1, 2. ¿Piri ti nokisáré kecho bijí pakoa?

 KULÍ jaré bamíali jonsa aminá bilé millón pagótami pakoli japi riká testigo Jeobá. Wiká echi, bineli echi bichíwali kuuchi ka jonsa japi riká echi discípulo Timoteo (2 Tim. 3:14, 15). Alí jarecho ko machili Jeobá jitra ma weli ka o jarecho ko ma we ochérami ka. Japi riká bilé mukí japi bineli echi Biblia echi testigo Jeobá yúa alí pakoli 97 bamiba.

² ¿Achi mi biné echi Biblia? ¿O mujé wénwala testigo Jeobá ju alí mi bineri echi bichíwali? Ami binéaká, a keʼré japi mujé ko ma nati pakomia. ¡Alí echi ko we aʼlá ju! Nalí kecho bijí pakoa, mujé ko bachá katúwika raʼichásaré Jeobá yúa. Jenaʼí binelíwami ruyema piri aniwáami ju katúwika raʼichia. Ayénachó ruyema, chúsiá mi ke majásaré katúwika raʼichia Jeobá yúa alí pakoa, ami iníliaká japi mi ma omeri echi riká isiá.

¿PIRI JU KATÚWIKA RAʼICHIA?

3. Ruyé jaré pagótami jitra japi uchuwi echoná Biblia japi katúwika nokali Jeobá yúa.

³ Echoná Biblia aní japalí bilé katúwika raʼicha Jeobá yúa, echi ko aniwáami ju japi echalí jonsa echi ko isima japi Jeobá nakí. Echi israelitas katúwikami nili Jeobá yúa. Nalí jaré echi, rojanárami nili nokimea bilé nóchali we natéami. Japi riká, Jeobá ko chapili Aarón jiti walubéala sacerdote nima. Jiti la echi Aarón mokoyóala echoná kowará niraa, olali bilé placa we rapáami japi aniwáami ju japi katúwikami nili isimia bilé nóchali we natéami (Lev. 8:9). Echi nazareos ayénachó katúwika nokali  Jeobá yúa, nokimea bilé nóchali we natéami. Echi raʼíchali nazareo machínali echi hebreo nazír jonsa, japi aniwáami ju “rojanárami” o “katúwikami”. Echi Moisés Nulalila anili japi echi ko ke nokisaa riweili jaré namuti (Núm. 6:2-8).

4. a) ¿Piri aniwáami ju tamujé jitra katúwika raʼichia Jeobá yúa? b) ¿Piri aniwáami ju echi raʼíchali “ketasi waminabi olasi mapurigá ʼyemi aboni chopi nakí olánala”? (Ayénachó iné echi dibujo).

⁴ Katúwika raʼichia Jeobá yúa, aniwáami ju japi ta Jesús najátowala nipo alí japi ta bachá nokiboa japi Onorúami nakí. ¿Alí chúriká nokiboa jepuná? Jesús ko anili: “ʼYemi nakisáagá olánala mapurigá Nijeni nakí máputamo olabo, ketasi waminabi olasi mapurigá ʼyemi aboni chopi nakí olánala” (Mat. 16:24). Echi raʼíchali “ketasi waminabi olasi mapurigá ʼyemi aboni chopi nakí olánala”, aniwáami ju japalí mujé ma katúwika raʼichásaká Jeobá yúa, mujé ko ma ke isísaré echi namuti chati japi Onorúami kichí (2 Cor. 5:14, 15). Echi jaré namuti ko ju echi nasawíliami chati (Gál. 5:19-21; 1 Cor. 6:18). ¿Achi jilí ju nijewia echi busuréliami? Ke tasi. Ami we galésaká Jeobá alí mi we bichíwisaká japi echi nulá sinibí tamó iʼwiri, mujé ko ke isima japi chati ju (Sal. 119:97; Is. 48:17, 18). Bilé hermano Nicholas riwéami aní: “Ami omeri inea japi Jeobá nulá japi riká echi fierros japi olá echi cárcel alí ke mi riwé isíami japi mi nakí, o japi riká echi fierros japi irré echoná zoológico japi mi tibú echi mawiyá jitra jiti ke mi namú olama”.

5. a) ¿Chúriká katúwika isimí Jeobá yúa bilé pagótami? b) ¿Chúsiá ke chopi iyiri ju katúwika raʼichia Jeobá yúa alí pakoa? (Ayénachó iné echi imágenes).

