Ani ochériki 22 inárachi diciembre bamíali 1929 echomí Noville, bilé pueblo japi mulipi ju echoná ciudad Bastoña (Bélgica), alí echoná machirúami ju japi riká las Ardenas. Ani newalá japalí ni towí nili alí ni biteili echoná granja nijé wénwala yúa. Nijé bonilá Raymond alí nijé, ati sinibí rawé simíaye wisunamia echi waasi, alí japalí nijé onolá ichayé ayénachó ti iʼwirie. Echoná pueblo sinéami pagótami we aʼlá nokayé anakupi niraa iʼwiria.

Nijé wénwala, Emile alí Alice, we católicos nili alí sinibí oméachi simíaye echoná iglesia. Nalí bamíali 1939, japalí jaré precursores sili Inglaterra jonsa, ma ke echi riká nili. Echi ko sinibí michá iyayé nijé onolá echi oselí riwéami Consolación (japi jipi ko rewé ¡Despertad!). Nijé onolá ko sapú machili japi echi nili ne bichíwali alí chotásili binea echi Biblia. Nalí echi pagótami echoná pueblo piréami, ma ke simá nokáami ke nijé onolá yúa alí chotásili sayeria japalí echi ko riweli simiyá echoná iglesia. Ayénachó iʼwérili nokali jiti nijé onolá ke riwema católico niya, echi namuti jitra we naʼáwili.

We ni risoa nilie japi echi pagótami we sayerie nijé onolá. Echi jitra ani iʼwírili tánili Onorúami ne sulachí jonsa, japi riká ni anili ne kulí echoná bachá párrafo. We be nalí pe aminana, ani ku kaníliki japalí echi pagótami ma ke me naʼawie nijé onolá yúa. Ani we bichíwiki japi Jeobá ju echi Onorúami japi tamó kipú japalí ti echi yúa raʼicha.

Echi Alemania nazi moʼili nakosia echoná Bélgica 10 inárachi mayo 1940, jepuná ko isili japi wiká pagótami júmisima echoná  país jonsa. Tamujé ko simíaki sur echomí Francia. Echomí buwichimi ati riwaki nakóachi sontarsi alemanes alí franceses.

Japalí ti ku bitichí siki, ati riwaki japi ne sojí suwaba namuti chikórami nili. Pe asali bi tamó buwea tamujé níwala kochí, Bobbie riwéami. Japalí ni inéi ikíachi suwaba jepuná namuti, ani nárika isié: “¿Chúsiá nirú wiká guerras alí wiká chati namuti?”.

Echalí, we tamó iʼwírili echi hermano Emile Schrantz, a japi nóchili japi riká precursor alí anciano. Echi ko we aʼlá tamó ruyeli néeka echi Biblia chúsiá nirú risoa níliwami alí jarecho si namuti japi ta machinalie. Echalí jonsa, aminabi ni we aʼlá Jeobá amígowala niki alí ni we bichíwiki japi echi ko we galéami ju.

Kecho suníachi echi guerra, ati checho ku chotásiki raʼichia echi hermanos yúa. Echi michá agosto bamíali 1943, echi hermano José-Nicolas Minet nawali tamujé bitélachi alí nijili bilé nawésali. Ma sunisa, echi ko nárili: “¿Jépuká pakónali?”. Nijé onolá alí nijé ayáwili sikala, alí ti pakótami nili bilé taa bakochi japi mulipi simirie echoná bitichí.

Michá diciembre bamíali 1944, niruili echi nakówami riwéami: batalla de las Ardenas. Jiti mulipi nili japoná ti pireili, ati ichípika mochili bilé michá echoná rilé sótano. Siné kaachi, japalí ni machíniki kóʼamia tamujé bukula, rujili wiká balas alí bombas alí najúnili echi kalí poala japoná ti jariweli echi sunú alí jarecho si namuti. Mulipi echoná wilili bilé sontarsi americano japi sinaka tamí aneli: “¡Wichí boʼí!”. Sapú echi yúa simiki, alí echi ko tamí ucheli echi casco tamí tibumia.

Ma simírisa echi guerra, ati chotásiki we napawía echi hermanos yúa echoná congregación Lieja muchúwami, japi mulipi nili japoná ti pireili. Miná ko echomí Bastoña ati niwaki bilé grupo. Ani chotásiki nochia echoná administración de impuestos alí ayénachó ni bineki jiti ni abogado nima.  Pe aminana, ani chotásiki nochia japi riká notario. Bamíali 1951, ati niwaki bilé asamblea de circuito echoná Bastoña, japoná napawili 100 pagótami. Echoná si asali Elly Reuter, bilé precursora japi 50 kilómetros isili nawayá bicicleta aseka echoná asamblea. Ati ayó anakupi koruki alí ti aniki japi ta niwipo. Echalí Elly kulí bayérami nili echoná Escuela de Galaad echomí Estados Unidos. Nalí osali bilé carta echomí central mundial jiti ruyema chúsiá ke omérima simiyá. Echi hermano Knorr, japi echalí wilárami nili jiti anema chúriká nochama echi testigo Jeobá, aneli Elly japi siné kaachi a keʼré japi omérima simiyá echoná Galaad echi kunala yúa. Ati niwiki michá febrero bamíali 1953.

