1, 2. ¿Chúsiá ti níliporé japi Jeobá ke tamó iyá japi ta tani?

 “WE GALÉ Jeobá alí echi ko mi iyama suwaba japi nakí mujé sulala” (Sal. 37:4). ¡Echi ko we baʼóami ju! Nalí, ¿achi aniwáami ju jepuná japi Jeobá sapú alí suwaba tamó iyama japi ta tani? We natéami ju japi ta nárika nokiboa jepuná. ¿Chúsiá? Natá jepuná jitra. Bilé hermana ke niwíkami, ané Jeobá japi siminali echoná Escuela japi biné echi Nawésami Raʼíchali Kalabé, nalí simiri jaré bamíali alí ke bayéliwa. Bilé hermano remalí japi we nayú, ané Jeobá japi ku saʼwema jiti aminá we nóchima echoná congregación; nalí, echi ko ke ku saʼwí. Jaré wénwala ané Jeobá japi echi nolá ke riwema echi, nalí echi nolá ko riwé Jeobá.

² A keʼré japi mi tánili Jeobá jaré namuti japi mi kecho bijí naré. Echi jitra ami natámiré japi Jeobá jarecho bi iyá japi tani alí mujé ko ke, o japi echi ko ke mi iyá japi mi tani jiti mi ke aʼlá isili. Bilé hermana Janice riwéami echi riká nílili. b Echi alí echi kunala aneli Jeobá japi simánili Betel. Janice ko jéaní: “Ani mayéi japi we sapú tamó bayema”. Nalí simárili jaré michá, jaré bamíali alí ke siné bayeri. Alí miná ko jéaní: “We ni omona nilie alí ni nárika isié achi ni isili bilé namuti japi ke aʼlá ju. Wisabé niraa ani aneki Jeobá japi ta simánilie Betel alí ni ke inamie chúsiá ke tamó bayeli”.

3. ¿Piri binepo jenaʼí binelíwami?

³ A keʼré japi ta isini kaachi nárika nokiboa acha Jeobá tamó kipú japalí ti echi yúa raʼicha. Jaré pagótami japi nijéwami nili Jeobá chabé piréami, ayénachó echi riká nárika nokali (Job 30:20; Sal. 22:2; Hab. 1:2). ¿Piri mi iʼwírima  bichiwia japi Jeobá a mi kipú alí mi iʼwírima? (Sal. 65:2). Jiti machiboa, bachá binepo jepuná namuti: 1) piri isima Jeobá, 2) piri nakí Jeobá japi ta nokiboa, alí 3) chúsiá isini aʼlá nima japi ta sinucho namuti tánipo Jeobá.

4. Japi riká aní Jeremías 29:12, ¿piri tamó ané Jeobá japi isima?

⁴ Jeobá ko aní japi tamó kipuma japalí ti echi yúa raʼicha (leeri Jeremías 29:12). Onorúami ko we galé japi echi nijéwami ju alí kipú japalí echi yúa raʼicha (Sal. 10:17; 37:28). Nalí jepuná ko ke aniwáami ju japi tamó iyama suwaba japi ta tánili. A keʼré japi ta buwésaré japalí chéami nawá echi Wichimóbachi we baʼóachi naremia echi namuti japi ta tánili.

5. ¿Piri nata Jeobá japalí kipú japi ta echi ané?

⁵ Japalí kipú japi ta echi ané, Jeobá ko nata japi binoy isínali (Is. 55:8, 9). Echi ko isima japi jenaʼí Wichimóbachi pirélima echi pagótami japi we kanílika nijéwima echi alí japi napawíkami nima. Nalí echi Satanás anili japi echi pagótami wabé aʼlárika pirélima aboi niraa nulásaká (Gén. 3:1-5). Jiti la, Jeobá ko riweli japi echi pagótami aboi niraa nulama alí echi riká néwariwélitimia japi echi Diablo ikaléami ju, jepuná jitra jipi rawé nirú wiká karú ikiwáami (Ecl. 8:9). Ati machí japi Jeobá ke kariwema echi karú ikiwáami japi jipi nirú, jiti a echi riká isísaká, echi pagótami natámiré japi echi isélikami aʼlá machí nulayá alí ku kariwea echi karú ikiwáami japi nirú jenaʼí Wichimóbachi.

