachá siglo piréami cha riká raʼícharami nili echi sayérala jitra, wipisórami nili alí miʼáari jiti echi ko jiwérika nokali nijewia Jeobá (Hech. 5:27, 28, 40; 7:54-60). Jipi rawé echi Satanás ayénachó tamujé najati. Japi riká, echi ko najati alí risoa olá echi hermanos Rusia piréami alí jaréanachó. Ayénachó wiká jarecho hermanos anacha jarecho namuti jilírami.

9. Ruyé bilé ejemplo jiti ta machiboa chúsiá we natéami ju japi ta sayeka mochibo.

 ⁹ Jarecho misúala japi tamó majari. Satanás ke bi tamó sayeri najátika alí risoa olaká, ayénachó nee jarecho misúala (Efes. 6:11). Ma inepo japi ikili Bob. Echi ko echoná hospitalchi boʼili jiti operáritami nima riweili alí aneli echi doctores japi ke narema echi la. Echi cirujano anili japi a nijéwima japi echi aní. Nalí bilé rokojó kecho séachi japalí operáritami nima, echi anestesista simili inesia Bob jiti echi téemala ma ke mochili echi yúa. Echi ko aneli Bob japi ke roʼérami nima echi la, nalí aneli japi echoná mulipi manama a newalésaká. A keʼré japi echi ko nátili japi Bob a narema echi la ke mochísaká echi téemala. Nalí Bob jiwérili isili nijewia Jeobá alí aneli echi doctor japi ke siné narema echi la.

10. ¿Chúsiá we chati ju japi ta natabo japi riká echi pagótami japi ke nijéwami ju Jeobá? (1 Corintios 3:19, 20).

¹⁰ Japi riká nata echi pagótami. Tamujé chotásisaká natia japi riká echi pagótami ke nijéwami, a keʼré japi ta riwepo Jeobá alí ma ke nijéwipo japi echi nulá (leeri 1 Corintios 3:19, 20). Echi pagótami japi mayé japi machíami ju, ané jarecho japi nokimea japi aboi nakí. Ma inepo japi echi riká ikili echi congregaciones Pérgamo alí Tiatira. Jaré cristianos chotásili nokayá japi riká echi pagótami echoná piréami japi nokayé echi nasawíliami chati alí amachikie wiká ídolos. Jesús we jiwérika raʼámili jepuná okuá congregaciones jiti riweli japi nirúlima echi nasawíliami chati (Apoc. 2:14, 20). Jipi rawé echi pagótami nokiméeré japi tamujé a galepo japi riká echi nata. A keʼré japi jaré tamujé téemala o echi japi ta machí, tamó anema japi nokiboa japi ta aboi nakí alí ke nijéwipo japi Jeobá nulá. Alí animéeré japi ke chati ju nokayá japi ta aboi nakí alí japi Onorúami nulá echoná Biblia ma ke natéami ju jipi rawé.

11. ¿Piri ta ke nokisáré?

¹¹ Isini kaachi ati natáboré japi echi namuti japi Jeobá nulá ke suwaba aʼlá ruyé alí japi ta machisáré jarecho si namuti. Alí a keʼré japi ta nokinálipo japi ke oserúa chukú echoná Biblia (1 Cor. 4:6). Japalí Jesús biteili echi escribas alí fariseos echi riká nokali. Echi ko nuleli echi pagótami jarecho si namuti japi riká aboi nátili alí ke japi riká anili echi nulalíwami, jiti la we jilí nili japi echi pagótami nijéwima (Mat. 23:4). Jeobá ko we aʼlá tamó ruyé japi ta nokisáré néeka binoy Raʼicháala alí echi organización. Ke newalé japi ta jarecho si namuti aniboa (Prov. 3:5-7). Jiti la ti ke noká japi riká ke oserúa chukú echoná Biblia alí ti ke ané jarecho japi nokimea japi riká ti aboi nata.

12. ¿Chúriká isimí Satanás chijachia echi raʼíchali ke bichíwali?

