BINELIWAMI 21
CANCIÓN sjj 107 Jeobá ko bineri chúriká galéami nipo
¿Chúriká mi machimea jépuká we aʼlá kunala o aʼlá upila nima?
“Japi ritiwá bilé upila we aʼláala, ritiwá bilé namuti we natéami japi riká echi corales” (PROV. 31:10).
JAPI TA JITRA BINEPO
Inepo jaré aʼlá busuréliami japi aní echi Biblia japi iʼwírima echi japi amí bilé aʼlá hermana o bilé hermano japi yúa niwima alí chúriká jarecho hermanos ayénachó omérima iʼwiria echi japi niwínali.
1, 2. a) Bilé hermano o bilé hermana niwínalaká, ¿piri namuti bachá we aʼlá natásaré? b) ¿Piri ta ruyá aní japalí ta nee echi raʼíchali “novios”? (Iné echi “Raʼíchali japi we natéami ju”).
¿AMI niwínali? Tákoré ke natéami ju japi ta niwíkami nipo jiti kanila pirélipo, wiká hermanos alí hermanas echi riká nokinali. Nalí, kecho echi riká isimia, ami olásaré japi mi newalé, we mi aʼlá amígowala nísaré Jeobá yúa alí mi we aʼlá nátami nísaré (1 Cor. 7:36, TNM). a Echi namuti mi iʼwírima jiti mi kanílima japalí mi ma niwisa.
2 A bichíwali ju japi niwínali a jilí nirama aaya echi japi yúa niwima (Prov. 31:10). Alí tákoré ma riwisaa bilé japi korú, a jilí nímiré chotasia novios niya. b Jenaʼí binelíwami binepo piri iʼwírima jiti bilé hermano o bilé hermana aʼlá nátika isima aa bilé novio o novia ma, alí chúriká nokisáré jiti chotásima novios niya. Ayénachó binepo piri nokimea jarecho hermanos echoná congregación jiti iʼwírima echi japi niwínali.
CHÚRIKÁ MI MACHIMEA JÉPUKÁ AʼLÁ KUNALA O AʼLÁ UPILA NIMA
3. ¿Piri natásaré bilé hermano o bilé hermana japi niwínali?
3 Kecho bijí novios niya, we natéami ju japi mi aʼlá machimea chúriká nísaré echi japi mi yúa niwínali. ¿Chúsiá? Jiti mi kecho bijí aʼlá machisáaká, a keʼré japi mujé ko anema japi mi ke novio o novia nínali bilé yúa japi aʼláala upila nima o kunala ma. O mujé ko chotásimiré novio o novia niya bilé yúa japi ke chopi iyiri isínali japi riká mujé. Nalí wabé natéami ko ju, japi echi ma pakótami nísaré (1 Cor. 7:39). We be nalí, jepuná ko ke aniwáami ju japi sinéami japi pakótami ju we aʼláala upila nima o kunala ma. Jiti la, aʼlá nima japi mi nárika isima: “¿Piri ju japi ni isínali pe aminana? ¿Chu isíami nísaré o chu iyiri cualidades olásaré echi japi ni yúa niwínali? ¿Achi aʼlá ju japi riká ni nakí o japi ni nata?”.
4. Japalí jaré ke niwíkami raʼicha Jeobá yúa, ¿piri namuti tani?
4 Ami niwínalaká, a keʼré japi mujé ko ma raʼíchili Jeobá yúa echi namuti jitra (Filip. 4:6). We be nalí, Jeobá ko ke bilé aneli japi áalima jépuká yúa niwima. Nalí echi ko ami iʼwírima aa, jiti echi ko we natéami niraa iné japi mi nili alí japi mi newalé. Jiti la, kiti riwé anea Jeobá japi mi nakí alí japi mi inili (Sal. 62:8). Ayénachó tani japi mi iʼwírima jiti mi kilí buwéami nima alí jiti mi aʼlá nátami nima (Sant. 1:5). Bilé hermano Estados Unidos bitéami japi John riwewi, c aní piri namuti ruyé Jeobá japalí echi yúa raʼicha, echi ko jéaní: “Ani ané Jeobá japi chúriká ni nakí japi nima echi hermana japi ni yúa niwínali. Alí ni tani japi ikimea jaré namuti japoná ni omérima machiyá bilé hermana. Ayénachó ni tani japi tamí iʼwírima olayá we aʼlá cualidades jiti ni we aʼlá kunala nima”. Bilé hermana Sri Lanka bitéami, Tanya riwéami, jéaní: “Nijé ko tani Jeobá japi tamí iʼwírima we nijéwami niya alí kaníliami, japalí ni chéami bijí aa japi ni yúa niwima”. We be nalí tákoré mi ke sapú riwisá bilé japi mi yúa niwima, Jeobá ko aní japi mi iyama suwaba namuti japi mi newalé jiti mi kanílima (Sal. 55:22).