Echalí bamíali, Elly alí nijé, ati simíaki echi Asamblea “Sociedad del Nuevo Mundo” echoná Estadio de los Yankees echomí Nueva York. Echoná ni machiki bilé hermano japi tamí iyayé bilé we aʼlá nóchali alí tamí anéi japi simabo pirélisia echomí Estados Unidos. Ati raʼíchiki Jeobá yúa alí ti nátiki japi ke narepo echi nóchali, nalí japi ku simabo Bélgica iʼwírimia bilé grupito japi 10 publicadores nili echomí Bastoña. Alí echi bamíali 1954 ochérili tamujé ranala, Serge. Nalí ma simírisa kichao michá, echi ko mukuli bilé nayulí jitra. Ati aneki Jeobá japi ta we omona nilie, alí echi ko tamó iʼwérili iyali echi jitra japi aní echi Biblia japi echi japi ma suwili checho ku jawásitami nima.

Octubre 1961, ani riwaki bilé nóchali japoná ni a omérima nochia alí precursor niya. Echalí rawé ani raʼicháari sucursal Bélgica jonsa, tamí nárili achi ni omerie superintendente de circuito niya. Nijé ko náriki achi ti oméripo bachá precursores niya. Tamí aneki japi ayena, alí ma simírisa osá naó michá precursor ka, ati chotásiki nochia japi riká circuito echi michá septiembre 1962.

Ma okuá bamíali simírisa, ati bayeri echomí Betel Bruselas japoná ti chotásiki nochia 1964. Echi nóchali we tamó kanílitili. Echi hermano Knorr nawali echoná Betel Bélgica 1965 alí echalí jonsa ani wilaari japi riká siervo de sucursal. Miná ko, Elly alí nijé ati bayeri echoná clase 41 echi Escuela de Galaad. Echi raʼíchali japi anili echi hermano Knorr 13 bamíali bachaka jonsa, a echi riká ikili. Pe aminana ma sunisa echi escuela, ati ku simíaki echomí Betel japi wilí echomí Bélgica.

Jiti ni bineki abogado nimia, ani wiká bamíali omériki iʼwiria tamujé níwala organización jenaʼí Europa alí jaréanami (Filip. 1:7). Jepuná nóchali tamí iʼwírili jiti ni raʼichama echi weli jáwami yúa japi muchuwi simírikami 55 países japoná echi gobierno ke nakí japi ta nawisabo. Japalí ni raʼichie echi weli jáwami yúa, ke ni aniyé japi ni we machíami ju  japi riká abogado, nalí ani aniyé japi nijé ko bichíyami ju Onorúami. Ke ni siné riweki iʼwírili tania Jeobá jiti ni machiyé japi aní echi Biblia, japi Jeobá ju japi nee echi pagótami jiti nokimea japi riká echi nakí (Prov. 21:1).

Ani newalá japalí ni raʼíchiki bilé walúala wilíami yúa echoná Parlamento Europeo. Jiti ni omérima echi yúa raʼichia, ani osaki wiká solicitudes, alí japalí ni ma omériki echi yúa raʼichia, echi ko tamí aneki: “Ami olá malí minutos bi”. Echi riká anésiwa ani iyólaki alí ni raʼíchiki Jeobá yúa. Japalí echi ko tamí riwali, tamí náriki: “¿Piri mi isimí?”. Nijé ko ku aneki: “Ani matétara iyayé Onorúami jiti mujé ko bilé echi iʼwíriami ju”. Echi ko anili: “¿Chúriká mi aniki?”. Ani ruyeki japi aní Romanos 13:4 alí, japi riká echi ko protestante nili, echi ko we aʼlá kipuli. Miná ko tamí aneki japi ni omérima raʼichia echi yúa 30 minutos alí ti we aʼlá raʼíchiki. Echi rijoi ayénachó anili japi we riwiwi echi nóchali japi noká echi testigo Jeobá.

Ma chabé jonsa echoná Europa echi Jeobá puéblowala simía japoná oyériwa jiti iʼwérili anéliwa japi sontarsi nima, jiti echi gobierno iyénali kúchuwala echi wénwala alí wiká winomí tani echi impuestos jitra. We ni kanili jiti ni si nikúurili echoná japoná oyériwa alí ni ineli chúriká Jeobá tamó iʼwírili. Echi testigo Jeobá niyúrili 140 simírikami echoná Tribunal Europeo de Derechos Humanos.

