1, 2. ¿Piri namuti aʼláala naré bilé pagótami japalí ma pakosa?

 WE TI kanili japalí ti pakó jiti echalí jonsa ata nili japi riká Jeobá téemala. Sinéami japi ma echi riká nokali ayénachó nátiré japi riká echi salmista David, japi anili: “We kaníliami ju echi rijoi japi mujé [Jeobá] chapí alí japi mi bayé jiti bitélima echoná mujé níwala patios” (Sal. 65:4).

² Jeobá ko ke riwé japi chuwé bakimea echoná patios japi echi níwala ju. Japi riká ti ma bineli echoná binelíwami 9, Jeobá ko muliwi echi japi néwariwéliti japi a echi amígowala nínali (Sant. 4:8). Japalí bilé katúwika isimí Jeobá yúa alí pakó, aminabi we muliwi echi. Alí echi Jeobá ko jériká ané: “Alí timí inema japi ni [...] emi iyama wiká namuti aʼláala japalí chéami timí ma ke newalé” (Mal. 3:10; Jer. 17:7, 8).

3. ¿Piri ta nokinali sinéami cristianos japi ta ma katúwika nokali alí pakoli? (Eclesiastés 5:4, 5).

³ Japalí mi pakó kulí mi chotásimi nóchilia Jeobá. Nalí sinéami japi ta cristianos ju, iʼwérili nokinali nokayá japi riká ti ma anili tákoré ikí namuti jilírami alí ti inili nokinalia japi chati ju (leeri Eclesiastés 5:4, 5). Ayénachó ke ti riwésaré nokayá japi riká isili Jesús alí nijewia japi echi nulali (Mat. 28:19, 20; 1 Ped. 2:21). Jepuná binelíwami tamó iʼwírima echi riká nokayá.

KITI RIWÉ NAJATIA JESÚS TÁKORÉ IKÍ NAMUTI JILÍRAMI O INÍLIAKÁ CHA ISÍNALIA

4. ¿Piri ruyá anili Jesús japalí anili japi echi discípulos “ujúsaré echi usí japi risoa níliti”? (Lucas 9:23).

⁴ Kiti natá japi mi ma pakosa, mujé ko ke siné olama echi karú ikiwáami. Jesús anili japi ibili echi discípulos  “sinibí rawé ujúsaré echi usí japi risoa níliti” (leeri Lucas 9:23, TNM). ¿Achi aniyá anili Jesús japi echi najátowala sinibí risoa nilia pirélima? Ke tasi. Japi aniyá anili ko ju japi ke bi narema echi namuti aʼláala, nalí ayénachó ikimea namuti we jilírami alí jaré echi, we risoa nílitima riweili (2 Tim. 3:12).

5. Japi riká anili Jesús, ¿piri namuti aʼláala narema echi japi we natéami niraa iné echi Onorúami Gobiérnowala?

⁵ A keʼré japi mujé ko anáchili japalí mujé téemala mi sayérili, o ami riwéliré wiká namuti alí winomí jiti mi we natéami niraa ineli echi Onorúami Gobiérnowala (Mat. 6:33, TNM). Ami echi riká ikílaká o isílaká, ami newalásaré japi Jeobá ko suwaba machí japi mi isili echi jitra (Heb. 6:10). Alí a keʼré japi mi ma ineli japi a bichíwali ju japi anili Jesús japi sinéami japi riweli wiká namuti echi jitra japi riká iyela, onolá, kúchuwala, kalí, téemala alí weʼé, wabé wikabé niraa narema jipi echi yúa japi olali chabé, alí ayénachó anili japi sinibí pirélima (Mar. 10:29, 30). Alí a bichíwali ju, echi namuti aʼláala japi mi nareli wabé wikabé ju echi yúa japi mi riweli (Sal. 37:4).

