BINELÍWAMI 29
CANCIÓN sjj-S 121 Necesitamos autodominio
“Ne galá ʼnagá” mochibo jiti ke nokiboa japi chati ju
“¡Ne galá ʼnagá muchisi! Riosi yuwa tániga raʼichasi, mapurigátamo ketasi chati olabo” (MAT. 26:41).
JAPI TA JITRA BINEPO
Ati iʼwérili nokisáré jiti ke nokiboa echi namuti chati, nalí ayénachó jiti ke nokiboa echi namuti japi isima japi ta chati nokiboa.
1, 2. a) ¿Piri aneli Jesús echi discípulos? b) ¿Chúsiá echi discípulos nokali echi namuti japi anijoli japi ke siné nokimea? (Ayénachó iné echi dibujos).
“ʼYÉMITAMO ne wabé galabé olánali, chopi ʼyemi aboni ketasi omérami ju galabé olayá” (Mat. 26:41b). Jepuná raʼíchali jitra, Jesús ko ruyá anili japi echi ko aʼlá machí japi echi pagótami ke omeri suwaba aʼlá nokayá jiti ke sébali aʼlá nokáami ju, nalí ayénachó ruyá anili japi ta ke natásaré japi tamujé ko ke siné nokiboa japi chati ju. Jaré horas kecho séachi japalí Jesús anili jepuná raʼíchali, echi discípulos ko anijoli japi ke siné riwema Jesús (Mat. 26:35). Tákoré echi riká nokinalie, echi ko ke machili japi we jilí nima nokayá japi aʼlá ju japalí jilírami namuti ikisaa. Jiti la Jesús ko aneli: “¡Ne galá ʼnagá muchisi! Riosi yuwa tániga raʼichasi, mapurigátamo ketasi chati olabo” (Mat. 26:41a).
2 Japalí chapirúami nili Jesús, ¿piri nokali echi discípulos? Jiti echi ko ke “ne galá ʼnagá” mochili o ke sayeka mochili, echi ko nokali echi namuti japi anijoli japi ke siné nokimea: echi ko riwesa simíali Jesús (Mat. 26:56).
Jesús ko aneli echi discípulos japi “ne galá ʼnagá” mochima alí japi sayeka mochima jiti echi riká ke nokimea japi anijoli japi ke siné nokimea, nalí echi ko riweli Jesús. (Iné echi párrafos 1 alí 2).
3. a) ¿Chúsiá ti ke natásaré japi ta sinibí we jiwérami nipo jiti ke chati nokiboa? b) ¿Piri binepo jenaʼí binelíwami?
3 Sinéami ti ke nokinali namuti japi isima japi ta riwepo Jeobá. Nalí jiti ta ke sébali aʼlá nokáami ju, isini kaachi ti nokibóaré namuti japi ke aʼlá ju. Jiti la, ke ti natásaré japi ta sinibí we jiwérami nipo jiti ke chati nokiboa (Rom. 5:12; 7:21-23). Ke sayiná, ati níliporé nokinalia namuti japi ke aʼlá ju alí jilí niráboré nokayá japi aʼlá ju. Ati ke riwénalaká Jeobá alí Jesús, ati nijéwisaré echi busuréliami japi Jesús anili alí sinibí sayeka mochísaré. Jepuná namuti ju japi jitra binepo jenaʼí binelíwami. Bachá, binepo piri namuti jitra ati we aʼlá tibuka nokisáré. Miná ko binepo piri ta nokisáré jiti ke nokiboa japi chati ju. Alí upá ko binepo piri ta nokisáré jiti ke riwepo “ne galá ʼnagá” mochía.
¿PIRI NAMUTI JITRA ATI WE AʼLÁ TIBUKA NOKISÁRÉ?
4, 5. ¿Chúsiá ti iʼwérili nokisáré ke nokayá echi namuti japi ke me chati ju?
4 Jaré namuti ke me chati ju jarecho yúa, nalí tákoré echi riká ju, ayena a isímiré japi ta ma ke me aʼlá Jeobá amígowala nipo. Ayénachó isímiré japi ta nokiboa namuti japi wabé chati ju.
