Japalí nili echi Segunda Guerra Mundial, nijé wénwala ko machínili Estonia jonsa alí simíali pirélisia echomí Alemania, alí echoná ni ochériki. Nalí miná ko chotásili suwaba kariwea jiti simabo riké echomí Canadá. Ati piréliki mulipi echoná Ottawa alí japoná nirúe tolí. Ati we risóati ke, nalí sinibí ti olayé tolí kaʼwala jiti ta okebo.

Siné rawé, echi testigo Jeobá leérili nijé iyela japi aní Apocalipsis 21:3, 4, japalí echi ko ineli kanílika nalali. Nijé iyela alí nijé onolá aminabi binésili japi aní echi Biblia alí miná ko ma pakoli.

Nijé wénwala ko ke me machiyé raʼichia inglés, nalí echi ko iʼwérili nokayé nóchilia Jeobá. Ne sojí suwaba sábados, nijé onolá ko tamí yurie alí nijé rejimala Sylvia nawisamia tákoré suwaba rokó nóchili japoná rasanie echi níquel echomí Sudbury (Ontario). Alí sinibí tarali ata napawíe binemia Echi Nawésami. Nijé onolá alí nijé iyela tamí binérili we galea Onorúami, jiti la ni pakoki bamíali 1956 japalí ni makoy bamíbami ke. Sinibí japalí ni nata japi chu yena galé Jeobá nijé wénwala, tamí iʼwérili iyá jiti ni aminabi nijéwima Jeobá.

Japalí ni ma suniki echi escuela secundaria, ma ni ke me natéami niraa inéi nóchilia Jeobá alí ni natie japi ni precursor nísaká, ke ni siné mema winomí simea aseka bilé avión raʼéwisia omáana Wichimóbachi. Ani riwaki bilé nóchali echoná radio alí ni nochie uchayá música, ani we kanilie nochia echoná. Alí jiti ni rokojó nochie, ani ke me ikirie simiyá suwaba napawíliwami; alí ayénachó ni we napawíe echi pagótami yúa japi ke galé Onorúami. Nalí, japi ni bineli echoná Bíbliachi tamí iʼwírili jiti ni riwema echi riká isiá.

Ani simiki bitélisia echomí Oshawa (Ontario). Echoná ni machiki Ray Norman alí echi rejimala Lesli, alí jarecho si precursores. Sinéami we tamí galéi. Inea japi we kaníliami ju, tamí iʼwírili checho ku natia japi ni isínilie. Echi ko tamí iʼwérili iyali jiti ni precursor nima. Alí ni echi riká isili septiembre bamíali 1966. Ani we kanila bitéi, nalí a niruili jaré namuti japi ikimea riweili.

Japalí ni a bijí binéi echoná escuela secundaria, ani osaki bilé solicitud jiti ni simea nochasia Betel echomí Toronto (Canadá). Alí japalí ni ma precursor ke, tamí bayeri Betel jiti ni nochama  naó bamíali. Jiti ni we galeli Lesli, ani majaa nilie japi ni simisáaká ma ni ke siné ku riwimea. Ani we raʼíchiki Jeobá yúa echi namuti jitra alí ni aniki japi ni a simea Betel, ayénachó ni we omónika aneki Lesli japi ni ma simea.

Echoná Betel ani nóchiki echoná lavandería alí miná ko japi riká secretario. Alí Lesli ko juláari japi riká precursora especial echomí Gatineau (Quebec). Nijé ko wisabé niraa natie piri isiá atiyé Lesli alí ni nárika isié achi ni aʼlá isili. Miná ko ikili bilé namuti we aʼláala: Ray, Lesli rejimala, bayérami nili Betel alí nijé yúa ripíe echoná cuarto. Echi riká ni checho ku chotásili amigo niya Lesli yúa. Ata niwiki 27 inárachi febrero bamíali 1971, echi ko nili echi upáwala rawé echi naó bamíali jitra japi ni asali echoná Betel.

