BINELÍWAMI 20
CANCIÓN sjj 67 Nawisasia simabo
Ke riwepo nawesia jiti ta galéami ju
“Jeʼná Galabé Riosi Raʼíchala ne suníami jenaʼí wichimóbachi [...] nawésalami níima” (MAR. 13:10).
JAPI TA JITRA BINEPO
Chúriká galéami niya tamó iʼwiri iʼwérili nokayá nawesia echi aʼláala raʼíchali ne sulachí jonsa.
1. ¿Piri ta bineli echoná napawíliwami we natéami 2023 japi sinepi bamíali niraa ju?
¡WE SEMATI nili echi napawíliwami we natéami 2023 japi sinepi bamíali niraa ju! a Echoná ati bilecho riká ku ruyeri jaré namuti japi ta bichiwi alí niruili jaré anuncios japi chúriká nokiboa nawesia. Japi riká, ata ruyeri japi jaré pagótami chotásima nijewia Jeobá japalí ma suwábitami nisa echi Walúala Babilonia. Ayénachó aniri japi noviembre jonsa bamíali 2023, ma ke osiboa echi horas alí jarecho si namuti japi ta ikí noká nawesia echoná informe. ¿Achi aniwáami ju jepuná japi ma ke me natéami ju nawesia? ¡Ke tasi!
2. ¿Chúsiá jipi aminabi we natéami ju japi ta nawisabo? (Marcos 13:10).
2 Ibili rawé japi simírisimi, aminabi we natéami ju japi ta nawisabo. ¿Chúsiá? Jiti ma mulipi sea echi jubá rawé. Natabo japi anili Jesús echoná Marcos 13:10 (leeri). Mateo ko osali japi echalí Jesús anili japi ta nawisásaré echi aʼláala raʼíchali omáana Wichimóbachi, kecho séachi echi “ne jubá suwibálawachi rawé” (Mat. 24:14). Jepuná raʼíchali aniwáami ju japalí suwábitami nisa suwaba japi Satanás níwala ju. Jeobá ko ma anili “chu kilíbuko echirigá ikimea”, alí “echalí rawé mapalí echirigá ikimea” (Mat. 24:36; 25:13; Hech. 1:7). Alí ibili rawé japi simírisimi, ata aminabi mulipi sea echalí rawé (Rom. 13:11). Jiti la, kecho séachi echalí rawé, ke ti riwésaré nawesia.
3. ¿Chúsiá ti nawesa?
3 Sinéami ta nárika nokisáré jepuná: ¿chúsiá ti nawesa echi aʼláala raʼíchali? Jiti ta galéami ju. Japalí ti nawesa, ati néwariwéliti japi ta galé echi aʼláala raʼíchali, echi pagótami, Jeobá alí echi rewalá. Ma inepo ibili niraa jepuná namuti.
ATA NAWESA JITI TA GALÉ ECHI AʼLÁALA RAʼÍCHALI
4. ¿Piri ta noká japalí ta kipú bilé raʼíchali aʼláala?
4 ¿Chumi nílili japalí mi aneri bilé raʼíchali aʼláala? Japi riká, japalí bilé téemala japi mi galé ma raneli o japi mi ma olá bilé nóchali japi mi we newaleli. Mujé ko we kaníliliré alí mi we inili ruyea mujé téemala alí mujé amígowala. Echi riká cho, japalí mi kipuli echi raʼíchali aʼláala Onorúami Gobiérnowala jitra, ¿kecha a bichíwali ju japi mi we kanílili kipúa echi raʼíchali japi wabé aʼláala ju?
5. ¿Chumi nílili japalí mi binésili echi Biblia? (Ayénachó iné echi fotos).
5 Natá chumi nílili japalí mi bineli echoná Biblia japi Jeobá ko we mi galé, japi mi bayeli jiti mi echi téemala nima, japi ma ke risoa nilia pirélipo alí japi echoná Wichimóbachi we baʼóachi ku jawásima japi ma suwili (Mar. 10:29, 30; Juan 5:28, 29, TNM; Rom. 8:38, 39; Apoc. 21:3, 4). Suwaba jepuná namuti we simá nílitili mujé sulala (Luc. 24:32). Ayénachó mujé ko galeli echi bichíwali alí mi we inílili ruyénalia sinéami pagótami (ayénachó iné japi aní Jeremías 20:9).
