1, 2. Japi riká aní Salmo 25:14, ¿piri ta nokisáré jiti we aʼlá amigos nipo Jeobá yúa?

 ¿PIRI mi mayé japi mi isísaré we aʼlá amigo nimia? A keʼré japi mi animea japi okuaka anakupi galema alí iʼwírima. Nalí ke mi siné natama japi mi majaa nílisaré mujé amígowala. Echi texto japoná machiburi na binelíwami ruyé japi Jeobá amígowala nínali ko aʼlá nokisáré o majásaré (leeri Salmo 25:14).

² Tákoré ti wiká bamibi o kuabi ma testigo Jeobá ka, sinéami ta aminabi majaa nílisaré Jeobá. Nalí, ¿piri aniwáami ju majaa Onorúami? ¿Piri tamó iʼwírima majaa nilia omonáritia Jeobá? Alí, ¿piri ta biné echi sumo sacerdote Jehoiadá, Abdías alí echi silíami Jehoás jitra? Jenaʼí binepo echi bikiá namuti jitra.

3. Ruyé chúriká tamó iʼwiri majaa nilia.

³ Ke chati ju majaa nilia japalí ti machí japi bilé namuti tamó risoa nílitima. Jiti ati echi riká nílisaká, tamó iʼwírima aʼlá namuti nokayá. Ma inepo jaré ejemplos. Japalí ti majaa nili wichiyá, ke ti mulíwipo japoná we rijachi ju. Ati majaa nílisaká risoa nilia, ke ti nokiboa echi namuti japi chati ju. Alí ati sinibí amigos nínalaká bilé yúa, ati majaa nílipo nokayá namuti japi echi omonáritima.

4. ¿Piri nakí Satanás japi ta nílipo Jeobá jitra?

⁴ Satanás ko nakí japi echi pagótami majama Jeobá. Ayénachó  nakí japi ta bichíwipo japi Elifaz aneli echi Job: japi Jeobá ko we iyóami ju, jiti la castigo iyá echi pagótami alí japi ke siné oméripo kanílitia echi (Job 4:18, 19). Satanás ayénachó nakí japi ta we majabo alí riwepo nóchilia Jeobá. Jiti ta ke nokiboa japi echi nakí, ati aminabi majaa nílisaré omonáritia Jeobá.

5. ¿Piri aniwáami ju majaa Onorúami?

⁵ Echi pagótami japi majaa Onorúami we galé echi alí ke nokinali bilé namuti japi isima japi riwema echi amígowala ka. Bilé we aʼlá ejemplo japi majaa nílili omonáritia Onorúami, echi ko nili Jesús (Heb. 5:7). Japi echi nílili, ke nili cha riká majaa Jeobá jitra (Is. 11:2, 3). Jesús ko nalí we galeli echi Onolá alí sinibí nijéwinilie (Juan 14:21, 31). Tamujé ayénachó we riwiwi Jeobá alí ti echi nijewi jiti echi ko bilé Onorúami we galéami ju, we machíami, wachíniga isíami alí we omérami. Ayénachó ti machí japi echi ko we tamujé galé alí we natéami niraa iné japi ta noká. Japi riká, japalí ti ke nijewi, echi ko omona nili, alí japalí ti a nijewi, echi ko we kanili (Sal. 78:41; Prov. 27:11).

6. ¿Piri tamó iʼwírima jiti majaa nílipo omonáritia Jeobá? (Salmo 34:11).

⁶ Ke bilé pagótami ocheri majaa nilia Jeobá; sinéami ta iʼwérili nokisáré jiti majaa nílipo omonáritia echi (leeri Salmo 34:11). Nalí, ¿chúriká ti nokiboa? Ineka echi namuti japi echi niwali. Japalí ti iné suwaba echi, ati machí japi Jeobá we machíami ju, we omérami alí japi we tamujé galé. Nokayá jepuná tamó iʼwiri aminabi we riwiwia Jeobá alí aminabi galea (Rom. 1:20). Bilé hermana Adrienne riwéami, anili: “Japalí ni iné echi namuti japi Jeobá niwali, ani machí japi echi ko we machíami ju alí jepuná tamí iʼwiri aminabi riwiwia alí aminabi bichiwia japi echi tamí ané sinibí we aʼlá ju”. Jiti we nátili echi namuti jitra, aminá ko echi jéanili: “Ke ni sineti isínali bilé namuti japi isima japi ni riwema nijewia Jeobá, echi japi tamí iwítili”. Aʼlá nima japi na tarali ami ikírima inea echi namuti japi Jeobá niwali. Echi mi iʼwírima aminabi we galea Jeobá alí riwiwia (Sal. 111:2, 3).

