1. ¿Piri namuti aʼláala ti olá jiti ta Onorúami puéblowala ju?

 ¡WE TI kanili jiti ta Jeobá puéblowala ju jipi jubá rawé! Tákoré jipi aminabi ikísimi namuti we jilírami, Jeobá tamó iyá echi hermanos alí hermanas jiti nima japi riká tamujé téemala (Sal. 133:1). Ayénachó Jeobá tamó iʼwiri jiti ta kanila pirélipo tamujé téemala yúa (Efes. 5:33-6:1). Alí tamó iʼwiri jiti machíami nipo alí iʼwérili nokiboa jiti ke cha riká natabo alí jiti kanila pirélipo.

2. ¿Piri ta nokisáré, alí chúsiá?

² Tákoré echi riká ju, ati aminabi iʼwérili nokisáré jiti ke siwepo nóchilia Jeobá. ¿Chúsiá? Jiti echi namuti japi noká alí japi aní jarecho, isímiré japi ta ke kanílipo. Ayénachó ti siwea níliporé japalí ti ke aʼlá noká, alí rasíruka japalí ta wisabé ke aʼlá nokisaa. Jepuná binelíwami tamó iʼwírima aminabi nóchilia Jeobá tákoré ti ikiyé jepuná namuti: 1) japalí bilé hermano cha riká raʼicha tamó jitra, 2) japalí tamó kunala o upila ma, isimí namuti japi tamó risoa níliti alí 3) japalí ti omona nili echi namuti jitra japi ta ke aʼlá nokali. Alí binepo bikiá pagótami jitra japi Bíbliachi uchuwi alí we nijéwami nili tákoré ikili namuti we jilírami.

JAPALÍ BILÉ HERMANO CHA RIKÁ RAʼICHA TAMÓ JITRA

3. ¿Piri namuti jilírami ikí japi Jeobá nijéwami ju?

³ Echi namuti jilírami. A bichíwali ju japi isini kaachi jaré hermanos nokimea jaré namuti japi ke tamó kanílitima o japi tamó iyótima. Alí jarecho ko nokiméeré echi namuti japi ta ke galé o ke simá nokiméeré tamujé  yúa. Isini kaachi echi ancianos ayénachó ke aʼlá noká. Suwaba echi namuti isímiré japi jaré ko natama achi jepuná organización Jeobá níwala ju. Echi jitra, jaré ko ma riwé nóchilia Jeobá echi hermanos yúa, riwé simíaya echoná napawíliwachi alí ayénachó ma ke raʼicha echi hermanos yúa japi cha anijoli echi jitra (Sof. 3:9). ¿Achi aʼlá ju japi ta echi riká nokiboa? Jiti ta machiboa, ma binepo bilé ejemplo japi echoná Biblia chukú alí japi echi riká cho ikili.

4. ¿Piri namuti jilírami ikili echi apóstol Pablo?

⁴ Echi ejemplo japi Bíbliachi chukú. Echi apóstol Pablo aʼlá machili japi echi cristianos ke sébali aʼlá nokáami nili. Japi riká, japalí chotásili napawía echi congregación yúa japi wilili echoná Jerusalén, wiká japi mochili echoná majali Pablo alí ke mayeli japi ma bichíyami nili (Hech. 9:26). Alí miná ko, jaré echi cristianos cha riká raʼíchili echi jitra (2 Cor. 10:10). Pablo ko ineli japi bilé anciano ke aʼlá nátika isili alí japi isima riweili japi jarecho cristianos siwema (Gál. 2:11, 12). Ayénachó omona nílili jiti Marcos, japi echi compañérowala nili, ke aʼlá isili (Hech. 15:37, 38). Pablo ko omérili natia japi ma ke napawima echi hermanos yúa japi cha olali. We be nalí Pablo ke echi riká isili, ke cha riká nátili echi hermanos jitra, echi ko nalí aminabi iʼwérili isili nóchilia Jeobá. ¿Piri iʼwírili jiti echi riká isima?

5. ¿Piri namuti iʼwírili Pablo jiti ke riwema napawía echi hermanos yúa? (Colosenses 3:13, 14; ayénachó iné echi dibujo).

⁵ Pablo ko we galeli echi hermanos alí hermanas. Jepuná iʼwírili jiti ke inema echi chati namuti japi nokali, nalí japi we aʼlá nokali; ayénachó jiti wikáwima jarecho japi riká echi binoy anili echoná Colosenses 3:13, 14 (leeri). Japi riká, ¿achi wikáwili Pablo japi isili Marcos? Ayena. Tákoré Marcos bineli riweli Pablo japalí echi we miká simili inemia echi congregaciones, echi ko ke iyoa ripili Marcos yúa. Alí japalí Pablo osélili bilé carta echi congregación Colosas muchúwami, anili japi Marcos we natéami ju alí japi sinibí we kanílitili echi (Col. 4:10, 11). Ayénachó japalí erta asali echomí Roma, bayeli Marcos jiti echi iʼwírisia simea (2 Tim. 4:11). Jepuná jitra ata machí japi Pablo ke siné riweli galea echi hermanos. ¿Piri ta biné japi riká isili echi?

