BINELÍWAMI 25
CANCIÓN sjj 7 Jeobá tamí iʼwírima alí tamí iʼwérili iyama
Sinibí newalabo japi Jeobá ju “echi Onorúami japi a bité”
“¡Jeobá bité!” (SAL. 18:46).
JAPI TA JITRA BINEPO
We tamó iʼwiri natia japi echi Onorúami japi ta nijewi a bité.
1. ¿Piri tamó iʼwírima aminabi nóchilia Jeobá tákoré ikí namuti jilírami?
ECHI Biblia aní japi jipi rawé ati piré japalí we jilírami ju (2 Tim. 3:1, TNM). Sinéami echi pagótami olá karú ikiwáami, nalí japi Onorúami nijéwami ju ayénachó ikí jepuná namuti: risoa olárami ju alí najátarami ju. ¿Piri tamó iʼwírima aminabi nóchilia Jeobá tákoré ti ikiyé jepuná namuti? Bilé namuti we natéami japi tamó iʼwírima ko ju, néwalayá japi Jeobá ju “echi Onorúami japi a bité” (Jer. 10:10; 2 Tim. 1:12).
2. ¿Chúriká néwariwéliti Jeobá japi a bité?
2 Jeobá ko a bité alí iné suwaba echi namuti jilírami japi ta ikí alí tamó iʼwiri (2 Crón. 16:9; Sal. 23:4). Néwalayá japi a bité tamó jiwérili iyama jiti anachabo echi namuti jilírami japi ta ikí. Ma inepo japi echi riká ikili echi silíami David.
3. ¿Piri ruyá anili David japalí anili: “¡Jeobá bité!”?
3 David ko we aʼlá machili Jeobá alí bichíwili echi. Echi ko iʼwírili tánili japalí Saúl alí jarecho si echi najatie (Sal. 18:6). Alí japalí ineli japi chúriká Jeobá echi iʼwírili, David ko jéanili: “¡Jeobá bité!” (Sal. 18:46). Jepuná raʼíchali jitra, echi ko ke bi ruyá anili japi a nirú Onorúami. Bilé oselí aní japi echi ruyá anili japi echi ko we bichiwi Jeobá “japi riká bilé Onorúami japi a bité alí japi sinibí iʼwiri echi puéblowala”. David ko ineli japi Jeobá sinibí echi iʼwírili, alí jepuná iʼwírili aminabi we bichiwia japi Jeobá a bité alí jiwérili iyali jiti aminabi nóchilima echi alí walubéala anema (Sal. 18:28, 29, 49).
4. ¿Chúsiá we aʼlá ju bichiwia japi Jeobá a bité?
4 We bichiwia japi Jeobá a bité, tamó iʼwírima we kanílika nóchilia echi alí jiti anachabo chuwé namuti jilírami japi ikí. Ayénachó tamó iʼwírima jiti sinibí nijéwinalipo Jeobá alí ke siné riwepo.
ECHI ONORÚAMI JAPI A BITÉ MI JIWÉRILI IYAMA
5. ¿Piri tamó iʼwírima jiti bichíwipo japi ta anachabo echi karú ikiwáami? (Filipenses 4:13).
5 Ati oméripo anachia echi karú ikiwáami, ata newalásaká japi Jeobá ko a bité alí japi sinibí tamó iʼwírima. Echi ko Suwaba Omériami ju alí tamó jiwérali iyama jiti anachabo chuwé namuti jilírami (leeri Filipenses 4:13, TNM). Jiti la a nirú wiká namuti japi ta jitra bichíwipo japi ta oméripo anachia echi namuti jilírami. Japalí ti iné japi Jeobá tamó iʼwiri japalí ti ikí namuti japi ke me jilírami ju, jepuná tamó iʼwiri bichiwia japi pe aminana ayénachó tamó iʼwírima japalí ikisaa jarecho si namuti we jilírami.
6. ¿Piri namuti japi ikili David iʼwírili aminabi we bichiwia Jeobá?