Japalí ta bineli echi bichíwali japi aní echi Biblia, ati we kanílili alí ti sinéami ruyénali. (Iné echi párrafo 5).
6. ¿Piri mi biné Ernest alí Rose jitra?
6 Echi riká isili bilé hermano Ernest riwéami. b Japalí 10 bamíbami nili, echi onolá mukuli. Echi ko anili japi machinali kumi simili echi onolá, achi ripá riwigachi simili o piri ikila. Ayénachó anili japi we omona nili japi jarecho kuuchi a bijí olayé echi wénwala alí echi ko ke. Echi ko sinibí simiyé echoná panteón alí chokóbika chukuká jériká raʼíchika tanie Onorúami: “Onorúami, périkó, ani machinali kumi atí nijé onolá”. Pe aminana japalí ma 27 bamíbami nili, chotásili binea echi Biblia alí echi ko we kanílili binesa japi echi suwíami ma ke namú nili, japi echi ko japi riká ko ochiyá bití alí japi Onorúami checho ku jawásima (Ecl. 9:5, 10; Hech. 24:15). Echi ko bineli echi namuti japi chabé jonsa machinalia biteili. Ayénachó echi upila, Rose riwéami, chotásili binea echi Biblia alí ayénachó we kanílili. Miná ko, bamíali 1978, okuánika pakoli. Alí ruyeli echi téemala, echi amígowala alí jarecho si pagótami japi bineli. Jiti la, Ernest alí Rose iʼwírili waminá 70 pagótami jiti machimea Jeobá alí pakoma.
7. ¿Piri ta nokinálipo ati ne sulachí jonsa galésaká japi aní echi Biblia? (Lucas 6:45).
7 Ati ne sulachí jonsa we galésaká japi aní echi Biblia, ati sinibí raʼichabo echi jitra (leeri Lucas 6:45). Ati nílipo japi riká echi discípulos bachá siglo piréami, japi anijoli: “Tamujeta tarapé chirigá ariwebo nawésiya mapurigata ma námali, ayénachó mapurigata ma riwali” (Hech. 4:20). Jiti ta aminabi we galé japi ta biné, ati ruyénali echi bichíwali sinéami pagótami japi ikí ta omeri.
ATA NAWESA JITI TA GALÉ ECHI PAGÓTAMI
8. ¿Chúsiá ti simía nawisasia? (Iné echi recuadro “ Galebo echi pagótami: Binéripo jiti najátima Jesús”; ayénachó iné echi foto).
8 Japi riká Jeobá alí Jesús, tamujé ayénachó we galé echi pagótami (Prov. 8:31; Juan 3:16). Ati we natimá echi pagótami jiti ke machí Onorúami jitra alí ke machí japi ikimea pe aminana (Efes. 2:12). Echi pagótami olá wiká karú ikiwáami alí risoa nilia piré, jiti la tamujé ko ati omeri iʼwiria bineria echi Onorúami Gobiérnowala jitra. Ata galésaká alí natimásaká echi pagótami, tamujé ko iʼwérili nokiboa simiyá nawisasia jiti kipuma echi raʼíchali aʼláala. Echi ko ju bilé namuti we natéami japi iʼwírima jiti kanila pirélima jipi, alí pe aminana pirélima echoná Wichimóbachi we baʼóachi (1 Tim. 6:19, TNM).
Jiti ta galé echi pagótami alí ti natimá, jepuná tamó iʼwiri iʼwérili nokayá nawesia jiti kipuma echi aʼláala raʼíchali. (Iné echi párrafo 8).
9. ¿Piri ta ruyé echi pagótami, alí chúsiá? (Ezequiel 33:7, 8).
