1, 2. Ke mi cho omériaká pakoa, ¿piri mi isísaré? (Iné echi bachá fotos japi uchuwi jena oselí).

 MUJÉ ma nátilaká pakomia, ati mi ané japi mi we aʼlá isimí. ¿Achi mi mayé japi mi ma isili suwaba namuti jiti mi omérima pakoa? Ami níliaká japi mi ma omeri alí echi ancianos ayénachó anisáaká japi aʼlá ju, sapú echi riká isí, kiti wilí buwé. Echi riká mi isísaká, we mi kanila nóchilima Jeobá.

² Echi ancianos mi anésaká japi mi kecho bijí omeri pakoa o mujé ju japi mi echi riká nili, kiti siwé. Nalí, aminabi iʼwérili isí jiti echi riká pe aminana ami omérima pakoa.

3. Echi rijoi Etiopía bitéami, ¿piri ka nárili Felipe, alí piri náriwami nirú? (Hechos 8:36, 38).

³ (Leeri Hechos 8:36, 38). Bilé rijoi Etiopía bitéami, nárili Felipe japi nawésami nili: “¿Kecha galá níima mapurigá nijé baʼwí jiti [pakótami] níisa?”. Ati machí japi echi ko a pakónali. Nalí be, ¿achi ma aʼlá nili japi pakoma?

4. ¿Chúriká néwariwélitili echi rijoi Etiopía bitéami japi aminabi binénali?

⁴ Echi rijoi “echoʼná Jerusalémachi iyénali mapujiti [...] waminabi walubélaga anénala Riosi” (Hech. 8: 27). A keʼré japi echi ma bichíyami nili japi riká echi judíos. Echi ko ma machiyé echi Oserúami Hebreas alí echoná bineli Jeobá jitra. Nalí aminabi machinalie, jiti la ¿piri isiá asali echoná buwichimi japalí Felipe riwali? Echi ko leeria asali echi oselí iwítami japi osali echi profeta Isaías (Hech. 8:28). Echi oserúami a jilí nili inámiwa. Echi rijoi ko ke bi machiyá asinali kuabi namuti, nalí aminabi binénali.

5. ¿Chúriká ti machí japi echi rijoi Etiopía bitéami a isili japi ma bineli?

⁵ Echi rijoi ko we natéami nili jiti nóchiliami nili echi mukí silíami Etiopía bitéami. Echi ko “walula silíami mukí níwala wenomí” tibúami nili (Hech. 8:27). A keʼré japi echi ko olali wiká nóchili alí nochia bi iyénili. Nalí, echi ko a ikírili isiá japi Jeobá nakí, ke bi bineka ripili echi bichíwali, nalí isili japi ma machili. Echi ko Etiopía jonsa simili Jerusalén japoná wilili echi templo binemia Jeobá jitra. Tákoré we miká nili alí wiká winomí suwabie, echi ko ariká simili jiti nijéwinili Jeobá.

6, 7. ¿Piri isili echi eunuco etíope jiti aminabi we galema Jeobá?

⁶ Felipe ko ruyeli echi eunuco etíope namuti we natéami japi echi ke machili, japi riká japi Jesús nili echi Mesías (Hech. 8:34, 35). Machiyá japi Jesús isili echi jitra, a keʼré japi echi eunuco etíope we kanílili. Jiti la, ¿piri isili? Echi ko a oméroli echi riká bi a ripía japi riká bichíyami nili echi judíos, nalí jiti echi ko we galeli Jeobá alí Jesús, echi ko anili japi pakoma alí isima japi Jesús anili. Felipe ko ineli japi ma aʼlá ju japi echi riká isima, jiti la pakoli.

⁷ Japi isili echi eunuco etíope mi iʼwírima machiyá japi mi isísaré jiti mi omérima pakoa. Alí, japi riká echi anili, mujé ayénachó ke majaka jéanimea: “¿Kecha galá níima mapurigá nijé baʼwí jiti [pakótami] níisa?”. Aminá ko binepo chúriká mujé ayénachó omeri isiá japi riká echi: aminabi binea, isiá japi riká mi bineli alí aminabi we galea Jeobá.

