1. ¿Piri namuti natámiré jaré japi Jeobá nijéwami ju?

 ¡WE TI simá nili machiyá japi “Jeobá ko we kanili binoy puéblowala yúa”! (Sal. 149:4). Tákoré echi riká ju, isini kaachi jaré ko siwea nili alí nata: “Jeobá we kanili echi puéblowala yúa, nalí ¿achi kaníliré tamí yúa?”. Wiká chabé piréami japi Jeobá nijéwami nili, ayénachó jilí nirali bichiwia japi Jeobá kanili echi yúa (1 Sam. 1:6-10; Job 29:2, 4; Sal. 51:11).

2. ¿Jépuká we kaníliti Jeobá?

² Tákoré ti ke sébali aʼlá nokáami ju, echi Biblia aní japi ta a oméripo nokayá japi Jeobá kanílima tamujé yúa. Nalí, ¿piri ta nokisáré jiti kanílima tamujé yúa? Ata néwariwélitisaré japi ta bichiwi Jesucristo alí ti pakósaré (Juan 3:16). Echi riká ti néwariwélitipo sinéami, japi ta omona nili echi chati namuti jitra japi ta nokali alí japi ta ma aneli Onorúami japi ta nokiboa japi echi nakí (Hech. 2:38; 3:19). Jeobá ko we kanili japalí ti echi riká noká echi amígowala nimia. Ati iʼwérili nokisáaká nokayá japi riká ti ma katúwika aneli, Jeobá ko we kanílima tamujé yúa alí tamó amígowala nima (Sal. 25:14).

3. ¿Chu iyiri náriwami binepo jena binelíwami?

³ Nalí, ¿chúsiá isini kaachi jaré ko inili japi Jeobá ke kanili echi yúa? ¿Chúriká néwariwéliti Jeobá japi we kanili tamujé yúa? Alí, ¿piri tamó iʼwírima jiti we bichíwipo japi echi ko we kanili tamujé yúa?

CHÚSIÁ JARÉ NATA JAPI JEOBÁ KE KANILI ECHI YÚA

4, 5. ¿Piri ta we bichíwisaré tákoré ti isini kaachi inili japi ta ke natéami ju?

⁴ Wiká tamujé, kuuchi ka jonsa ati nílili japi ta ke natéami ju (Sal. 88:15). Bilé hermano Adrián riwéami aní: “Sinibí  ni natie japi ni ke natéami ju. Ani newalá japalí ni taa ke, nijé ko tanie Jeobá japi nijé téemala pirélima echoná Wichimóbachi we baʼóachi, nalí ani inilie japi nijé ko ke bitélisaré echoná”. Bilecho hermano Tony riwéami, aní chúriká wéelitami nili echi wénwala jitra japi ke testigo Jeobá nili: “Ke siné tamí aneli japi we tamí galé alí japi we kanili tamí jitra. Jiti la ni inílili japi ni ke siné kanílitima nijé wénwala”.

⁵ Ati iníliaká isini kaachi japi ta ke natéami ju, newalabo japi Jeobá ju japi tamó bayeli echoná binoy puéblowala (Juan 6:44, TNM). Jeobá ko iné japi ta simá nokáami ju, tákoré tamujé ko ke inili japi ta echi riká ju, alí aʼlá machí japi ta chúriká ju (1 Sam. 16:7; 2 Crón. 6:30). Jiti la, japalí tamó ané japi ta we natéami ju, ati bichíwisaré (1 Juan 3:19, 20, TNM).

6. ¿Chu nílili Pablo japalí nátili echi namuti japi ke aʼlá isili?

⁶ A keʼré japi jaré tamujé a bijí omona nili echi chati namuti jitra japi ta nokali chabé kecho bijí machiyá echi bichíwali (1 Ped. 4:3). Jarecho ko a keʼré japi ma wiká bamibi nijewia Jeobá, nalí aminabi iʼwérili noká aʼlá nokayá echi namuti japi riká aboi ju. Alí mujé ru, ¿achi mi inili japi Jeobá ke ku wikáwili echi namuti japi mi isili? A echi riká nísaká, a keʼré japi mi ku kanílima machiyá japi jarecho japi Jeobá nijéwami nili echi riká cho nílili. Japi riká, echi apóstol Pablo we omona nílili japalí nátili echi namuti japi ke aʼlá isili (Rom. 7:24). Tákoré echi ko ma riweli chati isiá alí pakoli, echi ko a bijí nilie japi ke natéami ju echi jaréala apóstoles yúa alí nilie japi “wabé simírami chati sitíi oláami níili” (1 Cor. 15:9; 1 Tim. 1:15).

