1, 2. a) ¿Chúriká ju japalí bilé pakó? b) ¿Piri ta binepo jenaʼí binelíwami?

 ¿AMI siné kaachi ineli jaré hermanos alí hermanas japi pakoma? Japalí echi hermano japi nawesa wilí nari echi okuá preguntas, echi japi pakómaré jiwérika aní: “¡Ayénaʼá!”. Echalí echi téemala alí amigos we kanili. Ayénachó japalí echi japi pakó ku machina baʼwírali jonsa, echi akala newaré japi we kanili alí sinéami japi inea muchuwi sikachoni. Ne sojí sinibí tarali wiká miles pagótami pakó. Echalí jonsa ma testigo Jeobá ju jiti echi yúa katúwili alí pakoli.

² Ami pakónalaká, ami néwariwéliti japi mi Jeobá amígowala nínali alí echi ko we natéami niraa mi iné (Sal. 14:1, 2). Na binelíwami nátika oserúami nili emi jitra japi timí pakónali. Jenaʼí binepo bikiá namuti japi timí iʼwírima jiti timí pakónilima. Alí japi ta ma pakoli, ¿chúriká tamó iʼwírima? Na binelíwami tamó iʼwírima jiti aminabi nóchilipo Jeobá alí ke riwepo nijewia.

3. ¿Chúsiá ti wachíniga pirélinali alí ti galé echi bichíwali? (Salmo 119:128, 163).

³ Jeobá ko nuleli echi japi nijéwami nili: “Galesi echi bichíwali” (Zac. 8:19). Ayénachó, Jesús anili japi we natéami ju japi ta wachíniga nokiboa (Mat. 5:6, TNM). Jepuná ko aniwáami ju japi ta we inílipo ne sulachí jonsa nokinalia japi Jeobá aní japi aʼlá ju. ¿Achi mi wachía niraa bitélinali alí mi galé echi bichíwali? Ati machí japi echi riká ju. Jiti la mi kichí japi chati ju alí suwaba japi ke bichíwali ju (leeri Salmo 119:128, 163). Japi ikaléami ju noká japi riká Satanás, echi japi nuláami ju jenaʼí Wichimóbachi (Juan 8:44; 12:31). Bilé namuti japi echi Diablo nakí ko ju japi cha riká raʼichárami nima echi Onorúami rewalá jitra. Echi ko ikaleka raʼicha Jeobá jitra, japalí jonsa aneli echi  Eva japi Jeobá ikaléami ju alí japi ke aʼlá nuláami ju, ayénachó japi ke iyánali echi pagótami echi namuti aʼláala (Gén. 3:1, 4, 5). Suwaba echi namuti jitra, wiká ke aʼlá nata Jeobá jitra. Japalí echi pagótami ke galénali echi bichíwali, Satanás ko isima japi nokimea wiká namuti japi we chati ju (Rom. 1:25-31).

4. ¿Chúriká newa isimí Jeobá japi “echi Onorúami ne bichíwali raʼíchami” ju? (Ayénachó iné echi dibujo).

⁴ Jeobá ju “echi Onorúami ne bichíwali raʼíchami” alí echi pagótami japi echi galé echi ko bineri echi bichíwali (Sal. 31:5). Echi riká iʼwiri jiti ke bichíwima japi echi Diablo aní. Ayénachó, Jeobá tamó bineri jiti ta bichíwali raʼichabo alí wachíniga pirélipo, alí echi tamó iʼwiri jiti kilí nílipo alí aʼlá pirélipo (Prov. 13:5, 6). Japalí mi jonsa chotásili binea echi Biblia, ¿ami echi riká ineli? Mujé ko ma bineli japi Jeobá bi ju japi iʼwiri sinéami pagótami jiti aʼlá pirélima (Sal. 77:13). Jiti la mi nijéwinali japi Jeobá nulá (Mat. 6:33). Alí ayénachó mi nakí japi sinéami machimea echi bichíwali alí mi néwariwélitinali japi Satanás ikaleka raʼicha Jeobá jitra. Nalí, ¿chúriká mi isima?

5. ¿Chúriká mi néwariwélitima japi mi wachía niraa bitélinali alí japi mi galé echi bichíwali?