6 Ma inepo okuá namuti japi ikili David alí japi iʼwírili aminabi we bichiwia Jeobá. Japalí towí nili boʼwá niséami, bilé mawiyá wísili bilé boʼwá echi onolá níwala, alí ché siné ko bilé ojí echi riká cho isili. Japalí echi riká ikili, David ko ke majaka najátili echi alí ku iyeli echi boʼwá. Echi ko machiyé japi Jeobá echi iyali jiwérala jiti echi riká isima, jiti la echi ko ke anili japi binoy echi riká isili (1 Sam. 17:34-37). David ko sinibí newalali jepuná namuti japi ikili. Natia echi jitra iʼwírili aminabi we bichiwia japi Jeobá japi a bité echi iʼwírima pe aminana.
7. ¿Piri namuti iʼwírili David jiti nikoma Goliat yúa?
7 Pe aminana, japalí David a bijí remalí nili, echi ko simili inesia japoná muchuwi echi sontarsi israelitas. Alí ineli japi sinéami we majaa mochili jiti Goliat kawélika raʼíchili echi jitra (1 Sam. 17:10, 11). Echi sontarsi ko ineli bi japi Goliat we waʼlú nili alí japi we chati nili echi namuti japi anili (1 Sam. 17:24, 25). Nalí David ko ke echi riká ineli, echi ko nalí nátili japi riká aní echi Goliat, ke echi sontarsi bi kawelia aní, nalí ayénachó Jeobá jitra (1 Sam. 17:26). David we bichíwili japi Jeobá echi iʼwírima, japi riká japalí iʼwírili japalí niyúbili echi boʼwá. Alí Jeobá iʼwírila jitra, David ko niyúrili echi filisteo (1 Sam. 17:45-51).
8. ¿Piri tamó iʼwírima aminabi we bichiwia Jeobá japalí ti ikí namuti jilírami? (Ayénachó iné echi foto).
8 Japi riká David, tamujé ayénachó omeri anachia ati natásaká japi echi Onorúami japi a bité tamó iʼwírima (Sal. 118:6). Ati aminabi we bichíwipo, ati natásaká japi echi ma isili chabé. Japi riká, ami omeri leeria echi historias japi uchuwi echoná Biblia japi mi newalárima chúriká Jeobá ma iʼwírili chabé japi echi nijéwami nili (Is. 37:17, 33-37). Ayénachó leeri echi oselí o iné echi videos japi uchuwi echoná jw.org japi néwariwéliti chúriká Jeobá iʼwírili echi hermanos jipi piréami. Alí newalá chúriká Jeobá mi iʼwírili. Ke nísaká bilé namuti wabé jilírami japi riká ikili David echi ojí alí mawiyá yúa, kiti siwé jiti Jeobá ma isili wiká namuti mi jitra. Japi riká, echi ko mi bayeli jiti mi echi amígowala nima (Juan 6:44, TNM). Alí echi ko mi iʼwiri jiti mi aminabi echi nóchilima. Jiti la, ¿chúsiá mi ke tani japi mi iʼwírima néwalayá chúriká mi iʼwírili echi namuti jitra japi mi tánili o japalí mi iʼwírili japalí mi ikili namuti jilírami? Ami natásaká echi namuti japi Jeobá ma isili mi jitra, mi iʼwírima we bichiwia japi aminabi echi riká isima.
Japi riká ti noká anachia echi karú ikiwáami isima japi ta omonáritipo o kanílitipo Jeobá. (Iné echi párrafos 8 alí 9).
9. ¿Piri mi natásaré japalí mi olá karú ikiwáami? (Proverbios 27:11).
9 Japalí ti olá karú ikiwáami, ati natásaré echi namuti japi wabé natéami ju. Echi Diablo ko aní japi tamujé ko riwepo nijewia Jeobá japalí ti karúa ikisaa (Job 1:10, 11; leeri Proverbios 27:11). Jiti la, ati nijéwami nísaká, ati néwariwélitipo japi ta we galé Jeobá alí japi Satanás ko ikaléami ju. ¿Achi mi sayéritami ju echi Gobierno jitra, ke mi olá winomí, echi pagótami ke kipúnali japalí mi nawesa o ami ikí jarecho si namuti? Echi riká nísaká, newalá jepuná: ami anachásaká echi namuti jilírami japi mi ikí, mujé ko kanílitima Jeobá. Kiti siné wikawá japi Jeobá ko ke riwema japi mi bineli anachama echi namuti (1 Cor. 10:13, TNM). Jeobá mi iyama echi jiwérali jiti mi anachama.
