1. Japi riká aní 1 Pedro 5:2, ¿chu iyiri nóchali olá echi ancianos?

 JEOBÁ ko iyali echi ancianos echi nóchali japi tibuma echi hermanos. Jiti la echi ancianos we natéami niraa iné echi nóchali alí iʼwérili noká we aʼlá tibúa echi hermanos (Jer. 23:4; leeri 1 Pedro 5:2). ¡We aʼlá ju japi omáana echoná congregaciones nirú hermanos japi we iʼwera noká nochia!

2. ¿Piri namuti jilírami ikí jaré ancianos?

² Japalí noká echi nóchali, echi ancianos ko ikí namuti we jilírami. Japi riká, jiti aʼlá tibuma echi hermanos, echi ko we nochásaré. Ma natabo japi ikili Tony bilé anciano echomí Estados Unidos bitéami. Echi ko machili japi ke natásaré japi omérima suwaba isiá echi nóchali japi iyáliwa. Tony jéaní: “Japalí chotásili echi pandemia COVID-19 nirúe wiká nóchali echi napawíliwami jitra alí japalí ti nawesa, alí nijé ko suwaba isié. Tákoré ni iʼwérili isié, sinibí a nirúe nóchali. Nalí pe aminana ko, ma ni ke sinibí leerie echi Biblia, ma ni ke me raʼichie Jeobá yúa, ayénachó ma ni ke me binéi bineli niraa”. Ilir, bilé anciano Kosovo bitéami, ikili bilecho namuti jilírami. Japoná echi biteili niruili guerra alí we jilí nirae nijewia japi aní echi organización. Echi ko aní: “Japalí echi sucursal anili japi ni iʼwírima echi hermanos japi pireili japoná wabé cha ikiyé, we jilí nili alí we ni majaki. Ayénachó echi busuréliami japi nijiri ke ni me aʼlá niraki”. Bilé misionero Asia bitéami Tim riwéami, ayénachó we jilí nirali isiá echi nóchali japi isisa riweili. Echi ko jéaní: “Isini kaachi ni we risiyá nilie alí ni ma ke bilé namuti isínilie”. ¿Piri omeri nokayá echi ancianos jiti ke siwema ikisaa echi iyiri namuti jilírami?

3. ¿Chúsiá we aʼlá ju japi ta sinéami natabo japi isili Gedeón?

 ³ Echi ancianos omeri binea wiká namuti echi oyériami Gedeón jitra (Heb. 6:12; 11:32). Echi ko we aʼlá tibúe alí iʼwirie echi Onorúami puéblowala (Juec. 2:16; 1 Crón. 17:6). Japi riká Gedeón, echi ancianos jipi piréami ayénachó olá echi nóchali tibúa echi Onorúami puéblowala jipi rawé we jilí kaachi (Hech. 20:28; 2 Tim. 3:1). Ati binepo wiká namuti we natéami ati inésaká chúriká nili Gedeón, japi riká echi ko ke niráami nili, we nijéwami nili alí we anáchami. Ati ancianos nísaká o ke ma, sinéami ta we natéami niraa inésaré echi nóchali japi noká echi ancianos alí ti iʼwírisaré japi ta a omeri nokayá (Heb. 13:17).

4. ¿Chúriká newa isili Gedeón japi ke niráami nili?

⁴ Gedeón ko ke niráami nili. b Jiti la, japalí bilé ángel aneli Gedeón japi Jeobá chapili echi jiti niyúbima echi israelitas japi nulérami nili echi madianitas jitra, Gedeón ko ke niraka jéanili: “Nibí nijé téemala ko ke me natéami ju echi Manasés téemala yúa alí echi kuuchi japi olá nijé onolá nijé ju japi wabé ke natéami ju” (Juec. 6:15). Echi ko nátili japi ke omérima isiá echi nóchali, nalí Jeobá ko machili japi echi a omérima. Alí Jeobá nikúurola jitra Gedeón ko a omérili echi riká isiá.