7. ¿Chúriká tamó iʼwiri raʼichia Onorúami yúa?

⁷ Bilecho namuti japi tamó iʼwírima majaa nilia Jeobá, echi ko ju sinibí raʼichia echi yúa. Japalí ti aminabi raʼicha Onorúami yúa, ati aminabi we aʼlá machí japi chúriká ju echi. Sinibí japalí ti tani Onorúami japi tamó iʼwírima anachia bilé karú ikiwáami, ati nata japi echi ko we omérami ju. Japalí ti matétara iyá jiti nijili echi nolá tamujé jitra, ati newalá japi echi ko we tamó galé. Alí, japalí ta tani japi tamó iʼwírima japalí ti olasa bilé karú ikiwáami, ati newalá japi echi ko we machíami ju. Raʼichia Jeobá yúa tamó iʼwírima aminabi riwiwia echi, alí ke nokayá namuti japi isima japi riwepo Jeobá amígowala ka.

8. ¿Piri ta nokisáré jiti ke riwepo majaa nilia omonáritia Jeobá?

⁸ Jiti aminabi a majaa nílipo omonáritia Jeobá, ati binésaré echi ejemplos aʼláala alí ke aʼláala japi uchuwi echoná Biblia. Ma binepo bikiá ejemplos jitra. Bachá chotásipo binea okuá pagótami jitra japi nijéwami nili Jeobá: Abdías, japi nuláami nili echoná Acab bitélachi, alí echi sumo sacerdote Jehoiadá. Upá ko binepo echi silíami Jehoás jitra japi nuláami nili echomí Judá, japi ne kulí ko we aʼlá nijéwami nili Jeobá alí miná ko riweli nijewia.

9. ¿Chúriká iʼwírili Abdías majaa Jeobá? (1 Reyes 18:3, 12).

⁹ Echi Biblia jériká aní Abdías b jitra: “Abdías ko we majae Jeobá” (leeri 1 Reyes 18:3, 12). ¿Chúriká iʼwírili majaa nilia Jeobá? Echi ko bilé rijoi ke chiwáami nili alí we bichíwiliwami. Jiti echi riká nili, echi silíami Acab wilali nuláami niraa echi bitélachi (ayénachó iné japi aní Nehemías 7:2). Ayénachó jiti we majali Onorúami echi namuti iʼwírili jiti ke majáami nima alí echi nili japi a we newaleli. ¿Chúsiá? Jiti echi ko biteili japalí nulali echi silíami Acab, echi japi Jeobá we chati niraa ineli jarecho silíami yúa japi niruili echalí (1 Rey. 16:30). Ayénachó Acab niwika asali Jezabel yúa japi nijéwami nili Baal, bilé mukí japi we kichíe Jeobá alí japi nakiyé japi echi 10 tribus japi nirúe echoná Israel ma ke nijéwima Jeobá. Alí echi mukí miʼali wiká profetas japi nijéwami nili Jeobá (1 Rey. 18:4). ¡We jilí nili nijewia Jeobá echalí!

10. ¿Chúriká néwariwélitili Abdías japi ke majáami nili?

¹⁰ ¿Chúriká néwariwélitili Abdías japi ke majáami nili? Japalí Jezabel chotásili aa echi profetas Jeobá níwala jiti miʼlimea, Abdías ko ichípika riweli echoná risochí 100 profetas “rojánika 50 niraa” alí “iyayé koʼwáami alí baʼwí” (1 Rey. 18:13, 14). Jezabel machílaká japi isili Abdías, echi ko miʼlimeli. Japi riká sinéami pagótami, Abdías ko ke mukunalie, nalí echi ko we galeli Jeobá alí japi echi nijéwami nili alí ke ko binoy, jiti la echi ko iʼwírili echi profetas.

11. ¿Chúriká noká japi riká Abdías wiká japi Jeobá nijéwami ju? (Ayénachó iné echi foto).

