1. ¿Piri iʼwírili Job jiti aminabi we aʼlá machimea Jeobá?

 SUWABA echi namuti japi raʼíchili Job jarecho pagótami yúa japalí biteili japi ke siné wikáwili ko nili, japi raʼíchili Jeobá yúa. Jeobá ko aneli Job japi inema jaré namuti japi echi niwali, jiti echi iʼwírima machiyá japi echi ko we machíami ju alí jiti bichíwima japi echi ko a omeri tibúa japi nijéwami ju. Japi riká, Job ineli japi Onorúami ko iyá echi namuti jákami japi newalé, echi riká machili japi echi riká cho isima echi yúa (Job 38:39-41; 39:1, 5, 13-16). Japalí Job kilí niraa nátili echi namuti japi Jeobá niwali, echi ko aminabi we aʼlá machili japi chúriká ju echi.

2. ¿Chúsiá isini kaachi a jilí ju inea echi namuti japi Jeobá niwali?

² Tamujé ayénachó, ati oméripo aminabi we aʼlá machiyá Jeobá ineka japi echi niwali. Nalí, isini kaachi a jilí ju echi riká nokayá. Jiti ta piréami nísaká echoná ciudad, ke ti ne sinibí ritiwá echi namuti japi Jeobá niwali. Alí ata piréaká japoná a siyónami ju, a keʼré japi ta nílipo japi ta ke ikiri inea echi namuti. Jiti la, ma binepo chúsiá we natéami ju japi ta ikíripo inea japi Jeobá niwali. Ayénachó binepo chúriká Jeobá alí Jesús néeli echi namuti japi nirú tamó binérimia namuti we natéami, alí japi ta oméripo nokayá jiti ta aminabi binepo inea echi namuti japi ikí nirú.

3. ¿Chúriká ti machí japi Jeobá nakili japi Adán kanílima inea echi namuti japi echi niwali?

³ Jeobá ko nakili japi echi Adán kanílima inea echi namuti japi echi niwali. Jiti la, echi ko achali Adán echoná  weʼé baʼóachi jiti ichimea alí wilé niraa niwama (Gén. 2:8, 9, 15). Natá japi chu nílili Adán japalí ineli ochériachi echi siwá alí echi japi ichali. Tibúa echi weʼé baʼóami Edén riwéami bilé nóchali we natéami nili. Jeobá ayénachó aneli Adán japi rewarama suwaba echi namuti jákami (Gén. 2:19, 20). A keʼré japi Adán ko we aʼlá ineli echi namuti jákami, chúriká ju alí chu nokáami ju, jiti echi riká machimea chúriká rewarama. Adán ko we kaníliliré echi nóchili isiá jiti echi iʼwírili inea japi Jeobá we machíami ju, japi we aʼlárika niwali echi namuti alí simárika niraa.

4. a) ¿Chúsiá ti inésaré echi namuti japi Jeobá niwali? b) ¿Piri namuti japi ikí nirú ami we baʼori?

⁴ Ata inésaré echi namuti japi Jeobá niwali jiti echi binoy echi riká nakí. Echi ko jériká aní: “Ripá inaká inesi”. Alí miná ko nari: “¿Jépuká niwali suwaba echi namuti?”. Tamujé aʼlá machí jepi ju (Is. 40:26). Jeobá ke bi niwali wiká namuti we baʼóami ripá rewegachi, ayénachó jenaʼí Wichimóbachi alí echoná mar, alí ati omeri binea wiká namuti echi jitra (Sal. 104:24, 25). Jipi ko natá japi chúriká tamó niwali Jeobá jiti ta we baʼóripo japi ikí nirú. Echi ko niwali tamó busila, nakala, chamébala, chomala alí sikala.

5. Japi riká aní Romanos 1:20, ¿chúsiá we aʼlá ju japi ta inepo japi Jeobá niwali?

⁵ Ayénachó we natéami ju japi ta inepo japi Jeobá niwali jiti echi riká ati aminabi machiboa chúriká ju echi (leeri Romanos 1:20). Bilé ejemplo ko ju, japi riká niwárami ju echi namuti néwariwéliti japi Onorúami we machíami ju. Ayénachó echi sébili koʼwáami japi ikí nirú néwariwéliti japi we tamó galé. Ati aminabi machiboa Jeobá alí echi mulíwipo, ati inésaká echi namuti japi echi niwali. Jipi ko ma inepo chúriká Jeobá nee echi namuti japi binoy niwali tamó binérimia namuti we natéami.

6. ¿Piri ta biné echi cigüeñas jitra?

⁶ Jeobá ko ma olá echi hora. Sinibí bamíali, ma sunía echi michá febrero alí nasipa si inárachi echi michá mayo, echi israelitas ko a ritiréi echi cigüeñas japi inía ku simibi echomí norte. Jeobá ko aneli echi israelitas: “Echi cigüeña ripá iníami aʼlá machí chu kabú ku roʼima” (Jer. 8:7). Jeobá niwali echi cigüeñas jiti aʼlá machimea chu kabú ku roʼima. Jiti la inea echi weli chuluwí, tamó newalari japi Jeobá ma aʼlá machí chu kabú suwábima  echi chati namuti alí ata bichiwi japi a echi riká isima (Hab. 2:3).