6. Tákoré mi ma pakoli, ¿chúsiá mi aminabi iʼwérili isísaré ke “chati sitíi olánala”?

⁶ Ma pakosa, mujé ko aminabi iʼwérili isima ke “chati sitíi olánala” (1 Juan 2:16). Jiti mujé a bijí ke sébali aʼlá isíami nima, a keʼré japi isini kaachi ami inílima japi riká echi apóstol Pablo, japi anili: “Chopi sulachí niráa nijeni arigá ne wabé galé Riosi nulalila. [...] Ne bichíwali we nakí galabé olánala, chopi nijé arigá chati oláami ju pachana nijé sulálachi niráa. Echijiti nijeni mapurigá nulérami niráa ju echirigá chati olánala” (Rom. 7:22, 23). Ami siwea níliré jiti mi iʼwérili isimí ke chati isínalia. Nalí natia japi mi katúwika aneli Jeobá, mi iyama jiwérali jiti mi ke isima japi chati ju alí mi iʼwírima anachia japalí mi chati isínali. ¿Chúsiá?

7. Echi namuti japi ta katúwika aneli Jeobá, ¿chúriká tamó iʼwírima nijéwami niya?

⁷ Japalí mi katúwika ané Jeobá japi mi sinibí echi nijéwima, echi ko aniwáami ju japi mi ke isísaré echi namuti japi mi binoy kanili isiá japi chati ju alí japi Jeobá ke galé (Mat. 16:24). Ke mi natia iyénisaré piri mi isima japalí inílisa chati isínalia, tamujé ko bi natabo sinibí nijéwimia Jeobá alí kanílitia, jiti japalí ta katúwili echi yúa, ati aneli japi bachá nokiboa japi echi nakí. Ati nokiboa japi riká Job japi ikili namuti we jilírami nalí ariká anili: “Ke ni siné riwema nijewia [Jeobá]” (Job 27:5).

8. ¿Chúsiá natia japi ta katúwika aneli Jeobá tamó iʼwírima jiti ke nokiboa japi chati ju?

⁸ Natia japi ta katúwika aneli Jeobá, tamó iʼwérili iyama jiti ke nokiboa japi chati ju. Japi riká, ¿achi ta nokiboa japi riká ko korúa echi japi ma niwíkami ju? ¡Ke tasi! Jiti japalí ti katúwili Jeobá yúa, ma ti anili japi ta ke echi riká nokiboa. Ati ne kulí jonsa iʼwérili nokisáaká ke chati namuti natia, miná ko ke ti iʼwérili nokiboa ku riwea natia echi chati namuti. Ke ti nipo japi riká echi japi chati namuti noká (Prov. 4:14, 15).

9. ¿Chúsiá japi ta katúwika anili tamó iʼwírima bachá nokayá japi Jeobá aní?

⁹ ¿Piri ta nokiboa ati iyásiwaká bilé nóchali japi isima japi ta ke ikíripo simíaya suwaba napawíliwachi? Tamujé ko ma ti machí piri nokiboa, jiti chabé jonsa ma ti aʼlá nátili japi ta ke narepo. Ati we aʼlá  machí japi ta narésaká echi nóchali, ma ti ke ikíripo bachá nokayá japi Jeobá aní. Japi riká isili Jesús tamó iʼwírima; echi ko sinibí nátili kanílitimia echi Onolá. Tamujé ayénachó sapú aniboa japi ke nokiboa echi chati namuti jiti ta machí japi echi Onorúami, japi ta yúa katúwili, ke galé echi namuti (Mat. 4:10; Juan 8:29).

10. ¿Chúriká tamó iʼwírima Jeobá jiti ke riwepo najatia Jesús japalí ta ma pakosa?

¹⁰ Echi namuti jilírami japi ta ikí alí japalí ti inílisa chati nokinalia, tamó iʼwiri jiti néwariwélitipo japi ta aminabi najátinali Jesús. Alí ati machí japi Jeobá tamó iʼwírima echi riká nokayá, jiti echi Biblia aní: “Echalí Riosi ʼyemi mi wabé kuʼwírama mapurigátamo ketasi echirigá chati sitíi olabo. Echalí ʼyémitamo galá omérabo echirigá niʼyúriya mapurigátamo ketasi echirigá chati sitíi olabo” (1 Cor. 10:13).

PIRI MI ISÍSARÉ JITI MI KE RIWEMA AMINABI NAJATIA JESÚS

11. ¿Chu iyiri ju echi namuti japi mi omeri isiá aminabi najátimia Jesús? (Ayénachó iné echi fotos).

