1, 2. ¿Jépuká nili Sadoc? (1 Crónicas 12:22, 26-28).

 NATÁ jepuná jitra: japi napawí 340,000 pagótami jiti wilama David japi riká silíami omáana Israel. Bikiá rawé kipúrami ju mulipi echoná Hebrón japi echi pagótami raʼicha, wikará alí kanílika achí (1 Crón. 12:39). Echoná si atí bilé remalí Sadoc riwéami, japi a keʼré japi echi pagótami ko ke ineli. Nalí Jeobá ko a ineli alí nakili japi ta machiboa japi echoná si asali (leeri 1 Crónicas 12:22, 26-28). Nalí, ¿jépuká nili Sadoc?

² Sadoc ko nili bilé sacerdote japi nóchili echi sacerdote Abiatar yúa. Ayénachó vidente nili, japi aniwáami ju bilé rijoi japi Jeobá iʼwírili jiti we machíami nima alí aʼlá inámima japi Jeobá aní (2 Sam. 15:27). Echi pagótami ko busuréliami tanie echi. Alí ayénachó nili bilé rijoi ke majáami. Jenaʼí binelíwami binepo chúriká Sadoc néwariwélitili japi ke majáami nili.

3. a) ¿Chúsiá ti ke majáami nísaré? b) ¿Piri binepo jenaʼí binelíwami?

³ Jipi jubá rawé, Satanás ko jiwérili isimí sayeria echi Onorúami puéblowala (1 Ped. 5:8). Japalí ti a bijí buwé japi Jeobá suwábima echi Satanás alí echi namuti chati japi nirú jenaʼí Wichimóbachi, ke ti majáami nísaré (Sal. 31:24). Ma binepo bikiá namuti japi chúriká tamujé ayénachó oméripo ke majáami niya japi riká Sadoc.

IʼWIRI ECHI ONORÚAMI GOBIÉRNOWALA

4. ¿Chúsiá ti newalé ke majáami niya iʼwírimia echi Onorúami Gobiérnowala? (Ayénachó iné echi foto).

⁴ Japi ta Jeobá nijéwami ju, ati iʼwiri echi Onorúami Gobiérnowala, nalí isimia jepuná newalé ke majáami niya (Mat. 6:33, TNM). Japi riká, jenaʼí Wichimóbachi japoná we cha re, ati newalé ke majáami niya nijéwimia japi Jeobá  nulá alí nawisamia echi raʼíchali aʼláala (1 Tes. 2:2). Ayénachó we jilí ju neutrales niya jenaʼí Wichimóbachi japoná echi pagótami we rojaka piré (Juan 18:36, TNM). Alí wiká testigo Jeobá ikí namuti we jilírami, japi riká ke olá winomí, risoa olárami ju alí jaré ko erta muchuwárami ju jiti ke iʼwiri echi política o ke nínali sontarsi.

5. ¿Chúsiá Sadoc newaleli ke majáami niya iʼwírimia David?

⁵ Sadoc ke bi simili omowamia japi David silíami niraa wilárami nili. Echi ko ayénachó olali japi jitra nikoma alí ma we aʼlárika asali nikomia (1 Crón. 12:38). Echi ko sinibí iʼwírinalie David alí nimínalie echi israelitas echi sayérala jitra. A keʼré japi Sadoc ko ke me machili nikóaya, nalí echi ko ke majáami nili.

6. Japi isili David, ¿chúriká iʼwírili Sadoc jiti ke majáami nima? (Salmo 138:3).

⁶ ¿Piri iʼwírili Sadoc jiti ke majáami nima? Echi ko bineli jarecho rijoi jitra japi echi machili, japi we jiwérami nili alí ke majáami. Bilé echi ko nili David, japi ke majaka “nuleli echi sontarsi israelitas japalí nakóaye”. Jiti la, sinéami echi israelitas anijoli japi silíami niraa wilánali David (1 Crón. 11:1, 2). David ko we bichíwili Jeobá alí echi iʼwírili tanie japalí echi sayérala najátili echi (Sal. 28:7; leeri Salmo 138:3). Ayénachó bineli jarecho rijoi jitra japi ke majáami nili, japi riká Jehoiadá alí echi nolá Benaya japi sontarsi nili, alí echi 22 rijoi japi iʼwírili David (1 Crón. 11:22-25; 12:26-28). Sinéami echi iʼwírinalie David jiti silíami nima alí tibúnalie echi.