6. ¿Chúsiá we natéami ju japi ta aʼlá bichíwipo japi Jeobá sinibí we galéami ju alí wachíniga isíami?

⁶ Isini kaachi Jeobá ko sinúrika isimí tamó iʼwírimia tákoré ti chopi iyiri tánili jarecho yúa. Japi riká, japalí echi silíami Ezequías we nayuli, aneli Jeobá japi ku saʼwema alí Jeobá ko a ku saʼweli (2 Rey. 20:1-6). Nalí japalí echi apóstol Pablo aneli Jeobá japi iyema bilé soʼiwá —a keʼré japi nili bilé nayulí—, Jeobá ko ke ku saʼweli (2 Cor. 12:7-9). Newalabo japi ikili echi okuá apóstoles Santiago alí Pedro. Echi silíami Herodes miʼlinaili echi okuánika. Tákoré echi hermanos echoná congregación tánili Jeobá echi Pedro jitra alí a keʼré ayénachó Santiago jitra, Santiago miʼlirúami nili, nalí Pedro ko ke echi riká ikili jiti Jeobá néeli bilé ángel tibumia echi (Hech. 12:1-11). Ati nárika nokibóoré chúsiá Jeobá bilepi bi tibuli alí bilecho ko ke. Tákoré echi Biblia ke ruyé echi jitra, ati we aʼlá machí japi Jeobá “ke siné cha isíami ju” alí japi we galeli Pedro alí ayénachó Santiago (Deut. 32:4; Apoc. 21:14). c Isini kaachi Jeobá ke isímiré japi riká ti tánili. Nalí ke ti siné cha riká raʼicha echi jitra japi Jeobá isimí, jiti ta we aʼlá machí japi echi ko sinibí we galéami ju alí wachíniga isíami (Job 33:13).

7. ¿Piri ti iʼwérili noká ke nokayá, alí chúsiá?

⁷ Ati iʼwérili noká ke inea japi riká ti ikí tamujé, echi yúa japi ikí jarecho. A keʼré japi ta tani Jeobá bilé namuti alí echi ko ke tamó iyá. Alí pe aminana ati machí japi bilecho pagótami chopi iyiri tali japi riká tamujé, alí ti iné japi echi ko a nareli japi echi tali. Echi riká ikili bilé hermana Anna riwéami. Echi kunala Matthew nayuli cáncer jitra alí  echi ko raʼíchika tánili Jeobá jiti Matthew ku saʼwimea. Echalí okuá hermanas japi ma wiláami nili ayénachó nayuli cáncer jitra, alí Anna ko raʼíchika tánili Jeobá echi bikiánika jitra. Echi okuá hermanas ku saʼwili, nalí Matthew ko mukuli. Ne kulí ko, Anna nárika isié acha Jeobá iʼwírili echi hermanas jiti ku saʼwimea, alí a echi riká nísaká, chúsiá ke echi riká cho isili echi kunala yúa. Ke ti aʼlá machí chúsiá echi hermanas a ku saʼwili, nalí japi ta aʼlá machí ko ju japi Jeobá ko iyema suwaba japi tamó risoa níliti alí japi we inili ku jawásinalia japi echi nijéwami nili japi ma suwili (Job 14:15).

8. a) Japi riká aní Isaías 43:2, ¿piri isimí Jeobá tamó iʼwírimia? b) ¿Chúriká tamó iʼwiri raʼichia Jeobá yúa japalí ti ikí namuti jilírami? (Iné echi video Raʼichia Onorúami yúa tamó iʼwiri anachia).

⁸ Jeobá ko sinibí tamó iʼwírima. Tamujé Onolá Jeobá we tamó galé alí ke kanili inea tamujé risoa níliachi (Is. 63:9). Nalí isini kaachi riwé japi ta ikiboa namuti jilírami japi echi Biblia aní japi ju japi riká bakochi alí naʼí (leeri Isaías 43:2). Echi ko tamó ané japi tamó iʼwírima anachia japalí ti ikí namuti jilírami alí japi ke riwema japi ta sinibí risoa nílipo. Ayénachó tamó iyá echi binoy jiwérala jiti oméripo anachia (Luc 11:13; Filip. 4:13, TNM). Jiti la ti we aʼlá bichiwi japi sinibí olabo japi ta newalé jiti anachabo alí nijéwami nipo. d