5. ¿Piri namuti iʼwírima echi japi ke niwíkami ju jiti machimea hermanos o hermanas japi galé Jeobá? (1 Corintios 15:58; ayénachó iné echi fotos).
5 Echoná Biblia aní japi ta iʼwérili nokiboa “echi Walubéala nóchala nokayá” (leeri 1 Corintios 15:58, TNM). Ami nijéwisaká jepuná busuréliami, mujé ko ikírima napawika simiria wiká hermanos alí hermanas yúa. Echi riká ke bi amigos mi olama, ayénachó mi machimea jarecho japi ke niwíkami ju japi ayénachó we nóchilia muchuwi Jeobá japi riká mujé. Alí ayénachó ami we kanílima jiti mi machí japi mi kaníliti Jeobá.
Ami nóchilisaká Jeobá, ami machimea wiká hermanos alí a keʼré japi jaré echi, ayénachó niwínali. (Iné echi párrafo 5).
6. ¿Piri nalí wabé natéami niraa inésaré echi japi niwínali?
6 We be nalí, kiti riwé japi mi wabé natéami niraa inema aaya jépuká mi yúa niwima (Filip. 1:10). Japi wabé mi kanílitima ko ju, Jeobá amígowala niya, ke ko niwíkami niya (Mat. 5:3). Ayénachó, japalí mi kecho bijí niwí, ami ikírima aminabi nóchilia Jeobá (1 Cor. 7:32, 33). Jessica, japi bité echomí Estados Unidos alí niwili japalí mulipi 40 bamíbami nili, jéaní: “Tákoré ni nakiyé niwínalia, ke riwea nawesia tamí iʼwírili jiti ni kanílima”.
AʼLÁ INÉ CHÚRIKÁ JU ECHI JAPI MI KORÚ
7. ¿Chúsiá wabé aʼlá nima japi mi bachá aʼlá inema chúriká ju echi japi mi korú? (Proverbios 13:16).
7 Ami ma riwálaká bilé japi mi mayé japi we aʼlá kunala nima o aʼlá upila ma, ¿achi mi sapú anésaré japi mi korú? Echi Biblia ko aní japi aʼlá nátami ju ko, bachá aʼlá nata japi isima (leeri Proverbios 13:16). Jiti la, kecho bijí anea japi mi korú, aʼlá nima japi mi bachá aʼlá inema chúriká ju echi. Bilé hermano Países Bajos bitéami japi Albert riwé, jéaní: “Isini kaachi japalí ti korúa nili bilé, ke wilí rojorá japi ta nili. Jiti la we aʼlá ju japi mi bachá aʼlá inema echi japi mi korú, ke sapú chotásisaré novios niya”. Echi riká mi isísaká, ayénachó mi iʼwírima aʼlá machiyá achi echi hermana o hermano ju, japi mi ne bichíwali korú.
8. ¿Piri isísaré bilé hermano o hermana jiti inema chúriká ju echi japi korú? (Ayénachó iné echi fotos).
8 Nalí ami natámiré: “¿Piri ni isima jiti ni aʼlá inema chúriká ju bilé hermano o hermana?”. Echoná napawíliwachi o japalí timí napawika simari echi hermanos yúa, mujé ko inema chúriká ju echi. Japi riká, achi we aʼlá Jeobá amígowala ju, jépuká ju echi amígowala alí piri namuti jitra raʼicha (Luc. 6:45). Ayénachó piri namuti isínali pe aminana alí achi chopi iyiri ju japi riká mujé isínali. Ami aʼlá machináliaká, nari echi ancianos echoná congregación japoná echi napawí o jarecho hermanos japi aʼlá machí echi (Prov. 20:18). Ami omeri naria chúriká ju echi, chu iyiri cualidades olá (Rut 2:11). Nalí be, japalí mi iné echi hermana o hermano, ke mi isísaré japi echi cha nílima. Kiti nari suwaba namuti echi jitra. Riwiwi japi echi nili alí ke mi sinibí iyénisaré japoná echi iyena.
Kecho bijí anea bilé japi mi korú, bachá aʼlá iné chu isíami ju. (Iné echi párrafos 7 alí 8).
