BINELÍWAMI 23
CANCIÓN sjj 28 ¿Jépuká nima Jeobá amígowala?
We semati ju japi Jeobá tamó bayeli echi bitélachi
“Nijé níwala kalí chiní jitra niwárami echi yúa wilimea; nijé ko nima echi Onorúamiwala” (EZEQ. 37:27).
JAPI TA JITRA BINEPO
Jenaʼí binelíwami ata binepo piri tamó iʼwírima we natéami niraa inea japi Jeobá tamó bayeli echi bitélachi alí aʼlá binepo chúriká isimí tamó tibúa echoná.
1, 2. ¿Kumi tamó bayé Jeobá?
BILÉ mi nárisaká piri ju Jeobá mi jitra, ¿piri mi animea? Ami animéeré: “Jeobá ju nijé amígowala, nijé Onolá alí nijé Onorúamiwala”. Nalí, ¿achi siné kaachi mi nátili japi mujé ko bayérami ju Jeobá jitra?
2 Echi silíami David anili japi Jeobá amígowala niya ko ju, japi riká isimí bilé pagótami echi yúa japi bayé echoná bitélachi. Echi ko jéanili: “Oh, Jeobá, ¿jépuká bitélima mujé bitélachi? ¿Jépuká simama mujé kawíwalachi?” (Sal. 15:1). Jepuná versículo jitra ati biné japi Jeobá tamó bayé echi bitélachi, ati echi amígowala nísaká. ¡Jepuná ko we semati ju!
JEOBÁ KO TAMÓ BAYÉ ECHI BITÉLACHI
3. ¿Jépuká nili japi Jeobá bachá bayeli, alí chúriká inílili echi okuánika?
3 Kecho bijí niwayá echi namuti, Jeobá ko bineli asali japalí chéami niwali echi Nolá Jesucristo, japi bachá bayeli echi bitélachi. Jeobá ko we kaníliliré bayesa Jesús. Echi Biblia ko aní japi Jesús we kanílitili Jeobá alí sinibí “we kanila asali bachami echi yúa” (Prov. 8:30).
4. ¿Jépuká ayénachó bayeli Jeobá echoná bitélachi?
4 Pe aminana, Jeobá niwali echi ángeles alí ayénachó bayeli echoná binoy bitélachi. Echoná Biblia ko ané “Onorúami kúchuwala” alí aní japi we kanílili mochía Jeobá yúa (Job 38:7; Dan. 7:10). Wiká siglos, Jeobá bi bayeli japi echi amígowala nima japi pireili echoná ripá rewegachi. Nalí pe aminana ayénachó bayeli jarecho japi pireili jenaʼí Wichimóbachi. Japi riká Enoc, Noé, Abrahán alí Job. Echoná Biblia aní japi ibili echi, Jeobá amígowala nili (Gén. 5:24; 6:9; Job 29:4; Is. 41:8).
5. ¿Piri ta biné echi profecía jitra japi chukú echoná Ezequiel 37:26, 27?
5 Chabé jonsa, Jeobá ko bayésili echi amígowala jiti pirélima echoná binoy bitélachi. Japi riká aní echi profecía japi chukú echoná Ezequiel, tamó bineri japi Jeobá ko nakí japi echi nijéwami we kanílima echi amígowala niya (leeri Ezequiel 37:26, 27). Jeobá ko anili japi “katúwika isima echi yúa jiti kilí” pirélima. Jepuná raʼíchali ikimea riweili japalí echi ungidos alí japi pirélima jenaʼí Wichimóbachi, ma napawika nisa echoná Jeobá bitélachi (Juan 10:16). Alí ma echi riká ikísimi jipi rawé.
KUMI KE JAPONÁ TI MUCHUWI JEOBÁ KO TAMÓ TIBÚ
6. ¿Chu kabú ti moʼí echoná Jeobá bitélachi, alí kumi wilí echi?
6 Chabé, bilé kalí chiní jitra niwárami, iʼwírili jiti echi pagótami kanila isábima, jiti ke ratálima echi rayénali jitra alí ke sampama echi ukí jitra. Alí, japalí bilé bayérami nili jiti bakimea echoná bilé kalí chiní jitra niwárami, echi ko we aʼlá machiyé japi echoná iyárami nima koʼwáami alí japi simárika nokimea echi yúa. Tamujé ayénachó moʼili echoná Jeobá bitélachi japalí ti pakoli (Sal. 61:4). Echoná muchuwi jarecho japi Jeobá bayeli alí ti olá wiká namuti japi jitra binepo japi ju japi riká koʼwáami. Nalí, ¿kumi wilí echi Jeobá bitélachi? Echi ko ke biléana bi wilí, nalí omáana japoná piré echi japi nijéwami ju. Echi riká ineli wiká hermanos japi simíali bilé asamblea especial, alí machili wiká jarecho japi muchuwi echoná Jeobá bitélachi (Apoc. 21:3).