⁵ ¿Chúriká katúwika isimí Jeobá yúa bilé pagótami? Echi ko Jeobá yúa raʼíchika ané japi echi bi nijéwima alí japi jipi ko wabé natéami nima echi jitra, isiá japi  echi aní. Japalí bilé echi riká isimí, ayénachó ju japi riká ko anea Jeobá japi sinibí we galema ne sulachí jonsa, japi iwí jonsa, echi natáala jitra alí suwaba echi jiwérala jitra (Mar. 12:30). Japalí mi katúwika raʼicha Jeobá yúa, mujé bineli bi asisáré. Nalí japalí mi ma pakó, sinéami mi riwimea alí machimea japi mi ma katúwika aneli Jeobá japi mi sinibí nijéwima. Katúwika raʼichia Jeoba yúa we natéami ju. Mujé ko ne echi riká isísaré japi riká mi ma anili alí Jeobá ayénachó nakí japi mi echi riká isima (Ecl. 5:4, 5).

¿PIRI MI IʼWÍRIMA JITI MI KATÚWIKA RAʼICHAMA JEOBÁ YÚA?

6. ¿Piri iʼwiri bilé jiti katúwika raʼichánilima Jeobá yúa?

⁶ Mujé ko katúwika raʼichama Jeobá yúa jiti mi we galé. Japalí mi ma we aʼlá machí alí inami japi isima Onorúami alí mi aminabi binésimi echi jitra, mujé ko aminabi we galema (Col. 1:9). We aʼlá binea echi Biblia mi iʼwírili machiyá 1) japi Jeoba a bité, 2) japi echi Biblia Onorúami Raʼicháala ju alí 3) japi Jeobá nee binoy organizaciónwala isimia japi echi nakí.

7. ¿Piri isísaré bilé japi katúwika raʼichánali Jeobá yúa?

⁷ Bilé japi katúwika raʼichánali Jeobá yúa ma machisáré echi namuti ke me jilírami japi aní echi Biblia, nijéwisaré japi Onorúami nulá alí raʼichásaré jarecho yúa echi jitra japi bichiwi japi yena omeri (Mat. 28:19, 20). Ayénachó we galésaré Jeobá alí echi bi nijéwisaré ne sulachí jonsa. ¿Achi mi echi riká nili? Ami we galésaká Jeobá suwaba mujé jiwérala  jitra, mujé ko ke katúwika raʼichánilima echi yúa alí pakónilima jiti mi kanílitinali echi pagótami japi mi bineri Biblia jitra. Alí, ami remalí nísaká, ke mi isima jepuná namuti jiti mi kanílitima mujé wénwala o jiti mi iné japi mujé amígowala pakó.

8. Natia suwaba japi Jeobá isili mi jitra, ¿chúriká mi iʼwiri jiti mi katúwika raʼichama echi yúa? (Salmo 116:12-14).

⁸ Ami natásaká suwaba japi Jeobá isili mi jitra, echi mi iʼwírima jiti mi katúwika raʼichánilima echi yúa (leeri Salmo 116:12-14). Echi Biblia aní: “Echi Walubela Riosi echoʼná ripá riwigachi jonsa jula ne suwaba echi wabé galabéala máputa ʼyárami ju” (Sant. 1:17). Echi chiliwéliami wabé natéami japi Jeobá tamó iyali ko ju japi nijili Jesús jiti mukumea tamujé jitra. Echi jitra, mujé ko omeri Onorúami amígowala niya alí sinibí bitea (1 Juan 4:9, 10, 19). Bilé namuti japi riká mi néwariwélitima japi mi matétara iyá echi jitra japi isili, echi ko ju japalí mi katúwika raʼicha echi yúa (Deut. 16:17; 2 Cor. 5:15). Echi jitra raʼicha echi libro We mi kanílika bitélima, echoná binelíwami 46 punto 4, japoná ayénachó machina bilé video riwéami Piri ta omero nokayá Jeobá jitra, japi bikiá minutos rojorá.

¿ACHI MI MA OMERI KATÚWIKA RAʼICHIA JEOBÁ YÚA ALÍ PAKOA?

9. ¿Chúsiá bilé pagótami ke inílisaré japi iʼwérili anéliwa japi katúwika raʼichama Jeobá yúa?