ECHI ONORÚAMI JAPI A BITÉ MI IYAMA NAMUTI AʼLÁALA
10. ¿Piri isima echi Onorúami japi a bité echi yúa japi nijéwami ju?
10 Jeobá ko iʼwiri japi echi nijéwami ju (Heb. 11:6). Jipi rawé echi ko isimí japi ta kilí nílipo, kanílipo alí pe aminana ko isima japi sinibí pirélipo. Ati we bichiwi japi echi ko tamó iyánali namuti aʼláala alí japi a omeri echi riká isiá. Jepuná tamó iʼwiri jiti ta aminabi we jiwérika nóchilipo echi, japi riká nokali echi pagótami chabé piréami japi nijéwami nili. Ma binepo echi Timoteo jitra (Heb. 6:10-12).
11. ¿Piri iʼwírili jiti Timoteo we nochama echoná congregación? (1 Timoteo 4:10).
11 (Leeri Timoteo 4:10). Timoteo ko we bichíwili echi Onorúami japi a bité. Echi ko we aʼlá machiyé japi Jeobá iyama namuti aʼláala. Jiti la iʼwérili isili nóchilia echi. ¿Chúriká? Echi apóstol Pablo aneli japi iʼwérili isísaré we aʼlá binériami niya, we aʼlá ejemplo jarecho hermanos jitra japi riká echi remalí alí ochérami. Ayénachó iyáari jaré nóchali japi jilírami nili, japi riká busuré iyayá echi hermanos japi newaleli, nalí simárika niraa (1 Tim. 4:11-16; 2 Tim. 4:1-5). Tákoré jarecho ke ineli echi nóchali japi isié Timoteo, echi ko we bichíwili japi Jeobá iyama namuti aʼláala (Rom. 2:6, 7).
12. ¿Piri iʼwírima echi ancianos jiti jiwérika nochama? (Ayénachó iné echi foto).
12 Japi riká Timoteo, echi ancianos ayénachó we aʼlá machí japi Jeobá we natéami niraa iné echi nóchali japi noká. Echi ko ke bi iʼwiri echi hermanos echoná congregación, ayénachó bineri alí nawesa, alí wiká ancianos ayénachó nocha echoná proyectos de construcción o echoná labores de socorro. Jarecho ko nocha echoná Grupos de Visita a Pacientes o echoná Comités de Enlace con los Hospitales. Echi ancianos we aʼlá machí japi echi congregación Jeobá níwala ju alí ke ko echi pagótami. Jiti la we jiwérika noká nochia alí we bichiwi japi Jeobá iyama wiká namuti aʼláala echi nóchali jitra japi noká (Col. 3:23, 24, TNM).
Echi Onorúami japi a bité mi iyama namuti aʼláala echi nóchali jitra japi mi isimí echoná congregación. (Iné echi párrafos 12 alí 13).
13. ¿Chu nili Jeobá inea japalí ti iʼwérili noká echi nóchilia?
13 Ke sinéami ti omeri ancianos niya, nalí sinéami ti omeri nokayá wiká namuti Jeobá jitra. Echi ko we natéami niraa iné japalí ti jiwérili noká echi nóchilia. Japi riká japalí mi muchuwa winomí echoná cájachi echoná salón, tákoré kuabi ju. Echi ko we kanili japalí iné japi mi iʼwérili isimí ayawia sikala jiti mi animea bilé comentario, tákoré mi riwela nili. Alí wabé kanili japalí mi wikawi bilecho hermano o hermana japi mi cha olali. Tákoré mujé ko nili japi mi ke omeri aminabi we nóchilia Jeobá japi riká mi nakí, newalá japi echi ko we natéami niraa iné japi mi a omeri isiá. Echi ko we mi galé alí mi iyama namuti aʼláala echi namuti jitra japi mi isimí (Luc. 21:1-4).
KITI SINÉ RIWEPO ECHI ONORÚAMI JAPI A BITÉ
14. ¿Chúsiá Jeobá amígowala niya tamó iʼwírima jiti ke nokiboa japi chati ju? (Ayénachó iné echi foto).