9. Kecho bijí ruyea bilé japi mi korú, ¿piri namuti we mi aʼlá machisáré?
9 Alí, ¿chu kilí mi buwésaré kecho bijí ruyemia echi hermano o echi hermana japi mi korú? Ami sapú ruyésaká, echi ko natámiré japi mi ke aʼlá nátami ju (Prov. 29:20). Nalí, echi ma machisáaká japi mujé korú alí mi ke ruyesa, echi ko natámiré japi mi ke machí piri mi isima (Ecl. 11:4). Ami newalásaré jepuná: jiti mi bilé ruyema japi mi korú, ke aniwáami ju japi mujé ko ma aʼlá machisáré japi mi echi yúa niwima. Mujé ko nalí we aʼlá machisáré japi ma aʼlá ju japi mi niwima alí japi echi hermano o hermana nímaré we aʼlá kunala o upila ma.
10. Ami inéaká japi bilé mi korú nalí mujé ke echi riká cho níliaká, ¿piri mi isísaré?
10 Nalí, ami inésaká japi bilé mi korú, ¿piri mi isísaré? Mujé ke echi riká cho níliaká, japi riká mi isimí néwariwélitisaré japi mi ke korú. Nalí be, ke mi aʼlá isíami nima, ami riwésaká japi echi hermana o echi hermano natama japi timí a omérima novios niya (1 Cor. 10:24; Efes. 4:25).
11. ¿Chúriká noká echi pagótami jaréanami países japalí bilé niwínali, alí piri newalásaré?
11 Jaréana países echi wénwala ju japi aní jépuká yúa niwima echi kúchuwala. Jaréanami ko, echi téemala o echi amígowala ju japi aali echi japi ke niwíkami ju japi yúa niwima alí noká jaré namuti jiti echi napawika simárima alí anakupi machimea. Ati anésiwaká japi ta nokiboa bilé jepuná namuti, natabo piri ju japi nakí echi okuánika. Alí, ati níliaká japi ta ma riwali japi yúa niwima bilé amigo o bilé tamujé téemala, iʼwérili nokiboa aʼlá machiyá chúriká ju echi alí chu iyiri cualidades olá. Ayénachó wabé natéami ko ju japi we aʼlá Jeobá amígowala nima, ke ko echi winomí o achi binékami ju echoná escuela. Nalí be, newalabo japi echi japi ke niwíkami ju animea achi niwima o ke (Gál. 6:5).
CHÚRIKÁ MI ANEMA BILÉ JAPI MI KORÚ
12. Ami korúaká bilé alí mi chotásinalaká novios niya echi yúa, ¿chúriká mi anema?
12 Ami korúaká bilé alí mi chotásinalaká novios niya echi yúa, ¿chúriká mi anema? d Raʼichá echi yúa teléfono niraa o japoná nirú jarecho pagótami. We aʼlá ané japi mi korú alí japi mi machinali echi (1 Cor. 14:9). Echi mi anésaká japi bijí natásaré, riwé japi natama (Prov. 15:28). Nalí anisáaká japi ke mi korú, kiti aminabi iʼwérili ané.
13. ¿Piri mi isísaré bilé mi anésaká japi mi korú? (Colosenses 4:6).
13 ¿Piri mi isísaré bilé mi anésaká japi mi korú? Newalá japi echi ko iʼwérili isili mi anemia japi echi inili, jiti la simárika raʼichá echi yúa alí riwiwi (leeri Colosenses 4:6). Ke mi machiyáaká piri mi anema, ané japi mi natama, nalí kiti me wilí isí (Prov. 13:12). Ke mi novio nínalaká echi yúa, aʼlárika alí simárika ruyé. Bilé hermano Austria bitéami, Hans riwéami, aní piri isili japalí bilé hermana aneli japi echi korú alí japi echi machinali: “Ani we simárika aneki japi nijé ko ke korú echi, alí ni we sapú echi riká isiki jiti echi ko ke natama japi ni a korú. Echalí jonsa, ani aʼlá nati japi chúriká ni isimí echi yúa”. We be nalí, ami novio nínalaká echi yúa, raʼichá echi yúa japi mi inili alí japi chúriká mi nakí japi timí nokiboa japalí timí novios nisa. Jiti omáana piréami sinúrika nokáami ju, echi jitra a keʼré japi ibili emi sinúrika natama.
¿CHÚRIKÁ TI OMERI IʼWIRIA ECHI JAPI KE NIWÍKAMI JU?