7. a) ¿Chu iyiri ejemplos jipi nirúami tamó iʼwírima ke majáami niya? b) ¿Piri mi biné echi hermano Nsilu jitra japi machina echoná video?

⁷ Japalí ta biné echi pagótami jitra japi iʼwírili echi Onorúami Gobiérnowala, tamó jiwérili iyá alí tamó iʼwiri ke majáami niya. Japi riká echi Silíami Jesucristo,  japi ke iʼwírinalie echi política japalí jenaʼí biteili (Mat. 4:8-11; Juan 6:14, 15). Echi ko sinibí iʼwírili tánili Jeobá jiti olama echi jiwérala japi newaleli aʼlá isimia. Jipi rawé, ayénachó ti omeri binea echi kúruwi jitra japi ke majaka aní japi ke nima sontarsi o japi ke iʼwírima echi política. ¿Chúsiá mi ke amí japi ikili echi kúruwi echoná jw.org? a

IʼWIRI ECHI HERMANOS

8. ¿Chu kabú echi ancianos newalé ke majáami niya iʼwírimia echi hermanos?

⁸ Echi japi Jeobá nijéwami ju we kanili iʼwiria anakupi niraa (2 Cor. 8:4). Nalí jiti echi riká nokimea, isini kaachi newalé ke majáami niya. Japi riká, japalí nirúlisa guerra, echi ancianos ko aʼlá machí japi echi hermanos newalé japi iʼwérili iyama, ayénachó echi koʼwáami alí japi jitra binema o jarecho si namuti. Jiti echi ko we galé echi hermanos, echi ko sinibí iʼwírinali alí iyánali japi newalé, tákoré we jilí ju (Juan 15:12, 13). Echi riká echi ancianos néwariwéliti japi ke majáami ju japi riká Sadoc.

9. Japi riká aní 2 Samuel 15:27-29, ¿piri aneli David echi Sadoc japi isima? (Ayénachó iné echi dibujo).

⁹ Absalón miʼlinalie David jiti echi ko nalí silíami nínali (2 Sam. 15:12, 13). Jiti la, David ko sapú másisa riweili echoná Jerusalén jonsa. Echi ko aneli binoy sontársiwala: “¡Maba, júmisipo jenaʼí jonsa jiti ke kowirúami nipo Absalón jitra!” (2 Sam. 15:14). Japalí ma júmisili, David ko machili japi bilé ripísaré echoná Jerusalén jiti machimea echi namuti japi isínali Absalón alí ruyema echi. Jiti la júali Sadoc alí jarecho sacerdotes japi simama echoná ciudad jiti machimea piri namuti ju japi isínali Absalón (leeri 2 Samuel 15:27-29). Echi nóchali japi David iyali echi  rijoi we jilí nili. Echi ko we aʼlá tibuka nokisaa riweili jiti ke namú ikimea, jiti a keʼré japi Absalón machílaká, koʼimeli echi. Absalón ko bilé rijoi we nikóami nili alí japi binoy bi jitra nátili. ¿Piri mi mayé japi chu olárami nima riweili Sadoc alí echi sacerdotes, Absalón machílaká japi echi ko echi inea járili tibumia David?

10. ¿Piri nokali Sadoc alí japi echi yúa mochili iʼwírimia David jiti ke miʼlirúami nima?

¹⁰ David ko iʼwírili tánili Sadoc alí Husái, japi echi amígowala nili, jiti nokimea bilé namuti (2 Sam. 15:32-37). Nijéwika japi riká aneli David, Husái ko isili japi Absalón bichíwima echi alí aneli piri isima jiti nikoma David yúa; jepuná iʼwírima riweili David ma aʼlárika mochiya japalí nakoma. Miná ko, Husái ko ruyeli Sadoc alí Abiatar japi echi aneli Absalón (2 Sam. 17:8-16). Alí echi okuánika ruyeli David japi isima Absalón (2 Sam. 17:17). Jeobá iʼwírala jitra, Sadoc alí jaréala sacerdotes iʼwírili David jiti ke miʼlirúami nima (2 Sam. 17:21, 22).

