BINELÍWAMI 24
CANCIÓN sjj 24 Maba, napawika nochabo Jeobá
¡Kiti siné riwepo echi Jeobá bitélachi!
“Oh, Jeobá, ¿jépuká bitélima mujé bitélachi?” (SAL. 15:1).
JAPI TA JITRA BINEPO
Jeobá ko tamó ané japi ta nokisáré jiti ta ke riwepo echi amígowala niya alí chúriká nakí japi ta nipo echi amígowala yúa.
1. ¿Chúriká tamó iʼwiri japi aní Salmo 15:1-5?
ECHONÁ binelíwami japi ta bineli echi tarali japi kulí simírili, ata ineli japi Jeobá ko bayé echi pagótami japi ma pakótami ju jiti pirélima echoná binoy bitélachi, a iʼwérili nokisáaká echi amígowala niya. Nalí, ¿chúriká ti echi riká nokiboa? Echi Salmo 15 tamó iʼwiri machiyá echi namuti, jiti echoná aní jaré namuti we natéami japi ta nokisáré jiti ta aminabi mulíwipo Onorúami yúa (leeri Salmo 15:1-5).
2. ¿Piri nátiliré David japalí anili Jeobá “bitélachi”?
2 Echi Salmo 15 jériká chotasi: “Oh, Jeobá, ¿jépuká bitélima mujé bitélachi? ¿Jépuká simama mujé kawíwalachi?” (Sal. 15:1). Japalí David raʼíchili Jeobá “bitélachi” jitra, echi ko natia asáliré echi tabernáculo jitra, japi wilili echomí Gabaón jaré bamíali. David ayénachó raʼicha echi Onorúami “kawíwalachi” jitra, alí echi ko nátiliré Sion jitra, japi wilili echomí Jerusalén. Echoná, wiká kilómetros echomí sur Gabaón jonsa, David wilali bilé kalí chiní jitra niwárami, jiti echoná wilama echi arca del pacto japalí jonsa ma niwárami nisa bilé kalí japoná sinibí wilimea (2 Sam. 6:17).
3. ¿Chúsiá we natéami ju japi ta binepo echi Salmo 15? (Ayénachó iné echi dibujo).
3 A bichíwali ju japi wikabéala echi israelitas ke omérili nochia echoná tabernáculo, alí ke cho moʼiyá japoná wilili echi arca del pacto. Nalí sinéami japi Jeobá nijéwami nili a omérili nokayá japi riká ko moʼiyá echoná Onorúami bitélachi, a iʼwérili nokisáaká echi amígowala niya. Alí sinéami tamujé echi riká cho nokinali. Echi Salmo 15 aní jaré namuti we natéami japi ta nokisáré jiti ke riwepo Jeobá amígowala niya.
Japalí biteili David, echi israelitas jitra ke jilí nili aʼlá inamia piri aniwáami ju bayérami niya echoná Jeobá bitélachi. (Iné echi párrafo 3).
KE SINÉ NOKIBOA ECHI CHATI NAMUTI, NALÍ NOKIBOA JAPI AʼLÁALA JU
4. ¿Chúriká ta machí japi pakótami niya ke echi bi ju japi Jeobá nakí japi ta nokiboa? (Isaías 48:1).
4 Echi Salmo 15:2 raʼicha japi Jeobá amígowala ko “ke chati noká” alí “japi aʼlá chopi nokáami ju”. Echi ko aniwáami ju japi sinibí iʼwérili nokisáré aʼlá nokayá. Nalí, ¿achi ti oméripo sinibí aʼlá nokayá? Ayena. Tákoré ti ke sébali aʼlá nokáami ju, ati iʼwérili nokisáaká nijewia Jeobá, echi ko tamó inema japi riká sinibí aʼlá nokáami. Japalí bilé katúwika raʼicha Jeobá yúa alí pakó, kulí chotásimi echi amígowala niya. Newalabo japi riká nili chabé, israelita niya ke aniwáami nili japi ma bitélima echoná Jeobá bitélachi. ¿Chúsiá? Jiti jaré ko walubéala aneli Onorúami, nalí “ke ne sulachí jonsa alí ke wachíniga echi riká” nokali (leeri Isaías 48:1). Japi ne bichíwali Jeobá amígowala nínali, echi ko binesa riweili japi echi nulá alí nijewia. Jipi rawé echi riká cho ju: jiti ta Jeobá amígowala nipo, ke bi newalé japi ta pakótami nipo alí japi ta napawipo echi puéblowala yúa. Ati aminabi nokisáré japi aʼlá ju. ¿Alí piri aniwáami ju jepuná?
