1, 2. ¿Piri ta nárika noká isini kaachi?

 ¿ACHI siné kaachi ami nárika isili achi Jeobá mi iyá japi mi tánili? Echi riká nísaká, ke mujé bi ju. Wiká hermanos ayénachó aní japi echi riká cho nárika nokali, nalí wabé echi riká nokali japalí we risoa nílili. Tamujé ayénachó we jilí niráiré inea chúriká Jeobá tamó iʼwiri japalí ti we risoa nili.

² Jenaʼí binelíwami binepo chúsiá ti aʼlá machí japi Jeobá a iyá japi tánili echi japi nijéwami ju (1 Juan 5:15). Ayénachó binepo chúsiá ti isini kaachi nílipo japi Jeobá ke tamó iyá japi ta tánili alí chúriká Jeobá tamó iyá japi ta tánili.

3. ¿Chúsiá nakí Jeobá japi ta echi yúa raʼichabo?

³ Echi Biblia aní japi Jeobá we tamó galé alí japi tamujé we natéami ju echi jitra (Ageo 2:7; 1 Juan 4:10). Jiti la tamó ané japi ta echi yúa raʼichabo alí iʼwírili tánipo (1 Ped. 5:6, 7). Jeobá ko tamó iʼwírinali jiti ta echi mulíwipo alí jiti ta anachabo suwaba echi karú ikiwáami.

4. ¿Chúriká ti machí japi Jeobá ko a iʼwiri echi japi nijéwami ju? (Ayénachó iné echi dibujo).

⁴ Echoná Biblia raʼicha wiká pagótami jitra japi nijéwami nili alí japi iʼwíritami nili japalí nikúurili tánili. Ati néwalayére japi riká isili Jeobá iʼwiria echi silíami David. Echi ko wiká jitra sayéritami nili, jiti la wisabé niraa raʼíchili Jeobá yúa iʼwírili tania. Siné kaachi echi ko jéaneli Jeobá: “Oh, Jeobá, kipú japi ni mi ané; kipú japi ni mi iʼwírili  tani. Jiti mi ke tamó riwé alí mi wachíniga isíami ju, tamí iʼwiri” (Sal. 143:1) Jeobá ko a kipuli japi David tánili alí iʼwírili (1 Sam. 19:10, 18-20; 2 Sam. 5:17-25). Jiti la David ko jéanili: “Jeobá ko mulipi yúa atí japi yúa raʼicha ko”. Alí tamujé ayénachó bichiwi japi echi riká ju (Sal. 145:18).

5. ¿Achi sinibí Jeobá iʼwírili echi japi nijéwami nili japi riká echi tánili? Ruyé bilé ejemplo. (Ayénachó iné echi dibujo).

⁵ Japi ta raʼíchika tánili Jeobá, a keʼré japi echi ke tamó iʼwírima japi riká tamujé aboi nakí. Echi riká ikili echi apóstol Pablo. Echi ko ikili bilé namuti we jilírami alí anili japi echi ko nili japi riká bilé soʼiwá japi olali binoy sapálachi, alí bisiá niraa tánili Jeobá japi ku iyema. ¿A kipuli Jeobá japi Pablo tánili? Ayena, nalí ke japi riká Pablo nakili. Jeobá ko ke iyeli echi namuti we jilírami, nalí echi ko iyali jiwérali jiti echi riká aminabi nóchilima echi (2 Cor. 12:7-10).

6. ¿Chúsiá ti isini kaachi níliporé japi Jeobá ke tamó iʼwiri japalí ti iʼwírili tánisa?

⁶ A keʼré japi Jeobá ayénachó tamujé iʼwírima japi riká ti ke buwé. Nalí we ti aʼlá bichiwi japi Jeobá ko aʼlá machí piri ju japi ta newalé alí japi we aʼlá ju tamujé jitra. Alí isini kaachi “ne wabé simírami niráa olayá, suwaba namuti máputa tani tamujé, ayénachó mapurigata chopi ʼnata tamujé” (Efes. 3:20). Jiti la, echi ko tamó iʼwírimiré japalí ti ke buweli o japi riká ti ke mayeli japi isima.