¹¹ Jipi rawé wiká japi Jeobá nijéwami ju, piré japoná ke riwéliwa japi nóchilima echi. Japi riká Abdías, echi hermanos alí hermanas iʼwérili noká nijewia Jeobá alí ayénachó riwiwi echi weli jáwami (Mat. 22:21). Echi ko néwariwéliti japi majaa Onorúami japalí nijewi japi echi aní alí ke ko echi pagótami (Hech. 5:29). Jiti la echi ko ichípika nawesa echi raʼíchali aʼláala alí niwá napawíliwami (Mat. 10:16, 28, TNM). Ayénachó iʼwérili noká jiti echi hermanos sinibí rawé olama  japi jitra binema aminabi mulíwimia Jeobá. Ma binepo Henri jitra japi bité bilé país echomí África japoná chabé ko ke nakíwili japi nóchilima Jeobá. Japalí echi riká nili, Henri anili japi echi tóolima echi hermanos echi oselí japi jitra binema. Echi ko anili: “Nijé ko we riwélami ju, jiti la ni we aʼlá machí japi riwiwia Jeobá tamí iʼwírili ke majáami niya”. Mujé ayénachó ke majáami nima japi riká Henri ami binésaká majaa Onorúami.

12. ¿Chúriká néwariwélitili Jehoiadá alí echi upila japi we nijéwami nili Jeobá?

¹² Echi sumo sacerdote Jehoiadá we majali Jeobá, jiti la ke riweli echi nijewia alí iʼwírili jarecho. Japalí Atalía, echi Jezabel ranala, binoy wilíali japi riká silíami tákoré ke risensia olali, echalí Jehoiadá ko néwariwélitili japi we majae Onorúami. Echi pagótami we majae echi Atalía jiti we chati nili. Echi mukí ko iʼwérili isili silíami nínalia, jiti la miʼlinalie suwaba echi silíami kúchuwala, ¡tákoré binoy echi akásiwala nili! (2 Crón. 22:10, 11). Jehoás bi ke miʼlirúami nili jiti echi Jehosabeat alí echi kunala Jehoiadá ichípika achali alí tibuli. Echi riká iʼwírili jiti sinibí a nuláami nima echi David téemala. Jiti echi ko we nijéwami nili Jeobá, ke majali Atalía alí isili japi aʼlá nili (Prov. 29:25).

13. ¿Chúriká checho néwariwélitili Jehoiadá japi we nijéwami nili?

¹³ Japalí Jehoás kichao bamíbami nili, Jehoiadá checho néwariwélitili japi we nijéwami nili Jeobá. Echi ko nátili isimia bilé namuti. Aʼlá ikisáaká japi nátili, Jehoás nima riweili silíami, bilé japi David téemala nili. Nalí ke aʼlá machínisaká japi nátili, Jehoiadá miʼlirúami nima riweili. Nalí jiti Jeobá nikúurili, suwaba echi namuti we aʼlá machínili. Alí echi japi nuláami nili echoná téemala alí echi levitas iʼwírila jitra, Jehoiadá wilali Jehoás silíami niraa alí nulali japi miʼlimea Atalía (2 Crón. 23:1-5, 11, 12, 15; 24:1). Miná ko, echi “katúwika isili Jeobá yúa echi silíami yúa alí echi pueblo; echoná anijoli japi aminabi a nima echi Jeobá puéblowala” (2 Rey. 11:17). “Ayénachó jáwili echi yewi tibúami echoná yéwichi japoná wilí Jeobá kalila jiti ke wesi moʼimea japi ke biʼwíami ju” (2 Crón. 23:19).

14. ¿Chu isili Jeobá jiti Jehoiadá we natéami niraa ineli echi?

¹⁴ Wiká bamíali bachaka jonsa Jeobá ko anili: “Nijé ko natéami niraa inema japi tamí natéami niraa iné”, alí echi riká isili Jehoiadá yúa (1 Sam. 2:30). Japi riká, Jeobá ko isili japi echoná Bíbliachi oserúa ripima echi namuti aʼláala japi isili na sumo sacerdote jiti tamó binérima (Rom. 15:4). Alí japalí Jehoiadá mukuli, Jeobá isili bilecho namuti, echoná Biblia aní: “Tórami nili echoná ciudad David níwala echi isélikami yúa, jiti echi ko aʼlá isili echoná Israel nóchilia Onorúami alí nochia echoná Jeobá kalila” (2 Crón. 24:15, 16).

15. ¿Piri ta biné Jehoiadá jitra? (Ayénachó iné echi fotos).