9 Jiti ta galé echi pagótami, ati nawesa japi ma mulipi echi chati namuti suwábitami nima (leeri Ezequiel 33:7, 8). Ati we omona nili jiti echi pagótami alí tamujé téemala japi ke Testigos ju, ke machí japi ikimea pe aminana. Echoná Biblia aní: “Jenaʼí wichimóbachi piréami pagótami ne wabé simírami risúu nílama. Aʼlí chabénala ke wesi siné echiyena risúu olárami níili, kiʼyá chokichí jonsa [...]. Aʼlí waminánomí rawé ke wesi auché jaré echiyena risúu olárami níima” (Mat. 24:21). Jiti la ti ruyénali jepuná namuti japi ikimea: bachá suwábitami nima echi religiones japi ke bichíwali ju, alí Armagedón kaachi, suwábitami nima suwaba echi chati namuti (Apoc. 16:14, 16; 17:16, 17; 19:11, 19, 20). Ati tani Jeobá japi wiká pagótami kipuma japalí ti nawesi alí japi nijéwima Jeobá tamujé yúa. Nalí, ¿piri ikimea echi japi a bijí ke kipúnali japi ta ruyé, japi riká tamujé téemala?
10. ¿Chúsiá we natéami ju japi ta ke riwepo nawesia echi pagótami?
10 Japi riká ti ma bineli echoná binelíwami 19, a keʼré japi Jeobá ko niyúbima echi pagótami japi chotásimi bichiwia echi, japalí inesa japi ma suwábitami nisa echi Walúala Babilonia. Jepuná jitra ata biné japi we natéami ju japi aminabi nawésipo echi pagótami. ¿Chúsiá? Natabo jepuná: a keʼré japi echi namuti japi ta ruyé jipi, pe aminana echi ko ku newalama (ayénachó iné japi aní Ezequiel 33:33). Echi namuti japi ta nawesa a keʼré japi echi ko newalama alí natama nijewia Jeobá tamujé yúa. Japi riká chabé echi rijoi Filipos bitéami, japi tibúami nili japi erta mochili, chotásili bichiwia japalí nokeli echi kawí. Echi riká cho, a keʼré japi echi pagótami japi jipi ke kipúnali, chotásima bichiwia japalí ma suwábitami nisa echi Walúala Babilonia (Hech. 16:25-34).
ATA NAWESA JITI TA GALÉ JEOBÁ ALÍ ECHI RIWALÁ
11. ¿Chúriká ta nokiboa jiti Jeobá “walubéraga anérami níima”, “suwaba omériami níima” alí japi “oʼwikérami níima”? (Apocalipsis 4:11; ayénachó iné echi fotos).
11 Ati nawesa echi aʼláala raʼíchali jiti ta we galé Jeobá alí echi riwalá. Alí japalí ti nawesa, ati walubéala ané echi Onorúami japi ta we galé. Tamujé ayénachó nata Jeobá jitra japi riká aní na versículo: “Galá níima mapu Mujemi chopi waminabi walubéraga anérami níima [...] mapu Mujemi chopi waminabi galabé oʼwikérami níima. Ayénachó galá níima mapu mujemi chopi ne suwaba omériami níima” (leeri Apocalipsis 4:11). ¿Chúriká ta nokiboa jiti Jeobá “walubéraga anérami níima” alí japi “oʼwikérami níima”? Japalí ti ruyé jarecho pagótami japi echi niwali suwaba namuti japi ikí nirú alí japi echi isili japi ta pirélipo. Alí, ¿chúriká ti néwariwéliti japi Onorúami “suwaba omériami” ju? Japalí ti nee tamujé jiwérala alí tamujé níwala namuti nawisamia echi aʼláala raʼíchali japi yena ti omeri (Mat. 6:33, TNM; Luc. 13:24; Col. 3:23, TNM). Ati we kanili raʼichia echi Onorúami jitra jiti ta we galé echi. Nalí ayénachó ti raʼichánali echi riwalá jitra alí japi aniwáami ju. ¿Chúsiá?
Japalí ta iʼwérili noká nawesia echi aʼláala raʼíchali suwinárika niraa japi yena ti omeri, ata iyá Jeobá tamujé jiwérala. (Iné echi párrafo 11).