7. ¿Chúsiá isini kaachi ata sinúrika tánipo Jeobá echi namuti japi ta ma tánili? Ruyé bilé ejemplo.

⁷ Isini kaachi a keʼré japi ta sinúrika tánipo bilé namuti japalí ti ma aʼlá inámisa piri ju japi Jeobá nakí. Ma inepo japi echi riká isili echi hermano Martin Poetzinger. Japalí kulí niwili, echi ko torúami nili jiti erta asimea echoná campo de concetración nazi. Ne kulí ko, echi tánili Jeobá japi iʼwírima jiti ku machínima alí echi riká asimea echi upila yúa alí ku omérima nawesia. Nalí, japalí simírili okuá tarali echi ko nílili japi Jeobá ke iʼwírima jiti ku machínima. Jiti la, echi hermano Poetzinger tánili Jeobá: “Périkó, tamí iʼwiri jiti ni machimea japi mujé nakí japi ni isima”. Alí miná ko nátili suwaba echi namuti jitra japi ikiyé echi hermanos japi mochili echoná campo de concentración. Japi riká wiká ko  we siwea nilie jiti ke mochili echi upila yúa alí echi kúchuwala. Jiti la echi hermano Poetzinger aneli Jeobá: “Matétarabá jepuná kulíwami nóchali jitra”. Alí echi riká isili echi kima bamíali japalí erta asali.

8. ¿Piri namuti we natéami newalabo japalí ti Jeobá yúa raʼicha?

⁸ Ati newalásaré japi Jeobá ko ma aʼlá machí japi chúriká isima alí chu kabú isima japi anili. Japi riká, echi ko anili japi suwábima suwaba japi tamó risoa níliti, echi desastres naturales, echi nawilí alí japi ta ma ke suwiboa. Jeobá ko néema binoy Gobiérnowala echi riká isimia (Dan. 2:44; Apoc. 21:3, 4). Nalí jipi ko a bijí riwé japi Satanás nulama jenaʼí Wichimóbachi (Juan 12:31; Apoc. 12:9). b Jeobá akaréwisaká suwaba echi chati namuti japi nirú jenaʼí Wichimóbachi, a riwélima japi riká ko Satanás aʼlá machí nulayá. Jiti la, tákoré ti buwésaré echi namuti aʼláala japi Jeobá anili japi isima, echi ko ke aniwáami ju japi ke tamó iʼwiri. Ma binepo jaré namuti japi isimí Jeobá tamó iʼwírimia.

9. ¿Chúriká tamó iʼwiri Jeobá japalí ti nokiboa bilé namuti we natéami? Ruyé bilé ejemplo.

⁹ Tamó iʼwiri jiti machíami nipo. Jeobá ko aní japi tamó iʼwírima jiti aʼlá machiká nokiboa echi namuti japi ta nokinali. Ati aminabi wabé newalé japi tamó iʼwírima aʼlá machiká nokayá japalí ti nokiboa bilé namuti we natéami, japi riká achi ti niwipo o ke (Sant. 1:5). Ma inepo japi isili bilé hermana ke niwíkami María riwéami. c Echi ko we kanila nóchilie Jeobá japi riká precursora regular japalí machili bilé hermano. Echi ko jéaní: “Pe aminana ma ti we aʼlá amigos nílisiki alí ti korúa inili anakupi niraa. Ani machiyé japi ni anisáré achi ni niwima o ke. Jiti la ni wilí raʼíchiki Jeobá yúa echi namuti jitra. Ani nakiyé japi Jeobá tamí iʼwírima, nalí ni machiyé japi nijé binoy anisáré japi ni isima”. María ko nílili japi Jeobá a iʼwírili jiti aʼlá machiká isima. ¿Chúriká? Echi ko aali echoná publicaciones alí riwali wiká artículos japi we aʼlá ruyeli japi echi machinali. Ayénachó echi iyela japi Testigo ju, we aʼlá busuréliami iyali japi iʼwírili machiyá japi isima. Jiti la miná ko María we aʼlá nátika isili.