¹⁵ Japi isili Jehoiadá tamó iʼwiri jiti ta aminabi majaa nílipo Jeobá. Echi ancianos omeri echi riká cho nokayá japi riká Jehoiadá. ¿Chúriká? Japalí ke riwé tibúa echi hermanos echoná congregación (Hech. 20:28). Echi hermanos japi ma ochérami ju, omeri binea japi ke riwésaká Jeobá alí majaa nílisaká, echi ko a bijí néema jiti isima japi riká binoy nakí. Echi remalí ko omeri binea japi chúriká Jeobá nili Jehoiadá yúa alí we natéami niraa inésaré echi hermanos japi  ochérami ju alí riwíwisaré, nalí wabé natéami niraa inésaré echi hermanos japi ma wiká bamíali nokali nóchilia Jeobá (Prov. 16:31). Alí echi japi nuláami nili echoná téemala alí echi levitas jitra, ata biné jepuná namuti: nijéwipo alí nokiboa japi riká aní echi japi Jeobá jáwili (Heb. 13:17).

16. ¿Piri namuti we chati isili Jehoás?

¹⁶ Japalí remalí nili, echi silíami Jehoás iʼwérili isili aʼlárika nijewia Jeobá jiti echi riká binérili Jehoiadá (2 Rey. 12:2). Nalí pe aminana japalí mukuli Jehoiadá, Jehoás ko kipuli echi kúruwi Judá piréami japi riweli nijewia Jeobá. Jiti la, Jehoás alí echi pueblo “chotásili amachikia echi tona sagrados alí echi ídolos” (2 Crón. 24:4, 17, 18). Tákoré echi namuti we omonáritili Jeobá, echi ko “ke riweli profetas júulia jiti checho ku rotówima echi yúa”. Nalí “echi ko ke kipúnali”. Ke cho nijéwili Jehoiadá nolá, Zacarías c riwéami, japi profeta alí sacerdote nili, alí ayénachó japi Jehoás prímowala nili. Nalí ke echi bi nili, Jehoás nulali japi Zacarías miʼárami nima, tákoré echi téemala nokali Jehoás iʼwiria. ¡Echi ko we cha isíami nili! (2 Crón. 22:11; 24:19-22).

17. ¿Piri ikili Jehoás?

¹⁷ Jehoás ko riweli majaa Onorúami, jiti la we chati namuti ikili japi riká ma anili Jeobá:  “Japi tamí nasini ko ayénachó nasínirami nima” (1 Sam. 2:30). Pe aminana echi sontarsi sirios japi kuabi nili, niyúrili echi Jehoás níwala sontarsi japi wiká nili alí echi ko we risoa olari nalí ke mukuli. Japalí echi sontarsi sirios ma ku simíali, echi Jehoás nóchiliami miʼali echi, jiti echi ko we cha isili miʼayá Zacarías. Alí jiti echi ko we chati nili, ke tórami nili echi isélikami yúa (2 Crón. 24:23-25).

18. Japi riká aní Jeremías 17:7, 8, ¿piri nokiboa jiti ke nipo japi riká Jehoás?

¹⁸ ¿Piri ta biné Jehoás jitra? Japi riká bilé rojá japi ke ne rilé nawé, newalé bilé usí jiti jiwera wilimea, echi riká cho Jehoás newaleli japi Jehoiadá echi iʼwírima jiti bichíyami nima. Jiti la japalí Jehoiadá mukuli, Jehoás ko kipuli echi apóstatas alí ma ke nijéwili Jeobá. Echi jitra ati biné bilé namuti we natéami: ke ti majásaré Jeobá jiti jarecho tamó iʼwiri o jiti tamujé téemala alí echi hermanos echi riká cho noká. Jiti ta we aʼlá Jeobá amígowala nipo, ati binésaré, kilí niraa natásaré alí sinibí raʼichásaré Jeobá yúa, jiti echi riká aminabi we galepo alí riwíwipo echi (leeri Jeremías 17:7, 8; Col. 2:6, 7).

19. ¿Piri nakí Jeobá japi ta nokiboa?

¹⁹ Jeobá ko ke siné tamó nulé japi ta nokiboa namuti japi ta ke omeri nokayá. Japi echi tamó ané japi ta nokiboa ko ju japi aní Eclesiastés 12:13: “Majaa echi Onorúami japi ne bichíwali ju alí nijewi japi echi nulá, jiti suwaba jepuná ko ju japi isísaré echi rijoi”. Ati majásaká Jeobá, ati anachabo suwaba echi namuti jilírami japi ta ikí alí sinibí nijéwipo echi, japi riká Abdías alí Jehoiadá. Ayénachó ke ti siné riwepo Jeobá amígowala ka.