¹¹ Jesús ne sulachí jonsa nóchili Jeobá alí sinibí raʼíchili echi yúa, echi iʼwírili jiti sinibí mulipi nima (Luc. 6:12). Japi mi iʼwírima aminabi najatia Jesús japalí mi ma pakosa, echi ko ju isiá jarecho namuti japi mi iʼwírima aminabi muliwia Jeobá alí ke riwea echi riká isiá (Filip. 3:16). Isini kaachi ami kipuma japi nokali jaré hermanos aminabi nóchilimia Jeobá. A keʼré japi simíali echoná Escuela japi biné echi Nawésami Raʼíchali Kalabé o jaréanami simíali japoná newaléliwa nawésami. Mujé, ¿achi mi omeri echi riká cho isiá? Ami omériaká, ¡echi riká isí! Echi  japi Jeobá nijéwami ju, noká sinúrika namuti aminabi nóchilimia echi (Hech. 16:9). Nalí jipi ke mi omériaká echi isiá, kiti natá japi mujé ko ke me natéami ju echi yúa japi a omeri echi riká nokayá. Wabé natéami ko ju japi mi aminabi anachásima (Mat. 10:22, TNM). Kiti wikawá japi Jeobá ko we kanili japalí mi aminabi iʼwérili isimí isiá echi japi mi a omeri. Echi mi iʼwírima ke riwea aminabi najatia Jesús japalí mi ma pakosa (Sal. 26:1).

12, 13. ¿Piri mi isísaré ami iníliaká japi mi ke kanili isiá japi aʼlá ju? (1 Corintios 9:16, 17; ayénachó iné echi recuadro “ Japi mi isísaré aminabi máamia”).

¹² ¿Piri mi isísaré ami iníliaká japi mi ma ke raʼicha Jeobá yúa ne sulachí jonsa, ke mi kaníliaká simiyá nawisasia o leeria echi Biblia? Ami echi riká iníliaká, kiti natá japi Jeobá ko ma ke mi iʼwiri echi espíritu santo jitra. Jiti ta ke sébali aʼlá nokáami ju, isini kaachi echi riká iníliporé. ¿Piri mi iʼwírima ke mi kaníliaká? Natá echi apóstol Pablo jitra. Tákoré echi ko iʼwérili isili isiá japi riká Jesús, echi ko machiyé japi isini kaachi ke inílima isínalia japi aʼlá ju (leeri 1 Corintios 9:16, 17). Pablo jéanili: “Ani nawisásagá Riosi Raʼíchala mapujiti arigá ʼwérali ju mapurigani echirigá nawisama, echalini chopi echirigá olá mapujiti echi Walubela Riosi Binói tamí júuli echirigá nawisánala”. Jepuná jitra, echi ko ruyá anili japi echi ko ke riwema nawesia tákoré isini kaachi ke inili echi riká isínalia.

¹³ Echi riká cho, kiti riwé japi echi namuti japi mi inili mi nulema japi mi isima. Nalí, iʼwérili isí aʼlá isiá tákoré ke mi inili echi riká isínalia. Echi riká mi isísaká, pe aminana ma mi binoy inílima isínalia japi aʼlá ju. Jiti la, ami iʼwérili  isísaká isiá echi namuti japi mi iʼwírima muliwia Jeobá, mujé ko ke siné riwema aminabi najatia Jesús japalí mi ma pakosa. Alí japalí jarecho hermanos inesa japi mi ke riwé nijewia Jeobá, echi ayénachó echi riká nokinálima (1 Tes. 5:11).

“AMINABI WE AʼLÁ NÁTIKA ABOI INESI”

14. ¿Piri namuti aʼlá ju japi mi natama isini kaachi, alí chúsiá? (2 Corintios 13:5).

¹⁴ Japalí mi ma pakosa, we natéami ju japi mi isini kaachi natama piri namuti mi isimí (leeri 2 Corintios 13:5, TNM). Natá achi mi sinibí rawé raʼicha Jeobá yúa, leeria alí we aʼlá binea echi Biblia, achi mi simí echoná napawíliwachi alí nawisasia. Iʼwérili isí machiyá piri mi isísaré jiti mi we kanílima isiá echi namuti. Japi riká, ami omeri nárika isiá jepuná: “¿Achi ni machí aʼlá ruyea echi namuti ke me jilírami japi aní echi Biblia? ¿Achi ni omeri isiá jarecho namuti jiti ni aminabi we kanílima nawesia? Japalí ni raʼicha Jeobá yúa, ¿achi ni we aʼlá ruyé ibili niraa echi namuti japi ni inili alí ni néwariwéliti japi ni we bichiwi echi? ¿Achi ni iʼwérili isimí suwaba napawíliwachi simiyá? ¿Piri ni omeri isiá jiti ni wabé aʼlá kipúa asimea echoná napawíliwachi alí nijimia we aʼlá comentarios?”.