¹² Echi raʼíchali japi ke bichíwali ju. Satanás ko nee echi pagótami japi “yékaka niráa raʼicha” alí japi “yékaka niráa ʼnata” jiti echi pagótami nokimea japi echi nakí alí jiti ke napawika nima (Col. 2:8). Japi riká echalí bachá siglo, echi ko néeli jaré raʼíchali ke bichíwali japi anili jaré pagótami, ayénachó japi binérili echi judíos japi ke oserúa chukú echoná Biblia alí japi echi cristianos a bijí nijéwisaré echi nulalíwami japi Moisés osali. Echi raʼíchali ke bichíwali nili jiti isili japi echi pagótami ma ke nijéwima echi bichíwali raʼíchali japi aniyé Jeobá. Jipi rawé Satanás ko nee echi internet, radio, televisión alí jarecho si namuti, chijanamia jaré noticias japi ke machiwá achi bichíwali ju alí echi namuti ke bichíwali japi aní echi políticos. Echi riká ikili japalí niruili echi COVID-19, ata we kipuli echi raʼíchali japi ke bichíwali nili. c Nalí echi testigo Jeobá  japi a nijéwili japi anili echi organización, ke me olali echi karú ikiwáami japi riká jarecho japi a nijéwili echi raʼíchali ke bichíwali (Mat. 24:45).

13. ¿Piri ta ke wikawásaré?

¹³ Namuti japi ke tamó riwé japi nokiboa japi wabé natéami ju. Ke ti riwésaré japi chuwé namuti isima japi ta wikawabo chu iyiri namuti nalí wabé natéami ju (Filip. 1:9, 10). ¿Chu iyiri ju echi chuwé namuti? Echi ko ju japi ta noká suwaba rawé japi riká koʼyá, bajía, kanila simaria alí nochia. Ata we natéami niraa inésaká echi namuti, ma ta ke ikíripo nokayá echi namuti japi ne bichíwali wabé natéami ju (Luc. 21:34, 35). Ayénachó ke ti riwésaré japi echi política o japi jitra naʼawi echi pagótami, isima japi ta wikawabo japi wabé natéami ju. Ke ti aʼlá tibuka nokisáaká, kilipi niraa tamujé ayénachó echi riká natáboré o echi riká nokibóoré. Satanás ko nee jepuná malí namuti jiti ta ma ke jiwérika nokiboa nokayá japi aʼlá ju. Ma binepo piri tamó iʼwírima jiti ke nokiboa japi riká nakí Satanás alí piri ta nokisáré jiti ke riwepo jiwérika nijewia Jeobá.

14. ¿Piri tamó iʼwírima jiti ta sinibí jiwérika nokiboa nijewia Jeobá?

¹⁴ Natá chúsiá mi katúwika isili Jeobá yúa alí mi pakoli. Echi riká mi isili jiti mi Jeobá bi nijéwinali. Newalá piri namuti mi iʼwírili jiti mi bichíwima japi na organización ne bichíwali ju. Mujé ko aminabi machísili Jeobá, riwíwili alí we galeli, alí echi namuti mi iʼwírili inea Jeobá japi riká mujé Onolá. Ayénachó mi aminabi we bichíwisili alí jepuná isili japi mi we omonama echi chati namuti jitra japi mi isili. Miná ko, ami riweli isiá echi chati namuti japi Jeobá kichí alí mi chotásili isiá japi echi galé, alí mi we kanílili machiyá japi Jeobá ko a mi ku wikawi (Sal. 32:1, 2). Ami chotásili simiyá echoná napawíliwachi alí raʼichia jarecho yúa echi aʼláala namuti jitra japi mi binésili echoná Biblia. Jipi japi riká mi ma testigo Jeobá ju, ami chotásili inaria echoná buwé japi sinibí bitéliwami too alí ke mi siné riwénali echoná simiyá (Mat. 7:13, 14, TNM).

15. ¿Chúriká tamó iʼwiri binea alí natia japi aní Onorúami Raʼicháala?

 ¹⁵ Binepo echi Onorúami Raʼicháala alí natabo japi aní echoná. Bilé rojá we rilé nawéami nísaré jiti jiwérika wilimea. Echi riká cho, tamujé we bichíwisaré japi aní echi Onorúami Raʼicháala jiti sinibí jiwérika nokiboa nijewia Jeobá. Japalí bilé rojá aminá ochérisimi, echi ayénachó aminá we rilé nawarásimi. Japalí ti biné alí ti nata japi ta leeri, ati aminabi we bichiwi alí ti machí japi Onorúami bineri wabé aʼlá ju (Col. 2:6, 7). Natabo piri namuti aʼláala nareli echi japi Jeobá nijéwami nili chabé piréami, jiti Jeobá tibuli, busuré iyali alí japalí nuleli chúriká nokimea jaré namuti. Japi riká, Ezequiel ko we aʼlá ineli japalí riwali bilé ángel anáwiachi echi templo. Japi Ezequiel ineli ke bi isili japi echi we bichíwima, nalí ayénachó tamó bineri japi chúriká riwíwipo alí nijéwipo suwaba japi Jeobá nulá (Ezeq. 40:1-4; 43:10-12). d Ati iʼwérili nokisáaká we aʼlá binea alí natia japi aní echi Onorúami Raʼicháala, ayénachó we aʼlá tamó iʼwírima.

