Echi leériami ko machinali
Salmo 12:7 aní: “Mujé ko echi inea asimea”. ¿Piri ruyá aní jepuná raʼíchali? ¿Achi ruyá aní echi pagótami “japi we risoa nila” (versículo 5), o “echi Jeobá raʼicháala” (versículo 6)?
Echi contexto na versículo jitra aní japi ruyá aní echi pagótami.
Salmo 12:1-4 aní japi “echi japi nijéwami nili ma ke ité”. Jipi ko binepo Salmo 12:5-7 japi aminabi ruyé echi náriwami jitra.
“‘Echi pagótami jitra japi we risoa nila,
alí japi we omona jiti we risóati ju,
nijé ko wilísima alí iʼwírimaʼ, jéaní Jeobá.
‘Ani niyúbima echi jitra japi we kichí echiʼ.
Echi Jeobá raʼicháala biʼwíkami ju;
echi ko ju japi riká plata japi aʼlárika niwáari echoná horno wicholí jitra niwárami, japi kicháosa niraa biʼwíkami niwáari.
Mujé ko echi inea asimea, oh, Jeobá;
mujé tibuma ibili echi jipi jonsa alí sinibí”.
Echi versículo 5 ruyé japi isima Onorúami “echi pagótami jitra japi risoa nili”: echi ko niyúbima.
Echi versículo 6 ayénachó aní: “Echi Jeobá raʼicháala biʼwíkami ju; echi ko ju japi riká plata japi aʼlárika niwáari”. Alí japi ta cristianos ju ati we bichiwi jepuná raʼíchali (Sal. 18:30; 119:140).
Jipi ko inepo japi aní Salmo 12:7: “Mujé ko echi inea asimea, oh, Jeobá; mujé tibuma ibili echi jipi jonsa alí sinibí”. ¿Piri ruyá aní echi raʼíchali echi?
Japi riká echi versículo 6 ruyé “echi Jeobá raʼicháala” jitra, a keʼré japi jaré ko natama japi echi versículo 7 ruyá aní japi Jeobá tibú echi Biblia. Alí a bichíwali ju jepuná, jiti chabé jonsa Jeobá we aʼlá tibuli echi Biblia echi sayérala jitra jiti ke siné suwábima (Is. 40:8; 1 Ped. 1:25).
Nalí ayénachó a bichíwali ju japi aní echi versículo 5, jiti Jeobá ma iʼwírili alí niyúbili echi pagótami “japi we risoa nila”, alí aminabi echi riká isima (Job 36:15; Sal. 6:4; 31:1, 2; 54:7; 145:20).
Alí biché, ¿piri ruyá aní echi raʼíchali echi echoná versículo 7?
Japi riká aní jepuná capítulo, ati iné japi ruyá aní echi pagótami.
Salmo 12:1 raʼicha echi pagótami nijéwami jitra japi ikaleka raʼícharami nili. Miná ko aní japi Jeobá ko suwábima echi pagótami japi cha riká raʼíchami ju. Jepuná Salmo aní japi Jeobá ne bichíwali iʼwírima echi puéblowala jiti echi binoy “raʼicháala biʼwíkami ju”.
Jiti la, japalí echi versículo 7 aní “mujé ko echi inea asimea” alí “mujé tibuma ibili echi”, jepuná ko ruyá aní japi tibuma echi japi risoa olárami ju echi cha nokáami jitra.
Echi raʼíchali echi we aʼlá ruyé japi riká aní echi texto masorético. Alí echi versión griega osá niraa nee echi raʼíchali tamó, japi ruyá aní echi nijéwami japi risoa nili jiti cha olárami ju, echoná versículo 7 (11:8, Septuaginta). Ayénachó echi versículos 7 alí 8 ruyé japi Jeobá ko “tibuma ibili echi” japi nijéwami ju echi jitra japi “noká japi nirúlima cha nokiwáami” (Sal. 12:7, 8). Bilé traducción echi Oserúami Hebreas jitra arameo niraa, echoná versículo 7 bachá parte ayénachó nee echi raʼíchali echi, jériká aní: “Mujé, oh, WALUBÉALA, tibuma echi japi wachía nokáami ju, mujé ko echi tibuma echi cha nokáami jitra ne sinibí”. Suwaba jepuná namuti jitra japi ta bineli, ati iné japi Salmo 12:7 ke ruyá aní echi Jeobá raʼicháala.
Jiti la jepuná versículo tamó iʼwiri machiyá japi Jeobá iʼwírima echi japi nijéwami ju.
