1, 2. a) ¿Chu kabú, kumi alí chúsiá osélili Pablo echi carta echi efesios? b) ¿Chu iyiri náriwami binepo jena binelíwami?

 JAPALÍ Pablo erta asali echoná Roma, echi ko iʼwérili iyánali echi hermanos. Nalí, jiti ke omérili simiyá inesia, echi ko osélili wiká cartas. Bilé echi carta ko nili japi júulili echi cristianos Éfeso piréami echi bamíali 60 o 61 kaachi (Efes. 1:1; 4:1).

² Ma sojí 10 bamíali nili japalí Pablo iyénili nawesia alí bineria echi aʼláala raʼíchali echoná Éfeso (Hech. 19:1, 8-10; 20:20, 21). Echi ko we galeli echi hermanos alí iʼwírinali jiti nijéwima Jeobá. Nalí, ¿chúsiá Pablo osélili echi cristianos ungidos echi rayénachi alí rokowárili piréami jitra? ¿Alí piri ta biné sinéami cristianos echi busuréliami jitra japi iyali? Jenaʼí binelíwami binepo echi okuá náriwami jitra.

ROKOWÁRILI JONSA BUYALI ECHONÁ RAYÉNACHI

3. ¿Chu iyiri ejemplos néeli Pablo echoná Efesios capítulo 5?

³ Pablo ko jéaneli echi cristianos Éfeso piréami: “ʼYémitamo ne wabé chati sitíi ologá piréali, mapurigá echoʼná rokowárali piréami niráa, chopi jípitamo [...] echoʼná galá rayénachi niráa piréami ju” (Efes. 5:8). Echi ko néeli rayénachi alí rokowárili japi riká ejemplos, ruyemia japi echi cristianos Éfeso piréami ma riweli nokayá wiká chati namuti. Bachá, ma inepo chúsiá aneli japi “rokowárili piréami niráa” nili.

4. ¿Chúsiá echi efesios rokowárili pireili echi religión ke bichíwali jitra?

⁴ Rokowárili pireili echi religión ke bichíwali jitra. Kecho  bijí machiyá echi bichíwali alí kecho cristianos nilia, echi efesios bichíwili echi magia alí wiká namuti japi binérili echi religiones ke bichíwali. Echoná Éfeso wilili echi templo echi diosa griega Ártemis níwala, japi walubé nili alí japi echalí echi pagótami we natéami niraa ineli japi riká jaréala usani namuti japi niwárami nili omáana wichimóbachi. Wiká pagótami simíaye echoná amachíkimia echi ídolos. Niruli pagótami japi kuuchi niraa niwaká ralineli echi templo Ártemis níwala alí meli wiká winomí (Hech. 19:23-27). Ayénachó echoná piréami we machirúami nili jiti nokayé wiká namuti néeka echi magia (Hech. 19:19).

5. ¿Chúsiá echi efesios rokowárili pireili echi chati namuti jitra?

⁵ Rokowárili pireili jiti nokali namuti we chati. Echi pagótami echoná Éfeso piréami wabé chati nokáami nili japi riká echi nasawíliami chati alí ke tasi riwela nílili echi riká nokayá. Echi namuti japi nokali echoná obras de teatro alí omáwili, we néeli echi raʼíchali nasawíliami jitra (Efes. 5:3). Echi Biblia aní japi echi efesios ma ke namú nílili cha nokayá alí ke natéami niraa ineli japi nátili Jeobá echi jitra. Jiti ke machili japi aʼláala ju alí japi chati ju, Pablo ko anili efesios jitra: “Ketasirapé machí echi ne Bichíwali. Aʼlí aboni ketasi auché siʼnú galabéala niráa piré” (Efes. 4:17-19). Echi ko japi riká rokowárili pireili jiti nokali japi Jeobá ke galé.

6. ¿Chúsiá Pablo aneli echi efesios japi jipi ko “echoʼná galá rayénachi niráa piréami ju”?