⁵ Jiti mi néwariwélitima japi mi ke bichiwi japi Satanás aní, japi mi ruyénali jarecho echi bichíwali, japi mi nakí japi Jeobá nalí nulama alí japi mi nijéwinali japi echi nulá, ami katúwika raʼichásaré Jeobá yúa alí mi anésaré japi mi sinibí echi bi nijéwima. Alí miná ko, ami pakósaré jiti sinéami machimea japi mi ma echi riká isili. Jiti la, ami we galésaká echi bichíwali alí mi wachía niraa bitélinalaká, echi mi iʼwírima jiti mi pakoma.

6. Japi riká aní Salmo 45:4, ¿chúsiá ti we galé Jesús?

⁶ ¿Chúsiá mi galé Jesucristo? Ata machiboa jaré namuti echoná Salmo 45:4 (leeri). Jesús ko sinibí bichíwali raʼicha, ke niráami ju alí wachíniga niraa bité. Jiti la, ami we galésaká japi riká echi isimí, mujé ayénachó we galema Jesús. Japi riká, Jesús ko sinibí isili japi aʼlá ju alí ruyeli echi bichíwali (Juan 18:37). Nalí, ¿chúriká néwariwéliti japi ke niráami ju?

7. ¿Chúriká néwariwéliti Jesús japi ke niráami ju?

 ⁷ Jesús ko néwariwéliti japi ke niráami ju, japi riká raʼicha alí japi riká isimí. Japi riká, echi ko sinibí wabé natéami niraa iné echi Onolá alí ke nakí japi jarecho nalí wabé natéami niraa inema echi binoy (Mar. 10:17, 18; Juan 5:19). ¿Chumi nili machiyá japi Jesús ke niráami ju? A keʼré japi mi we galé echi alí mi isínali japi riká echi isimí. ¿Chúsiá Jesús ke niráami ju? Jiti Jeobá ke niráami ju alí Jesús isimí japi riká echi, jiti we galé (Sal. 18:35; Heb. 1:3). ¿Kechi ko echi mi iʼwiri jiti mi aminabi mulíwima Jesús?

8. ¿Chúsiá ti we kanili japi Jesús tamó silíamiwala ju?

⁸ We ti kanili japi Jesús tamó Silíamiwala ju, jiti echi ko we aʼlá nulá. ¿Chúsiá? Jiti Jeobá binérili alí echi ko wilali japi riká Silíami (Is. 50:4, 5). Ayénachó, Jesús néwariwélitili japi we tamó galé (Juan 13:1). Jiti Jesús tamó Silíamiwala ju, ati we galésaré. Echi binoy anili japi echi pagótami japi echi nijewi, néwariwéliti japi ne bichíwali echi galé (Juan 14:15; 15:14, 15). Jiti la, ¡ati wabé natéami niraa iné Jeobá Nolá amígowala niya!

9. Japi riká pakoli Jesús alí japi riká pakó echi discípulowala, ¿piri namuti chopi iyiri ju?

⁹ Jesús ko nulali japi pakósaré sinéami japi echi nijéwinali (Mat. 28:19, 20). Alí echi binoy echi riká isili. Nalí japi riká Jesús pakoli sinúrika ju japi riká noká echi discípulos (iné echi recuadro “ Ke chopi iyiri nili japi riká pakoli Jesús alí japi riká pakó echi discípulos”). Nalí, a nirú jaré namuti japi a chopi iyiri ju. Japi riká, japalí Jesús pakoli, echalí chotásili isiá japi Jeobá nuleli (Heb. 10:7). Echi riká cho noká echi discípulowala. Japalí pakó néwariwéliti jarecho japi ma katúwili Jeobá yúa alí japi echalí jonsa nokimea japi Jeobá nulá alí ke ko japi echi aboi nakí. Echi riká ayénachó noká japi riká Jesús isili.

10. ¿Piri namuti jitra we mi galé Jesús, alí piri mi isísaré ami we galésaká?

¹⁰ Mujé ko bichiwi japi Jesús Jeobá Nolá ju alí echi Silíami japi Onorúami wilali jiti nulama jenaʼí Wichimóbachi. Alí mi machí japi Jesús ke niráami ju alí japi isimí japi riká echi Onolá. Ayénachó mi bineli japi kóʼali echi japi lochea pireili, iʼwérili iyali japi siwea mochili alí saʼweli echi nayúami (Mat. 14:14-21). Ayénachó mi ineli japi Jesús ju japi nulá echoná congregaciones jipi rawé (Mat. 23:10). Alí mi machí japi Jesús isima wiká namuti we baʼóami japalí nulasa jenaʼí Wichimóbachi. ¿Chúriká mi néwariwélitima japi mi we galé echi? Nijewia japi echi nulá (Juan 14:21). Jiti la, ami katúwika raʼichásaré Jeobá yúa alí mi pakósaré.

11. ¿Chu iyiri ju echi namuti wabé natéami japi mi jitra pakósaré, alí chúsiá echi riká mi aní?

¹¹ ¿Chu iyiri ju echi namuti wabé natéami japi ta jitra pakósaré? Ati machiboa ata natásaká japi Jesús anili japi chu iyiri ju echi nulalíwami wabé natéami. Echi ko jéanili: “Ne sulachí niráa ne wabé galesi echi Walubela kétamo Riósawa. Ayena cho ne suwaba kétamo iwigá niráa [...] kétamo ʼnátawa niráa [...]. Ayena cho ne suwaba kétamo jiwérawa niráa” (Mar. 12:30). ¿Achi mi echi riká galé Onorúami?

12. ¿Chúsiá mi we galé Jeobá? (Ayénachó iné echi imágenes).

¹² A nirú wiká namuti japi ta jitra we galepo Jeobá. Japi riká, mujé ko ma bineli  japi Jeobá ju japi “isili iwitia japi piré” alí ayénachó japi echi nijí suwaba echi namuti japi aʼláala ju (Sal. 36:9; Sant. 1:17). Jiti la, suwaba echi aʼláala namuti japi mi olá Jeobá mi iyá, jiti echi ko we aʼláala ju alí we mi galé.

13. ¿Chúsiá japi isili Jeobá tamujé jitra bilé chiliwéliami we natéami ju?

¹³ Jeobá ko nijili binoy Nolá jiti mukumea tamujé jitra. ¿Chúsiá echi ju bilé chiliwéliami we natéami? Jiti Jeobá alí Jesús we galé anakupi niraa. Jesús jéanili: “Onorúami tamí wabé galé” alí “Nijeni we galé Onorúami” (Juan 10:17; 14:31). Echi riká anili jiti echi okuaka wiká millones bamíali napawika pireili (Prov. 8:22, 23, 30). Jiti la japalí Jesús we risoa nílili alí mukuli, Jeobá ko we omónali alí risoa nílili inea. Nalí Jeobá ko riweli japi echi riká ikimea jiti echi we mi galé alí we galé sinéami pagótami, alí nakí japi sinéami sinibí we kanílika pirélima (Juan 3:16, TNM; Gál. 2:20, TNM). Echi ju echi namuti wabé natéami japi ta jitra we galé Onorúami.

14. ¿Piri namuti isima japi mi we kanílima?

¹⁴ Japalí mi aminabi we binésimi Jeobá jitra, ayénachó mujé aminabi we galé echi. Mujé ko jipi alí sinibí aminabi mulíwinali Jeobá, alí a mi omérima  echi riká isiá. Japi mi aní alí japi mi isimí néwariwélitisaká japi mi we galé Jeobá, mujé ko we kanílitima echi sulala. Alí Jeobá we simárika mi ané japi mi echi riká isima (Prov. 23:15, 16). Japi mi isimí jipi alí pe aminana néwariwélitima achi mi ne bichíwali galé Jeobá (1 Juan 5:3). Bitelia japi riká nakí Jeobá, isima japi mi sinibí we kanílima.

15. ¿Chúriká mi néwariwélitima japi mi we galé Jeobá?

¹⁵ ¿Chúriká mi néwariwélitima japi mi we galé Jeobá? Bachá, ami katúwika raʼichásaré Jeobá yúa jiti mi anema japi mi echi bi sinibí nijéwima (Sal. 40:8). Alí miná ko, ami pakósaré jiti sinéami machimea japi mi ma katúwili Jeobá yúa. Japi riká ti bineli kulí chotasia na binelíwami, ami pakósaká, mujé alí sinéami we kanílima jiti echalí rawé we natéami ju. Alí echalí jonsa, mujé ko ma ke bitélima japi riká mujé nakí, nalí japi riká Jeobá nakí (Rom. 14:8, TNM; 1 Ped. 4:1, 2). Ami nátiré japi we jilí nima ami pakósaká, nalí echi riká mi isísaká mujé ko we mi kanílika bitélima. Ma binepo chúsiá.

16. Japi riká aní Salmo 41:12, ¿piri namuti aʼláala iyama Jeobá echi japi iʼwérili noká echi nóchilia?

¹⁶ Jeobá bilepi bi ju wabé nijíami. Japalí mi iyá Jeobá, echi ko rasíruka wiká namuti mi ku iyama (Mar. 10:29, 30). Alí jipi, Jeobá ko isima japi mi we kanílika bitélima, mi iyama wiká namuti aʼláala alí suwaba namuti japi mi newalé. Japalí mi pakosa ami chotásima nóchilia Jeobá, nalí pe aminana ayénachó a mi omérima sinibí echi riká isiá. Mujé alí Jeobá aminabi we galema anakupi niraa, alí japi riká Jeobá, ami omérima sinibí bitea (leeri Salmo 41:12).

17. ¿Piri ju japi mi omérima isiá jiti mi kanílitima Jeobá?

¹⁷ Japalí mi katuwi Jeobá yúa alí mi pakó, mujé ko iyá bilé namuti we natéami. Suwaba echi namuti japi mi olá alí japi mi kaníliti, Jeobá mi iyali. Tákoré suwaba japi ikí nirú Jeobá níwala ju, ¿piri nalí ju japi wabé kanílitima Jeobá?  Japalí mujé echi nijewi alí mi iʼwérili isimí echi nóchilia (Job 1:8; 41:11; Prov. 27:11). Jiti la, we galea Jeobá ju echi namuti wabé natéami japi jitra mi pakósaré. Ke nirú bilecho namuti japi mi wabé kanílitima.

18. ¿Piri mi nárika isísaré?

¹⁸ Japi riká ti ma bineli, jipi ko piri mi nata ¿achi mi ma pakoma? Mujé bi ju japi animea. Bilé namuti japi mi iʼwírima machiyá ko ju nárika isiá: “¿Chúsiá ni ke pakó?” (Hech. 8:36). Checho ku newalá echi bikiá namuti japi ta bineli japi jitra bilé pakósaré. Bachá, we galea echi bichíwali alí wachía niraa bitélinalia. Nárika isí: “¿Achi ni we inili inénilia japalí sinéami pagótami bichíwali raʼichama alí wachía niraa pirélima?”. Okuá, we galea Jesucristo. Nárika isí: “¿Achi ni nakí japi echi Jesús nijé Silíamiwala nima alí ni nijéwinali japi echi nulá?”. Alí bikiá, japi wabé natéami ju, we galea Jeobá. Nárika isí: “¿Achi ni nijéwinali Jeobá alí echi riká kanílitia echi sulala?”. Ami anílaká ayena suwaba echi preguntas, ¿chúsiá mi ke pakó? ¿Piri namuti isimí japi mi ke pakoma? (Hech. 16:33).

19. ¿Chúsiá mi ke wilí natásaré achi mi ma pakoma? Ruyé bilé ejemplo (Juan 4:34).

¹⁹ Ke mi cho machiyáaká achi mi ma pakósaré, natá bilé ejemplo japi anili Jesús (leeri Juan 4:34). Echi ko anili japi nóchilia Jeobá ju japi riká koʼyá echi koʼwáami. ¿Chúsiá echi riká anili? Jiti echi koʼwáami we aʼlá iʼwiri tamujé ripokala. Alí Jesús machili japi suwaba japi Jeobá tamó tani, tamó iʼwiri jiti aʼlá pirélipo. Jeobá ko ke siné tamó tani japi ta nokiboa echi namuti japi tamó risoa níliti. Jiti la, Jeobá ko nakí japi mi pakoma (Hech. 2:38). We mi aʼlá bichíwisaré japi mi nijéwisaká Jeobá alí mi pakosa, mujé ko we mi aʼlá bitélima. Ami iyásiwaká bilé koʼwáami we raʼíami, ¿kechi ko mi ke wilí natama jiti mi okema? Echi riká cho, kiti wilí natá achi mi ma pakósaré.

20. ¿Piri ta binepo biléala binelíwami?

²⁰ ¿Chúsiá wiká kecho bijí pakónali? A mayéeré japi bijí buwésaré. A bichíwali ju japi pakoa, bilé namuti we natéami ju japi bilé natásaré. Jiti la, we aʼlá natá, teeli buwé alí iʼwérili isí jiti mi pe aminana ami pakoma. Nalí, ami ma pakónalaká, ¿piri mi isísaré jiti mi omérima pakoa? Echi ko binepo biléala binelíwami.