15, 16. ¿Piri mi biné Robert jitra?

¹⁵ Ayénachó we natéami ju japi mi natama piri namuti ami bijí aminabi iʼwérili isísaré aʼlá isiá. Ma inepo bilé ejemplo japi néwariwéliti japi we natéami ju echi riká isiá. Bilé hermano Robert riwéami jéaní: “Japalí ni 20 bamíbami ke, ani jaré rawé bi nochie ibili tarali. Siné rawé japalí ni ma machíniki nochia, bilé compañera tamí bayeli echi bitélachi. Anili japi ke wesi ité alí japi ta oméripo ‘kanílika simariaʼ. Ne kulí ko ani aneki japi ni ke omérima jiti ni isima jarecho namuti, nalí miná ko ani aneki japi ke simea alí ni ruyeki chúsiá”. Tákoré Robert we aʼlá isili, nalí japalí nátili echi namuti japi ikili echi ko machili japi wabé aʼlá isisa riweili. Echi ko jéaní: “Ke ni we sapú aneki echi compañera japi ni ke simea echi yúa, japi riká isili José echi Potifar upila yúa (Gén. 39:7-9). Ke ni mayéi japi ni we jilí nirama aniyá japi ke. Japi ikili tamí iʼwírili machiyá japi ni aminabi iʼwérili isísaré we aʼlá amigo niya Jeobá yúa”.

¹⁶ Natá japi mi ikí bilé namuti japoná mi chati isímili, nalí mujé ko ke isili. Tákoré ke mi isili echi chati namuti, aʼlá nima japi mi ayénachó isima japi riká Robert,  alí nárika isí jepuná: “¿Achi ni wilí nátili animea japi ke?”. Ami iníliaká japi nirú jaré namuti japi mi aminabi aʼlá isísaré, kiti siwé. Nalí natá japi we aʼlá nili japi mi machili piri mi aminabi aʼlá isísaré. Raʼichá Jeobá yúa echi namuti jitra alí iʼwérili isí jiti mi aminabi nijéwinalima echi (Sal. 139:23, 24).

17. Japi riká ikili Robert, ¿chúsiá we natéami ju japi ta sinibí nijéwipo Jeobá?

¹⁷ A nirú jarecho namuti japi ta biné Robert jitra. Echi ko jéaní: “Japalí ni ke nijéwiki echi compañera, echi ko tamí aneki ‘We mi aʼlá isiliʼ. Ani náriki chúsiá echi riká aní. Echi ko tamí aneki japi bilé echi amígowala, japi chabé testigo Jeobá nili, echi aneli japi sinéami echi kúruwi alí iwé japi Testigos ju, ke aʼlá noká japalí ikisaa bilé namuti japoná isima japi chati nokimea. Alí tamí aneki japi echi ko aneli echi amígowala japi tamí yúa echi riká isima inemia piri ni isiá. ¡We ni kanili jiti ni isili japi ke cha riká raʼichárami nima Jeobá riwalá jitra!”.

18. Japalí mi ma pakosa, ¿piri mi aminabi isínali? (Iné echi recuadro “ Okuá artículos japi we mi iʼwírima”).

¹⁸ Japalí mi katúwika ané Jeobá japi mi sinibí echi nijéwima alí pakó, mujé ko néwariwéliti japi mi ke nakí japi jarecho cha riká raʼichama Jeobá riwalá jitra. Ami newalásaré japi Jeobá ko suwaba machí echi karú ikiwáami japi mi ikí alí japi mi iʼwérili isimí ke isiá echi chati namuti. Echi ko iné japi mi iʼwérili isimí nijewia alí mi iʼwírima. We aʼlá bichiwi japi echi espíritu santo jitra mi iyama echi jiwérali jiti mi isima japi aʼlá ju (Luc. 11:11-13). Echi riká mujé ko omérima aminabi najatia Jesús japalí mi ma pakosa.