7. ¿Piri ta biné echi usá jitra? (Isaías 40:31).

⁷ Jeobá ko jiwérili iyá japi echi nijéwami ju. Isaías jitra, Jeobá ko aneli japi echi nijéwami ju, japi iʼwírima japalí ke jiwera nílisa o siwea nílisa jiti “inía riwélima japi riká ko olayá echi usá masala” (leeri Isaías 40:31). Echi israelitas ko sinibí ineli echi usá iníachi néeka echi iká jiti ayama echi masala alí ke me risimea. Jepuná tamó bineri bilé namuti we natéami, japi riká isimí Jeobá iʼwiria echi usá ayénachó tamó iʼwírima alí tamó jiwérili iyama. Jiti la, japalí mi inesa echi usá we ripá iníachi alí ke me nokea echi masala, newalá japi Jeobá mi jiwérili iyama jiti mi anachama echi karú ikiwáami.

8. a) ¿Piri bineli Job echi namuti jitra japi Jeobá niwali? b) Alí tamujé, ¿piri ta biné?

⁸ Jeobá ju bilé Onorúami japi ta omero bichiwia. Japalí Jeobá raʼíchili Job yúa, echi ko iʼwírili jiti Job aminabi bichíwima echi (Job 32:2; 40:6-8). Echi ko raʼíchili jaré namuti jitra japi binoy niwali, japi riká echi sipolí, nolí alí echi ralamú. Ayénachó raʼíchili jaré namuti jákami jitra, japi riká echi toro alí echi caballo (Job 38:32-35; 39:9, 19, 20). Suwaba jepuná namuti jákami jitra, Job ko machili japi Jeobá we jiwérami ju, we galéami alí we machíami. Japi ruyeli Jeobá isili japi Job aminabi we bichíwima (Job 42:1-6). Echi riká cho, japalí ta biné echi namuti jitra japi Jeobá niwali, ata newalá japi echi ko wabé rasíruka machíami ju alí jiwérami tamujé yúa. Jeobá ko omeri iyea suwaba echi chati namuti japi tamó risoa níliti alí echi riká isima. Natia echi jitra tamó iʼwiri jiti ta aminabi we bichíwipo echi.

9, 10. ¿Piri tamó bineri Jeobá jitra echi rayénali alí echi ukí?

⁹ Jesús ko we aʼlá machiyé suwaba japi Onorúami niwali, jiti echi si iʼwírili echi Onolá niwayá echi universo japi riká “bilé we machíami” nóchami (Prov. 8:30). Miná ko, japalí jenaʼí Wichimóbachi biteili, echi ko néeli echi namuti japi Onorúami niwali binérimia echi discípulos jaré namuti we natéami echi Onolá jitra. Ma binepo jaré.

¹⁰ Jeobá ko néwariwéliti japi we galé sinéami. Echoná ripá rabó asaká, Jesús binérili echi discípulos okuá namuti jitra japi Jeobá niwali, nalí japi echi pagótami ke me natéami niraa iné: echi rayénali alí echi ukí. Jepuná okuá namuti we natéami ju jiti ta pirélipo. Jeobá ko we galéami ju alí echi ko iyá jepuná namuti ke bi japi nijéwami ju, ayénachó japi ke nijéwami ju (Mat. 5:43-45). Jesús ko néeli jepuná ejemplo binérimia echi discípulos japi Jeobá ko nakí japi ta galepo sinéami pagótami. Japalí ti inesa japi we simárika wilí mokowíachi echi rayénali o japalí ti we kanili inea ukúachi, natabo japi Jeobá we galé sinéami. Natia japi riká ju Jeobá, tamó iʼwírima nawesia sinéami pagótami japi aní echi Biblia.

11. ¿Chúriká tamó iʼwérili iyá inea echi chuluwí?

¹¹ Jeobá tamó iyá japi ta newalé jiti ta pirélipo. Jesús ayénachó jéanili: “Ne galá ʼnesi echi jaré chuluguí echoʼná ripá iʼnika ʼyénami, mapujiti aboni ketasi ichá, nirapé ʼwí, nirapé napabú echoʼná biléana rikówachi”. A keʼré japi kipúa mochili,  ineli jaré chuluwí inisia simíriachi, jiti la echi ko jériká aneli: “¡ʼYémitamo waminabi wabé simírami natiguí!” (Mat. 6:26). Jesús ko we simárika binérili japi Jeobá sinibí tamó iyá japi ta newalé jiti ta pirélipo (Mat. 6:31, 32). Japi Jesús anili, aminabi iʼwérili iyá echi japi nijéwami ju jipi rawé. Japi riká bilé precursora España bitéami, echi ko we siwea nilie jiti ke ritiréi bilé aʼlá kalí japoná bitélima. Nalí, japalí ineli jaré chuluwí koʼyá uchútiami namuti rakala, echi ko ku kanílili. Echi ko jéaní: “Echi tamí newalárili japi Jeobá ayénachó tamí tibuma, japi riká isimí echi chuluwí yúa”. Miná ko echi hermana riwali japoná bitélima.