6, 7. ¿Piri tamó iʼwírima jiti ta aminabi néwariwélitipo japi ta galé echi hermanos tákoré ke sébali aʼlá nokáami ju? (1 Juan 4:7).

 ⁶ Japi ta biné. Jeobá ko nakí japi ta aminabi néwariwélitipo japi ta we galé echi hermanos alí hermanas (leeri 1 Juan 4:7). Bilé hermano o bilé hermana ke simárika isísaká tamujé yúa, ke ti sapú cha riká natásaré echi jitra, nalí natabo japi echi ko ke echi riká isínaliami nili alí japi iʼwérili isimí isiá japi aʼláala ju (Prov. 12:18). Tákoré ti ke sébali aʼlá nokáami ju, Jeobá ko we tamó galé. Ke riwé tamó galea japalí ti ke aʼlá noká alí ke iyoa ripí (Sal. 103:9). We natéami ju japi ta nokiboa japi riká tamujé Onolá Jeobá alí ku wikáwipo jarecho (Efes. 4:32-5:1).

⁷ Ayénachó ke ti wikawásaré japi ta ma kuwachimi rawé piré, jiti la we natéami ju japi ta we napawika nipo echi hermanos yúa. A keʼré japi ta najátarami nipo o erta muchuwárami. Echi riká ikisáaká, ata newalepo japi echi hermanos tamó iʼwírima (Prov. 17:17). Echi riká ikili bilé anciano España bitéami, Josep riwéami. a Echi ko erta achari jarecho hermanos yúa jiti nijéwili Jeobá. Echi ko jéaní: “Jiti ta we napawika mochili, ati we sapú naʼawie echi hermanos yúa. Jiti la, ati iʼwérili nokisaa riweili anachia alí wikawia anakupi niraa. Echi namuti tamó iʼwírili jiti ta napawika nipo alí jiti ta tibupo anakupi niraa jarecho jitra japi ayénachó erta mochili alí japi ke Testigos nili. Ani newalá japi siné kaachi ani apoli nijé sikala alí ke ni omérili nokea. Jiti ni ke omerie isiá wiká namuti, bilé hermano tamí iʼwírili wichoa echi chiní alí ayénachó isiá jarecho si namuti. Ani níliki japi ni we galéliwa japalí ni newaleli”. Jiti la, ¡we natéami ju japi sapú akaréwipo japalí ti naʼáwisa echi hermanos yúa!

JAPALÍ TAMÓ KUNALA O UPILA MA ISIMÍ NAMUTI JAPI TAMÓ RISOA NÍLITI

8. ¿Piri namuti jilírami ikí echi japi niwíkami ju?

⁸ Echi namuti jilírami. Japi riká aní echi Biblia, sinéami echi niwíkami ikimea namuti jilírami (1 Cor. 7:28). ¿Chúsiá? Jiti echi kunala alí echi upila ke sébali aʼlá nokáami ju. Ayénachó ke chopi iyiri ju alí ke chopi iyiri namuti galé. A keʼré japi jaréana piréami ju alí sinúrika niraa ochérili. Pe aminana, echi ko inémiré namuti japi ke aʼlá noká japi chabé ke ineli japalí kecho niwili. Suwaba echi namuti isímiré japi echi ma ke kanilia pirélima. Alí a keʼré japi ibili natama japi echi biléala iyiri ju alí echi okuánika ke iʼwérili nokimea ku akarewia echi namuti jilírami, jiti la natámiré japi aʼlá nima japi ku rojama. Nalí, ¿achi aʼlá nima japi echi riká nokimea? b Inepo bilé ejemplo japi chukú echoná Biblia japi we anáchili tákoré ikili namuti we jilírami.

9. ¿Piri namuti jilírami anáchili Abigaíl?

⁹ Echi ejemplo japi Bíbliachi chukú. Abigaíl ko niwika asali Nabal yúa alí echi Biblia aní japi we cha isíami nili alí we aparúami (1 Sam. 25:3). A we jilí níliré bitea echi rijoi yúa. Nalí, ¿achi omérimili Abigaíl isiá bilé namuti jiti ma ke risoa nílima bitea echi Nabal yúa? Ayena, jiti siné kaachi David, echi japi silíami nima riweili echoná Israel, simili miʼamia echi Nabal jiti cha riká raʼíchili echi jitra  alí echi sontársiwala (1 Sam. 25:9-13). Abigaíl ko omérili miná masia alí riwea japi David miʼama echi kunala, nalí ke echi riká isili. Echi ko nalí raʼíchili David yúa alí aneli japi ke miʼama Nabal (1 Sam. 25:23-27). ¿Chúsiá echi riká isili?