5. Jeobá jitra ko, ¿jépuká ju japi “ke chati noká” alí “japi aʼlá chopi nokáami ju”?
5 Jeobá jitra ko, echi japi “ke chati noká” alí “japi aʼlá chopi nokáami ju”, ke bi ju echi japi sinibí tarali simía echoná napawíliwachi (1 Sam. 15:22). Sinéami cristianos, ati iʼwérili nokisáré nijewia Jeobá suwaba echi namuti jitra japi ta noká, tákoré ti awénili muchuwi (Prov. 3:6; Ecl. 12:13, 14). We natéami ju japi sinibí nijéwipo Jeobá, ayénachó echi namuti jitra japi ta mayé japi ke me natéami ju. Ati echi riká nokisáaká, ati néwariwélitipo japi ta we galé echi, alí Jeobá ayénachó we tamó galema (Juan 14:23; 1 Juan 5:3).
6. Japi riká aní Hebreos 6:10-12, japi ta nokali chabé nijéwami niya, ¿achi tamó iʼwírima sinibí pirelia echoná Jeobá bitélachi?
6 Jeobá ko we natéami niraa iné suwaba namuti japi ta nokali echi jitra. Nalí, japi ta nokali chabé nijéwami niya, ke tamujé iʼwiri jiti sinibí pirélipo echoná Jeobá bitélachi, echi riká aní Hebreos 6:10-12 (leeri). Tákoré Jeobá ko sinibí newalá echi aʼláala namuti japi ta nokali, echi ko nakí japi ta aminabi a iʼwérili nokiboa echi nóchilia ne sulachí jonsa japalí ti chéami “abijí piré jenaʼí wichimóbachi”. Ati ke siné riwésaká aʼláala namuti nokayá, echi ko sinibí tamujé amígowala nima (Gál. 6:9).
NE BICHÍWALI RAʼICHABO NE SULACHÍ JONSA
7. ¿Piri aniwáami ju “ne sulachí jonsa bichíwika” raʼichia?
7 Salmo 15:2 ruyé japi echi pagótami japi Jeobá bayé jiti pirélima echi bitélachi, echi ko “ne sulachí jonsa bichíwika raʼicha”. Jepuná ko ke bi aniwáami ju japi ke ikaleka raʼichabo, nalí suwaba japi ta noká wachíniga niraa nísaré (Heb. 13:18). Echi ko we natéami ju “jiti Jeobá we kichí echi pagótami japi cha nokáami ju, nalí amígowala ju echi japi aʼlá nokáami ju” (Prov. 3:32).
8. ¿Piri namuti ke ti nokisáré?
8 Japi “ne sulachí jonsa bichíwika raʼicha”, echi ko ke isimí japi riká ko nijewia japi Onorúami nulá japalí wiká pagótami ritiwá alí miná ko japalí bineli asisaa, ma ke nijewi (Is. 29:13). We chati ju echi riká nokayá, jiti la ti ke echi riká nokinali. Nalí, ¿piri namuti isímiré japi bilé pagótami echi riká isima? Japalí echi chotásisa natia japi bilé namuti japi Jeobá nulá ke aʼlá ju (Sant. 1:5-8). A keʼré japi echi ko ke nijewi jaré namuti japi mayé japi ke me natéami ju. Alí japalí iné japi ke namú ikí echi namuti jitra japi isili, a keʼré japi echi ko aminabi we cha isima. Tákoré echi ko nata japi a nijéwami ju, Jeobá ko ma ke galé japi echi isimí (Ecl. 8:11). Nalí be, tamujé ko sinibí ne sulachí jonsa nokinali japi aʼláala ju.
9. ¿Piri ta biné japi Jesús anili Natanael jitra? (Ayénachó iné echi dibujo).
9 We natéami ju japi ta we aʼlá suléami nipo, echi riká ti machí jiti japalí Felipe yúrili echi amígowala Natanael jiti machimea Jesús, Jesús ko anili bilé namuti we semati Natanael jitra. Tákoré echi ko kecho machiyé, jéanili: “¡Nibila! Wakiná inaro bilé rijói [...] mapu ne bichíwali tarapé ʼyékami ju” (Juan 1:47). Jesús ko we aʼlá machili chúriká nili echi discípulowala, nalí Natanael jitra ko, echi ko ineli japi we aʼlá suléami nili. Tákoré Natanael ke sébali aʼlá isíami nili japi riká sinéami tamujé, echi ko ke ikaléami nili alí we aʼlá suléami. Jesús ko we galeli japi riká echi nili alí echi riká aneli. ¡Aʼlá nima japi Jesús ayénachó echi riká animea tamujé jitra!