5 Sinéami ta ikí namuti japi isima japi ta chati nokiboa, nalí ayénachó sinéami tamujé ati inili nokinalia sinúrika namuti japi ke aʼlá ju. Japi riká, a keʼré japi jaré ko iʼwérili noká jiti ke nokimea echi nasawíliami chati. Jarecho ko nokináliré jarecho namuti chati, japi riká echi masturbación o inea echi pornografía. Alí jarecho ko iʼwérili nokayéeré jiti ke nokimea japi riká noká echi pagótami jenaʼí Wichimóbachi piréami, japi riká ke niráami niya, ke we sapú iyóami niya o ke majaa echi pagótami. Jiti la Santiago jéanili: “Siʼwinárigá echi jaré pagótami chopi nijéwaga olá mapurigá aboni chati sitíi olárama, mapalí aboni arigá we nakí echirigá chati sitíi olánala” (Sant. 1:14).
6. ¿Piri namuti ati we aʼlá machisáré?
6 ¿Ami machí piri namuti chati ju japi mi wabé inili isínalia? We chati ju iyenia japi riká ko ke bilé namuti chati isínalia o natia japi tamujé ko we jiwérami ju alí japi ke siné nokiboa echi namuti japi chati ju (1 Juan 1:8). Pablo ko ruyeli japi echi japi aʼlá nokáami ju, ayénachó we aʼlá aboi tibuka nokisáré jiti ke nokimea japi chati ju (Gál. 6:1). Jiti la we aʼlá ju japi ta machiboa chu iyiri namuti japi chati ju, ati wabé inili nokinalia (2 Cor. 13:5, TNM).
7. ¿Piri jitra ati we aʼlá tibuka nokisáré? Ruyé bilé ejemplo.
7 Ma ti aʼlá machisáaká chu iyiri ju echi namuti japi ta we inili nokinalia, ¿piri ta nokisáré? ¡Ati iʼwérili nokisáré jiti ke nokiboa japi chati ju! Natabo jepuná jitra: chabé, ¿chu iyiri namuti nili japi ke me jiwérami nili echoná bilé ciudad japi olali muralla? Echi yewi. Jiti la we aʼlá tibusa riweili echoná. Echi riká cho, tamujé ko we aʼlá tibuka nokisáré echi chati namuti jitra japi ta wabé inili nokinalia (1 Cor. 9:27).
PIRI TA NOKISÁRÉ JITI KE NOKIBOA JAPI CHATI JU
8, 9. ¿Piri isisa riweili echi remalí japi raʼicha Proverbios capítulo 7 jiti ke isima echi nasawíliami chati? (Proverbios 7:8, 9, 13, 14, 21).
8 ¿Piri ta nokisáré jiti ke nokiboa japi chati ju? Ma inepo japi ta biné echoná Proverbios capítulo 7. Echoná raʼicha bilé remalí jitra japi isili nasawíliami chati bilé mukí lowíami yúa. Echi versículo 22 ruyé japi echi remalí “ke sayiná” simili najatia echi mukí. Nalí echoná bachá versículos raʼicha japi echi remalí kilipi niraa isísili wiká namuti japalí chéami ma isili echi nasawíliami chati.
9 ¿Chu iyiri nili echi namuti japi isísili? Bachá, ma chónachi “echi ko simirie echoná cállechi mulipi echoná esquina japoná atí echi mukí”. Miná ko simili “echomí niraa japoná echi bité” (leeri Proverbios 7:8, 9). Alí japalí ma ineli echi mukí, echi ko ke namú isili alí ke miná másili. Nalí riweli japi binoy chimúkima alí raʼíchima echi chiliwéliami jitra japi nijili kilí nílimia Jeobá yúa. Echi mukí echi riká isíliré jiti natama japi aʼláala pagótami ju (leeri Proverbios 7:13, 14, 21). Echi remalí ke isílaká suwaba jepuná namuti, ke inílimili cha isínalia alí ke isímili echi nasawíliami chati.
