1, 2. ¿Chúsiá jipi ayénachó chopi iyiri ju japi riká Lot biteili chabé?

 JAPALÍ ti iné japi echi pagótami we chati namuti noká, japi riká echi nasawíliami chati alí jarecho si namuti, ata inili japi riká echi Lot japi wachía isíami nili. Echi ko “wabé oʼmónali mapujiti sinibí rawé riwali [...] sitíi oláami rijói echoʼná piréami chopi waminabi wabé simírami chati sitíi chuwé olali”. Lot echi riká nílili jiti machili japi echi Onolá Jeobá we kichí japi echi pagótami echi riká nokimea (2 Ped. 2:7, 8). Ayénachó Lot we galeli alí we riwíwili Jeobá, jiti la echi ko ayénachó we kichili japi echi pagótami nokimea echi nasawíliami chati. Jipi echi riká cho ju, echi pagótami ke riwiwi japi Onorúami nulá echi nasawíliami jitra. Nalí tamujé ko a nijéwipo Jeobá ati we galésaká alí ti majaa níliaká omonáritia echi (Prov. 14:2).

² Jiti ta oméripo echi riká nokayá, Jeobá tamó iʼwiri néeka echi busuréliami japi nirú echoná libro Proverbios. Sinéami japi ta cristianos ju, japi riká rijoi, mukí, ochérami, kúruwi alí iwé, ata oméripo binea wiká namuti japi oserúa uchuwi echoná Proverbios.

3. Japi riká aní Proverbios 17:3, ¿chúsiá we natéami ju japi ta tibupo tamujé sulala? (Ayénachó iné echi fotos).

³ Bilé namuti we natéami japi ta jitra we aʼlá tibúsaré tamujé sulala, echi ko ju jiti Jeobá ko iné echi. ¿Piri aniwáami ju? Japi Jeobá ke tamó iné japi riká tamó iné echi pagótami. Echi ko we aʼlá machí chúriká ju tamujé sulala (leeri Proverbios 17:3). Alí, ati we natéami niraa inésaká echi busuréliami japi Jeobá tamó iyá, echi ko tamó galema. Ayénachó ke ti riwepo japi echi Diablo tamó ékima alí ke ti nokiboa echi chati namuti  japi noká echi chati pagótami (Juan 4:14; 1 Juan 5:18, 19). Ati aminabi we mulíwisaká Jeobá, ati aminabi we galepo alí riwíwipo. Ayénachó ke nokinálipo echi namuti japi echi omonáritima alí ke siné natabo nokinalia echi chati namuti japi echi kichí. Japalí nirúlisa bilé namuti japi isima japi ta cha natabo o cha nokiboa, jériká nárika nokiboa: “¿Chúsiá ni risoa nílitima bilé japi we tamí galé alí japi wiká namuti isili tamí jitra?” (1 Juan 4:9, 10).

4. Jiti bilé hermana majali Jeobá, ¿piri isili?

⁴ Bilé hermana japi bité echomí Croacia Marta b riwéami, anili japi siné kaachi echi ko isínali echi nasawíliami chati. Echi ko osali: “Ke ni omérili aʼlá natia. Alí ni we jilí nirali riwea natia isínalia echi chati namuti. Nalí majaa Jeobá tamí iʼwírili”. ¿Chúsiá? Echi ko anili japi majaa Jeobá iʼwírili jiti echi ko natama chu ikimea echi riká isísaká. Ata ikisaa japi riká Marta, tamujé ayénachó echi riká natabo. Nalí wabé natéami ko ju japi ta newalabo japi chati namuti nokisaa omonáritipo Jeobá alí ke ti oméripo sinibí echi amígowala niya (Gén. 6:5, 6).

5. ¿Piri mi biné japi ikili Leo?

⁵ Echi japi majaa Jeobá iʼwérili isimí jiti ke natama japi echi chati namuti japi isimí ke me chati ju, japi riká napawía echi pagótami yúa japi cha nokáami ju. Ma binepo japi ikili bilé hermano Leo riwéami japi bité echomí República Democrática del Congo. Ma simírisa naó bamíali japalí jonsa pakoli, echi ko chotásili napawía jarecho yúa japi cha nokáami nili. Mayeli japi Jeobá ke cha riká iné japi echi yúa napawima ke binoy isísaká echi chati namuti japi echi noká. Nalí pe aminana echi ko chotásili we bajía alí nasawía. Miná ko Leo nátili suwaba echi namuti japi binérili echi wénwala japi Testigos nili alí nátili japi chabéi we  kaníliami nili. Jiti la, echi ko riweli cha isiá alí echi ancianos iʼwírili jiti checho ku nijéwima Jeobá. Jipi ko, Leo we kanila nocha japi riká anciano alí precursor especial.