⁶ Nalí jaré echi efesios echoná rokowárili jonsa buyali, jiti la Pablo anili japi jipi ko “echoʼná galá rayénachi niráa piréami ju” (Efes. 5:8). Echi ko aniwáami ju japi echi ko chotásili nokayá japi riká aní echi Jeobá Raʼicháala, japi nili japi riká bilé luz japi iʼwírili machiyá piri nokimea (Sal. 119:105). Echi ko riweli suwaba japi noká echi religión ke bichíwali alí echi chati namuti. Echi efesios  jipi ko iʼwérili nokali niya japi riká Onorúami, echi bi nijewia alí kanílitia (Efes. 5:1).

7. Japi riká ti piré jipi alí japi riká pireili echi cristianos Éfeso piréami, ¿piri namuti chopi iyiri ju?

⁷ Echi riká cho, jaré tamujé ati pireili japi riká ko rokowárili niraa. Kecho machiyá echi bichíwali, jaré tamujé nokáliré echi chati namuti alí ti omáwiliré echi omáwali japi riká noká echi religión ke bichíwali. Nalí japalí ti machili Jeobá jitra, ati chotásili nokayá japi aʼlá ju alí ti riweli japi chati ju. Jepuná we tamó iʼwírili (Is. 48:17). Tákoré echi riká ju, isini kaachi ati jilí niraa ke rokowárili pirea. Ma binepo piri tamó iʼwírima jiti ke riwepo rayénachi pirea.

MA KE CHECHO KU ROKOWÁRILI PIRÉLIPO

8. Japi riká aní Efesios 5:3-5, ¿piri namuti riwesa riweili echi efesios?

⁸ (Leeri Efesios 5:3-5). Jiti ke checho ku rokowárili pirélima, echi cristianos Éfeso piréami iʼwérili nokisaa riweili riwea echi chati namuti japi Jeobá ke galé. Jepuná ko ke bi nili echi nasawíliami chati, ayénachó nili echi raʼíchali chati. Pablo ko newalárili japi a mochínalaká japoná nulá Jesús alí Onorúami, echi ko riwesa riweili echi chati namuti.

9. ¿Chúsiá ti aʼlá tibuka nokisáré echi nasawíliami chati jitra?

⁹ Tamujé ayénachó we aʼlá tibuka nokisáré jiti ke ku nokiboa echi chati namuti japi ta nokali japalí ti rokowárili niraa pireili (Efes. 5:11). A bichíwali ju, japalí bilé pagótami aminabi we iné o kipú echi nasawíliami japi chati ju, o raʼicha echi jitra, pe aminana echi ko isima echi chati namuti (Gén. 3:6; Sant. 1:14, 15). Japi riká, biléana país wiká Testigos niwali bilé grupo echoná bilé red social aboi mensaje júlimia. Ne kulí ko raʼíchili Jeobá jitra alí echi bichíwali. Nalí kilipi niraa chotásili raʼichia japi ma ke me aʼlá nili alí miná ko ma raʼichie echi nasawíliami bi jitra. Pe aminana, wiká echi ko anijoli japi echi namuti japi raʼíchili isili japi nokimea nasawíliami chati.

10. ¿Piri nakí Satanás japi ta natabo? (Efesios 5:6).

¹⁰ Satanás ko eki echi pagótami jiti ke machimea japi aʼlá ju alí japi chati ju (Is. 5:20; 2 Cor. 4:4). Ayénachó isimí japi ta natabo japi aʼláala ju echi namuti japi Jeobá aní japi ta ke nokiboa, japi riká echi nasawíliami japi chati ju (2 Ped. 2:19). Jiti la jipi echoná internet, películas alí programas echoná televisión, buyaní wiká namuti japi néwariwéliti japi ke chati ju japi Jeobá kichí. Echi Diablo ko nakí japi ta natabo japi echi chati namuti japi noká echi pagótami o japi riká piré, aʼlá ju jiti tamó kaníliti (leeri Efesios 5:6).

11. ¿Chúriká néwariwéliti japi ikili Angela japi we natéami ju nijewia japi aní Efesios 5:7? (Ayénachó iné echi imágenes).