⁹ A keʼré japi mujé ko inili japi mi kecho omeri katúwika raʼichia Jeobá yúa alí pakoa. Ayénachó a keʼré japi mi riwésaré isiá jaré namuti jiti mi nijéwima Jeobá, o a keʼré japi mi newalé che teeli buwea jiti mi aminabi we bichíyami nima (Col. 2:6, 7). Newalá japi ke sinéami echi binéami echi yena sapú galema Jeobá. Alí ke sinéami echi remalí japi chopi ikí bamiba, katúwika raʼicha Jeobá yúa alí pakó. Jiti la we aʼlá natá echi namuti japi mi a omeri isiá alí kiti natá japi mi ayénachó isísaré japi riká noká jarecho (Gál. 6:4, 5).

10. ¿Piri mi omeri isiá ami iníliaká japi mi kecho omeri katúwika raʼichia Jeobá yúa alí pakoa? (Ayénachó iné echi recuadro “ Mujé wénwala Testigos nísaká”).

¹⁰ Ami iníliaká japi mi kecho omeri katúwika raʼichia Jeobá yúa, aminabi iʼwérili isí jiti mi a echi riká isima. Tani Jeobá japi mi iʼwírima isiá echi namuti japi mi ke aʼlá isimí (Filip. 2:13; 3:16). We aʼlá bichiwi japi echi ko a mi kipuma japi mi ané ali mi iʼwírima (1 Juan 5:14).

CHÚSIÁ JARÉ KE KATÚWIKA RAʼICHÁNALI JEOBÁ YÚA ALÍ PAKÓNILI

11. ¿Chúriká tamó iʼwírima Jeobá jiti sinibí echi nijéwami nipo?

¹¹ Jaré pagótami ma omeri katúwika raʼichia Jeobá yúa alí pakoa, nalí ke echi riká noká. ¿Chúsiá? Jiti majaa nili japi machibúrami nima echoná congregación jonsa chati namuti nokisáaká. Echi Biblia aní japi Jeobá ko iyá japi echi nijéwami ju suwaba japi newalé jiti “sinibí galabé ologá ʼyénabo” japi riká echi nakí alí echi riká kanílitipo echi (Col. 1:10). Jiti la, ami we bichíwisaré japi Jeobá mi iyama echi jiwérili japi mi newalé aʼlá isimia. Alí echi ko ma wiká iʼwírili japi echi nijéwami ju (1 Cor. 10:13). Jiti la pe kuabi pagótami ju japi machibúrami ju echoná congregación jonsa. Jeobá iʼwírila jitra ati oméripo we aʼlá nijewia echi.

12. ¿Piri tamó iʼwírima jiti ke nokiboa echi chati namuti?

¹² Jiti ta ke sébali aʼlá nokáami ju, sinéami ti inili nokinalia chati namuti  (Sant. 1:14). Nalí, japalí ikisaa bilé namuti japi isima mi chati isitia, mujé binoy natásaré piri mi isima. Tákoré wiká pagótami aní japi ta ke siné oméripo riwea chati nokinalia alí nokayá japi aʼlá ju, echi ko ke bichíwali ju. A ti oméripo nokayá japi ta ma ke inílipo chati namuti nokinalia. Nirú wiká namuti japi tamó iʼwírima, japi riká: raʼichia Jeobá yúa sinibí rawé, we aʼlá binea bineli niraa echi Biblia, simiyá echoná napawíliwachi alí nawisasia. Ati nokisáaká suwaba jepuná namuti, ati olabo echi jiwérili japi ta newalé nokimea japi riká ti katúwika aneli Jeobá. Newalabo japi ta ke awénili ju; Jeobá tamujé iʼwírima (Gál. 5:16).

13. ¿Piri ta biné José jitra?

¹³ Ati ke jilí nirabo nijewia Jeobá, ati bachá natásaká piri ta nokiboa japalí ikisaa bilé namuti japi isima tamó cha isitia. Echoná Biblia nirú ejemplos pagótami jitra japi we aʼlá nijéwami nili tákoré ke sébali aʼlá nokáami nili japi riká tamujé. Natabo José jitra. Echi Potifar upila sinibí iʼwérili anéi japi echi yúa boʼimea. Nalí José ko ma we aʼlá machili piri isima. Echi Biblia ruyé japi echi ko ke nijéwili alí jéanéi: “¿Chúsiá ni chati namuti isima ba japi Onorúami ke galé?” (Gén. 39:8-10). Suwaba jepuná néwariwélitili japi bachaka jonsa José ko ma aʼlá machili piri isima japalí Potifar upila cha riká isisa echi yúa. Jiti la, José ke jilí nirali aniyá japi ke isima echi chati namuti.

