Ati wikáwitami nipo echi namuti chati jitra japi ta nokali jiti Jesús mukuli tamujé jitra (Efes. 1:7). Nalí echi Biblia ko ruyé japi Onorúami ko we kilí nili alí wikáwili echi chati namuti japi nokali chabé (Rom. 3:25, nota, TNM). Jepuná ko aniwáami ju japi ma chabé jonsa echi ko wikáwili echi chati namuti japi nokali chabé piréami kecho mukúachi Jesús. ¿Chúsiá Jeobá omérili wikawia chabé piréami alí a bijí wachíniga isíami niya?

Japalí jonsa Jeobá anili japi nawama riweili bilé japi niyúbima echi pagótami japi bichíyami ju, echi jitra ko nili japi riká ko Jesús ma mukuká natétila (Gén. 3:15; 22:18). Jeobá ko we bichíwili japi pe aminana echi Nolá a mukuká natétima (Gál. 4:4; Heb. 10:7-10). Japalí Jesús biteili jenaʼí Wichimóbachi, Jeobá ko riweli japi wikáwima echi chati namuti japi nokayé echi pagótami japi bichíyami nili tákoré Jesús kecho bijí mukuyé echi jitra (Mat. 9:2-6).