6. ¿Chu iyiri okuá mukí jitra binepo jenaʼí binelíwami?

⁶ Jenaʼí ma binepo echi capítulo 9 echoná Proverbios japoná nirú jaré busuréliami we natéami. Jena capítulo raʼicha okuá mukí jitra. Bilé aniwáami ju japi we machíami ju alí biléala ko japi ke aʼlá nátami ju. Japalí ti aminabi biné jaréala párrafos, natabo japi echi pagótami japi noká japi Satanás nakí, we natia bi jari echi nasawíliami alí pornografía (Efes. 4:19). Jiti la we natéami ju japi ta aminabi binepo majaa Jeobá alí japi ta ke nokiboa echi chati namuti (Prov. 16:6). Echi okuá mukí japi ta jitra raʼichabo, bayé “echi japi ke aʼlá nátami ju” japi moʼimea echi bitélachi alí kanila okema echi koʼwáami (Prov. 9:1, 5, 6, 13, 16, 17). Nalí, ¿piri ikí echi japi bayéritami nili echi okuá mukí jitra? Ma inepo.

7. Japi riká aní Proverbios 9:13-18, ¿piri ikí echi japi bayéritami nili echi mukí jitra japi ke aʼlá nátami ju? (Ayénachó iné echi dibujo).

⁷ Bachá raʼichabo echi mukí jitra japi ke aʼlá nátami ju (leeri Proverbios 9:13-18). Echi ko ke riwela jiwérika siná: “¡Sinéami echi japi ke aʼlá nátami ju, kiná simasi!”. Echi riká bayé echi japi ke aʼlá nátami ju jiti kanila okema echi koʼwáami. Alí, ¿piri ikí echi japi a nijewi alí moʼí echi bitélachi? Echi ko suwimea jiti echi versículo 18 aní: “Echoná bití echi suwíami”. Echoná Proverbios wisabé niraa raʼicha bilé mukí jitra japi echi iyiri ju. Japi riká, jaréala capítulos tamó ané japi ta tibuka nokiboa bilé mukí jitra japi we cha isíami ju alí bilé mukí jitra japi cha nasawíami ju. Echoná aní japi simía echi bitélachi suwimea (Prov. 2:11-19). Proverbios 5:3-10 ayénachó tamó ané japi ta tibuka nokiboa bilecho mukí jitra japi cha isíami ju; aní japi muliwi ko echi mukí suwimea.

8. ¿Piri natásaré japi kipú echi mukí japi ke aʼlá nátami ju?

⁸ Sinéami japi kipú japi aní echi mukí japi ke aʼlá nátami ju, natásaré achi nijéwima o ke ma. Nalí, ¿chu kabú ju japalí echi mukí tamó bayé? Isini kaachi a nímiré japalí nirú bilé namuti japi isima japi ta chati nokiboa, japi riká echi nasawíliami chati o ayénachó japalí machina pornografía echoná internet o echoná televisión. Echi riká ikisáaká, ¿piri ta nokiboa?

9, 10. ¿Chúsiá ti ke nokisáré echi nasawíliami chati?

⁹ We natéami ju japi ta sinéami ke nokiboa echi nasawíliami chati. ¿Chúsiá? Ma binepo japi aní Proverbios japoná ruyé piri aniyá  atí “echi mukí ke aʼlá nátami”. Echi ko jéaní: “Echi baʼwí chikórami we akáami ju”. Echoná Biblia aní japi echi nasawíliami japi noká echi niwíkami ko ju japi riká echi baʼwí japi raʼila bajíliwa (Prov. 5:15-18). Bilé mukí alí rijoi japi aʼlá niwíkami ju, a omeri nasawía anakupi niraa. Nalí, ¿piri aniwáami ju echi “baʼwí chikórami” japi aní echoná Proverbios? A keʼré japi echi ko ju echi nasawíliami chati japi Onorúami we kichí. Alí aní japi “chikórami” ju jiti japi echi riká noká, ichípika noká japi riká bilé chiwáami japalí chikó. Alí echi ko iné japi riká ko baʼwí akáami jiti mayé japi ke bilé ritiwá echi namuti chati japi noká. Nalí ke bichíwali ju japi ke wesi ritiwá jiti Jeobá ko suwaba ritiwá; alí japi ma ke nijéwili Jeobá echi riká nokayá, we risoa nílima jiti ma ke echi amígowala ju (1 Cor. 6:9, 10). Nalí ke echi bi ju japi ikí.