8. Japi riká aní Juan 17:3, ¿piri mi isísaré?

⁸ (Leeri Juan 17:3, TNM, alí echi nota). Japi riká anili Jesús, ¿achi mi iʼwírili jiti mi chotásima binea echi Biblia? Wiká ko a echi riká ikili. Nalí echi raʼíchali japi anili Jesús ayénachó  tamó iʼwiri aminabi binesia. Echi Biblia aní japi ta ke siné sunibo aʼlá machiyá echi Onorúami ne bichíwali jitra (Ecl. 3:11). Jiti la, aminabi sinibí binésipo echi jitra. Alí japalí ti aminabi machísimi Jeobá, aminabi mulíwipo echi (Sal. 73:28).

9. Tákoré ti ma bineli echi namuti japi ke me jilí ju, ¿piri ta aminabi nokisáré?

⁹ Japalí bilé kulí biné Jeobá jitra, chotasi binea echi namuti japi ke me jilí ju. Pablo ko anili japi echi namuti ko ju japi riká echi leche japi iyáliwa bilé taa muchi (Heb. 5:12; 6:1). Alí ayénachó anili japi aminabi iʼwérili nokisáré binea jarecho namuti japi aní echi Biblia alí japi we natéami ju. ¿Ami we inili echi riká isínala? ¿Ami iʼwérili isínali aminabi binea Jeobá jitra alí japi echi isima?

10. ¿Chúsiá jaré we jilí niraa binea?

¹⁰ Jaré ko we jilí niraa binea. ¿Mujé ru? ¿Ami binéritami nili leeria alí binea echoná escuela? ¿Ami kanílili echi riká isiá? ¿O ami níliki japi mi jilí niraa binea? Echi riká mi níliaká, ke mujé bi ju japi mi echi inili. Nalí Jeobá mi iʼwírima. Echi ko we aʼlá binériami ju alí ke bilé ité japi riká echi.

11. ¿Chúsiá Jeobá ju echi “Walúala Binériami”?

¹¹ Jeobá aní japi echi ko ju “Walúala Binériami” (Is. 30:20, 21). Echi ko kilí niraa binériami ju, simárika alí machí japi ta chu nili. Ayénachó echi ko iné echi namuti japi ta aʼlá noká (Sal. 130:3). Echi ko ke siné tamó tani japi ta ke omeri nokayá. Ayénachó ke ti wikawásaré japi echi isili we aʼlárika niwayá tamujé mochokóala (Sal. 139:14). Echi achó tamó niwali jiti binepo wiká namuti alí nakí japi sinibí echi riká nokiboa nalí we kanílika. Jiti la jipi jonsa, ati iʼwérili nokisáré binénilia japi aní echi Biblia (1 Ped. 2:2). Nalí, ¿piri mi iʼwírima echi riká isiá? Isí jaré namuti japi mi iʼwírima leeria alí binea echi Biblia sinibí rawé (Jos. 1:8). Jeobá mi iʼwírima jiti mi we kanílima leeria echi Biblia alí binea echi jitra.

12. ¿Chúsiá we natéami ju japi ta binepo Jesús jitra alí japi echi isili?

¹² Bilecho namuti japi mi iʼwírima ko ju, aʼlá binea echi Jesús jitra alí japi isili japalí biteili jenaʼí Wichimóbachi. Jipi rawé japalí we jilí ju ati oméripo nijewia Jeobá ati nokisáaká japi riká isili Jesús (1 Ped. 2:21). Jesús ko we aʼlá ruyeli echi discípulos japi risoa olárami nima riweili (Luc. 14:27, 28). Nalí echi ko aʼlá machili japi we nijéwami nima japi riká echi (Juan 16:33). Jiti la, we aʼlá biné echi Jesús jitra alí ayénachó iʼwérili isí jiti mi isima japi riká echi sinibí rawé.

13. ¿Piri mi ke riwésaré tania Jeobá, alí chúsiá?

¹³ Japalí ti biné, ke bi ju japi ti machinali wiká namuti. Nalí ti machinali Jeobá jiti ta we galénali alí ti we bichíwinali echi (1 Cor. 8:1-3). Aminabi we biné Jeobá jitra alí tani japi mi iʼwírima we bichiwia (Luc. 17:5). Echi ko a mi iʼwírima. Ami we bichíwisaká japi riká mi biné Onorúami jitra, mujé ko nijéwima japi echi aní (Sant. 2:26).