12. Japalí ti nawesa, ¿piri namuti ta noká?
12 Jiti ta we galé Jeobá, ke ti nakí japi cha riká raʼichárami nima echi riwalá jitra (Mat. 6:9). Ata ruyénali jarecho japi ke bichíwali ju suwaba echi namuti japi Satanás anili Jeobá jitra (Gén. 3:1-5; Job 2:4; Juan 8:44). Jiti la ti iʼwérili noká nimía Jeobá alí ti we inili ruyénalia echi bichíwali, sinéami echi pagótami japi a tamó kipúnali. Ati nakí japi sinéami machimea japi Jeobá we galéami ju, japi wachíniga nuláami ju alí japi echi Gobiérnowala isima japi ma ke risoa pirélipo, japi we kilí pirélipo alí we kanílika (Sal. 37:10, 11, 29; 1 Juan 4:8). Japalí ti echi riká noká, ati iʼwiri jiti ke cha riká raʼichárami nima echi Jeobá riwalá jitra. Alí ti we kanili jiti ta a noká japi riká nokisáré echi Testigos. ¿Chúsiá?
13. ¿Chúsiá ti we kanili testigo Jeobá riwéwami niya? (Isaías 43:10-12).
13 Jeobá ko tamó chapili jiti ta echi testígowala nipo (leeri Isaías 43:10-12). Ma simírili jaré bamíali, japalí echi Japi Aʼlá Niseri anili echoná bilé carta: “Ke nirú bilecho namuti wabé natéami japi riká testigo Jeobá riwewia”. c Natabo japi ta torúami ju japoná atí echi oyériami jiti bilé anili japi ta chati namuti nokali, alí ti newalé japi bilé pagótami tamó iʼwírima. Mujé ko, ¿jépuká mi bayema jiti mi iʼwírima? A keʼré bilé pagótami japi mi we aʼlá machí, japi mi bichiwi alí japi aʼláala ju, jiti japi echi aní a iʼwírima. Jeobá ayénachó tamó chapili jiti ta ruyepo jarecho japi echi bi ju echi Onorúami ne bichíwali. Echi riká isili jiti echi ko we aʼlá tamó machí alí tamó bichiwi. Tamujé jitra ko we natéami ju alí we semati ju testigo Jeobá riwéwami niya, alí ruyea jarecho echi riwalá alí japi ke bichíwali ju japi aniri echi jitra. Japalí ta echi riká noká, ayénachó ti noká japi riká ti riwéwami ju: testigo Jeobá (Sal. 83:18; Rom. 10:13-15, TNM).
KE TI RIWEPO NAWESIA JAPALÍ CHÉAMI JEOBÁ ANÍ
14. ¿Piri namuti a keʼré japi ikimea echoná gran tribulación?
14 ¡Pe aminana ikimea namuti we natéami! Ata nakí japi aminabi wiká pagótami bichíwima Jeobá, kecho bijí chotásiachi echi gran tribulación. Nalí be, ayénachó ti we kanili machiyá japi a keʼré, jaré pagótami riwema cha nokayá alí chotásima walubéala anea Jeobá tamujé yúa ma gran tribulación kaachi japalí we jilí nima (Hech. 13:48).
15, 16. ¿Piri namuti ke siné riwepo nokayá, alí chu kabú chéami?
15 Nalí kecho séachi echalí rawé, ati olá bilé nóchali we natéami, japi ju nawesia echi aʼláala raʼíchali omáana Wichimóbachi. Ayénachó ti nawesa echi pagótami japi echi chati namuti ma mulipi suwábitami nima. Alí, japalí ma sebasa echi rawé japalí Jeobá oyérima, echi pagótami ko newalama japi echi raʼíchali japi ta nawésili, Jeobá níwala nili (Ezeq. 38:23).
16 Jiti la, ¿piri ta nokinali? Jiti ta we galé Jeobá, echi riwalá, echi pagótami alí echi aʼláala raʼíchali, ati aminabi iʼwérili nokiboa we kanílika nawesia japalí chéami Jeobá aní: “¡Ma aʼlá ju!”.
CANCIÓN sjj 54 Jeobá mi ruyé chu iyiri ju echi buwé
a Echi napawíliwami we natéami ko nili 7 inárachi octubre bamíali 2023 echoná Salón de Asambleas japoná napawí echi Testigo Jeobá echomí Newburgh, Nueva York (Estados Unidos). Miná ko echi programa uchaari echoná JW Broadcasting okuá partes niraa, echi bachá ko machínili noviembre 2023 alí biléala ko enero 2024.
b Iné echi artículo “Binesa echi Biblia jipi ko we kaníliami ju: We ni kaníliki jiti echoná Biblia ani riwaki japi ni machinalie”, japi machínali echoná oselí La Atalaya 1 inárachi febrero 2015.