11. ¿Chúriká ti oméripo ke majáami niya japi riká Sadoc ati anésiwaká japi iʼwíripo echi hermanos?

¹¹ ¿Chúriká ti oméripo ke majáami niya japi riká Sadoc, ati anésiwaká japi iʼwíripo echi hermanos japalí ikí namuti we jilírami? 1) Nijéwipo japi riká ti anéliwa. Japalí echi riká ikisaa, we natéami ju nijéwami niya jiti echi riká napawika nipo. Jiti la, nokiboa japi riká tamó ané echi sucursal (Heb. 13:17). Echi ancianos sinibí binésaré echi oselí japi ruyé japi chúriká nokiboa kecho ikíachi bilé namuti chati alí chúriká nokiboa japalí ma ikisaa (1 Cor. 14:33, 40). 2) Ke majáami nipo, nalí aʼlá tibuka nokiboa (Prov. 22:3). We aʼlá natá kecho isiá bilé namuti jiti mi ke namú ikimea. 3) We bichíwipo Jeobá. Echi ko we tamó galé alí nakí japi sinéami aʼlá mochibo. Alí a omeri tamó iʼwiria jiti aʼlárika iʼwíripo echi hermanos tákoré we jilí ke.

12, 13. ¿Piri mi biné Víktor alí Vitali jitra? (Ayénachó iné echi imagen).

 ¹² Ma binepo Víktor alí Vitali jitra, okuá ancianos japi tóoli koʼwáami alí baʼwí echi hermanos echomí Ucrania. Víktor ko jéaní: “Ati omáana jarie aa koʼwáami. Wisabé niraa ti kipúe nimúkiami mulipi japoná ti asitie. Bilé hermano ko iyali koʼwáami japi jariweli, echi riká echi publicadores a olali japi okema jaré tarali. Ani newalá japalí ti cárrochi muchuwia uchutie echi koʼwáami alí bilé bomba wichili mulipi 20 metros japoná ti uchutie, nalí ke ratali. Suwaba echalí rawé ani raʼíchiki Jeobá yúa jiti tamí iʼwírima ke majáami niya alí jiti echi riká ni aminabi iʼwírima echi hermanos”.

¹³ Vitali ko jéaní: “Ani newaleli ke majáami niya. Ne bachá japalí ni simiki iʼwírimia echi hermanos, ani isiki 12 horas. Omáana buwichimi ani raʼíchiki Jeobá yúa”. Vitali ko ke majáami nili nalí ayénachó we aʼlá tibuka isili. Echi ko aní: “Ke ni siné riweki tania Jeobá japi tamí iʼwírima aʼlá machiká isiá alí sinibí néwalayá japi ni bineli ko ke omeri. Ani sinibí simiyé bi echomí carretera japoná echi Gobierno anili japi simabo. Aminabi ni we bichíwiki japalí ni ineki japi echi hermanos napawika nochie. Echi ko aʼlárika riwéi echi carretera japomí simáripo, napabúe koʼwáami alí muchuwie echoná carro, ayénachó tamó iyayé koʼwáami alí japoná ripibo”.

KITI RIWÉ JEOBÁ

14. ¿Chuti nili japalí bilé japi ta we galé riwesa nijewia Jeobá?

¹⁴ A nirú bilé namuti japi we tamó omonáriti: japalí bilé tamujé téemala o bilé amigo riwesa nijewia Jeobá (Sal. 78:40; Prov. 24:10). Alí wabé mi omona nili japalí echi pagótami we aʼlá amigo ju mujé yúa. Ami ma echi riká ikílaká, japi isili Sadoc we mi iʼwírima.

15. ¿Chúsiá ke majáami nisa riweili Sadoc jiti ke riwema nijewia Jeobá? (1 Reyes 1:5-8).