10. ¿Chu iyiri namuti isímiré japi bilé cha isima japi riká echi remalí japi ruyé echoná Proverbios?
10 Sinéami japi Jeobá nijéwami ju, echi riká cho ikiméaré. A keʼré japi bilé isima bilé namuti chati alí miná ko inílima japi suwaba “ke sayiná” ikili alí jériká animéeré: “Ke ni machí chúriká ikili”. Nalí japalí echi aʼlá natásaká, a keʼré japi machimea japi a niruili jaré namuti japi isísili japalí chéami chati isili. Japi riká, a keʼré japi echi ko napawili echi pagótami yúa japi ke aʼlá nokáami nili, simíliré biléana japoná ke aʼlá ju japi bilé cristiano simea o inéliré namuti ke aʼláala echoná televisión o internet. Ayénachó a keʼré japi riweli raʼichia Jeobá yúa, leeria echi Biblia, simiyá napawíliwachi alí nawisasia. Japi riká ikili echi remalí japi ruyé echoná Proverbios, echi ko kilipi niraa isísili jaré namuti alí miná ko ma cha isili, alí ke tasi “ke sayiná” ikili.
11. Ke ti nokináliaká echi chati namuti, ¿piri ta nokisáré?
11 ¿Piri ta biné? Japi ke bi ju japi ta ke chati namuti nokiboa, ayénachó ke ti nokisáré namuti japi isima japi ta chati namuti nokiboa. Echi riká ruyeli Salomón japalí sunili raʼichia echi remalí jitra alí echi mukí lowíami. Raʼichia echi mukí jitra, echi ko anili jepuná busuréliami: “Kiti mi wikásaré echi níwala buwérili” (Prov. 7:25). Alí ayénachó anili: “Miká asá echi jitra alí kiti muliwi japoná echi bité” (Prov. 5:3, 8). Echi jitra ta biné japi ta ke nokináliaká echi chati namuti, ke ti nokisáré suwaba echi namuti japi isima japi ta echi riká nokiboa. a Jepuná ko nímiré jaré namuti japi ne sojí sinéami echi cristianos jitra ke chati ju, nalí japi tamujé jitra a isímiré japi ta chati namuti nokiboa (Mat. 5:29, 30, TNM).
12. ¿Piri isili Job, alí chúriká iʼwírili jiti ke isima echi nasawíliami chati? (Job 31:1).
12 Jiti ke nokiboa echi namuti japi isima japi ta chati namuti nokiboa, ati nokisáré japi riká Job. Jiti echi ko ke cha riká inema bilecho mukí alí ke inílima nasawínalia echi yúa, isili bilé namuti we natéami, jéanili: “Ani katúwika isili nijé busila yúa” (leeri Job 31:1). Jepuná iʼwírili Job jiti ke isima echi nasawíliami chati. Tamujé ayénachó oméripo we aʼlá nátika nokayá jiti ke nokiboa echi namuti japi isima japi ta nokiboa namuti chati.
13. ¿Chúsiá ti we aʼlá tibuka nokisáré echi namuti jitra japi ta nata? (Ayénachó iné echi fotos).
13 Ayénachó ti we aʼlá tibuka nokisáré echi namuti jitra japi ta nata (Éx. 20:17). Jaré ko aní japi ke namú ikimea ata natásaká chati namuti nokayá, nalí ke siné nokisáaká echi namuti chati japi ta nata. Nalí jepuná ko ke bichíwali ju. Japalí ti aminabi nata nokayá echi namuti chati, ati aminabi nokinálipo japi ta nata. Echi riká ti nokisáaká, ati nokiboa japi ta wabé jilí nirabo anachia jiti ke nokiboa echi namuti chati. A bichíwali ju japi ta ke natánali namuti chati, nalí isini kaachi echi riká ti nata tákoré ti ke nakí. Jiti la, ¿piri ta nokisáré echi riká ikisáaká? Ati sapú riwésaré echi iyiri natia alí bilecho namuti aʼláala ku natia. Ati echi riká nokisáaká, ke ti siné riwepo japi bilé namuti chati japi ta nata, isima japi ta aminabi nokinálipo bilé namuti chati alí we jilí nirabo anachia (Filip. 4:8; Col. 3:2; Sant. 1:13-15).