10. ¿Piri iʼwírili Abigaíl jiti ke siwema tákoré ikiyé namuti we jilírami?

¹⁰ Abigaíl ko we galeli Jeobá, jiti la we natéami niraa ineli japi nátili Jeobá echi niwíkami jitra. Echi ko aʼlá machíliré japi Jeobá aneli Adán alí Eva japalí niwítili (Gén. 2:24). Jiti kanílitinali Jeobá, echi ko iʼwérili isili iʼwiria binoy kunala alí japi echi yúa pireili. Jiti la Abigaíl sapú wikáwili tánili David jiti ke miʼama Nabal tákoré binoy ko ke cha isili. Jeobá ko we galeli Abigaíl jiti ke majáami nili alí we nijéwami. ¿Piri biné Abigaíl jitra echi kunéami alí upéami? Ma inepo.

11. a) ¿Piri nakí Jeobá japi nokimea echi niwíkami? (Efesios 5:33). b) ¿Piri mi biné Carmen jitra? (Ayénachó iné echi imágenes).

¹¹ Japi ta biné. Jeobá ko nakí japi niwíkami ju riwíwima echi kunala o upila ma, tákoré echi ke simá isíami ju. Onorúami ko we kanili japalí iné japi echi niwíkami iʼwérili noká akarewia echi karú ikiwáami alí japalí we galé alí riwiwi anakupi niraa (leeri Efesios 5:33). Ma binepo japi ikili Carmen. Echi ko usani bamíali olali niwíkami ka japalí chotásili binea echi Biblia echi testigo Jeobá yúa alí pakoli. Echi ko jéaní: “Nijé kunala ke galeli japi ni isili, echi ko nijichémali Jeobá jitra, cha riká raʼichie tamí jitra alí anili japi tamí riwema”. Nalí Carmen ko ke siweli. 50 bamíali echi ko iʼwérili isili we galea alí riwiwia echi kunala. Ayénachó jéaní: “Kilipi niraa ani bineki machiyá chu nilia nijé kunala alí simárika raʼichia echi yúa. Ani machiyé japi Jeobá we natéami niraa iné jiti ta niwíkami ju. Jiti la ni iʼwérili isili jiti ta ke rojabo. Jiti ni we galé Jeobá echi tamí iʼwírili jiti ni ke siwema”. c Ami ikiyáaká namuti we jilírami mujé kunala yúa o upila ma, we mi bichíwisaré japi Jeobá mi iʼwírima jiti mi ke siwema.

JAPALÍ TI OMONA NILI ECHI JITRA JAPI TA KE AʼLÁ NOKALI

12. ¿Chu níliporé ati nokisáaká bilé namuti we chati?

¹² Echi namuti jilírami. Ati nokisaa bilé namuti we chati, ati ma ke iʼwérili nokináliporé nóchilia Jeobá. Echi Biblia aní  japi echi jitra ata we siwea nílipo alí we omona nílipo (Sal. 51:17). Echi riká ikili Robert, bilé hermano japi wiká bamíali iʼwérili isili siervo ministerial nínalia. Echi ko isili bilé namuti we chati alí nátili japi we risoa nílitili Jeobá. Echi ko jéaní: “We ni omona níliki japi riká ko wiká ladrillos tamí mutela. Miná ko ni okoki ropala, ani nalaki alí ni raʼíchiki Jeobá yúa. Ani newalá japi ni nátiki japi Onorúami ma ke siné tamí kipuma jiti ni we risoa nílitili”. Ati nokisáaká bilé namuti we chati, a keʼré japi ta we omona nílipo alí ti natabo japi Jeobá ma ke tamó galé alí japi ma ke natéami ju aminabi echi nóchilia (Sal. 38:4). ¿Ami echi riká nílili siné kaachi? Echi riká mi nílisaká, bilé namuti japi mi iʼwírima ko ju binea bilé jitra japi we nijéwami nili alí japi ke riweli Jeobá tákoré isili bilé namuti we chati.

13. ¿Piri chati namuti isili Pedro japi wabé risoa nílitili?