Ata julari echomí Quebec bilé congregación japoná raʼicháliwa Francés. Ma jaré bamíali simírisa tamí aneri japi ni nochama japi riká superintendente de circuito. Ani 28 bamíbami ke, jiti la ni inilie japi ni bilé remalí nili ke machíami. Nalí we tamí iʼwírili japi aní Jeremías 1:7, 8. Ayénachó ni we natie chúriká ti nokiboa circuito nisa, jiti Lesli ko wisabé niraa cha ikili japalí aseka inárili echoná troca alí ke me aʼlá omerie ochiyá. Nalí Lesli tamí aneki: “Jeobá tamó anésaká japi ta nokiboa echi nóchali, ¿kechi aʼlá nima japi ta nóchika inepo achi ti omeria?”. Miná ko ti aniki japi a nochabo japi riká circuito alí ti nóchiki 17 bamíali.

Ani we nochia iyenie japi riká circuito, jiti la ni ke me ikirie wilí napawika simiria Lesli yúa. Nalí ani bineki bilé namuti we natéami, siné lunes biʼá anéchini echi timbre japi chukú echoná yéwichi alí japalí ni irápiki ke wesi iteli, nalí ni riwaki bilé canasta bi namuti muchúwami, japi riká bilé mantel, fruta, queso, pan, bilé botella vino roʼami, copas alí bilé nota jéaníami: “Bayé mujé upila koʼasia”. Echalí rawé we semati ke, jiti we aʼlá rayena wiliyé. Nalí ani binema riké jaré nawésali, jiti la ni aneki Lesli japi ni ke omérima simiyá; echi ko a tamí inámili nalí omona ripili. Japalí ni chotásiki binea ani ke kanilia nilie. Miná ko ni newalaki japi aní Efesios 5:25, 28 alí ni nátiki japi Jeobá echi versículos jitra tamí ané japi ni we natéami niraa inésaré japi inili nijé upila. Ani raʼíchiki Jeobá yúa alí ni aneki Lesli: “¡Maba!”. Echi ko we kanílili. Troca aseka ti simíaki mulipi bilé bakochi japoná we simáré alí ti peki echi mantel, we ti kanílika simáriki okuaka. ¡Alí ayénachó ani ikíriki binea echi nawésali!

Waʼlú nili echi circuitos japoná ti nochie, Columbia Británica jonsa aminá Terranova, nalí we ti kanila simáriki nochia echoná. ¡Ani ma isié japi riká ni natie chabéi japalí ni taa ke! Siné kaachi ko ani inili siminalia echoná Escuela de  Galaad, nalí ni ke nínilie misionero biléanachó país. Alí ni natie japi echi misioneros ko we machíami nísaré, nalí nijé ko ke mayéi japi ni echi riká nili. Ayénachó ni we majae natia japi tamí julama bilé país echomí África japoná nirúe nayulí alí guerras. Nijé ko we kaníliami ke japoná ni asali.

Bamíali 1992, echoná Unión Soviética japoná ke nakiwie japi ta nóchilipo Jeobá, ma ti ku risensia iyáari jiti checho ku nokiboa echi nóchali. Jiti la tamó nárili achi ti simánilie echomí Estonia japi riká misioneros. Jiti ta ke mayeli japi tamó bayema, ati we raʼíchiki Jeobá yúa. Alí checho ti nátiki: “Jeobá tamó anésaká japi nokiboa bilé nóchali, ¿kechi aʼlá nima japi ta nokiboa?”. Miná ko ti aniki japi a simabo, alí ni nátiki: “Aʼlá ju jiti ta ke simabo echomí África”.

We ti sapú bineli raʼicha estonio niraa alí ma jaré michá simírisa echoná país tamó aneri japi ta nochabo japi riká circuito. Ata simibi iʼwérili iyasia 46 congregaciones alí jaré grupos echoná Estonia, Letonia, Lituania alí Kaliningrado (Rusia). Jiti la ti kuabi niraa raʼíchali bineki japi ju letón, lituano alí ruso. We jilí nili tamujé jitra, nalí echi hermanos ko we natéami niraa inéi japi ta nokali alí tamó iʼwirie. Bamíali 1999 wilaari bilé sucursal echomí Estonia alí tamí aneri japi ni nochama japi riká comité echi hermanos Toomas Edur yúa, Lembit Reile alí Tommi Kauko.