7. ¿Chúsiá ti aní japi echi pagótami aʼlá nijéwami japi ma suwili a bijí piré echoná Jeobá bitélachi? (Ayénachó iné echi foto).
7 ¿Alí piri ikili echi pagótami nijéwami japi suwili? ¿Achi bijí piré echoná Jeobá bitélachi? Ayena. ¿Chúsiá ti echi riká aní? Jiti echoná Biblia aní japi Onorúami a bijí newalá. Jesús jériká anili: “Japi echi suwíami ku jawásitami ju, echi Moisés ayénachó echi jitra ruyeli echoná kuwíchalichi nasípaka, japalí anili japi Jeobá ju ‘echi Abrahán Onorúamiwala, Isaac Onorúamiwala alí Jacob Onorúamiwalaʼ. Echi ko ke suwíami Onorúamiwala ju, nalí echi japi piré, jiti echi jitra ko sinéami echi a bijí piré” (Luc. 20:37, 38, TNM).
Echi japi Jeobá nijéwami nili chabé piréami japi ma suwili, a bijí piré Jeobá bitélachi. (Iné echi párrafo 7).
AʼLÁALA NAMUTI JAPI TA NARÉ ALÍ JAPI TA NOKISÁRÉ
8. ¿Piri aʼláala namuti tamujé naré jiti ta muchuwi echoná Jeobá bitélachi?
8 Japi riká bilé kalí chiní jitra niwárami, tamó iʼwiri jiti isábipo alí tamó tibú echi ukí alí rayénali jitra, echi riká cho echi Jeobá bitélachi ata tibuta muchuwi jiti ke riwepo echi amígowala niya, alí ati machí japi ikimea pe aminana. Japalí ti mulipi muchuwi Jeobá yúa, Satanás ke tamó omérima sinibí cha olayá (Sal. 31:23; 1 Juan 3:8). Alí echoná Wichimóbachi we baʼóachi, Jeobá ke riwema tamó tibúa alí ayénachó ma ti ke suwiboa (Apoc. 21:4).
9. ¿Chúriká nokisáré echi japi muchuwi echoná Jeobá bitélachi?
9 ¡We semati ju japi Jeobá tamó riwé japi ta mochibo echoná binoy bitélachi alí japi tamó riwé echi amígowala niya! Nalí, ¿piri ta nokisáré sinibí mochimia echoná Jeobá bitélachi? Natabo jepuná: bilé tamó bayésaká echi bitélachi, a keʼré japi tamujé ko machinálipo piri ju japi echi nakí japi ta nokiboa. Japi riká, a keʼré japi echi ko nakí japi ta iyepo echi zapatos kulí moʼimea echoná pachá, alí ti we kanílika echi riká nokiboa. Echi riká cho, ati machinali japi Jeobá nakí japi ta nokiboa jiti ke riwepo echi bitélachi mochiya. Jiti ta we galé echi, ati iʼwérili noká kanílitia (Col. 1:10). A bichíwali ju japi Jeobá ko ju tamujé amígowala, tamujé Onorúamiwala alí tamujé Onolá; jiti bela tamujé ko riwíwisaré echi (Sal. 25:14). Ke ti siné wikawásaré jépuká ju echi. Majaa Jeobá tamó iʼwírima jiti ke siné nokiboa namuti japi echi omonáritima alí jiti “ke niraka” nijéwipo Onorúami (Miq. 6:8).
CHOPI RIKÁ ISILI SINÉAMI YÚA ECHONÁ DESIERTO
10, 11. ¿Chu iyiri ejemplo tamó bineri japi Jeobá chopi riká iné sinéami japi echi nijéwami ju?
10 Jeobá ko chopi riká iné sinéami japi bayeli echi bitélachi (Rom. 2:11, TNM). Ati machí jepuná jiti echi riká isili echi israelitas yúa japalí mochili echoná desierto echomí Sinaí.
11 Japalí niyúbili binoy puéblowala echoná Egipto, Jeobá ko jáwili sacerdotes jiti nochama echoná tabernáculo, ayénachó nuleli echi levitas japi nokimea jaré nóchali echoná. Nalí, echi japi nóchili echoná tabernáculo o japi mulipi pireili, ¿achi echi bi nili japi Jeobá wabé aʼlá tibuli? Ke tasi, Jeobá ko we aʼlá tibuli sinéami echi israelitas.
12. ¿Chúriká néwariwélitili Jeobá japi we galeli sinéami echi israelitas japi mochili echoná campamento? (Éxodo 40:38; ayénachó iné echi imágenes).