16. ¿Chúriká iʼwírili Bob we jiwérika nijéwinalia Jeobá ne sulachí jonsa? (Salmo 112:7).

¹⁶ Jiwérika nokiboa sinibí nijéwinalia Jeobá ne sulachí jonsa. Siné kaachi echi silíami David anili japi ke siné riwema galea Jeobá, echi ko jériká wikarali: “Nijé sulala jiwérami ju, oh, Onorúami” (Sal. 57:7). Tamujé ayénachó nipo japi riká David, ati we jiwérika nokisáaká bichiwia Jeobá alí nijéwinalia ne sulachí jonsa (leeri Salmo 112:7). Checho binepo Bob jitra japi ta raʼíchiki echoná párrafo 9. ¿Chúriká iʼwírili Bob we jiwérika nijéwinalia Jeobá ne sulachí jonsa? Japalí echi doctor aneli japi echoná mulipi manama echi la a newalésaká, echi ko anili japi echi riká nísaká sapú simea. Bob ko jéaní: “Ke ni wilí nátiki, ayénachó ke ni nata ripiki piri ikimea”.

17. ¿Piri ta biné Bob jitra? (Ayénachó iné echi imágenes).

¹⁷ Bob bachaka jonsa nátili kecho simiyá echoná hospital japi sinibí nijéwima Jeobá. Nalí be, ¿piri iʼwírili jiti echi riká isínalima? Bachá, echi ko ne sulachí jonsa inílili kanílitinalia Jeobá. Okuá, bineli echoná Biblia alí jarecho publicaciones japi raʼicha echi la jitra. Alí bikiá, echi ko we bichíwili japi Jeobá echi  iyama wiká namuti aʼláala a nijéwisaká japi echi nulá. Japi riká Bob, tamujé ayénachó jiwérika nokiboa sinibí nijéwinalia Jeobá tákoré ikiyé namuti we jilírami.

18. ¿Piri ta biné Barac jitra? (Ayénachó iné echi bachá dibujo japi chukú jena oselí).

¹⁸ We bichíwipo Jeobá. Natabo echi oyériami Barac jitra alí echi namuti aʼláala japi ikili jiti we aʼlá nijéwili japi Jeobá nuleli. Echalí echi israelitas ko ke olali japi jitra nakoma japi riká echi lanza alí escudo. Tákoré ke olali suwaba echi namuti, Jeobá ko aneli Barac japi simea nikosia Sísara alí echi sontársiwala yúa, echi japi olali suwaba japi jitra nakoma (Juec. 5:8). Barac asali echoná ripá rabó Tabor riwéami japalí echi profetisa Débora aneli japi rikínima echoná ipórachi jiti nikoma Sísara alí echi sontársiwala yúa japi olali 900 carros. Tákoré echoná ipórachi echi israelitas jitra we jilí nima riweili niyuria, Barac ko nijéwili. Japalí echi israelitas ma tijinia sírili echoná ripá rabó jonsa, Jeobá ko isili japi waʼlú ukumea. Suwaba echi carros ke omérili jumia echi wisojá jitra, alí Jeobá isili japi echi Barac alí echi israelitas niyúrima (Juec. 4:1-7, 10, 13-16). Jipi rawé, Jeobá ayénachó tamó iʼwírima ata bichíwisaká alí nijéwisaká suwaba japi tamó nulé néeka echi organización (Deut. 31:6).

19. ¿Piri ta nokisáré sinibí?

¹⁹ Jipi rawé a bijí nirúachi echi chati namuti, ata jiwérika nokisáré nijewia Jeobá (1 Tim. 6:11, 12; 2 Ped. 3:17). Ke siné riwepo nijewia Jeobá japalí ti najátarami ju, japalí jarecho tamó majari, japalí ti kipú raʼíchali japi ke bichíwali ju, ke cho riwepo japi chuwé namuti isima japi ta riwepo nokayá japi wabé natéami ju alí ke natabo japi riká echi pagótami (Efes. 4:14). Sinibí jiwérika nokiboa nijewia Jeobá, we galepo echi alí sinibí nijéwinalipo japi echi nulá. Nalí ayénachó we aʼlá nátami nísaré alí simá nokáami. Echoná biléala binelíwami ata binepo japi Jeobá alí Jesús ju japi wabé aʼlá nátami ju alí simá nokáami jarecho yúa, alí chúriká ti omeri niya japi riká echi.