12. Japi riká aní Mateo 10:29-31, ¿piri tamó bineri Jeobá jitra echi chuluwí?

¹² Jeobá ko we natéami niraa iné ibili niraa tamujé. Kecho bijí júulia nawisamia, Jesús ko iʼwírili echi apóstoles jiti ke majama japalí sayérisiwa (leeri Mateo 10:29-31). Echi ko raʼíchili bilé chuluwí jitra, gorrión riwéami, japi we machirúami nili echomí Israel. Echalí echi gorrión pe kuabi winomí natéami nili. Jesús aneli echi discípulos japi Onorúami aʼlá machí “mapalí bilé táa chuluguí riʼlé wiʼyérali wichí”. Miná ko jéanili: “[Emi] ne wabé simírami natéami ju [...] ketasi mapurigá echi jaré wikabé kúuchi chuluguí”. Echi riká binérili japi Jeobá ko we natéami niraa iné ibili niraa echi. Alí echi iʼwírili jiti ke majaa nílima echi sayérala. Japalí echi discípulos ineli echi gorriones japalí nawesia járili echoná pueblos, a newaláliré japi anili Jesús. Echi riká cho, japalí mi inesa echi chuluwí, newalá japi Jeobá ko we mi natéami niraa iné echi “wikabé kúuchi chuluguí” yúa. Jeobá mi iʼwírima jiti mi ke majaa anachama japalí mi sayérisiwa (Sal. 118:6).

13. ¿Piri ta nokisáré jiti ta aminabi binepo echi namuti jitra japi Jeobá niwali?

¹³ Ati oméripo aminabi binea Jeobá jitra ineka japi echi niwali. Jiti la, ati iʼwérili nokisáré jiti ta ikíripo inea japi ikí nirú alí natia piri ta biné Jeobá jitra. Nalí, isini kaachi a jilí nímiré echi riká nokayá. Bilé hermana Camerún bitéami ruyé chúsiá, echi ko jéaní: “Jiti ni ochériki echoná ciudad, ani iʼwérili isié inea echi namuti japi Jeobá niwali”. Alí bilé anciano Alfonso riwéami jéaní: “Japi tamí iʼwiri ko ju, ma olayá jaré minutos bineli asaká inea japi ikí nirú alí natia piri ni biné Jeobá jitra”.

14. ¿Piri bineli David japalí nátili echi namuti jitra japi Jeobá niwali?

¹⁴ Echi silíami David we nátili echi namuti jitra japi Jeobá niwali. Echi ko jéanili:  “Japalí ni iné ripá siyónachi, echi namuti japi mi niwali mujé makúsuwala jitra, echi mechá alí echi sipolí japi mi niwali, ¿piri ju echi pagótami jiti mi sinibí a newalama?” (Sal. 8:3, 4). David ko ke bi ineli japi we semati ju echi sipolí, nalí echi ko nátili piri bineli Jeobá jitra. Ineka echi, machili japi Jeobá ne walubéala ju. David ayénachó nátili chúriká echi ochérili echoná iyela ropálachi. Natia echi namuti jitra, iʼwírili jiti aminabi we galema Jeobá jiti we machíami ju (Sal. 139:14-17).

15. Inea echi namuti japi Jeobá niwali, ¿ami machili japi chúriká ju echi? Ruyé jaré ejemplos (Salmo 148:7-10).

¹⁵ Japi riká isili David, ke ti newalé we miká simiyá jiti natabo echi namuti jitra japi Jeobá niwali. Ami we aʼlá inésaká echi namuti japi ikí nirú japoná mi iyena, ami machimea japi chúriká ju Jeobá. Japi riká, natá japi Jeobá we jiwérami ju japalí mi we ratábami inesa echi rayénali (Jer. 31:35). Ayénachó natá japi Jeobá we machíami ju japalí mi inesa bilé chuluwí rosorá chukíriami. Ayénachó natá japi Jeobá we kaníliami ju japalí mi inesa bilé kochí najátiami binoy wasila. Alí waʼlú matétara iyá Jeobá jiti we galéami ju japalí mi inesa bilé iyela riʼéami echi ranala yúa japi taa muchi ju. Ata binepo wiká namuti Jeobá jitra ineka japi echi niwali, jiti suwaba japi ikí nirú walubéala ané Jeobá (leeri Salmo 148:7-10).

16. ¿Piri ta nokisáré?

¹⁶ Ke nirú bilé japi we machíami ju, we galéami, simárika niwáami echi namuti alí we jiwérami japi riká tamujé Onolá Jeobá. Ati jarecho namuti si machiboa japi chúriká ju Jeobá ineka japi echi niwali. Nalí, ati iʼwérili nokisáré ikiria jiti inepo japi ikí nirú alí natia piri tamó bineri Jeobá jitra. Ati echi riká nokisáaká, ati aminabi mulíwipo echi Onorúami japi tamó niwali (Sant. 4:8). Echoná biléala binelíwami, ata binepo chúriká echi wénwala omeri néea echi namuti japi Jeobá niwali, iʼwírimia echi kúchuwala muliwia Onorúami.