14. ¿Piri tamó iʼwírima sapú aniyá japi ta ke nokiboa echi namuti chati japi Jeobá kichí?

¹⁴ ¿Chúriká nokiboa japi riká José alí we aʼlá nijéwami niya? Natia jipi jonsa chúriká ti nokiboa japalí ikisaa namuti japi isima tamó cha isitia. Ati binésaré sapú aniyá japi ta ke nokiboa echi chati namuti japi Jeobá kichí alí ti ke wilí nátika ripísaré (Sal. 97:10; 119:165). Echi riká ti nokisáaká tamó iʼwírima jiti ke nokiboa namuti we chati. Jiti la, japalí ti ikisaa echi namuti ma ti machiboa piri ta nokiboa.

15. ¿Chúriká mi néwariwélitima japi mi kanílitinali Jeobá? (Hebreos 11:6).

¹⁵ A keʼré japi mujé ko machí japi mi bineli ne bichíwali ju alí mi a inili nóchinalia Jeobá ne sulachí jonsa. Nalí, ¿a nirú bilé namuti japi isimí japi mi ke katúwika  raʼichánilima Jeobá yúa alí pakoma? Echi riká nísaká, ami omeri isiá japi riká isili echi silíami David japi jéaneli Jeobá: “We aʼlá tamí machí, oh, Onorúami, alí machí nijé sulala. Tamí pachana iné alí machí echi nátali japi tamí omonáriti. Iné achi nirú bilé chati namuti japi ni isínali, alí tamí yuri echoná buwérili japi too sinibí bitéliwami” (Sal. 139:23, 24). Japalí mi iʼwérili isimí jiti mi omérima katúwika raʼichia Jeobá yúa alí pakoa, mujé ko néwariwéliti japi mi kanílitinali echi. Alí echi Biblia ko aní japi Jeobá ko iyá wiká namuti aʼláala japi echi riká noká (leeri Hebreos 11:6).

AMINABI MULIWI JEOBÁ

16, 17. ¿Chúriká bayé Jeobá echi Testigos kúchuwala? (Juan 6:44).

¹⁶ Jesús ko anili japi Jeobá ju japi bayé echi pagótami echoná binoy puéblowala (leeri Juan 6:44, TNM). ¡Jepuná ko we semati ju! Nalí, ¿piri aniwáami ju jepuná? Japi Jeobá ko iné echi namuti aʼláala japi noká ibili echi pagótami japi bayé echoná binoy puéblowala. Alí echi ko we natéami niraa iné ibili echi japi nijéwami ju (Deut. 7:6; nota). Echi riká mi iné Jeobá.

¹⁷ Remalí, mujé wénwala mi binériaká Jeobá jitra, a keʼré japi mujé ko inili japi mi simí echoná congregación jiti mujé wénwala mi yuri alí ke jiti Jeobá mi bayeli. Nalí be, natá japi aní echi Biblia: “Mulubéanasi Riosi yuwa, aʼlí Riosi ayénachó mulubéanama ʼyemi yuwa” (Sant. 4:8; 1 Crón. 28:9). Jepuná ko aniwáami ju japi mujé bachá mulíwisaká echi, echi ayénachó mi mulíwima. Jeobá ko ke mi iné japi riká pe chuwé pagótami. Sinéami muchuwi echoná congregación jiti Jeobá ju japi bayeli ibili echi. Jepuná ayénachó ju echi Testigos kúchuwala. Japalí bilé kulí chotásimi muliwia Jeobá, Jeobá ayénachó muliwi echi japi riká aní Santiago 4:8 (ayénachó iné japi aní 2 Tesalonicenses 2:13).

18. ¿Piri ta binepo biléala binelíwami? (Salmo 40:8).

¹⁸ Japalí Jesús pakoli, echalí jonsa we kanílika chotásili isiá suwaba japi Jeobá nuleli (leeri Salmo 40:8; Heb. 10:7). Japalí mujé katúwika raʼicha Jeobá yúa alí pakó, ayénachó mi isiá riwélima japi riká Jesús. Biléala binelíwami ami binema piri mi iʼwírima jiti mi ke riwema nijewia Jeobá japalí mi ma pakosa.