¹³ Echi ejemplo japi Bíbliachi chukú. Bilé rokojó japalí kecho miʼlirúami nili Jesús, echi apóstol Pedro isili jaré namuti chati japi we risoa nílitili. Bachá, echi ko anili japi ke siné riwema Jesús tákoré jaréala apóstoles bineli riwema echi (Mar. 14:27-29). Miná ko, echoná jardín Getsemaní riwéachi, echi ko wisabé niraa ochiká ripili (Mar. 14:32, 37-41). Ayénachó japalí chapirúami nili Jesús, echi ko bineli riweli (Mar. 14:50). Ne upá ko, Pedro ko bisiá niraa anili japi ke machili Jesús alí ayénachó anili japi a ne bichíwali aní (Mar. 14:66-71). ¿Piri isili Pedro japalí machili japi we cha isili? Echi ko we risoa nílili alí we nalali (Mar. 14:72). ¿Ami nata japi chu nílili Pedro japalí ineli japi echi amígowala Jesús wijaa chukuli echoná tonchi? Echi ko níliliré japi we cha isíami nili.

14. ¿Piri iʼwírili Pedro jiti aminabi nóchilima Jeobá? (Ayénachó iné echi dibujo).

¹⁴ Pedro ko ke siweli alí aminabi iʼwérili isili nóchilia Jeobá. ¿Piri namuti iʼwírili? Echi ko ke bineli ripili, nalí napawika simírili echi hermanos yúa japi iʼwérili iyali (Luc. 24:33). Ayénachó japalí Jesús ku owínili, newa ikili Pedro yúa iʼwérili iyamia (Luc. 24:34; 1 Cor. 15:5). Jesús ko ke aneli Pedro japi we cha isili, nalí aneli japi narema jaré nóchali we natéami (Juan 21:15-17). Tákoré Pedro machiyé japi isili namuti we chati, echi ko ke siweli echi jitra. ¿Chúsiá? Jiti machili japi Jesús a bijí we galeli alí japi echi hermanos binoy iʼwiri. Ma inepo piri ta biné echi jitra.

15. ¿Piri nakí Jeobá japi ta we bichíwipo? (Salmo 86:5; Romanos 8:38, 39; ayénachó iné echi foto).

 ¹⁵ Japi ta biné. Jeobá ko nakí japi ta we bichíwipo japi echi tamó galé alí japi tamó wikáwima (leeri Salmo 86:5; Romanos 8:38, 39, TNM). A bichíwali ju japi ta sinéami we omona nili japalí ti nokisaa echi namuti chati. Nalí ke ti siné natásaré japi Jeobá tamó riweli galea alí japi ke siné tamó wikáwima. Japi ta nokisáré ko ju sapú iʼwírili tania. Robert, japi ta jitra raʼíchiki echoná párrafo 12, jéaní: “Japi isili tamí chati isitia ko ju, natia japi ni ke newalé iʼwírili jiti ni anachama ke isimia chati namuti”. Echi ko machili japi raʼichásaré echi ancianos yúa. Robert ayénachó aní: “Japalí ni echi riká isiki, echi tamí iʼwírili jiti ni machimea japi Jeobá aminabi we tamí galé. Echi ancianos ke riweli tamí iʼwiria. Echi ko tamí iʼwírili jiti ni bichíwima japi Jeobá ke bineli tamí riweli”. Japi riká Robert, tamujé ayénachó bichíwisaré japi Jeobá we tamó galé alí japi tamó wikáwima. Echi riká isima ati omona nílisaká echi chati namuti jitra japi ta nokali, ati iʼwírili tánisaká alí ti iʼwérili nokisáaká ke checho ku nokayá echi chati namuti (1 Juan 1:8, 9). Natia japi Jeobá ke riwé tamó galea, tamó iʼwírima jiti ta ke siwepo japalí ti nokisaa echi namuti chati.

16. ¿Chúsiá mi ke riwénali aminabi nóchilia Jeobá?

¹⁶ Jeobá ko we natéami niraa iné suwaba echi namuti japi ta noká echi nóchilia, jipi jubá rawé we jilí kaachi. Echi ko tamó iʼwírima jiti ke siwepo tákoré ti ikiyé namuti we jilírami. Ati omeri we galea echi hermanos alí ku wikawia japalí ke aʼlá nokisaa tamó yúa. Ati omeri néwariwélitia Jeobá japi ta we galé alí japi ta riwiwi japi echi nulá, japalí ti iʼwérili noká akarewia chuwé namuti jilírami japi ta ikí tamujé kunala yúa o upila ma. Alí ati nokisáaká bilé namuti we chati, ati omeri riwea japi Jeobá tamó iʼwírima, bichiwia japi tamó galé, japi tamó ku wikáwima alí ke riwea echi nóchilia. Jiti la “ketasi [...] ariwebo echi ne wabé galabé olayá” jiti ta machí japi Jeobá tamó iyama wiká namuti aʼláala (Gál. 6:9).