12 Echoná campamento japoná mochili echi israelitas, sinéami omérili Jeobá amígowala niya alí ke natéami nili olayá bilé nóchali we natéami echoná tabernáculo o mulipi pirea. Japi riká, Jeobá ko isili japi sinéami omérima inea echi nolí japi moba asali echoná tabernáculo alí echi waʼlú kapílami naʼí japi rajinia wilili (leeri Éxodo 40:38). Jiti la, japalí echi nolí biléanachó nokeli, sinéami omérili inea jiti ku napabuma echi aboi níwala namuti alí simíaya biléanachó napawika jaréala israelitas yúa (Núm. 9:15-23). Echi riká cho, sinéami omérili kipúa japalí anérili echi trompetas plata jitra niwárami, japi aniwáami nili japi biléana simama (Núm. 10:2). Jepuná jitra ati machí japi bitelia mulipi echoná tabernáculo, ke aniwáami nili japi wabé aʼlá Jeobá amígowala nima. Nalí sinéami echi israelitas bayérami nili Jeobá jitra jiti kanila pirélima echi bitélachi alí tibútami nima. Jipi rawé echi riká cho ju, kumi ke japoná ti piré, Jeobá ko sinéami we tamó galé, tamó iʼwiri alí tamó tibú.
Echi tabernáculo japi nasipa wilili echoná campamento, néwariwélitili japi Jeobá we galeli sinéami echi israelitas. (Iné echi párrafo 12).
JIPI JEOBÁ AYÉNACHÓ NÉWARIWÉLITI JAPI WE GALÉ SINÉAMI
13. ¿Chúriká néwariwéliti Jeobá jipi japi galé sinéami japi echi nijéwami ju?
13 Jaré cristianos mulipi piré japoná wilí echi central mundial echomí Estados Unidos o jaréanachó sucursal alí jaré ko nocha echoná. Jepuná iʼwiri jiti omérima nokayá wiká sinúrika nóchali alí nochia echi Japi Aʼlá Niseri yúa. Jaré ko nocha japi riká superintendente de circuito o noká jarecho nóchali tiempo completo niraa. Nalí wiká ko ke noká echi iyiri nóchali. Mujé bilé echi nísaká, natá japi Jeobá ko we mi galé, japi mujé ko bayérami ju jiti mi bitélima echi bitélachi alí japi we aʼlá mi tibú (1 Ped. 5:7). Echi riká ju, Onorúami ko iyá sinéami japi echi nijéwami ju japi jitra binema, ané japi nokimea alí tibú.
14. ¿Chu yiri ju bilecho namuti japi riká Jeobá néwariwéliti japi we galé sinéami?
14 Jipi rawé Jeobá isimí japi sinéami pagótami olama echi Biblia, jepuná néwariwéliti japi echi ko we galé sinéami. Echi Onorúami Raʼicháala oserúami nili bikiá raʼicháliami niraa: hebreo, arameo alí griego. ¿Achi wabé aʼlá Jeobá amígowala keʼré echi japi a omeri leeria echi Onorúami Raʼicháala japi riká oserúami nili ne kulí? Ke tasi echi riká ju (Mat. 11:25).
15. ¿Ruyé bilecho namuti japi néwariwéliti japi Jeobá galé sinéami? (Ayénachó iné echi fotos).
15 Jiti Jeobá amígowala nipo, ke newalé we binékami niya echoná escuela o machiyá japi riká oserúami nili echi Biblia ne kulí. Jeobá ko ke bi iʼwiri echi japi we binékami ju echoná escuela jiti machíami nima, nalí iʼwiri sinéami. Echi binoy Raʼicháala, echi Biblia, traducíritami ju miles raʼicháliami niraa. Jiti la, Omáana Wichimóbachi piréami, echi pagótami omeri binea echi Biblia jitra alí Jeobá amígowala niya (2 Tim. 3:16, 17).
Echi Biblia traducíritami ju miles raʼicháliami niraa, jepuná néwariwéliti japi Jeobá we galé sinéami. (Iné echi párrafo 15).
KE RIWEPO PIRELIA ECHONÁ JEOBÁ BITÉLACHI
16. Japi riká aní Hechos 10:34, 35, ¿jépuká riwé Jeobá japi pirélima echoná binoy bitélachi?
16 Bitelia echoná Jeobá bitélachi we semati ju jiti ke nirú bilecho japi wabé simá isíami ju alí japi kanílika naré echi pagótami echoná binoy bitélachi. Jeobá ko ke natéami niraa iné japi kumi ochérili echi pagótami, japoná bitéami ju, japi riká raʼíchami ju, chu yena binékami ju, chu ikí bamíbami ju, achi rijoi ju o mukí ma. Echi ko bi nakí japi ta riwíwipo japi echi nulá (leeri Hechos 10:34, 35).
17. ¿Piri ta binepo biléala binelíwami?
17 Echoná Salmo 15:1, David anili jepuná náriwami: “Oh, Jeobá, ¿jépuká bitélima mujé bitélachi? ¿Jépuká simama mujé kawíwalachi?”. Miná ko, Jeobá iʼwírili David jiti echi binoy animea echi respuestas. Biléala binelíwami binepo piri ti nokisáré jiti Jeobá tamó riwema pirelia echi bitélachi.
CANCIÓN sjj 32 ¡Jeobá bi nijewi!