Japalí Felipe yúrili Natanael echi Jesús yúa, echi ko aneli japi ne bichíwali raʼíchami nili ne sulachí jonsa. ¿Achi echi riká animéeré tamujé jitra? (Iné echi párrafo 9).
10. ¿Chúsiá ti ke cha riká raʼichásaré? (Santiago 1:26).
10 Ne sojí suwaba echi namuti japi aní echi Salmo 15, ruyé chúriká ti nísaré jarecho pagótami yúa. Japi riká, echoná Salmo 15:3 aní japi echi pagótami japi Jeobá bayeli jiti pirélima echi bitélachi, echi ko “ke ikaleka raʼíchami ju jarecho jitra risoa nílitimia, ke chibi oláami ju jarecho alí ke cha riká raʼicha echi amígowala jitra”. Cha riká raʼichia ke bi risoa níliti jarecho, ayénachó isímiré japi ta ke pirélipo echoná Jeobá bitélachi (leeri Santiago 1:26).
11. ¿Chu oláliwa echi japi ikaleka raʼicha jarecho jitra alí ke riwé echi riká nokayá?
11 Echi salmista we aʼlá ruyeli japi ke ikaleka raʼichásaré jarecho jitra risoa nílitimia o jiti jarecho cha riká natama echi jitra. Echi pagótami japi echi riká noká alí ke riwésaká echi riká nokayá, machibúrami nísaré echoná congregación jonsa (Jer. 17:10).
12, 13. ¿Chu kabú a keʼré japi cha riká raʼichabo tamujé amígowala jitra tákoré ti ke echi riká nokinali? (Ayénachó iné echi foto).
12 Salmo 15:3 ayénachó tamó newalari japi, echi japi bité echoná Jeobá bitélachi “ke chibi oláami ju jarecho alí ke cha riká raʼicha echi amígowala jitra”. Nalí, ¿chúriká isímiré bilé japi cha riká raʼichárami nima echi amígowala jitra?
13 A keʼré japi ta cha riká raʼichabo bilé jitra tákoré ti ke echi riká nokinali. Japi riká japalí ikisaa jepuná namuti: 1) bilé hermana riwé nóchilia Jeobá tiempo completo niraa, 2) bilé niwíkami ku machina echoná Betel jonsa o 3) ati kipú bilé anuncio japoná aní japi bilé hermano ma ke anciano ju o siervo ministerial. Japalí echi riká ikisaa, ¿achi aʼlá ju japi ta natabo japi echi riká ikili jiti echi hermanos ke aʼlá nokali alí ruyepo jarecho japi ta nata? Ke tasi, jiti tamujé ko ke machí suwaba namuti. Ayénachó newalabo japi echi japi Jeobá bayeli echi binoy bitélachi “ke chibi oláami ju jarecho alí ke cha riká raʼicha echi amígowala jitra”.
Ke jilí ju cha riká raʼichia jarecho jitra alí isini kaachi ayénachó ikaleka raʼichia. (Iné echi párrafos 12 alí 13).
WE NATÉAMI NIRAA INEPO ECHI JAPI MAJAA JEOBÁ
14. Echi japi bité echoná Jeobá bitélachi, ¿chúriká machí jépuká “cha isíami ju” alí japi ke yúa napawísaré?
14 Echoná Salmo 15:4 aní japi Jeobá amígowala ko “ke napawí echi yúa japi we cha isíami ju”. Alí, ¿jépuká we cha isíami ju? Tamujé aboi ke ti omeri aniyá chu iyiri pagótami cha isíami ju. ¿Chúsiá? Jiti ta ke sébali aʼlá nokáami ju alí isini kaachi a ti napawínali jaré pagótami yúa jiti ta galé japi riká ju echi alí jarecho yúa ko ke. Nalí echi pagótami japi tamujé ke yúa napawísaré bi ju, echi japi Jeobá aní japi we cha nokáami ju (1 Cor. 5:11). Echi iyiri pagótami ko ju japi we cha noká alí ke omona nili echi riká nokayá, japi ke riwiwi echi namuti japi ta bichí alí japi iʼwérili noká jiti ta ke Jeobá amígowala nipo (Prov. 13:20).
15. ¿Chúriká ti néwariwélitipo japi ta we natéami niraa iné “echi japi majaa Jeobá”?