9. Japi riká aní Santiago 1:6, 7, ¿chúsiá we natéami ju japi ta bichíwipo japi Jeobá a tamujé iʼwírima?

⁹ Jeobá ko nakí japi ta echi bichíwipo (Heb. 11:6). Isini kaachi ati níliporé japi echi namuti japi ta ikí wabé jilí ju alí japi Jeobá ke tamó iʼwírima. Nalí echoná Biblia aní japi echi Onorúami jiwérala jitra ati oméripo “moyena bilé muralla” (Sal. 18:29). Jiti la, ke ti natásaré japi echi ke tamó iʼwírima. Nalí raʼichabo echi yúa alí we bichíwipo japi a tamó iʼwírima (leeri Santiago 1:6, 7).

10. Bilé ejemplo néeka ruyé chúriká ti nokiboa echi jitra japi ti tánili Jeobá.

¹⁰ Jeobá ko nakí japi ta nokiboa japi riká ti tánili. Natabo bilé hermano jitra japi siminali echoná waʼlú napawíliwachi alí tani Jeobá japi echi iʼwírima jiti echi patrón riwema japi simea. ¿Piri isima Jeobá echi iʼwírimia? A keʼré echi ko iʼwérili iyama jiti ke majaka raʼichama echi patrón yúa. Nalí echi hermano simisáré echi yúa raʼichasia. Ayénachó a keʼré japi echi ko wisabé niraa echi riká isima alí newalémiré nochia bilecho rawé o anea echi patrón japi ke natétima japalí ke nochama.

11. ¿Chúsiá ti wisabé niraa raʼichásaré Jeobá yúa?

¹¹ Jeobá ko nakí japi ta wisabé niraa raʼichabo echi yúa (1 Tes. 5:17). Jesús ko anili japi isini kaachi ke sapú narepo japi ta tali (Luc. 11:9). ¡Nalí ke ti siwésaré! Wisabé niraa raʼichabo Jeobá yúa echi namuti jitra (Luc. 18:1-7). Ati echi riká nokisáaká wisabé niraa, ati néwariwéliti Jeobá japi ta we natéami niraa iné japi ta taa alí japi ta we bichiwi japi echi ko tamó iʼwírima.

12. a) ¿Piri ta nárika nokisáré, alí chúsiá? b) ¿Piri ti natásaré jiti aʼlá riwíwika raʼichabo Jeobá yúa? (Iné echi recuadro “ ¿Achi néwariwéliti japi ni tani Jeobá japi ni riwiwi echi?”).

¹² Ati ke narésaká echi japi ta tánili Jeobá, aʼlá nima japi ta nárika nokiboa bikiá  náriwami. Bachá ko ju “¿Achi aʼlá ju japi ni taa?”. Ne sojí sinibí ti nata japi ta ma machí chu iyiri aʼlá ju tamujé jitra. Nalí a keʼré echi namuti japi ta taa, pe aminana ke tamó iʼwírima. Ati raʼíchiré Jeobá yúa bilé namuti jilírami jitra jiti tamó iʼwírima japi riká tamujé nakí, nalí a keʼré japi ta tali ke me aʼlá ju o ayénachó ke ju japi riká Jeobá nakí (1 Juan 5:14). Japi riká, natabo echi wénwala jitra japi ta bineki echoná bachá párrafo. Echi ko tánili Jeobá japi echi nolá ke riwema echi. Ati mayéeré japi aʼlá ju japi tali. Nalí Jeobá ko ke bilé iʼwérili ané japi echi nijéwima. Echi ko nakí japi ta sinéami, alí ayénachó tamujé kúchuwala, nijéwipo echi jiti ta echi riká nokinali (Deut. 10:12, 13; 30:19, 20). Jiti la, echi wénwala omeri anea Jeobá japi echi iʼwírima jiti omérima aʼlá bineria aboi nolá alí echi riká aminabi we galema Jeobá alí echi amígowala nima (Prov. 22:6; Efes. 6:4, TNM).

