1, 2. a) ¿Chu iyiri namuti chopi iyiri ju japi ikili echi judíos alí japi ta ikí? b) Ruyé jaré namuti jilírami japi ikili echi judíos. (Ayénachó iné echi recuadro “ Japalí pireili Ageo, Zacarías alí Esdras”).

 ¿AMI we nata isini kaachi chu ikimea pe aminana? Ami ke olayéeré nóchali alí we nátiré chúriká mi iyama mujé téemala japi newalé. O ami nátiré chúriká mi isima tibúa mujé téemala jiti echi isélikami naʼáwika noká, ata najátarami nisa o ke nakíwisa japi ta nawisabo. Ami ikiyáaká echi iyiri namuti, ami ku kanílima machiyá japi chúriká Jeobá iʼwírili echi israelitas japalí echi riká cho ikili.

² Echi judíos japi sinibí pireili echoná Babilonia newaleli we bichíyami niya jiti riwesa simama echi namuti we natéami japi olali echoná Babilonia, alí simíaya echomí Jerusalén japomí ke machili. Ke ne wilí simírili japalí echi ko ma jilika pireili jiti jilí nirali olayá winomí, echi isélikami naʼáwika pireili alí sayéritami nili. Suwaba echi namuti jitra, jaré ko a we jilí nirali iʼwiria ku atewia echi Jeobá kalila. Jiti la, echi bamíali 520 kecho nawáachi Cristo, Jeobá ko júali echi profetas Ageo alí Zacarías jiti iʼwérili iyama echi pueblo (Ageo 1:1; Zac. 1:1). Japi riká ti inepo jenaʼí, japi nokali echi profetas we aʼlá nili. Nalí japalí ma ne sojí simírili 50 bamíali, echi judíos checho ku siweli. Echalí nili japalí Esdras, bilé we aʼlá machiká osáami echi nulalíwami, ku roʼili Babilonia jonsa echomí Jerusalén jiti iʼwérili iyama alí iʼwírima jiti checho ku we natéami niraa inema nóchilia Jeobá (Esd. 7:1, 6).

3. ¿Piri náriwami ta binepo? (Proverbios 22:19).

³ Echi profecías japi osali Ageo alí Zacarías, iʼwírili echi israelitas jiti aminabi bichíwima Jeobá tákoré olali wiká sayérala, alí ayénachó tamó iʼwírima jiti aminabi bichíwipo Jeobá tákoré ikiyé chuwé namuti (leeri Proverbios  22:19). Jenaʼí binelíwami ata binepo piri aneli Jeobá binoy puéblowala echi Ageo alí Zacarías jitra, alí ayénachó binepo Esdras jitra. Binea jepuná namuti tamó iʼwírima machiyá jepuná náriwami: ¿piri nílili echi judíos japi ku rotówili Jerusalén japalí ikili wiká namuti we jilírami?, ¿chúsiá we natéami niraa inésaré nóchilia Jeobá japalí ti ikí namuti we jilírami?, alí ¿piri namuti tamó iʼwírima aminabi bichiwia Jeobá tákoré ikiyé chuwé namuti?

4, 5. ¿Chu iyiri namuti isíliré japi echi judíos siwema atewia echi templo?

⁴ Japalí echi judíos ku sili echoná Jerusalén, olali wiká nóchali. Echi ko sapú atéwili echi altar Jeobá níwala alí niwali echi cimientos japoná wilimea echi templo (Esd. 3:1-3, 10). Nalí miná ko, echi ko we sapú siwea nílili. ¿Chúsiá? Jiti echi ko ke bi atéwisa riweili echi templo, ayénachó nokisaa riweili jarecho namuti, japi riká niwayá echi níwala kalí, ichayá alí kóʼaya echi téemala (Esd. 2:68, 70). Ayénachó, echi sayérala iʼwérili nokali jiti riwema atewia echi templo (Esd. 4:1-5).