5. ¿Piri namuti isima japi echi ancianos niráami nima?

⁵ Echi ancianos iʼwérili noká ke niráami niya (Miq. 6:8; Hech. 20:18, 19). Echi ko ke raʼicha bi jari echi namuti aʼláala jitra japi nokali alí japi olá; ke cho aboi risoa níliti japalí ke aʼlá nokisaa o ke aʼlá machínisa echi namuti japi noká. Nalí a nirú jaré namuti japi isima japi niráami nima alí natama japi awénili omeri nokayá echi nóchali. Japi riká, a keʼré japi bilé anciano naré wiká nóchali alí aminá ko machí japi ke omeri isiá suwaba echi nóchali. Ayénachó a keʼré japi anérami nima japi we aʼlá isili bilé nóchali alí japi bilecho nóchali ko ke aʼlá isili. Japalí ikisaa echi iyiri namuti, ¿chúriká iʼwírima japi isili Gedeón echi ancianos?

6. ¿Chúriká omeri echi ancianos ke niráami niya japi riká Gedeón? (Ayénachó iné echi foto).

⁶ Iʼwírili taa. Echi pagótami japi ke niráami ju we aʼlá machí japi binoy ke omeri isiá suwaba echi nóchali. Jiti Gedeón ko ke niráami  nili, nikúurili tánili jarecho (Juec. 6:27, 35; 7:24). Echi ancianos japi aʼlá nátami ju echi riká cho noká. Tony japi ta jitra raʼíchili echoná párrafo 2, jéaní: “Nijé ko naréi suwaba echi nóchali japi tamí iyalie jiti ni mayéi japi ni a omeri isiá. Jiti la ni nátiki japi aʼlá nima napawika binea echoná bitichí chúriká nokiboa jiti ke niráami nipo alí ayénachó ni aneki nijé upila japi tamí ruyema achi ni ke niráami ju. Ayénachó ni ineki echi video japi chukú echoná jw.org japi rewé Tal como Jesús, capacitemos a otros y confiemos en ellos”. Tony ko chotásili iʼwírili tania jarecho alí echi ko aní piri namuti aʼláala ikili: “Sinéami echoná congregación napawika nocha alí nijé ko aminabi ikiri we aʼlá amigo niya Jeobá yúa”.

7. ¿Chúriká omeri echi ancianos niya japi riká Gedeón japalí anésiwa japi ke aʼlá nokali? (Santiago 3:13).

⁷ Kilí nisi japalí jarecho aní japi timí ke aʼlá nokali. Japalí bilé anciano anésiwa japi ke aʼlá isili, echi ko néwariwélitima achi niráami ju o ke ma. Echi riká ikisáaká, japi isili Gedeón iʼwírima echi ancianos. Gedeón sinibí newalali japi ke sébali aʼlá isíami nili, jiti la japalí echi rijoi Efraín piréami naʼáwili echi yúa echi ko kilí nili (Juec. 8:1-3). Ayénachó echi ko ke iyoli, ke niráami nili alí kilí kipuli japi anijoli echi efraimitas, echi riká iʼwírili jiti ma ke naʼáwima. Echi ancianos japi aʼlá nátami ju, noká japi riká Gedeón alí japalí anésiwa japi ke aʼlá nokali echi ko aʼlá kipú alí kilí niraa raʼichi (leeri Santiago 3:17). Jiti echi riká noká, sinéami echoná congregación we kilí napawika ju.

8. ¿Piri nokisáré echi ancianos japalí simárika raʼichawa echi jitra? Ruyé bilé ejemplo.