15 Ayénachó, Salmo 15:4 aní japi ta we natéami niraa inésaré “echi japi majaa Jeobá”. Jiti la, ata iʼwérili noká riwiwia alí we simá nokáami niya echi Jeobá amígowala yúa (Rom. 12:10). Nalí, ¿chúriká ti nokiboa jepuná? Salmo 15:4 aní japi echi japi bayérami ju echoná Jeobá bitélachi “sinibí isimí japi riká ma anili tákoré isini kaachi ke aʼlá ikí”. Ke ti nokisáaká japi ta ma anili, a keʼré japi risoa nílitipo jarecho (Mat. 5:37). Japi riká, Jeobá ko nakí japi echi japi bayérami ju echoná binoy bitélachi, nijéwima japi echi nulé echi niwíkami. Ayénachó nakí japi echi wénwala iʼwérili nokimea nokayá japi riká aneli echi kúchuwala. Jiti ta we galé Jeobá alí echi pagótami, ati iʼwérili nokiboa japi riká ti ma anili.
16. ¿Chúriká ayénachó néwariwélitipo japi ta we natéami niraa iné echi Jeobá amígowala?
16 Bilecho namuti japi ta nokiboa jiti we natéami niraa inepo echi Jeobá amígowala ko ju, iʼwiria echi japi newalé alí kanila narea tamujé pirélachi (Rom. 12:13). Ayénachó japalí ti bayé echi hermanos kanila simárimia tamujé yúa, aminabi ti we aʼlá amigos nipo alí ayénachó Jeobá yúa. Japalí ti simá nokáami ju jarecho yúa, ayénachó ti noká japi riká isimí Jeobá.
KE TI KORUPO ECHI WINOMÍ
17. ¿Chúsiá winomí jitra raʼicha echi Salmo 15?
17 Echi Salmo 15 ayénachó ruyé japi echi japi bayérami ju echoná Jeobá bitélachi “ke tasi animea chu kipu ku nijima tanéwisiwa winomí alí ke tasi naré winomí risoa olamia echi japi ke cha isili” (Sal. 15:5). ¿Chúsiá winomí jitra raʼicha jepuná Salmo, tákoré teeli ju? Jiti ke jilí ju we natéami niraa inea echi winomí. Ati echi riká ikiyáaká, a keʼré japi ta risoa nílitipo jarecho alí ti ma ke aʼlá Jeobá amígowala nipo (1 Tim. 6:10). Chabé, jaré israelitas wikabé winomí ku tanie japalí tanewie jarecho. Ayénachó echi oyériami winomí nareli risoa olamia echi japi ke cha nokali. Jeobá ko we kichí suwaba jepuná namuti (Ezeq. 22:12).
18. ¿Piri ta nárika nokisáré? (Hebreos 13:5).
18 We aʼlá ju japi ta natabo jepuná náriwami jitra: “¿Achi ni sinibí natia iyena echi winomí jitra alí japi ni ralinali? Bilé tamí tanéwisaká winomí, ¿achi ni wilí isimí ku nijimia jiti ni nata japi echi ke newalé? ¿Achi ni we natéami ka nili jiti ni olá winomí? ¿Achi ni jilí niraa nijíami niya? ¿Achi ni nata japi sinéami echi hermanos japi olá winomí we natéami niraa iné echi winomí? ¿Achi ni amígowala bi nínali echi yúa japi olá wiká winomí, alí echi risóati yúa ko ke?”. We semati ju japi Jeobá tamó bayeli echoná binoy bitélachi. Jiti la, ¡sinibí we natéami niraa inepo! Ke ti korúkami nísaré echi winomí. Echi riká ti nokisáaká, Jeobá ke siné tamó riwema (leeri Hebreos 13:5).
JEOBÁ KO WE GALÉ ECHI AMÍGOWALA
19. ¿Chúsiá Jeobá tamó nulé japi ta nokiboa echi namuti japi aní echi Salmo 15?
19 Echi Salmo 15 jériká suní: “Japi echi riká isimí we jiwérami nima” (Sal. 15:5). Jepuná raʼíchali jitra, echi salmista tamó ruyé japi Jeobá tamó nulé echi namuti jiti echi ko nakí japi ta kaníliami nipo. Japalí ta nijewi japi Onorúami tamó nulé, ati we aʼlá piré alí echi ko tamó tibú (Is. 48:17).
20. ¿Piri namuti aʼláala narema echi japi bayérami ju echoná Jeobá bitélachi?
20 Echi japi bayérami ju echoná Jeobá bitélachi, sinibí nijéwisaká, we kanílika pirélima pe aminana. Echi japi chapirúami ju, bayérami nima echoná ripá rewegachi japoná Jesús ma aʼlárika wilali japoná pirélima (Juan 14:2). Alí jaréala cristianos pirélima jenaʼí Wichimóbachi alí narema wiká aʼláala namuti japi riká aní Apocalipsis 21:3. ¡We semati ju japi ta bayérami nili jiti ta Jeobá amígowala nipo! ¡Ma mulipi ata we kanílika pirélipo echoná Jeobá bitélachi ne sinibí!
CANCIÓN sjj-S 39 Un buen nombre ante Dios