7. ¿Piri ta we aʼlá bichíwisaré ati riwésaká nokayá echi chati namuti?

⁷ Tamujé Onolá japi ripá rewegachi atí, tamó ané japi tamó ku wikáwima ati riwésaká cha nokayá (Sal. 86:5). Jiti la, ati we omona nílisaká echi chati namuti jitra japi ta nokali, ati omeri we bichiwia japi aní Jeobá echoná binoy Raʼicháala: japi echi ko ma tamó ku wikáwili (Col. 2:13).

8, 9. ¿Piri tamó iʼwírima jiti riwepo natia japi echi namuti japi ta noká ke siné kaníliti Jeobá?

⁸ Sinéami ta iʼwérili nokinali nóchilia Jeobá japi yena ti omeri. Nalí be, jiti ta ma ochérami ju o nayúami ma, echi isímiré japi ta ke me oméripo aminabi nóchilia Jeobá. Jiti la, a keʼré japi ta natabo japi ta ke siné oméripo kanílitia Jeobá echi namuti jitra japi ta noká. Bilé hermana Amanda riwéami jéaní: “Nijé ko sinibí aminabi iʼwérili isimí nóchilia Jeobá, jiti ni nata japi ni a echi riká isísaká, ani kanílitima echi. Alí japalí ni ma ke omérisa isiá bilé namuti, ke ni kanili alí ni nata japi Jeobá ayénachó ke kanili tamí yúa”.

⁹ ¿Piri tamó iʼwírima jiti riwepo natia japi echi namuti japi ta noká ke siné kaníliti Jeobá? Newalabo japi echi ko simá isíami ju alí ke siné tamó anema japi nokiboa echi namuti japi ta ke omeri. Echi ko we natéami niraa iné japi ta noká, ata iʼwérili nokisáaká japi yena ti omeri echi nóchilia. Ayénachó natabo echi pagótami jitra japi Bíbliachi uchuwi japi iʼwérili nokali nóchilia Jeobá japi yena omérili. Japi riká, echi apóstol Pablo wiká bamíali jiwérika nóchili alí simili wiká miles kilómetros iʼwírisia jiti nirúlima congregaciones. Nalí japalí ke omérili nóchilia Jeobá japi riká chabé, ¿achi Jeobá riweli kanilia Pablo yúa? Ke tasi. Pablo ko iʼwérili isili  japi yena omérili alí Jeobá ko aminabi iyali namuti aʼláala (Hech. 28:30, 31). Tamujé ayénachó ke sinibí oméripo nóchilia Jeobá japi riká chabé, nalí Jeobá ko we natéami niraa iné japi ta ne sulachí jonsa nokiboa echi nóchali. Jipi ko binepo jaré namuti japi chúriká Jeobá néwariwéliti japi a kanili tamujé yúa.

CHÚRIKÁ NÉWARIWÉLITI JEOBÁ JAPI WE KANILI TAMÓ YÚA

10. ¿Chúriká ta machí japi Jeobá we kanili tamó yúa? (Juan 16:27).

¹⁰ Echi Biblia jitra. Jeobá ko we kanili néwariwélitia japi we galé echi japi nijéwami ju. Echoná Biblia osá niraa ruyé japoná Jeobá aneli Jesús japi echi Ranala ju japi we galé alí japi we kaníliti echi (Mat. 3:17; 17:5). ¿Achi mi kanílisa nili japi Jeobá mi anema japi we kanili mi yúa? A bichíwali ju japi echi ko ke tamó raʼichi ripá jonsa. Nalí tamó raʼichi echi Biblia jitra. Japalí ti leeri echi we semati raʼíchali japi Jesús aneli echi discípulos, ati inili japi riká ko Jeobá tamó anea echi raʼíchali (leeri Juan 16:27). Jesús ko ne echi riká isili japi riká ju binoy Onolá. Japalí ti leeri japi Jesús aneli echi discípulos japi we galeli tákoré ke sébali aʼlá nokáami nili, ati omeri natia japi Jeobá echi riká cho tamó ané (Juan 15:9, 15).

11. Japalí ti ikí namuti jilírami, ¿piri ta ke natásaré? (Santiago 1:12).

¹¹ Echi namuti jitra japi isimí. Jeobá ko tamó iʼwírinali nijika echi namuti japi ta newalé. Nalí isini kaachi ayénachó riwé japi ta ikiboa echi namuti jilírami japi riká ikili Job (Job 1:8-11). Echi namuti japi ta ikí ke aniwáami ju japi Jeobá ma ke tamujé galé, nalí echi namuti tamó iʼwiri jiti néwariwélitipo japi ta we galé echi alí japi ta we bichiwi (leeri Santiago 1:12, TNM). Japalí ti ikí echi namuti jilírami, ati inepo chúriká Jeobá tamó iʼwiri jiti anachabo alí néwariwéliti japi we tamó galé.