Ke ti nokisáré suwaba echi namuti japi isima japi ta chati namuti nokiboa. (Iné echi párrafo 13).
14. ¿Piri bilecho namuti tamó iʼwírima jiti ta ke chati namuti nokiboa?
14 Bilecho namuti japi tamó iʼwírima jiti ke chati namuti nokiboa ko ju, we aʼlá bichiwia japi nijewia japi Jeobá nulá sinibí we aʼlá ju. A keʼré japi isini kaachi we ti jilí niraa natia alí inilia japi riká galé Jeobá, nalí ati iʼwérili nokisáaká echi riká nokayá, tamujé ko we kilí nílipo.
15. ¿Chúriká tamó iʼwiri we inilia nokinalia japi aʼláala ju?
15 Ati inílisaré nokinalia japi aʼláala ju alí binésaré kichía japi chati ju alí galea japi aʼláala ju (Amós 5:15). Echi riká ti nokisáaká, jepuná tamó iʼwírima jiti aminabi we inílipo nokinalia japi aʼláala ju alí ke nokinalia echi namuti japi isima japi ta chati nokiboa. Nalí ke echi bi ju, ayénachó tamó iʼwírima japalí ke sayiná ikisaa bilé namuti japi isima japi ta nokiboa echi chati namuti.
16. ¿Chúsiá nóchilia Jeobá tamó iʼwírima jiti ke chati namuti nokiboa? (Ayénachó iné echi fotos).
16 ¿Piri tamó iʼwírima jiti we inílipo nokinalia japi aʼláala ju? Ati iʼwérili nokisáré nóchilia Jeobá. Japalí ta muchuwi echoná napawíliwachi alí ti nawisasia simía, ati aminabi we inili nokinalia japi aʼláala ju jiti kanílitipo Jeobá alí we jilí ju japi ikimea namuti japi isima japi ta chati nokiboa (Mat. 28:19, 20; Heb. 10:24, 25). Leeria alí we aʼlá binea echi Onorúami Raʼicháala alí natia japi aní echoná, ayénachó tamó iʼwiri jiti galebo japi aʼláala ju alí kichibo japi chati ju (Jos. 1:8; Sal. 1:2, 3; 119:97, 101). Alí newalabo japi Jesús anili jepuná busuréliami: “Riosi yuwa tániga raʼichasi, mapurigátamo ketasi chati olabo” (Mat. 26:41). Japalí ti sinibí raʼicha Jeobá yúa, echi ko tamó iʼwiri alí ti aminabi we inili kanílitinalia echi (Sant. 4:8).
Nokayá suwaba echi namuti japi tamó iʼwiri muliwia Jeobá, tamó iʼwírima ke nokayá japi chati ju. (Iné echi párrafo 16). b
KE RIWEPO “NE GALÁ ʼNAGÁ” MOCHÍA
17. ¿Piri namuti we jilí nirali riwea Pedro?
17 A keʼré japi ta a oméripo riwea inilia nokinalia jaré namuti chati, nalí jarecho ko a jilí nirámiré. Echi riká ikili echi apóstol Pedro japi we majali echi pagótami, jiti la bisiá niraa anili japi ke machili Jesús (Mat. 26:69-75). Nalí pe aminana, echi ko ke majaka binérili Jesús jitra. Echi riká néwariwélitili japi ma ke majaa nílili (Hech. 5:27-29). Nalí japalí ma jaré bamíali simírisa, echi ko ma ke koʼali echi cristianos yúa japi ke judíos nili “mapujiti binói we majali echi jaré Juríosi” (Gál. 2:11, 12). Jiti la ti machí japi echi ko ku majaa nílili echi pagótami. Ke ti machí achi riweli echi riká inilia.