Ati machiki wiká Testigos japi milaari echomí Siberia. Tákoré namuti we jilírami ikili echoná cárcel o we miká mochili echi téemala yúa, echi ko sinibí a kaníliami nili alí kanila nawésili. Jepuná jitra ta bineki japi ta a omeri anachia alí kaníliami niya tákoré namuti jilírami ikiyé.

Jiti ta we nochie alí ti ke me isabie, Lesli ko we risiyá nílili. Nalí echalí ko ke ti machiki japi Lesli nayúami ke fibromialgia. Jiti la ti nátiki checho ku simamia echomí Canadá. Alí japalí tamó bayeri echi escuela japi biné japi nocha japi riká Comité de Sucursal echomí Patterson (Nueva York), ani nátiki japi ta ke oméripo simíaya. Nalí ma we raʼichasa Jeobá yúa, ati aniki japi a simabo alí Jeobá tamó iʼwírili. Jiti japalí ti muchuwie echoná escuela Lesli ówitami nili, echi riká miná ko checho ti ku chotásiki nochia japi riká ne kulí.

Siné rokó bamíali 2008, japalí ti ma ku Estonia muchuwie, tamí raʼíchili central mundial ka jonsa alí tamí aneli achi ti simánilie nochasia echomí República Democrática del Congo. Ke ni mayéi japi echalí rokojó tamí raʼíchima alí japi nakimea japi baʼalínala rawé ku ni ruyema japi ni nátili. Ke ni ruyeki Lesli echalí rokó jiti aʼlá ochimea. Nalí nijé ko ke ochiki ruyea Jeobá japi chúriká ni nilie simiyá echomí África.

Baʼalínala rawé japalí ni ruyeki Lesli, ati aniki: “Jeobá tamó ané japi simabo echomí África. Nalí, ¿chúriká ti machiboa achi ti omeri echi riká  nokayá ke ti cho echi riká nokisáaká?”. Jiti la, ma 16 bamíali mochisa echoná Estonia, ata simíaki echomí Kinsasa, japi capital ju echoná país. Echi sucursal olayé we baʼóami jardín alí ti we kilí nilie. Japi bachá isili Lesli echoná cuarto ko ju, achayá bilé tarjeta japi ti tóoki Canadá jonsa, japi aniyé: “Siwá japoná mi wilaari”. Japalí ti ma binérisa echi pagótami echi Biblia jitra, ma machisaa echi hermanos alí ma nochasa japi riká misioneros, ati machiki japi ta a omeri we kaníliami niya. Alí miná ko ti simíaki iʼwérili iyasia echi sucursales japi jawi echoná 13 países echoná África. Jepuná tamó iʼwírili machiyá jarecho pueblos japi we baʼóami ju alí sinúrika. Ma ni ke majaa nilie alí ti waʼlú matétara iyaki Jeobá jiti tamó júali echomí África.

Echoná Congo-Kinsasa tamó iyali koʼwáami japi ta ke mayéi japi okebo, japi riká echi konói. Nalí japalí ti ineki japi echi hermanos we raʼilie koʼyá echi, ati cho koʼyá ineki chu kami ka alí ti we raʼíliki.

Ayénachó ati simíaki jaré pueblos echomí este echoná país koʼwáami tóolia alí iʼwérili iyasia echi hermanos, japoná jaré pagótami we rasíami risoa olayé echi mukí alí echi kuuchi. Wikabéala echi hermanos we risóati ke. Nalí we ti kanilie inea japi echi ko we bichiwi japi checho ku jawásitami nima echi suwíami alí japi we galé Jeobá, alí ke siné riwéi echi alí echi organización. Suwaba japi echi nokayé tamó iʼwérili iyali. Jaré echi hermanos ma ke olali japi ichali alí japoná pirélima, jepuná tamí binérili japi wabé natéami ju Jeobá amígowala niya alí ke ko olayá wiká namuti. Tákoré echi hermanos echi riká pireili, we kaníliami ke. Inea suwaba jepuná, tamó iʼwírili anachia echi namuti we jilírami alí echi karú ikiwáami.