¹¹ Satanás ko nakí japi ta napawipo echi pagótami yúa japi nokimea japi ta jilí nirabo nijewia japi Jeobá nulá. Jiti la, Pablo aneli echi efesios japi ke napawima echi pagótami yúa japi chati namuti noká. Echi ko jéaneli: “Tarapé siné echirigá chati sitíi olasi ʼyemi, mapurigá aboni chati sitíi olá” (Efes. 5:7). Tamujé wabé aʼlá tibuka nokisáré echi efesios yúa. ¿Chúsiá? Jiti jipi rawé ke bi nirú echi pagótami japi yúa raʼichabo, nalí ayénachó echi redes sociales. Bilé  hermana Asia bitéami Angela riwéami, a ruyé chúriká machili japi we chati ju ke aʼlá néea echi redes sociales. Echi ko jéaní: “Kilipi niraa echi ko isili japi ni ma ke aʼlá natama. Miná ko ma ni ke cha nilie olayá ‘amigosʼ japi ke riwiwi japi aní echi Biblia. Pe aminana ko ani chotásili natia japi ke me chati ju cha isiá bitélisa japi Jeobá ke galé”. ¡We aʼlá nili japi echi ancianos we simárika iʼwírili Angela! Echi ko jéaní: “Jipi ko ma ni ke nata echi namuti japi buyaní echoná redes sociales, nalí ni nata Jeobá jitra”.

12. ¿Piri ta nokisáré ati nijéwinalaká japi Jeobá nulá?

¹² Tákoré wiká pagótami aní japi echi chati namuti aʼlá ju, tamujé ko ke bichíwipo jiti ta machí japi ke bichíwili ju (Efes. 4:19, 20). Nárika nokiboa: “Japalí ni ke newalesa, ¿achi ni yúa napawí echi compañeros japi ni yúa simí echoná escuela, japi ni yúa nocha o echi pagótami japi ke riwiwi japi Jeobá nulá? ¿Achi ni ke majaka nimí japi aní echi Biblia tákoré echi pagótami cha riká raʼicha tamí jitra?”. Ayénachó ati aʼlá tibuka nokisáré aa echi amigos echoná congregación japi riká aní 2 Timoteo 2:20-22. Newalabo japi ke sinéami tamó iʼwírima sinibí nijewia Jeobá.

SINIBÍ “ECHOʼNÁ GALÁ RAYÉNACHI” PIRÉLIPO

13. ¿Piri aniwáami ju sinibí “olasi mapurigá echoʼná galá rayénachi piréami niráa”? (Efesios 5:7-9).

¹³ Pablo ko iʼwérili iyali echi cristianos Éfeso piréami jiti iʼwérili nokimea ke ku pirea rokowárili niraa, jéaneli: “Sinibí ne wabé galabé olasi mapurigá echoʼná galá rayénachi piréami niráa” (leeri Efesios 5:7-9). Echi ko aniwáami ju japi pirélipo japi riká ne bichíwali cristianos. Alí, ¿chúriká nokiboa? Bilé echi namuti ko ju leeria alí we aʼlá binea japi aní echi Biblia alí echi publicaciones. Japalí ti echi riká nokisá, we natéami ju japi aʼlá binepo Jesús jitra alí japi echi binérili, jiti echi ko ju japi riká echi luz japi “we  galá machíraga olá jenaʼí wichimóbachi piréami” (Juan 8:12; Prov. 6:23).

14. ¿Chúriká tamó iʼwírima echi Onorúami jiwérala?

¹⁴ Ati newalé echi Onorúami jiwérala jiti sinibí “echoʼná galá rayénachi” pirélipo. ¿Chúsiá? Jiti we jilí ju ke isiá echi chati namuti japi nokiwá jenaʼí Wichimóbachi (1 Tes. 4:3-5, 7, 8). Echi Onorúami jiwérala tamó iʼwírima jiti ke bichíwipo japi aní jarecho pagótami alí jiti ke natabo japi riká echi japi ke aʼlá niraa iné japi Jeobá nulá. Ayénachó tamó iʼwírima jiti “wabé galabé níibo, ne wabé bichíwaga raʼíchami” alí “galabé wachínaga oláami” (Efes. 5:9).

15. ¿Piri ti nokisáré jiti narepo echi Onorúami jiwérala? (Efesios 5:19, 20).