13. Japi riká aní Hebreos 4:16, ¿chu kabú tamó iʼwiri Jeobá?

¹³ Okuá náriwami ko ju “¿Achi aʼlá niraa iné Jeobá nijía echalí japalí ni taa?”. Ati níliporé japi ta sapú newalé echi namuti japi ta tali. Nalí Jeobá ko we aʼlá machí chu kabú wabé aʼlá ju tamó iʼwírimia (leeri Hebreos 4:16). Japalí ti ke sapú naré japi ta tali, ati natáboré japi Jeobá ke tamó iʼwírinali. Nalí a keʼré japi echalí kecho bijí aʼlá ju japi tamó iʼwírima. Ku newalabo echi remalí jitra japi raʼichie Jeobá yúa jiti ku saʼwimea. Jeobá ku saʼwélaká, a keʼré japi Satanás animeli japi echi remalí nijewi Jeobá jiti echi ku saʼweli (Job 1:9-11; 2:4). Nalí Jeobá ko ma aʼlá machí chu kabú  isima japi ma ke nayúa pirélipo (Is. 33:24; Apoc. 21:3, 4). Jiti la ti aʼlá machí japi jipi Jeobá ke ku saʼwema echi nayúami. Jiti la echi hermano omeri tania Jeobá japi echi iyama jiwérali alí kilí nílima jiti anachama alí aminabi nóchilima echi (Sal. 29:11).

14. ¿Piri mi biné Janice jitra?

¹⁴ ¿Ami newalá Janice jitra echi hermana japi raʼichie Jeobá aneka japi siminali Betel? Ma malí bamíali simírisa, Janice ko inámili japi isili Jeobá iyamia japi echi tali. Echi ko jéaní: “Echi bamíali Jeobá tamí binérili wiká namuti alí tamí iʼwírili jiti ni aminabi we aʼlá isíami nima. Japi riká, nijé ko newaleli aminabi we bichiwia echi, we aʼlá binea bineli niraa echi Biblia alí inamia japi ni a omero kaníliami niya japomí ni simí nóchilisia Jeobá”. Pe aminana, Janice alí echi kunala chotásili nochia japi riká circuito. Echi ko jéaní: “Jeobá a tamí iʼwírili, nalí ke japi riká nijé nakili. Ma jaré bamíali simírisa ani machiki japi Jeobá we simárika isili tamí iʼwiria. Waʼlú ni matétara iyá Jeobá jiti simárika isili alí néwariwélitili japi tamí galé”.

15. ¿Chúsiá isini kaachi wabé aʼlá nima japi ta ke bilepi bi namuti jitra tánipo Jeobá? (Ayénachó iné echi imágenes).

¹⁵ Bikiá náriwami ko ju “¿Achi ni tánisaré bilecho si namuti?”. Tákoré aʼlá ju tania Jeobá bilepi bi namuti jitra, nalí isini kaachi wabé aʼlá nima japi ta ke echi riká nokiboa, jiti machiboa piri ju japi Jeobá nakí tamujé jitra. Natabo echi hermana ke niwíkami jitra japi aneli Jeobá japi siminalie echoná Escuela japi biné echi Nawésami Raʼíchali Kalabé, jiti echi riká omérima simiyá biléanachó japoná newaléliwa. Tákoré echi ko ke riwema  wisabé niraa tania Jeobá jepuná namuti jitra, ¿piri che jaré namuti omeri tania Jeobá? Echi ko omeri anea japi echi iʼwírima machiyá piri isima jiti aminabi we nóchilima echi (Hech. 16:9, 10). Miná ko omeri naria echi hermano circuito achi newaléliwa precursores biléana congregación japi mulipi ju. Ayénachó omeri osaká júulia bilé carta echi sucursal jiti machimea kumi newaléliwa publicadores. e

16. ¿Piri ti aʼlá machí?

¹⁶ Japi riká ti ma bineli, a ti omeri bichiwia japi Jeobá tamó kipuma japalí ti echi yúa raʼicha alí japi sinibí tamó iʼwírima japi riká wabé aʼlá ju jiti we galéami ju alí wachíniga isíami (Sal. 4:3; Is. 30:18). Isini kaachi echi ko tamó iyámiré japi ta tánili japi riká ti ke mayeli, nalí sinibí tamó kipuma alí tamó iʼwírima. Echi ko we tamó galé alí ke siné tamó awénili riwema (Sal. 9:10). Jiti la aminabi bichíwipo Jeobá alí ruyepo suwaba japi ta inili ne sulachí jonsa japalí ti echi yúa raʼicha (Sal. 62:8).