Pe aminana ko ti biléana juláari, jipi ko echomí sucursal Hong Kong. Ke ti siné mayeli japi ta pirélipo echomí Asia. Nalí japi riká Jeobá sinibí tamó iʼwírili japoná ti nóchili, jipi ko ati sapú aniki japi a simabo tákoré ti ke machiyé japi chúriká nima echomí Hong Kong. Jiti la, bamíali 2013  ati we omóniki anea echi amigos japi ta ma simabo echoná África jonsa.

Simíaya pirélisia echomí Hong Kong, a jilí nili jiti echoná wiká pagótami rijowi alí sinibí anéchini carros alí jarecho si namuti, ayénachó ti we jilí niraki binea raʼichia chino cantonés. Nalí echi hermanos we kanílika tamó nareli alí ti we raʼíliki koʼyá echi koʼwáami echoná nirúami. Jiti niruili wiká nóchali alí echi namuti we natéami ke, echi Japi Aʼlá Niseri anili japi ralinema japoná wilíachi sucursal alí biléanachó ku wilama. Alí bamíali 2015, Lesli alí nijé ati simíaki pirélisia echomí Corea del Sur alí jipi jenaʼí ti a bijí muchuwi. Binea raʼichia coreano a ju bilecho namuti we jilírami, nalí japalí echi hermanos tamó ané japi ta aminabi we aʼlá raʼicha coreano niraa, echi ko tamó iʼwérili iyá.

Isini kaachi a jilí ju olayá kulíwami amigos, nalí ti machiki japalí ti echi hermanos bayésaká tamujé bitélachi, ke ti wilí noká machiyá echi. Jiti sinéami ati nijéwinali Jeobá alí Jeobá ko tamujé niwali we simárika, ata omeri we galea sulachí jonsa alí amigos niya echi hermanos yúa (2 Cor. 6:11).

Ata bineki galea echi pagótami japi riká Jeobá galé alí ata we iʼwérika noká inea piri nakí echi japi ta nokiboa jiti we tamó galé. Japalí ta siwea nilie o japalí ta nárika nokayé achi kanilie echi hermanos tamujé yúa, ata inéi echi tarjetas alí cartas japi tamó iyali echi amigos. Ata ineki japi Jeobá ko a tamó kipúe japalí ti echi yúa raʼichie alí tamó iʼwirie alí iʼwérili iyayé.

Suwaba jepuná bamíali, Lesli alí nijé, ati bineki japi tákoré ti olá wiká nóchali, a we natéami ju japi ta okuaka napawika simáripo alí japi aʼlá ju japi ta achiboa aboi jitra japalí ta ke aʼlá anisaa binea bilecho raʼíchali. Alí suwaba rokó ati nata echi namuti japi ta we galeli alí ti matétarabá iyá Jeobá.

Ke ni siné mayéi japi ni misionero nima alí japi ni bitélima jaréanachó países. Jipi ko ti machí japi Jeobá nikúurola jitra ata omeri nokayá suwaba namuti, alí machiyá jepuná ani we kanili. Ani nata japi riká anili echi profeta Jeremías: “Mujé tamí ékili, oh, Jeobá” (Jer. 20:7). Echi riká ju, Jeobá ko wiká namuti aʼláala tamujé iyali japi ta ke mayeli japi ta oméripo nokayá. ¡Alí ni simiki aseka echi avión! Wikaná ta simíali japi ni ke mayéi japi ni simea japalí ni taa ke. Echoná malí continentes ata simíali iʼwérili iyasia echi hermanos japi nocha echoná sucursales. Ani waʼlú matétarabá iyá Lesli jiti sinibí we kanílika tamí iʼwírili isiá echi nóchali japi ta nareli.

Sinibí ta newalá jépuká ta nóchilia noká alí chúsiá. Echi aʼláala namuti japi Jeobá tamujé iyá jipi, néwariwéliti japi pe aminana aminabi wiká namuti tamujé iyama (Sal. 145:16).