14. Ati iʼwírinalaká echi japi ke niwíkami ju, ¿piri ta ke nokisáré?
14 ¿Piri ta omeri nokayá sinéami tamujé iʼwírimia echi japi niwínali? Bachá, we aʼlá nátika nokiboa japi ta jitra raʼicha (Efes. 4:29). Jiti la ti nárika nokisáré: “¿Achi ni raʼicha jaré namuti echi jitra jiti jarecho achimea? Japalí ni iné bilé hermano o bilé hermana napawika raʼíchachi, ¿achi ni sapú nata japi ma anakupi korú?” (1 Tim. 5:13). Ke siné nílitipo bilé hermano japi ke natéami ju o japi ke aʼlá isimí, jiti ke niwíkami ju. Hans, japi ta jitra bineki echoná párrafo 13, ruyé: “Jaré hermanos ko jériká anijó: ‘¿Chúsiá mi ke niwí? Mujé ko ma ochérikami ju, ma mi ke niwimaʼ. Jepuná raʼíchali ko, pe níliti echi hermanos japi ke me natéami ju alí iníliti japi iʼwérili anéliwa japi niwísaré”. Nalí wabé aʼlá ju japi ta anepo namuti japi iʼwérili iyama (1 Tes. 5:11, TNM).
15. a) Japi riká aní Romanos 15:2, ¿piri ta nokisáré iʼwírimia echi japi niwínali? (Ayénachó iné echi foto). b) ¿Chu iyiri namuti mi baʼórili japi machina echoná video? (Iné echi nota).
15 Alí, ¿ati mayésaká japi bilé hermano alí bilé hermana aʼlá nima japi okuaka niwísaré? Echi Biblia ko aní japi ta we natéami niraa inésaré japi chu nili jarecho (leeri Romanos 15:2). Wiká japi ke niwíkami ju ke nakí japi jarecho anema jépuká yúa niwima, alí ti riwíwisaré japi echi nakí (2 Tes. 3:11, TNM). Alí jarecho ko a nakí japi ta iʼwíripo, nalí echi tamó iʼwírili tánisaká (Prov. 3:27). e Bilé hermana Lydia riwéami, japi bité echomí Alemania, jéaní: “Ami omérima bayea echi hermano alí hermana japoná wiká napawí, jiti echoná aboi anakupi machimea alí raʼichama”.
Japalí timí napawí kanila simárimia jarecho hermanos yúa, echalí ju japalí echi ke niwíkami omeri machiyá jarecho alí raʼichia echi yúa. (Iné echi párrafo 15).
16. ¿Piri newalásaré echi japi ke niwíkami ju?
16 Tákoré ti ke niwíkami ju o ma niwíkami, sinéami ta omeri we kaníliami niya (Sal. 128:1). Jiti la, ami niwínalaká nalí ke mi cho bijí riwiyáaká jépuká yúa niwima, aminabi iʼwérili isí nóchilia Jeobá. Bilé hermana Macao bitéami Sin Yi riwéami, jéaní: “Echoná Wichimóbachi we baʼóachi, ami wilí kanila simírima mujé kunala alí upila yúa. Jiti la, jipi ke mi cho niwíkami nísaká, we kanila simiri jiti ke wiká bamíali nima”. Nalí, ma mi chotásilaká novio o novia niya bilé yúa, echoná biléala binelíwami binepo piri timí omeri nokayá jiti emi we aʼlá nátika nokimea.
CANCIÓN sjj 137 We nóchami alí galéami ju echi hermanas
a We aʼlá mi iʼwírima leeria echi artículo riwéami “Ser novios. Parte 1: ¿Estoy listo para salir con alguien?”, japi chukú echoná jw.org.
b RAʼÍCHALI JAPI WE NATÉAMI JU: Jenaʼí binelíwami alí biléala, japalí ti nee echi raʼíchali novios, echi ko ruyá aní japalí bilé rijoi alí mukí anakupi niraa machísimi jiti inema achi aʼlá upila o aʼlá kunala nima. Jaréanami países ayénachó néeliwa jepuná raʼíchali español niraa: salir con alguien, ennoviarse, empezar una relación, hacerse novios o estar conociéndose. Alí chotasi novios niya japalí bilé rijoi alí bilé mukí aní japi anakupi korú, alí suní japalí niwí o japalí ma riwé novios niya.
c Sinúrika ju jaré riwalá.
d Jaréanami países, echi rijoi ju japi bachá ané echi tiwé japi korú. Nalí ke chati ju japi echi tiwé ayénachó anema (Rut 3:1-13). Ami riwimea jaré busuréliami echoná artículo riwéami “Los jóvenes preguntan... ¿Cómo le digo lo que siento por él?”, echoná oselí ¡Despertad! 22 inárachi octubre bamíali 2004.
e Iné echoná jw.org echi video Iʼwérili noká jiti we bichíyami nima. Japi ke niwíkami ju.