⁵ Echi judíos japi checho ku sili echoná Jerusalén, jilika pireili jiti ke me niruili winomí alí echi isélikami naʼáwika pireili. Echalí japoná echi pireili nulérami nili Persia jitra. Nalí, japalí ma mukuli echi silíami Ciro bamíali 530 kecho nawáachi Cristo, Cambises chotásili nulayá alí napabuli wiká sontarsi jiti simama nakosia Egipto yúa. Japalí ma simíami nili nakosia echomí, a keʼré japi echi sontarsi simárili echomí Israel alí tániliré echi judíos baʼwí, koʼwáami alí japoná ripima, alí jepuná isíliré japi echi judíos aminabi we jilika pirélima. Miná ko, japalí echi silíami Darío I, chotásili nulayá, wiká pagótami echoná Persia piréami we naʼáwika pireili. Suwaba jepuná isíliré japi echi judíos we natama chúriká kóʼama echi téemala. Jiti la nátiliré japi kecho bijí aʼlá nili atéwisa echi templo Jeobá níwala (Ageo 1:2).

6. ¿Piri bilecho namuti jilírami ikili echi judíos, alí piri aneli echi profeta Zacarías? (Zacarías 4:6, 7).

⁶ (Leeri Zacarías 4:6, 7). Japi riká ti ineli echoná párrafo 5, ke echi namuti bi nili japi ikili echi judíos, ayénachó echi ko najátarami nili. Bamíali 522 kecho nawáachi Cristo, echi sayérala nokali japi echi silíami ma ke nakíwima japi echi judíos atéwima echi templo. Nalí echi profeta Zacarías aneli echi judíos japi Jeobá néema echi binoy jiwérala jiti iyema echi namuti japi isimí japi ke atewárami nima echi templo. Alí bamíali 520, echi silíami Darío ku risensia iyali jiti ku atéwima echi templo, ayénachó iyali winomí echi judíos alí nuleli echi weli jáwami echomí mulipi piréami japi ayénachó iʼwírima (Esd. 6:1, 6-10).

7. ¿Piri namuti aʼláala nareli echi judíos jiti bachá nokali japi Onorúami nakili?

 ⁷ Echi profeta Ageo alí Zacarías jitra, Jeobá ko aneli binoy puéblowala japi bachá iʼwérili nokisáaká atewia echi templo, echi ko iʼwírima (Ageo 1:8, 13, 14; Zac. 1:3, 16). Jiti echi profetas iʼwérili iyali echi judíos, echi ko checho ku chotásili atewia echi templo bamíali 520 alí kecho malí bamíali simíriachi, echi ko ma sunili ku atewia. Tákoré ikili wiká namuti jilírami, echi ko bachá nokali japi Onorúami nakili. Jiti la, Jeobá ko iyali suwaba echi namuti japi newaleli alí iʼwírili jiti mulíwima echi yúa. Echi namuti jitra, echi ko  omérili kanílika nijewia Jeobá (Esd. 6:14-16, 22).

8. ¿Chúriká tamó iʼwiri Ageo 2:4 jiti bachá we natéami niraa inepo nokayá japi Jeobá nakí? (Ayénachó iné echi nota).

⁸ Ata machí japi ta ma ne jubá rawé piré, jiti la jipi wabé natéami ju japi ta simabo nawisasia japi riká Jesús tamó nuleli (Mar. 13:10). Nalí, ke ti olásaká japi ti newalé o echi gobiernos ke nakisáaká japi ta nawisabo, a keʼré japi jilí nirabo bachá nokayá japi Jeobá aní. ¿Piri tamó iʼwírima jiti bachá we natéami niraa inepo nokayá japi Jeobá nakí? Sinibí bichiwia japi “Jeobá japi ángeles nulé” b ke siné tamó awénili riwema. Echi ko tamó iʼwírima ati bachá we natéami niraa inésaká nokayá japi echi nakí alí ke ko japi tamujé nakí. Jiti la ti ke majásaré (leeri Ageo 2:4).

9, 10. ¿Chúriká machili bilé niwíkami japi a bichíwali ju japi aní Mateo 6:33?