¹⁰ Ayénachó japi noká echi nasawíliami chati riwela nílimiré, ma ke natéami ka nílima, ropéami ripima tákoré echi ko ke nakili o risoa nilia ripima echi téemala yúa. Jiti la, we aʼlá nátika nipo ke ti nijéwisaká japalí tamó bayesa “echi mukí ke aʼlá nátami”. Wiká japi noká echi nasawíliami chati ke bi riwé Jeobá amígowala niya, ayénachó nachú echi nayulí japi isimí japi suwimea (Prov. 7:23, 26). Proverbios 9:18 jériká suwena: “Japi bayeli echi mukí ma rilé jochi tota bití”. Nalí, ¿chúsiá wiká pagótami ju japi noká echi nasawíliami chati tákoré machí japi risoa ikimea o suwimea? (Prov. 9:13-18).

11. ¿Chúsiá we chati ju echi pornografía?

¹¹ Wiká ju japi iné echi pornografía alí jaré ko mayé japi ke chati ju japi inema. Nalí echi ko ke bichíwali ju, echi pornografía we chati ju alí isimí japi echi iné we jilí nirama ku riwea. Ayénachó japi iné pornografía we jilí niraa ku wikawia japi ineli alí isimí japi aminabi we inílima cha isínalia (Col. 3:5; Sant. 1:14, 15). Ne sojí suwaba japi nokali echi nasawíliami chati, inéami nili echi pornografía.

12. ¿Piri isísaré bilé cristiano japalí machínisa pornografía echoná celular o biléanami japi isima japi chati namuti natama?

¹² ¿Piri isísaré bilé cristiano japalí machínisa pornografía echoná celular o biléanami? Echi ko sapú riwésaré inea. Bilé namuti japi iʼwírima jiti echi riká isima ko ju, natia japi wabé natéami ju Jeobá amígowala niya. A nirú jaré namuti japi echi pagótami nata japi ke pornografía ju, nalí a isimí japi ta natabo echi chati namuti; jiti la echi ke cho inésaré. ¿Chúsiá? Jiti echi ko ju japi riká ko ma nokayá echi chati namuti tamujé sulálachi japi riká anili Jesús (Mat. 5:28, 29, TNM) Bilé anciano David riwéami japi bité echomí Tailandia, jéaní: “Nijé ko jepuná nárika isimí: ‘¿Achi galéeré Jeobá japi ni aminabi inea ripima jepuná namuti tákoré ke pornografía ju?ʼ. Natia echi namuti tamí iʼwiri jiti ni aʼlá isima”.

13. ¿Piri tamó iʼwírima jiti we aʼlá nátika nokiboa?

¹³ Ati majásaká omonáritia Jeobá, ke ti jilí nirabo aʼlá nátika nokayá. Jiti la a bichíwali ju japi riká aní Proverbios 9:10: “Majaa Jeobá ko ju japoná jonsa chotásiwa machíami niya”. Proverbios 9:1-6 we aʼlá ruyé jepuná jitra, japoná raʼicha bilé mukí jitra japi we machíami ju.

14. ¿Piri jitra raʼicha Proverbios 9:1-6?

¹⁴ (Leeri Proverbios 9:1-6). Jenaʼí ruyé japi riká Jeobá ko tamó bayea, jiti echi ko tamó niwali alí echi isimí japi ta we machíami nipo (Prov. 2:6; Rom. 16:27). Echoná versículos, Proverbios raʼicha bilé waʼlú kalí jitra japi olá kichao columnas. Echi jitra a tamó natari japi Jeobá we aʼláala ju, japi naré sinéami  pagótami japi nijéwinali echi busuréliami japi echi ané.

15. ¿Piri tamó ané echi mukí japi jitra raʼicha Proverbios 9:1-6?