12. ¿Piri ta biné Dimitri jitra?

¹² Ma inepo japi ikili bilé hermano Dimitri riwéami japi Asia bité. Echi ko ma ke olali nóchali, alí jiti wiká michá simírili ke nochia, chotásili aminabi nawesia néwariwélitimia Jeobá japi we bichiwi echi. Nalí aminabi wiká michá simirie  alí kecho bijí olayé nóchali. Miná ko nayuli bilé nayulí we chati alí ke omérili wilisia. Echi jitra, Dimitri chotásili natia japi ke aʼláala onolá ju, ke aʼláala kunala alí japi Jeobá ke kanili echi yúa. Nalí siné rokó, echi malala imprimírili bilé oselichi echi texto Isaías 30:15 japoná jéaní: “A timí we jiwérami nima ke timí majaa mochísaká alí timí tamí we aʼlá bichíwisaká”. Alí miná ko iyali echi onolá alí jéaneli: “Papá, japalí mi omona nílisa, newalá jepuná texto”. Dimitri newalali japi Jeobá iʼwiri echi téemala jiti olama chiní, koʼwáami alí japoná pirélima. Echi ko jéaní: “Japi ni isísaré ko ju kilí niya alí aminabi we bichiwia Jeobá”. Ami echi riká cho ikiyáaká, mujé ko bichíwisaré japi Jeobá mi natimá alí mi jiwérili iyama jiti mi anachama.

13. ¿Chúriká ayénachó néwariwéliti Jeobá japi we kanili tamujé yúa?

¹³ Echi hermanos jitra. Jeobá ko omeri isiá japi echi hermanos tamó anema raʼíchali japi tamó iʼwérili iyama japalí ti newalé. Echi riká ikili bilé hermana Asia bitéami. Echi ko ma ke olali nóchali alí we nayuli. Miná ko, echi kunala isili namuti we chati alí riweli anciano niya. We jilí nili echi namuti japi ikiyé echi hermana, jiti la anili: “Ke ni inamie chúsiá ni ikiyé suwaba jepuná namuti. Ani natie japi ni chati namuti isili jiti la Jeobá ko ma ke kanili tamí yúa”. Miná ko echi hermana iʼwírili tánili Jeobá alí aneli japi echi néwariwélitima japi a bijí galé. Jeobá ko a isili japi echi tánili. ¿Chúriká? Echi ko aní: “Echi ancianos raʼíchili tamí yúa alí tamí iʼwírili machiyá japi Jeobá ko a bijí tamí galé”. Pe aminana echi hermana checho tánili Jeobá japi echi iʼwírima machiyá chúriká binoy iʼwiri. Alí, ¿piri  ikili? Echi ko jéaní: “Echalí rawé ani nareki bilé carta we semati japi júali echi hermanos echoná congregación muchúwami. Japalí ni leériki ani níliki japi Jeobá a tamí kipuli”. Japi riká ti ma ineli, echi raʼíchali we semati japi tamó ané jarecho, néwariwéliti japi Jeobá ko we kanili tamujé yúa (Sal. 10:17).

14. ¿Chúriká Jeobá ayénachó nee echi hermanos néwariwélitimia japi a tamó galé?

¹⁴ Jeobá ayénachó néwariwéliti japi we tamó galé japalí nee echi hermanos tamó busuré iyamia. Japi riká, echalí bachá siglo néeli echi apóstol Pablo osélimia 14 cartas, busuré iyamia echi cristianos. ¿Chúsiá Jeobá isili japi Pablo iyama echi busuréliami? Jiti echi ko we aʼláala ju alí simá isíami, jiti la raʼami “japi riká isimí bilé onolá echi nolá yúa japi we galé” (Prov. 3:11, 12). Jiti la, bilé tamó iyásaká bilé busuréliami néeka echi Biblia, kiti natabo japi Onorúami ke kanili tamujé yúa. Nalí echi riká, echi ko néwariwéliti japi a bijí we tamó galé (Heb. 12:6). ¿Piri jarecho namuti néwariwéliti japi Jeobá a bijí kanili tamó yúa?

JARECHO NAMUTI JAPI NÉWARIWÉLITI JAPI JEOBÁ WE KANILI TAMÓ YÚA

15. ¿Jépuká iyá Jeobá echi binoy jiwérala, alí piri ta we bichíwisaré?