¹⁵ Bilé namuti japi ta nokisáré jiti ta narepo echi Onorúami jiwérala ko ju, raʼíchika tania Jeobá. Jesús ko anili japi Jeobá ko iyama “echi Wabé Galabé Riosi Iwigala [jiwérala] echi jaré mapu tániko” (Luc. 11:13). Ayénachó echoná napawíliwachi ata narepo echi Onorúami jiwérala, japalí ta walubéala ané Jeobá echi hermanos yúa (leeri Efesios 5:19, 20). Alí echi ju japi tamó iʼwírima jiti aʼlá niraa pirélipo japi riká Onorúami galé.

16. ¿Piri tamó iʼwírima jiti aʼlá nátika nokiboa? (Efesios 5:10, 17).

¹⁶ Japalí ti nokiboa bilé namuti we natéami, ati natásaré piri ju japi Jeobá nakí alí ti echi riká nokisáré (leeri Efesios 5:10, 17, TNM). Japalí ti aa echi busuréliami japi uchuwi echoná Biblia japi tamó iʼwírima echi namuti jitra japi ta ikí, ata néwariwéliti japi ta machinali piri nata Jeobá. Ata nijéwisaká echi busuréliami, ati aʼlá nátika nokiboa.

17. ¿Chúriká aʼlá nátika nokiboa? (Efesios 5:15, 16; ayénachó iné echi dibujo).

¹⁷ Pablo ayénachó aneli echi cristianos Éfeso piréami japi we aʼlá nátika nokimea (leeri Efesios 5:15, 16). Echi Diablo ko we kanílisa nili japi ta we iʼwérili  nokiboa nokayá echi namuti japi nirú jenaʼí Wichimóbachi alí japi ta ma ke ikíripo nóchilia Onorúami (1 Juan 5:19). Ke jilí ju sapú we natéami niraa inea echi winomí, echi nóchali o binea, alí ma ke iʼwérili isiá nóchilia Jeobá. Ati echi riká ikiyáaká, a keʼré japi ta ayénachó ma nata japi riká echi pagótami jenaʼí Wichimóbachi piréami. A bichíwali ju japi jepuná namuti ke chati ju, nalí ke wabé natéami nísaré japi ta bachá nokiboa. Jiti sinibí “echoʼná galá rayénachi” pirélipo, ati ikírisaré nokayá echi namuti japi wabé natéami ju.

18. ¿Piri isili Donald aminabi we nóchilimia Jeobá?

¹⁸ Iʼwérili isí aminabi we nóchilia Jeobá. Echi riká isili Donald, japi bité echomí Sudáfrica. Echi ko jéaní: “Ani nátiki chúriká ni bité, raʼíchiki Jeobá yúa alí ni aneki japi tamí iʼwírima aminabi we nóchilia echi. Ayénachó ni aneki japi tamí iʼwírima aa bilé nóchali japoná ni a ikírima aminabi we nawesia. Alí Jeobá tamí iʼwírili jiti ni a riwimea. Miná ko, nijé alí nijé upila si, ati chotásiki nochia tiempo completo niraa”.

19. ¿Piri ta nokisáré jiti sinibí “echoʼná galá rayénachi” pirélipo?

¹⁹ Echi carta japi Pablo osélili echi efesios iʼwíriliré jiti we nijéwami nima Jeobá, alí ayénachó tamujé iʼwírima. Japi riká ti ma ineli, tamó iʼwiri aʼlá namuti nokayá japalí ti kanila simari alí aʼlá amigos olayá. Ayénachó tamó iʼwiri we aʼlá binea japi aní echi Biblia jiti echi riká echi japi ta biné tamó iʼwírima aʼlá namuti nokayá. Alí tamó newalari japi we natéami ju echi Onorúami jiwérala jiti tamó iʼwiri olayá we aʼlá cualidades. Ati nijéwisaká echi busuréliami japi Pablo anili, ati we aʼlá nátika nokiboa alí kanílitipo Jeobá. Echi riká ti nokisáaká, ma ti ke checho ku rokowárili pirélipo, nalí echoná rayénachi.