¹⁵ Jeobá ko we aʼláala ju alí tamó iyá wiká namuti aʼláala. Jepuná ko néwariwéliti echi mukí japi jitra raʼicha Proverbios 9:1-6 japi aniwáami ju “echi ne bichíwali machiwáami”. Echi ko aʼlárika wásika riweli echi sapá alí manali echi vino, ayénachó aʼlárika wilali echi mesa (Prov. 9:2). Alí echoná versículos 4 alí 5 “echi ne bichíwali machiwáami” ané echi japi ke aʼlá nátami ju: “Kiná simasi, okesi echi pan”. ¿Chúsiá ti nijéwisaré japi aní echi mukí? Jiti Jeobá tamujé tibúnali alí nakí japi ta we machíami nipo. Ayénachó ke nakí japi tamujé risoa nilia pirélipo echi chati namuti jitra japi ta chabé nokali. Jiti la, echi ko isimí japi we machíami nima echi japi wachíniga nokáami ju (Prov. 2:7). Ati majásaká Jeobá, ati kanílitinalipo alí nijéwipo echi busuréliami japi tamó ané. Echi riká ti nokisáaká, ati we kaníliami nipo (Sant. 1:25).

16. Jiti Alain majaa Jeobá, ¿piri isili, alí piri namuti aʼláala ikili?

¹⁶ Inepo bilé ejemplo japi tamó bineri japi majaa Jeobá tamó iʼwírima jiti we aʼlá nátika nokiboa. Bilé anciano Alain riwéami japi nocha japi riká binériami bilé escuélachi, jéaní: “Wiká compañeros japi ni yúa nocha mayé japi echi películas japoná machina pornografía aʼlá ju jiti echi aboi binema alí echi riká ruyema piri ju echi nasawíliami”. Nalí Alain ko machí japi ke bichíwali ju. Echi ko ruyé japi isili: “Jiti ni majaa Jeobá, ke ni ineki echi iyiri películas. Ayénachó ni ruyeki nijé compañérowala chúsiá ni ke echi riká isimí”. Echi riká nijéwili jepuná busuréliami: “Simasi echoná buwérili aʼlá inámiami” (Prov. 9:6). Jiti echi compañeros ineli japi Alain we aʼlárika ruyeli alí we aʼlá isili, jaré ko chotásili binea echi Biblia alí simíaya echoná napawíliwachi.

17, 18. ¿Piri namuti aʼláala naré echi japi nijewi “echi ne bichíwali machiwáami”? (Ayénachó iné echi dibujo).

¹⁷ Jeobá ko nee jepuná okuá ejemplos echi umukí jitra tamó binérimia piri ta nokisáré jiti pe aminana we kaníliami nipo. Japi a nijewi ko “echi mukí ke aʼlá nátami”, a nokinali echi nasawíliami japi chati ju. Echi ko bi nata nokinalia echi namuti japi aboi nakí alí ke nata japi noká risoa nílitima pe aminana. Alí japi echi noká isima japi suwimea (Prov. 9:13, 17, 18).

¹⁸ Nalí japi nijewi echi mukí japi aniwáami ju “echi ne bichíwali machiwáami”, we kaníliami ju jiti olá suwaba echi namuti japi newalé jiti Jeobá amígowala nima (Is. 65:13). Echi profeta  Isaías jitra, Jeobá ko jéaní: “Tamí aʼlá kipusi alí okesi japi aʼlá ju, alí timí kanila okema echi we raʼíami koʼwáami” (Is. 55:1, 2). Echi riká ju, jipi ko tamujé ko biné galea japi Jeobá galé alí kichía japi Jeobá kichí (Sal. 97:10). Alí ati we kanili bayea jarecho jiti ayénachó ne bichíwali machíami nima. Tamujé ko ju japi riká “echi umukí nóchami” japi raʼicha echi capítulo 9 echoná Proverbios japi “ripabé jonsa echoná ciudad” sinaka bayé jarecho. Tamujé alí jarecho japi ayénachó nijewi we ti aʼláala namuti naré jipi, nalí ayénachó ati aʼláala namuti narepo pe aminana. Ke ti riwésaká simíaya echoná buwérili aʼlá inámiami, ati oméripo sinibí pirea (Prov. 9:3, 4, 6).

19. Japi riká aní Eclesiastés 12:13, 14, ¿piri ta nokisáré? (Ayénachó iné echi recuadro “ ¿Chúriká tamó iʼwiri majaa Jeobá?”).

¹⁹ (Leeri Eclesiastés 12:13, 14). Tákoré ma ti ne jubá rawé piré alí ikí wiká chati namuti, tamujé ko ke ti riwénali majaa Jeobá. Echi riká ti nokisáaká, ata tibupo tamujé sulala, ke ti siné nokiboa echi chati namuti japi riká echi nasawíliami chati alí Onorúami amígowala nipo. Alí jiti ta we galé alí riwiwi Jeobá, ati aminabi bayepo sinéami jiti aama “echi ne bichíwali machiwáami” alí nokimea japi riká biné.