⁹ Inepo japi ikili bilé niwíkami, Oleg alí Irina, c japi precursores ju. Pe aminana japalí simíali iʼwírisia biléana congregación, echi ko ma ke olali nóchali jiti echoná país ke me niruili winomí. Tákoré bilé bamíali we jilí nirali jiti isini bi rawé nóchili, nalí echi ko sinibí ineli chúriká Jeobá echi iʼwírili alí isini kaachi echi hermanos ayénachó echi iʼwírili. ¿Piri iʼwírili japalí ikili echi namuti jilírami? Oleg, japi ne kulí ko siwea nílili, jéaní: “Sinibí simíaya nawisasia tamó iʼwírili jiti bachá we natéami niraa inepo nóchilia Jeobá”. Japalí echi alí echi upila aa járili nóchali, echi ko ke riweli nawesia.

¹⁰ Siné rawé japalí ma ku bitichí sili  nawesia járisa, bilé echoná mulipi bitéami aneli japi bilé echi amígowala we miká jonsa nawali, 160 kilómetros, jiti riwema okuá bolsas koʼwáami muchúwami. Oleg jéaní: “Echalí ati ineki japi Jeobá we tamó galé alí ayénachó echi congregación. Ati we aʼlá machí japi Jeobá ke siné awénili riwé japi echi nijéwami ju, tákoré echi namuti japi ikí we jilírami ke” (Mat. 6:33, TNM).

11. ¿Piri tamó iyama Jeobá ati bachá nokisáaká echi nóchali we natéami japi tamó nuleli?

¹¹ Jeobá ko nakí japi ta iʼwérili nokiboa bineria echi pagótami jiti echi riká niyúbima. Japi riká ti ineli echoná  párrafo 7, Ageo ko iʼwérili iyali echi judíos jiti checho ku chotásima atewia echi templo. A nijéwisaká, Jeobá ko aneli japi iyama wiká namuti aʼláala (Ageo 2:18, 19). Tamujé ayénachó we bichiwi japi Jeobá tamó iyama wiká namuti aʼláala, ati bachá nokisáaká echi nóchali we natéami japi tamó nuleli.

12. ¿Chúsiá Esdras alí japi echi yúa simíali echomí Jerusalén newaleli we bichiwia Jeobá?

¹² Bamíali 468 kecho nawáachi Cristo, Esdras ko simili Babilonia jonsa echomí Jerusalén jarecho judíos yúa japi pe aminana sili. Echi ko we bichíwisa riweili jiti simama echomí. Simárima riweili echoná buwérili japoná ke aʼlá nili alí, jiti toyá sírili wiká oro alí plata japi néerami nima echoná templo, echi chiwáami ko ke jilí nirama riweili chiwenia (Esd. 7:12-16; 8:31). Alí miná ko machili japi echoná Jerusalén ke aʼlá nili, jiti ke me pireili pagótami echoná alí echi weli tejoli alí echi yewi najúa jali. ¿Chúriká tamó iʼwiri japi isili Esdras aminabi we bichiwia Jeobá?

13. ¿Piri iʼwírili Esdras aminabi we bichiwia Jeobá? (Ayénachó iné echi nota).

¹³ Esdras ko ineli chúriká Jeobá iʼwírili binoy puéblowala japalí jilí nili. Echalí bamíali 484, japalí echi silíami Asuero nulali japi echi judíos japi pireili japoná nulali echi Imperio persa suwábitami nima, a keʼré japi Esdras biteili echomí Babilonia (Est. 3:7, 13-15). Jiti la, a keʼré japi Esdras mukumea riweili. Japalí echi judíos machili, echi ko ke koʼali jiti siwea nílili alí tánili Jeobá japi echi iʼwírima (Est. 4:3). Natabo chu nílili Esdras alí echi judíos japalí machili japi echi japi miʼlinaili nalí nili japi suwili (Est. 9:1, 2). A keʼré japi echi namuti iