¿Chúsiá “Fulano” anili japi niwisa Rut yúa wikawama japi echi níwala ju? (Rut 4:1, 6).

Chabé japalí bilé rijoi niwíkami mukusaa, kecho bijí kúchuwami ka, jaré ko nárika nokali: “¿Piri ikimea echi níwala wasá alí jépuká níwala nima? ¿Achi bijí newalárami nima echi riwalá alí echi téemala?”. Suwaba jepuná we aʼlá ruyeli japi osali Moisés.

Bilé rijoi japi olali wasá mukusaa, echi rejimala o bilé téemala japi we mulipi nili, omérili narea. Alí ayénachó bilé rijoi we risóati ripisa alí ralinesa echi níwala wasá, echi rejimala o téemala japi we mulipi nili, ku omérili ralayá echi wasá. Echi riká sinibí echi wasá echi téemala níwala nima riweili (Lev. 25:23-28; Núm. 27:8-11).

¿Piri nokayé jiti echi riwalá japi ma mukuli alí echi téemala si, sinibí newalárami nima? Echi mukúami rejimala niwíe echi upila yúa, jiti echi riká ma ranélisaká bilé towí, echi omérima olayá echi riwalá alí narea echi wasá. Japi riká nokayé riwéami nili matrimonio de levirato o de cuñado, echi ayénachó iʼwírili echi mukí kunámami jiti ke risóati ripima (Deut. 25:5-7; Mat. 22:23-28). Echi riká ikili Rut yúa.

Natabo Noemí jitra. Echi ko niwika asali Elimélec yúa. Nalí japalí mukuli echi alí okuánika kúchuwala, ma ke iteli bilé rijoi japi tibuma Noemí (Rut 1:1-5). Japalí Noemí ku nawali echoná Judá, echi ko aneli echi moʼolila Rut japi anema Boaz, bilé Elimélec téemala japi mulipi nili, japi ku ralimea echi níwala wasá (Rut 2:1, 19, 20; 3:1-4). Nalí Boaz ko a machiyé japi nirúe bilé téemala japi wabé mulipi nili echi yúa alí japi echi nalí isisa riweili ku ralayá echi níwala wasá (Rut 3:9, 12, 13). Echi Biblia ko riwá echi rijoi “Fulano”.

Ne kulí ko, Fulano anili japi a ralimea echi wasá (Rut 4:1-4). Tákoré machiyé japi wiká winomí suwábima, ayénachó machiyé japi Noemí ma wiláami nili alí ke omérima ranelia japi narema Elimélec níwala wasá. Jiti la a ralisáaká, echi níwala nima echi wasá alí echi téemala si, alí echi ko mayeli japi we aʼlá nima echi riká isisa.

Nalí, japalí Fulano machili japi niwisa riweili echi Rut yúa, ma ke ralinali echi wasá. Jéanili: “Ke ni omérima ku ralayá, jiti japi nijé níwala ju echi si ni wikawama” (Rut 4:5, 6). ¿Chúsiá echi riká anili?

Fulano o bilé japi mulipi téemala nili, niwísaká Rut yúa alí echi ranélisaká bilé towí, echi nalí narema riweili Elimélec níwala wasá. ¿Piri ayénachó nátiliré echi rijoi japalí ke ralinálili echi wasá? Tákoré echi Biblia ke ruyé, ma inepo jaré namuti japi echi nátiliré.

• Bachá, Fulano nátiliré japi wikáwima wiká winomí jiti Rut ranala narema Elimélec wasáwala alí ke ko echi.

• Okuá, ke bi iyasa riweili japi newaleli Rut, ayénachó Noemí.

• Bikiá, Rut alí Fulano aminabi wiká tanélisaká, echi ko rojánisa riweili echi wasá echi kúchuwala yúa.

• Naó, Fulano ma ke che olásaká jarecho kuuchi, echi bilepi japi ma ranélili Rut yúa, olama riweili Elimélec níwala wasá alí echi níwala. Echi wasá echi nolá níwala nima riweili, nalí echi Elimélec riwalá niraa chukumea alí ke ko echi Fulano riwalá. Jiti ke wikawánali echi níwala wasá, echi ko ke niwili Rut yúa. Nalí echi ko nakili japi Boaz niwima Rut yúa, jiti echi ayénachó we mulipi téemala nili Elimélec yúa. Alí Boaz ko a echi riká isili. ¿Chúsiá? Jiti echi ko nakili japi echi mukúami riwalá ke siné wikawárami nima alí echi wasá (Rut 4:10).

Fulano ko binoy bi jitra nátili, jiti la iʼwérili isili jiti ke wikawárami nima echi riwalá alí echi wasá. ¡Nalí ke iʼwírili! Jiti jipi ma ke bilé newalá echi riwalá, ayénachó ke nareli japi Boaz nareli, jiti echi riwalá ke machina japoná oserúa uchuwi suwaba echi Jesucristo téemala, japi Mesías ju. Fulano ko ke nareli echi namuti aʼláala jiti binoy bi jitra nátili alí ke iʼwírili japi newaleli (Mat. 1:5; Luc. 3:23, 32).