14. ¿Piri jitra raʼíchili Pedro ruyemia japi we natéami ju japi ta nokiboa japi ta biné? (Ayénachó iné echi dibujo).

¹⁴ Echi apóstol Pedro anili japi echi discípulos nokimea japi riká binésimi. Echi ko ruyeli néeka japi riká isili Noé.  Jeobá ko aneli Noé japi suwábima echi pagótami cha nokáami waʼlú ukí jitra. Nalí ke bi machisaa riweili japi ikimea. Noé alí echi téemala nokisaa riweili bilé namuti jiti omérima niyubia. Pedro ko anili:“Mapuyénasí echi Noé sunili niwayá echi [...] arka”. Echi ko ruyá anili japalí kecho nawáachi echi waʼlú ukí (1 Ped. 3:20). Noé alí echi téemala nokali japi riká anili Jeobá alí niwali echi waʼlú arca (Heb. 11:7). Miná ko Pedro raʼíchili japi pakoa ayénachó ju japi riká isili Noé kecho bijí nawáachi echi waʼlú ukí. Echi ko jéanili: “Jipi rawé mapalita baʼwí jiti [pakótami] ju, echalí tamujeta achigórigá kuʼwíratami ju [o niyúbitami]” (1 Ped. 3:21). Echi riká cho, japi riká mi isimí jiti mi omérima pakoa, ju japi riká nokali Noé alí echi téemala wiká bamíali jiti omérima niwayá echi arca. Jiti la, ¿piri mi isísaré jipi jonsa jiti mi omérima pakoa?

15. ¿Piri mi isísaré ami ne bichíwali omona níliaká echi chati namuti jitra japi mi isili?

¹⁵ Bilé namuti japi ta nokisáré ko ju, japi ta omona nílipo echi chati namuti jitra japi ta nokali (Hech. 2:37, 38). Ata bichíwali omona nílisaká, ata riwésaré echi riká nokayá. Japi riká, ¿ami ma riweli isiá japi Jeobá ke galé, echi nasawíliami japi chati ju, pewia alí cha riká raʼichia? (1 Cor. 6:9, 10; 2 Cor. 7:1; Efes. 4:29). Ke mi cho riwéaká echi namuti, aminabi iʼwérili isí riwea. Raʼichá echi yúa japi mi bineri echi Biblia o iʼwírili tani echi ancianos ami newaléaká. Ami remalí nísaká alí mi bijí bitéaká mujé wénwala yúa, iʼwírili tani echi jiti mi omérima riwea echi chati namuti japi isimí japi mi ke omérima pakoa.

16. ¿Piri mi iʼwírima aminabi muliwia Jeobá?

¹⁶ Ayénachó we natéami ju japi ta nokiboa jepuná namuti: simía napawíliwachi alí nijía comentarios (Heb. 10:24, 25). Ma mi publicador o publicadora kecho pakótami nísaká, sinibí simí nawisasia. Ami echi riká isísaká, aminabi mi we kanílima echi riká isiá (2 Tim. 4:5). Ami remalí nísaká alí mi a bijí bitéaká mujé  wénwala yúa, nárika isí jepuná: “¿Achi sinibí tamí newalari japi ni simisáré napawíliwachi alí nawisasia? ¿O nijé binoy echi riká isimí jiti ni echi riká nakí?”. Japalí mujé binoy isimí jepuná namuti, mujé ko néwariwéliti japi mi we bichíyami ju, japi mi galé Jeobá alí japi mi matétara iyá echi. Ami isísaká suwaba jepuná namuti, ami iyayá riwélima Jeobá bilé chiliwéliami (2 Ped. 3:11; Heb. 13:15). Echi ko we kanili japalí ti aboi nátika echi riká noká alí ke ko japalí ti iʼwérili nulésiwa (ayénachó iné japi aní 2 Corintios 9:7). Alí tamujé ko we kanili iyayá Jeobá echi namuti aʼláala.