¹⁵ Jeobá ko iyá echi binoy jiwérala japi echi galé (Mat. 12:18). Natá jepuná náriwami jitra: “Japi riká ni bité, ¿achi ni néwariwéliti japi ni olá echi cualidades echi Onorúami jiwérala jitra?”. Japi riká, ¿achi mi jipi wabé kilí buwéami ju chabé yúa japalí mi kecho machili Jeobá? Japalí mi aminabi iné japi mi a néwariwéliti echi cualidades echi Onorúami jiwérala jitra, mujé ko a omeri bichiwia japi Jeobá ko we kanili mi yúa (iné echi recuadro “ Echi Onorúami jiwérala tamujé iʼwiri...”).

16. Japi riká aní 1 Tesalonicenses 2:4, ¿jépuká nee Jeobá jiti nawisama echi aʼláala raʼíchali? ¿Alí chúriká mi níliti echi?

¹⁶ Jeobá ko iyá echi pagótami japi galé echi nóchali japi ju: nawesia echi raʼíchali aʼláala (leeri 1 Tesalonicenses 2:4). Ma inepo chúriká bilé hermana Jocelyn riwéami, machili japi a echi riká ju. Siné rawé echi ko we siwea chiléali, ke bilé namuti isínalia. Echi ko jéaní: “Ke ni jiwera  nilie alí ke ni natéami ka nilie. Nalí ni precursora ke alí echalí rawé nili japalí ni simiyé nawisasia. Jiti la ni raʼíchiki Jeobá yúa alí ni simiki”. Echalí biʼá Jocelyn raʼíchali bilé mukí yúa Mary riwéami, japi we simá isíami nili alí anili japi a binema echi Biblia. Ma jaré michá simírisa, Mary ko aneli Jocelyn japi echalí biʼá japalí echi nawali binoy bitélachi, echi ko raʼíchili Onorúami yúa iʼwírili tánimia. ¿Piri bineli Jocelyn echi jitra japi ikili? Echi ko jéaní: “Ani níliki japi riká ko Jeobá tamí anea: ‘Nijé ko we kanili mi yúaʼ”. A bichíwali ju japi ke sinéami kipuma echi aʼláala raʼíchali japalí ti nawesa, nalí ati we bichíwisaré japi Jeobá ko we kanili japalí ti iʼwérili noká raʼichia jarecho yúa echi aʼláala raʼíchali.

17. Japi riká anili Vicky, ¿chúsiá we natéami ju natia japi isili Jesús? (Salmo 5:12).

¹⁷ Jiti Jeobá we tamó galé echi ko nijili binoy Nolá Jesús jiti mukumea tamujé jitra (1 Tim. 2:5, 6). Nalí, ¿ati nílisaká japi Jeobá ke kanili tamujé yúa tákoré ti bichiwi japi isili Jesús alí ti ma pakoli? Newalabo japi ta ke sinibí bichíwisaré tamujé sulala, nalí sinibí bichíwipo japi Jeobá aní. Echi jitra ko, echi japi bichiwi japi isili Jesús wachíniga nokáami ju, alí echi ko iyama wiká namuti aʼláala (leeri Salmo 5:12; Rom. 3:26). Bilé hermana Vicky riwéami we iʼwírili natia japi isili Jesús. Tákoré echi ko we jilí nirae bichiwia japi Jeobá a binoy galé, echi ko machili jepuná: “Jeobá ko sinibí we kilí nili tamí yúa [...]. Nalí nijé ko néwariwélitili japi riká ni jéanea Jeobá: ‘Mujé ko ke siné omérima tamí galea. Japi isili mujé Nolá, ke omeri ku wikawia echi namuti chati japi ni isiliʼ”. Japi riká Vicky, ati natásaká japi isili Jesús, tamujé ayénachó nílipo japi Jeobá a tamó galé alí japi ta kaníliti echi.

18. Ati ke riwésaká galea Jeobá, ¿piri ta we bichíwisaré?

¹⁸ Tákoré ti iʼwérili noká nokayá japi ta ma bineli jenaʼí binelíwami, a keʼré japi ta isini kaachi siwea nílipo alí nárika nokibóaré achi ta ne bichíwali Jeobá kanili tamujé yúa. Ami echi riká níliaká, newalá japi echi ko we galé “japi ke riwé binoy galea” (Sant. 1:12, TNM). Jiti la, aminabi muliwi Jeobá alí iʼwérili isí inea chúriká Jeobá néwariwéliti japi we kanili mi yúa. Alí kiti siné wikawá japi Onorúami “ketasi mikabé atí tamujé yuwa” (Hech. 17:27).