⁸ Walubéala niraa anesi Jeobá. Japalí Gedeón walúala niraa anérami nili jiti niyúrili echi madianitas, echi ko anili japi Jeobá nalí walúala anérami nísaré (Juec. 8:22, 23). ¿Chúriká omeri echi ancianos niya japi riká Gedeón? Sinibí walúala niraa anea Jeobá japalí noká bilé namuti aʼláala (1 Cor. 4:6, 7). Japi riká, japalí bilé anciano anésiwa japi we aʼlá bineri, echi ko omeri aniyá japi echi anili Onorúami Raʼicháala ju alí japi ta wiká namuti biné jiti Jeobá tamó bineri néeka echi organización. We aʼlá ju japi isini kaachi echi ancianos nárika nokimea achi japi riká bineri walúala niraa ané Jeobá o echi aboi. Natabo japi ikili bilé hermano Timothy riwéami. Japalí anciano niraa wilaari, echi ko we kanila nijíe nawésali echoná napawíliwachi. Echi ko jéaní: “Ani we simárika chotasie raʼichia alí ni néeli ejemplos japi wilí nili alí we semati. Jiti la echi hermanos we semati raʼíchali tamí anéi. Ani machiki japi tamí jitra bi echi riká raʼichie alí ke ko Jeobá alí echi Biblia”. Jiti la pe aminana Timothy ineli japi ma ke echi riká binérisaré jiti ma ke echi jitra bi simárika raʼichama (Prov. 27:21). Alí miná ko, ¿piri ikili? Echi ko jéaní: “Jipi ko echi hermanos tamí ané japi echi nawésali japi ni nijili iʼwírili anachia echi karú ikiwáami alí aminabi muliwia Jeobá. Jipi ko ni wabé kanili echi jitra japi tamí ané echi hermanos, ke ko japi riká chabéi japalí we simárika raʼichie tamí jitra”.

9. ¿Piri namuti isima riweili japi Gedeón néwariwélitima achi nijéwami nili alí ke majáami? (Iné echi bachá dibujo japi chukú jena oselí).

⁹ Pe aminana japalí Jeobá wilali Gedeón oyériami niraa, echi ko néwariwélitisa riweili achi nijéwami ju alí ke majáami. Jeobá ko iyali bilé nóchali japi we jilí nili, najuchia echi altar japi niwali echi onolá Baal niwilia (Juec. 6:25, 26). Pe aminana Gedeón napabuli wiká sontarsi alí Jeobá ko osá niraa aneli japi kuabi nísaré (Juec. 7:2-7). Ma upá ko, Jeobá aneli japi nakoma echi sayérala yúa ma nasipa rokojó (Juec. 7:9-11).

10. ¿Piri namuti ikíachi bilé anciano néwariwélitima achi nijéwami ju o ke?

 ¹⁰ Echi ancianos ko sinibí we aʼlá nijéwisaré (Sant. 3:17). Japalí bilé anciano nijéwami ju a isimí japi riká aní echi Biblia alí japi riká aní echi organización, echi riká echi ko bineri jiti jarecho echi riká cho nokimea. Nalí a jilí nímiré nijewia jiti isini kaachi a nirú wiká namuti japi aní echi organización japi nokisáré. Echi jitra a keʼré japi isini kaachi natama achi aʼlá ju nijewia japi nuléliwa. Ayénachó a keʼré japi anérami nima japi isima bilé nóchali japoná cha ikiméaré. Japalí ikisaa echi iyiri namuti, ¿chúriká omeri echi ancianos niya japi riká Gedeón?

11. ¿Piri iʼwírima echi ancianos jiti nijéwami nima?

¹¹ Aʼlá kipusi echi busuréliami alí nijéwisi. Onorúami ko aneli Gedeón chúriká najunama echi altar japi niwali binoy onolá alí kumi niwama echi altar Jeobá níwala, ayénachó chu iyiri namuti jákami chiliwema. Gedeón ko ke namú aniká sapú nijéwili japi Jeobá nuleli. Jipi rawé echi ancianos naré cartas, anuncios alí jarecho si namuti japi júuli echi organización japoná ruyéliwa japi nokisáré; suwaba jepuná namuti jitra Jeobá ko tamó tibú jiti ke namú ikiboa alí jiti ke riwepo echi amígowala niya. Ati we galé echi ancianos jiti echi ko we aʼlá nijewi japi Jeobá nulé néeka echi organización. Jiti we aʼlá nijéwami ju, echi namuti japi noká iʼwiri echoná congregación (Sal. 119:112).