10. Japi riká aní Filipenses 4:13, ¿chúriká iʼwírima Jeobá japi echi nijéwami ju? Ruyé bilé ejemplo. (Ayénachó iné echi foto).

¹⁰ Tamó iʼwiri anachia. Japi riká isili echi apóstol Pablo yúa, Jeobá ayénachó tamó iyá jiwérali jiti anachabo  echi karú ikiwáami (leeri Filipenses 4:13, TNM). Ma inepo japi chúriká iʼwírili bilé hermano Benjamin riwéami. Taa ka jonsa, echi ko wiká bamíali biteili echi téemala yúa japoná pireili japi júmisikami ju echi guerra jitra echomí África. Echi ko jéaní: “Ani wisabé niraa raʼichie Jeobá yúa alí ni tanie jiwérali jiti ni aʼlá isima. Echi ko a tamí kipuli alí tamí iʼwírili jiti ni kilí nílima, ke majaka nawisama alí ni olama publicaciones jiti ni ke riwema binea echi jitra”. Ayénachó aní: “Leeria japi chúriká Jeobá iʼwírili jarecho Testigos anachia, tamí iʼwírili jiti ni ke siwema alí ni ke riwema nijewia Jeobá”.

11, 12. ¿Chúriká omérima néea Jeobá echi hermanos tamó iʼwírimia? (Ayénachó iné echi foto).

¹¹ Nee echi hermanos tamó iʼwírimia. Bilé rokojó kecho séachi japalí Jesús miʼlirúami nima riweili, echi ko we raʼíchili Jeobá yúa alí tánili japi iʼwírima jiti echi pagótami ke animea japi echi ko we cha riká isili Jeobá jitra. Jeobá ke echi riká isili, nalí iʼwírili néeka bilé ángel jiti iʼwérili iyama (Luc. 22:42, 43). Echi riká cho jipi, Jeobá tamó iʼwérili iyámiré néeka echi hermanos japalí tamó raʼichi teléfono jitra o japalí simea tamujé bitélachi. Jiti bela sinéami tamujé ati oméripo iʼwérili iyayá echi hermanos japalí newalesa (Prov. 12:25).

¹² Jipi ko inepo japi ikili bilé hermana Míriam riwéami. Kulí jaré tarali simírisa japalí mukuli echi kunala, echi ko bineli asali echoná bitélachi we risoa nilia. Echi ko we nalali alí newaleli japi bilé echi yúa raʼichama. Echi ko jéaní: “Ke ni newa nilie raʼichánilia bilé yúa, jiti la ni iʼwírili tániki Jeobá. Japalí ni bijí raʼichia asali Jeobá yúa nalayá, anéchini echi teléfono. Echi ko nili bilé anciano, bilé we aʼlá amigo”. Echi anciano alí echi upila iʼwérili iyali Míriam, jiti la echi ko a we bichiwi japi Jeobá isili japi echi hermano raʼíchima.

13. ¿Chúriká omeri néea Jeobá echi japi ke nijéwami ju iʼwírimia echi Testigos? Ruyé bilé ejemplo.

¹³ A keʼré japi néema echi pagótami japi ke nijéwami ju echi (Prov. 21:1). Jeobá ko kipú echi oraciones japi niwá japi  echi nijéwami ju alí isini kaachi nee echi pagótami japi ke nijéwami ju iʼwírimia echi. Japi riká, echi ko isili japi echi silíami Artajerjes riwema Nehemías ku simíami echomí Jerusalén ku atéwimia echi ciudad (Neh. 2:3-6). Jipi rawé, Jeobá ayénachó omeri isiá japi echi japi ke Testigos ju, ayénachó tamó iʼwírima japalí ti newalé.

14. ¿Chúriká mi iʼwiri japi ikili Soo Hing?