17, 18. ¿Piri namuti mi iʼwírima jiti mi omérima pakoa, alí chúsiá? (Proverbios 3:3-6).

¹⁷ Kecho pakoa, a keʼré japi mi ikimea namuti we jilírami. Japi riká, jaré ko kawélika raʼichámiré mi jitra o mi risoa olámiré jiti mi bichíyami ju (2 Tim. 3:12). Ayénachó a keʼré japi mujé iʼwérili isimí riwea echi namuti japi chati ju, nalí isini kaachi checho mi ku isimí. Ami omona níliré jiti mi mayé japi mi ke siné omérima pakoa. ¿Piri namuti mi iʼwírima ke siwea? Echi namuti we natéami ko ju: we galea Jeobá.

¹⁸ Wabé natéami ko ju japi mujé we galema Jeobá (leeri Proverbios 3:3-6). Ami we galésaká Jeobá, ami anachama suwaba echi karú ikiwáami japi mi ikí. Echi Biblia wisabé niraa aní japi Jeobá ke siné riwé japi echi galé. Ayénachó aní japi ke siné riwema galea (Sal. 100:5). Mujé ko niwárami nili japi riká Onorúami (Gén. 1:26). Jiti la, ¿chúriká mi omero we galéami niya japi riká Jeobá?

19. ¿Chúriká mi néwariwélitima japi mi matétara iyá Jeobá japi isimí mi jitra? (Gálatas 2:20).

¹⁹ Bachá ami matétara iyásaré Jeobá (1 Tes. 5:18). Sinibí nárika isí jepuná: “¿Chúriká néwariwélitili Jeobá jipi japi we tamí galé?”. Alí japalí mi echi yúa raʼichasa, matétara iyá echi namuti jitra. Iné suwaba echi namuti japi Jeobá isimí japi riká ko mi jitra echi riká isiá, japi riká isili echi apóstol Pablo (leeri Gálatas 2:20, TNM). Alí nárika isí: “¿Ani néwariwélitinali Jeobá japi nijé ayénachó we galé?”. Ami we galésaká Jeobá, echi mi iʼwírima jiti mi anachama  chuwé namuti jilírami, echi karú ikiwáami alí jiti mi aminabi isima japi echi galé. Echi riká ami néwariwélitima japi mi we galé mujé Onolá Jeobá.

20. ¿Piri aniwáami ju katúwika raʼichia Jeobá yúa, alí chúsiá we natéami ju jepuná namuti?

²⁰ Japalí mi aminabi we galésimi Jeobá, echi mi iʼwírima jiti mi katúwika raʼichama echi yúa. Ma mi echi riká isísaká, mujé ko ma sinibí Jeobá níwala nima. Japalí mi katúwika raʼicha Jeobá yúa, mujé ko ruyé japi mi echi nijéwima sinibí tákoré mi ikiyé namuti jilírami. Echi riká mi isima sinepi bi. A bichíwali ju japi mi we aʼlá natásaré echi riká isimia. Nalí, newalá japi ke nirú bilecho namuti we aʼláala japi mi omeri isiá (Sal. 50:14). Satanás ko iʼwérili isima jiti mi riwema galea Jeobá alí mi ke nijéwima echi. Kiti riwé japi echi niyúrima (Job 27:5). Ami we galésaká Jeobá, echi namuti mi iʼwírima jiti mi isima japi riká mi ma aneli echi alí mi aminabi mulíwima.

21. ¿Piri newalásaré echi japi pakó?

²¹ Ma mi katúwika raʼichásaká Jeobá yúa, jipi ko raʼichá echi ancianos yúa jiti mi anema japi mi isísaré. Nalí newalá japi pakoa, ke echi bi ju japi mi isísaré, mujé ko kulí chotásimi nóchilia Jeobá. Jiti la, jipi jonsa aminabi iʼwérili isí we galea Jeobá alí isí jaré namuti japi mi iʼwírima echi riká isiá. Echi mi iʼwírima jiti mi omérima pakoa. Echalí rawé we mi kanílima. Nalí mi newalásaré japi mi kulí chotásimi. Iʼwérili isí jiti mi aminabi we galema Jeobá alí echi Nolá Jesús.