12. Japalí echi organización aní japi sinúrika nokimea jaré namuti, ¿chúriká omeri echi ancianos iʼwiria japi riká aní Hebreos 13:17?

¹² Nokisí japi riká timí anéliwa. Newalabo japi Jeobá ko aneli Gedeón japi ne sojí suwaba sontarsi ku bitichí julama (Juec. 7:8). Jiti la, a keʼré japi Gedeón nátili: “¿Achi aʼlá nima echi riká ni isisa? ¿Achi aʼlá namuti ikimea?”. Nalí Gedeón ko ariká nijéwili. Alí, ¿chúriká noká echi ancianos japi riká echi? Japalí noká echi namuti japi riká aní echi organización japi Jeobá wilali (leeri Hebreos 13:17). Japi riká, echi bamíali 2014 echi Japi Aʼlá Niseri anili japi sinúrika nokimea napabúa echi winomí jiti niwama echi kalí japoná biné echi testigo Jeobá alí japoná niwá echi waʼlú napawíliwami (2 Cor. 8:12-14). Chabé ko echi organización tanewie winomí echi congregaciones jiti niwama bilé kalí japoná biné echi testigo Jeobá alí miná ko echi congregaciones ku nijíe echi winomí. Nalí, jipi ko a nirú biléana japoná jariwéliwa echi winomí japi nijí echi congregaciones omáana Wichimóbachi nirúami alí nee echi winomí niwamia bilé kalí japoná newaléliwa, tákoré echi congregaciones echoná nirúami kuabi winomí nijili o wiká ma. Japalí bilé anciano José riwéami machili japi echi riká nima, echi ko jériká nátili: “Aʼlá nímiré jaréanami ko, nalí jenaʼí ko ke. Ke bilé salón niwárami nima”. Tákoré echi riká nátili, echi ko ariká nijéwili. ¿Chúsiá? Echi ko jéaní: “Ani newalaki japi aní  Proverbios 3:5, 6 japoná aní japi ni bichíwisaré Jeobá. ¡Alí ani iné japi wiká namuti aʼláala ikísimi! Ke bi niwásiwa wiká salones, ayénachó ti bineli sinúrika nakuuria jiti sinéami chopi iyiri olama”.

13. a) ¿Piri namuti aʼlá machili Gedeón? b) ¿Piri nokisáré echi ancianos jiti nima japi riká Gedeón? (Ayénachó iné echi foto).

¹³ Ke majaka nijéwisi Jeobá. Gedeón ko nijéwili Jeobá tákoré ikiyé namuti jilírami alí majaa nilie (Juec. 9:17). Pe aminana japalí Jeobá aneli japi iʼwírima echi, Gedeón ko we aʼlá machili japi Jeobá tibuma echi binoy puéblowala. Echi ancianos japi piré japoná ke riwéliwa japi nokimea japi riká Jeobá nakí, echi ko ju japi riká Gedeón. Ke majaka anijó chúriká nokimea niwayá echi napawíliwami alí nawesia tákoré machí japi risoa olárami nima, wipisórami nima o machí awátami nima echoná nóchali jonsa. c Ma gran tribulación kaachi, echi ancianos newalema aminabi ke majáami niya jiti nijéwima echi busuréliami japi iyárami nima, tákoré jilírami namuti ikimea. A keʼré japi echi busuréliami ko nima japi animea japi chúriká nokimea nawesia echi nawésali japi nima japi riká weli rijé o japi chúriká niyúbitami nipo japalí tamó sayérisa echi Gog de Magog (Ezeq. 38:18; Apoc. 16:21).

14. ¿Chúsiá a jilí níliré Gedeón jitra anachia?