14 Ati bichíwisaká japi Jeobá a bité, ke ti me jilí nirabo nijewia. Echi riká isili José; ke chati namuti isili echi Potifar upila yúa, jiti echi ko ineli Jeobá japi riká a bitéami alí ke nakili japi omonama (Gén. 39:9). Jiti tamujé we bichíwipo japi Jeobá a bité, ata iʼwérili nokisáré sinibí echi yúa raʼichia alí binea echi Biblia. Echi riká ti nokisáaká, ati aminabi echi amígowala nipo. Alí japi riká José, we ti aʼlá amigos nísaká Jeobá yúa, ke ti siné nokiboa echi namuti japi ke galé (Sant. 4:8).
Onorúami amígowala niya mi iʼwírima jiti mi sinibí nijéwiami nima. (Iné echi párrafos 14 alí 15).
15. ¿Piri ta biné echi israelitas jitra japalí mochili echoná desierto? (Hebreos 3:12).
15 Echi japi riwé bichiwia Jeobá, a keʼré japi riwema nijewia echi. Echi riká ikili echi israelitas japalí mochili echoná desierto. Echi ko machiyé japi Jeobá a bité, nalí ma ke me bichiwia nili japi echi iyama japi newalé. Alí nárika nokali: “¿Achi tamujé yúa atí Jeobá o ke?” (Éx. 17:2, 7). Jiti la, miná ko echi Israelitas riweli Jeobá. Alí tamujé ke ti nokinali japi riká nokali echi (leeri Hebreos 3:12).
16. ¿Piri namuti isímiré japi ta ma ke me bichíwipo Jeobá?
16 Jipi rawé nirú wiká namuti japi isímiré japi ta riwepo Jeobá. Japi riká, wiká pagótami aní japi Onorúami ke bité. Alí wisabé niraa ata iné japi echi pagótami japi ke nijéwami ju Jeobá, we aʼlá niraa piré. Inea jepuná namuti isímiré japi ta ma ke me bichíwipo. Alí, tákoré ke ti riwepo bichiwia japi Jeobá a bité, ati riwéporé bichiwia japi echi tamó iʼwiri. Echi riká ikili echi japi osali echi Salmo 73. Echi ko ineli japi echi pagótami japi ke nijéwami nili echi Onorúami nulalila, we kanila pireili. Echi jitra echi ko nátili achi natéami ju nijéwilia Jeobá (Sal. 73:11-13).
17. ¿Piri tamó iʼwírima ke riwea Jeobá?
17 ¿Piri iʼwírili echi salmista aʼlá ku natia? Echi ko nátili piri ikimea echi pagótami japi riwé Jeobá (Sal. 73:18, 19, 27). Ayénachó echi ko nátili echi namuti aʼláala japi naré echi japi nijéwami ju Jeobá (Sal. 73:24). Tamujé ayénachó omeri natia echi namuti aʼláala japi Jeobá tamó iyali alí ku natabo chúriká ti pirélipolí ke ti nijéwilaká Jeobá. Natia suwaba jepuná namuti, tamó iʼwírima sinibí nijéwami niya Jeobá alí aniyá japi riká echi salmista: “Nijé ko we ni natéami niraa ineni muliwia Jeobá” (Sal. 73:28).
18. ¿Chúsiá ti ke majabo japi ikimea pe aminana?
18 Ati oméripo anachia chuwé namuti jilírami japi ta ikiboa jipi jubá rawé kaachi, jiti tamujé ko “galá bichíiga oʼwikébo echi ne bichíwali Walubela Riosi, echi mapu sinibí niráa bitéami ju” (1 Tes. 1:9). Echi ko a bité, we natéami niraa iné tamujé alí sinibí tamó iʼwírima. Echi ko tibuli chabé echi japi nijéwami nili alí aminabi echi riká isima jipi. Ma mulipi ikimea echi namuti wabé jilírami, nalí tamujé ko ke awénili mochibo (Is. 41:10). “Echirigá tamujé bichíyami galata omero ne bichíwaga jeaniyá: Echi Walubela Riosi ju mapu tamí kuʼwira. Ketásini majama” (Heb. 13:5, 6).
CANCIÓN sjj 3 Nijé mi wichii, Jeobá