Pe aminana, ani nóchiki echi hermano Philip Brumley yúa, japi atí echoná central mundial, alí echi hermano Valter Farneti, japi atí echoná Italia, iʼwírimia echi hermanos Cuba piréami, jiti echi gobierno riwema japi echi Testigos nóchilima Jeobá. Ani osaki bilé carta echi embajada de Cuba japi wilí echomí Bélgica alí miná ko ni yúa napawiki echi japi nóchami ju echoná. Ati we aʼlá ruyénili echi namuti japi isili japi echi gobierno ma ke tamó riwema nóchilia Jeobá, nalí ne kulí ko ke ti omérili aʼlá akarewia.

Ati raʼíchiki Jeobá yúa iʼwírili tánimia, alí miná ko ati risensia iyáari jiti ta julabo 5,000 Biblias echomí Cuba. Jiti echi Biblias we aʼlá séali echomí alí iyárami nili echi hermanos, ati machiki japi Jeobá tamó iʼwirie. Jiti la ti checho ku risensia tániki jiti ta oméripo júulia aminá 27,500 Biblias, alí ayénachó tamó risensia iyali. ¡We ni kanili jiti ni omérili iʼwiria jiti wiká hermanos Cuba piréami olama aboi níwala Biblia!

 Ani wisabé niraa simili echomí Cuba iʼwírisia jiti tamó riwema nóchilia Jeobá. Matétarabá echi jitra, ani omérili we aʼlá raʼichia wiká weli jáwami yúa.

Bamíali 1994, simírikami 800,000 pagótami kowirúami nili echoná Ruanda. We ti omona nili jiti ayénachó suwili jaré hermanos. Sapú ti niwaki bilé grupo jiti iʼwíripo echi hermanos japi piré echoná Ruanda.

Japalí ti siki echoná capital Kigali, ati ineki japi echi Oficina de Traducción alí japoná muchuwie echi publicaciones, kuuchi iwáami nili japoná nimuiri. Ati ruyeri japi jaré hermanos miteka kowirúami nili. Nalí ayénachó ti ruyeri echi namuti aʼláala japi nokali echi hermanos anakupi galea. Japi riká, ati machiki bilé hermano tutsi japi ichípika asali biléana risochí ne sojí bilé michá, echi ko tibútami nili jaré Testigos hutus jitra. Echoná Kigali ayénachó ti niwaki bilé napawíliwami, echi riká ti iʼwérili iyaki simírikami 900 hermanos alí hermanas.

Miná ko ti simáriki echi frontera alí ti siki echoná Zaire (jipi ko ju República Democrática del Congo) aamia echi hermanos ruandeses japi júmisili echomí campo de refugiados mulipi echoná ciudad Goma. Jiti ta ke ineki bilé Testigo, ati raʼíchiki Jeobá yúa jiti tamó iʼwírima. Miná ko bilé tamó mulíwili alí ti náriki achi machí bilé testigo Jeobá. Echi ko anili: “Ayena, nijé testigo Jeobá ju. Ani emi yúrima japoná muchuwi echi Comité de Socorro”. Ati olaki bilé napawíliwami we semati echi comité yúa, alí miná ko ti napawiki 1,600 refugiados yúa iʼwérili iyamia alí ku kanílitimia. Ayénachó ti leérili bilé carta japi júali echi Japi Aʼlá Niseri. Echi ko we simá nílili kipusa jepuná raʼíchali: “Ati sinibí tani Jeobá emi jitra. Ati machí japi Jeobá ke siné emi riwema”. ¡Alí a bichíwali nili jepuná raʼíchali japi anili echi Japi Aʼlá Niseri! Jipi ko nirú aminá 30,000 simírikami Testigos japi we kanílika nijewi Jeobá echomí Ruanda.

Bamíali 2011, japalí ti ma ne sojí 58 bamibi niwíkami ka, mukuli nijé upila Elly. Ani ruyeki Jeobá japi ni we omona nili alí echi ko tamí ku jiwérili iyali. Ayénachó tamí iʼwérili iyali raʼichia echi raʼíchali aʼláala echi pagótami yúa japi mulipi piré.

Tákoré ni ma simírikami 90 bamibi, ani bijí nawesa sinibí tarali. Ayénachó ni we kanili iʼwiria echi Departamento de Asuntos Legales japi wilí jenaʼí sucursal Bélgica, iʼwérili iyayá echi betelitas alí ruyea jarecho hermanos japi riká ni biteili.

Ma simírili 84 bamíali japalí ni kulí raʼíchiki Jeobá yúa alí ni chotásiki echi amígowala niya. ¡Ani aminabi mulipi ka nili echi yúa alí ni waʼlú matétara iyá Jeobá jiti we aʼlá tamí kipuli japalí ni echi yúa raʼíchili! (Sal. 66:19). b