¹⁵ Japalí David ma we ochérami nili alí ma ne sojí mukumea riweili, echi nolá Adonías iʼwérili isili jiti silíami nima, tákoré Jeobá ko nakili japi Salomón nalí silíami nima (1 Crón. 22:9, 10). Sadoc ko ke riweli nijewia Jeobá, nalí echi amígowala Abiatar iʼwírili Adonías (leeri 1 Reyes 1:5-8). Japalí echi riká isili, Abiatar ko ke bi riweli nijewia David, nalí ayénachó Jeobá. ¡Sadoc ko we omona nílili japalí echi riká ikili! Echi okuaka aminá 40 bamíali napawika nóchili japi riká sacerdotes (2 Sam. 8:17). Napawika “tóoli echi Arca echi Onorúami ne bichíwali níwala” (2 Sam. 15:29). Ayénachó okuaka iʼwírili David alí wiká namuti nokali napawika nóchilia Jeobá (2 Sam. 19:11-14).

16. ¿Piri iʼwírili Sadoc jiti ke riwema nijewia Jeobá?

¹⁶ Sadoc ko we nijéwami nili Jeobá tákoré Abiatar ko ke aʼlá isili. Alí David we bichíwili Sadoc. Japalí ruyeri David japi isínilie Adonías, echi ko iʼwírili tánili Sadoc, Natán alí Benaya jiti silíami niraa wilama Salomón (1 Rey. 1:32-34). A keʼré japi Sadoc ko iʼwérili nareli japalí nátili jaré pagótami jitra japi we aʼlá nijéwami nili Jeobá alí iʼwírili echi silíami David, japi riká Natán (1 Rey. 1:38, 39). Japalí Salomón silíami niraa wilaari, echi ko iyali Sadoc echi nóchali japi olali Abiatar (1 Rey. 2:35).

17. ¿Chúriká mi isima japi riká Sadoc bilé japi mi we galé riwésaká nijewia Jeobá?

¹⁷ ¿Chúriká mi isima japi riká Sadoc bilé japi mi we galé riwésaká nijewia Jeobá?  Néwariwéliti jépuká mi nijewi (Jos. 24:15). Jeobá mi iyama echi jiwérali japi mi newalé alí mi iʼwírima jiti mi ke majáami nima. Sinibí raʼichá echi yúa alí sinibí mulipi asá echi nijéwami yúa. Jeobá ko we natéami niraa iné japi mi we nijéwami ju alí mi iyama wiká namuti aʼláala (2 Sam. 22:26).

18. ¿Piri mi biné Marco alí Sidse jitra?

¹⁸ Ma binepo Marco jitra alí echi upila, Sidse. Echi okuánika malala riweli echi bichíwali japalí ma ochérili. Marco jéaní: “Japalí kulí ocheri mujé kúchuwala, mujé ko ne sulachí jonsa ma we galé. Ami isimí chuwé namuti tibumia echi, jiti ke namú ikimea. Jiti la, japalí echi riwé nijewia Jeobá, mujé ko we omona. Nalí Jeobá sinibí echoná asali mulipi tamó yúa. Echi ko isimí japalí Sidse ke jiweria nila, nijé jiwérami nima. Alí japalí nijé ke jiweria nili, isimí japi Sidse jiwérami nima”. Sidse ko jéaní: “Ke ti oméripili anachia, Jeobá ke tamó iyálaká echi jiwérali japi ta newaleli. We ni omona nilie jiti ni natie japi nijé iyiri nili jiti nijé malala riweli echi bichíwali. Jiti la ni aneki Jeobá japi ni nilie. Pe aminana, bilé hermana japi ni ma wiká bamíali ke inéi, mulíwili tamí yúa, matochi tamí chapili alí tamí ineka jériká tamí aneki: ‘Sidse, newalá japi mujé ke iyiri juʼ. Jeobá tamí iʼwírili jiti ni ke siwema alí kanílika nóchilima echi”.

19. ¿Piri mi isínali?

¹⁹ Jeobá ko nakí japi sinéami japi ta echi nijéwami ju, ke majáami nipo japi riká Sadoc (2 Tim. 1:7). We be nalí, echi ko ke nakí japi ta natabo japi ta aboi jiwérala jitra oméripo, nalí japi ta bichíwipo echi. Jiti la, japalí ti ikisaa bilé namuti we jilírami japoná ti newalebo ke majáami niya, iʼwírili tánipo Jeobá. Ami omeri bichiwia japi Jeobá mi iʼwírima ke majáami niya japi riká Sadoc (1 Ped. 5:10).