¹⁴ Bilé hermana Soo Hing riwéami, nílili japi Jeobá néeli echi doctor echi iʼwírimia. Echi ranala ko nayú wiká nawilí jitra echoná mochokóalachi alí siné kaachi ko we risoa ikili. Soo Hing alí echi kunala riweli echi nóchili tibumia aboi ranala, jiti la echi ko ma ke winomiwa ripili. Echi namuti we jilí nili, jiti la Soo Hing anili japi ma ke omérili. Jiti la raʼíchili Jeobá yúa ne sulachí jonsa alí aneli japi echi iʼwírima. Echi doctor ko machili japi ikiyé, jiti la iʼwírili tánili echi Gobierno alí iʼwírili aaya bilé kalí japoná pirélima nalí japi ke me natijí. Miná ko Soo Hing jéanili: “Ata ineki japi chúriká Jeobá tamó iʼwírili. Aʼlá ti machí japi echi ko a tamó kipú” (Sal. 65:2).

15. ¿Chúriká machili bilé hermana japi Jeobá a iʼwírili japi echi tánili?

¹⁵ Ke ne sinibí Jeobá tamó iʼwiri néeka weli namuti. Nalí japi riká tamó iʼwiri a ju japi ta newalé jiti ta ke riwepo echi nijewia. Jiti la, we aʼlá machiká mochísaré jiti ta inepo chúriká isimí Jeobá tamó iʼwiria. Bilé hermana Yoko riwéami, nílili japi riká ko Jeobá ke iʼwiria japi echi tánili. Nalí miná ko, echi ko chotásili osayá suwaba echi namuti japi tanie Jeobá. Pe aminana echi hermana checho ku ineli japi osali alí machili japi Jeobá a iʼwírili ne sojí suwaba echi namuti jitra japi echi tánili, alí jarecho si namuti japi echi ke newalali. Jiti la, we natéami ju japi ta isini kaachi kilí niraa natabo japi chúriká Jeobá tamó iʼwiri japi ta tani (Sal. 66:19, 20).

16. ¿Chúriká ti néwariwéliti japi ta bichíyami ju japalí ti Jeobá yúa raʼicha? (Hebreos 11:6).

¹⁶ Ati newalé we bichíyami niya japalí ti Jeobá yúa raʼicha, nalí ayénachó jiti kanílipo machiyá japi chúriká isimí Jeobá tamó iʼwiria (leeri Hebreos 11:6).  Ma inepo japi bilé niwíkami, Mike alí Chrissy riwéami, echi riká nokali. Echi okuánika simánilie Betel. Mike jéaní: “Ati wisabé niraa júuliki solicitud alí ti wisabé niraa raʼíchiki Jeobá yúa echi namuti jitra, nalí ke ti siné bayeri”. Mike alí Chrissy ke riweli bichiwia japi Jeobá aʼlá machí kumi nalí echi we aʼlá nóchilima. Jiti la echi ko iʼwérili nokali nóchilia Jeobá japi riká precursores regulares japoná pe kuabi publicadores nili alí iʼwírili nochia echoná proyectos de construcción. Jipi ko nocha japi riká circuito. Mike jéaní: “Jeobá ko ke tamó iʼwírili japi riká ti nakili, nalí a tamó iʼwírili alí isini kaachi wabé aʼlá japi riká ti ke mayeli japi echi riká isima”.

17, 18. Japi riká aní Salmo 86:6, 7, ¿piri ta we aʼlá machí?

¹⁷ (Leeri Salmo 86:6, 7). David ko we aʼlá machiyé japi Jeobá kipúe alí iʼwirie japi echi tanie. Alí ami bichíwisaré japi echi riká isimí mujé yúa. Echi ejemplos japi ta ma bineli jenaʼí binelíwami, tamó binérili japi Jeobá tamó iʼwiri jiti aʼlá machiká nokiboa alí tamó iyá jiwérali jiti ta oméripo anachia. Ayénachó ti bineli japi Jeobá nee echi hermanos jiti tamó iʼwírima alí isini kaachi echi pagótami japi ke nijéwami ju.

¹⁸ Tákoré Jeobá ke ne sinibí tamó iʼwírima japi riká tamujé aboi nakí, ati aʼlá machí japi sinibí tamó iʼwírima. Echi ko tamó iyama japi ta newalé alí japalí ti newalé. Jiti la, aminabi we bichíwipo japalí ti raʼicha Jeobá yúa japi echi tamó tibuma jipi alí japi tamó iyama ibili niraa japi ta newalé (Sal. 145:16).