18. Echi namuti chati japi ta mayé japi ta ma riweli, ¿piri a keʼré japi ikimea?
18 Echi riká cho, a keʼré japi tamujé checho ku iʼwérili nokiboa riwea bilé namuti japi ta nátili japi ta ma riweli. Bilé hermano jériká aní: “Ma ni makoy bamíali ke ineki pornografía, alí ni nátiki japi nijé ko ma omérili aʼlá riwea echi riká isiá. Nalí isini kaachi, ani checho ku iníliki inénalia”. ¡We aʼlá nili japi echi hermano ke siweli! Echi ko machili japi sinibí rawé iʼwérili isisa riweili jiti ke isima echi chati namuti. Echi upila alí echi ancianos we iʼwiri echi, jiti aminabi we aʼlá tibuka isima jiti ke checho ku inema echi pornografía.
19. ¿Piri ti nokisáré ati kecho oméralaká riwea inilia nokinalia bilé namuti chati?
19 ¿Piri ti nokisáré jiti echi namuti chati japi ta inili nokinalia japi ta kecho omérili riwea, ke isima japi ta nokiboa namuti we chati? Nijéwipo japi Jesús anili: “¡Ne galá ʼnagá muchisi!”. Tákoré mi inili japi mi ma riweli isiá bilé namuti chati, aminabi iʼwérili isí aʼlá tibuka isiá jiti mi ke echi riká ku isima (1 Cor. 10:12). Alí ke riwé isiá echi namuti japi ma mi iʼwírili. Proverbios 28:14 aní: “Echi rijoi japi sinibí aʼlá tibuka isimí ko, kaníliami ju” (2 Ped. 3:14).
CHÚSIÁ WE AʼLÁ JU “NE GALÁ ʼNAGÁ” MOCHÍA
20, 21. a) ¿Chúsiá we aʼlá ju “ne galá ʼnagá” mochía? b) Ati iʼwérili nokisáaká ke nokayá japi chati ju, ¿piri isima Jeobá? (2 Corintios 4:7).
20 Japalí ti “kaníliga chati sitíi olako, pe téeli niráa echirigá kanili”. Nalí, ati nijéwisaká japi Jeobá nulá, ati sinibí wabé kaníliami nipo (Heb. 11:25; Sal. 19:8). Tamujé ko niwárami nili jiti nokiboa japi riká Jeobá nakí (Gén. 1:27). Alí, ati echi riká nokisáaká, ati we kilí nílipo alí kanílika nijéwipo Jeobá alí pe aminana sinibí pirélipo (1 Tim. 6:12; 2 Tim. 1:3; Jud. 20, 21).
21 A bichíwali ju japi ta “ketasi omérami ju galabé olayá”, nalí jepuná ko ke aniwáami ju japi ta ke siné nokiboa japi aʼlá ju. Jeobá echoná atí tamujé iʼwírimia (leeri 2 Corintios 4:7). Echi ko tamó iyama echi jiwérali japi ta newalé. Nalí tamujé ayénachó sinibí rawé iʼwérili nokisáré jiti ke nokiboa echi namuti japi isima japi ta chati namuti nokiboa. Ati echi riká nokisáaká, ati omeri bichiwia japi echi ko tamó iyama echi jiwérali japi ta newalé japi ta raʼíchika tánili (1 Cor. 10:13, TNM). Echi Jeobá iʼwírila jitra, ati oméripo “ne galá ʼnagá” mochía alí ke siné nokayá namuti japi chati ju.
CANCIÓN sjj-S 47 Oremos a Dios todos los días
a Echi pagótami japi isili bilé namuti we chati, a omeri machiyá chúriká iʼwíritami nima leeria echi libro We mi kanílika bitélima, echoná binelíwami 57 puntos 1 aminá 3, alí echoná artículo riwéami “Miremos siempre hacia el futuro”, echoná oselí La Atalaya noviembre bamíali 2020, páginas 27 aminá 29, párrafos 12 aminá 17.
b JAPI RUYÉ JAPI MACHINA ECHONÁ FOTOS: Biʼá bilé hermano leeri echi texto diario, nasipa rawé ko leeri echi Biblia alí ma aʼlí ko simí echoná napawíliwachi japi ju nasipa tarali.