¹⁴ Echi nóchali japi olali Gedeón oyériami niya we jilí nili. Japalí echi madianitas ku júmisili majaa japalí nakoa járili, Gedeón ko najátili echoná valle de Jezreel jonsa aminá bakochi Jordán alí a keʼré japi echoná bakochi suweka niruili wiká namuti japi soʼiwéami nili (Juec. 7:22). Jiti echi riká nili, ¿achi ma ke najátili? ¡Ke! Echi ko aminabi najátili. Tákoré Gedeón alí echi 300 rijoi ma we risíami nili, echi ko bakochi baʼónami simárili alí séali echi madianitas alí sinéami miʼali (Juec. 8:4-12).

15. ¿Chu kabú a jilí nímiré anachia echi ancianos jitra?

¹⁵ Bilé anciano jitra ko we jilí ju tibúa echi  congregación alí echi téemala, jiti la we risiyá nílimiré natia wiká namuti o ke jiwera nílimiré. Japalí echi ancianos echi riká nílisa, ¿chúriká omero nokayá japi riká Gedeón?

16, 17. a) ¿Piri iʼwírili Gedeón jiti anachama? b) Alí, ¿piri we bichíwisaré echi ancianos? (Isaías 40:28-31; ayénachó iné echi foto).

¹⁶ Bichiwi japi Jeobá emi iyama echi jiwérali. Gedeón echi riká isili alí Jeobá sinibí iʼwírili (Juec. 6:14, 34). Siné kaachi Gedeón alí echi sontársiwala najátili okuá silíami madianitas japi majaa júmisili camello aseka (Juec. 8:12, 21). Nalí Jeobá nikúurola jitra, echi israelitas niyúrili nakoa echi okuá silíami yúa. Echi ancianos jipi rawé piréami ayénachó we bichíwisaré Jeobá, echi Onorúami japi “ke siné risí”. Echi ko emi jiwérili iyama japalí timí newalé (leeri Isaías 40:28-31).

¹⁷ Ma binepo Matthew jitra japi iʼwiri echoná Comité de Enlace con los Hospitales. ¿Piri iʼwiri anachia? Echi ko jéaní: “Ani we aʼlá machí japi bichíwali ju japi aní Filipenses 4:13, jiti wisabé niraa japalí ni we risiyá nili o ma ni ke omeria nili, ani raʼicha Jeobá yúa alí ni tani japi tamí iyama echi jiwérali japi ni newalé jiti echi riká ni aminabi omérima iʼwiria echi hermanos. Ma raʼichasa Jeobá yúa, ani inili japi Jeobá tamí iyá jiwérala jiti ni aminabi anachama”. Japi riká Gedeón, echi ancianos ayénachó iʼwérili noká iʼwiria echi hermanos tákoré ikiyé namuti jilírami. A bichíwali ju, echi ancianos newalásaré japi ke ne suwaba omeri nokayá japi nokinali. Echi ancianos we bichiwi japi Jeobá a kipuma japi echi tani alí japi aboi iyama echi jiwérali japi newalé jiti aminabi anachama (Sal. 116:1; Filip. 2:13).

18. Japi riká ti ma bineli, ¿chúriká omeri echi ancianos nokayá japi riká Gedeón?

¹⁸ Jenaʼí binelíwami ma ti bineli japi echi ancianos omeri binea wiká namuti Gedeón jitra. Japi riká, echi ko newalásaré japi ke omeri awénili nokayá echi nóchali, kilí nísaré japalí jarecho aní japi ke aʼlá nokali bilé namuti alí japalí simárika raʼicha echi jitra sinibí walubéala anésaré Jeobá. Ayénachó echi ko we nijéwami nísaré alí ke majáami, wabé natéami ju echi riká niya jipi kuwachimi rawé kaachi. Alí we bichíwisaré japi Jeobá aboi iyama echi jiwérali japi newalé jiti anachama japalí ikí pe chuwé namuti jilírami. A bichíwali ju japi ta we natéami niraa iné sinéami echi ancianos jiti we iʼwérili noká nochia (Filip. 2:29).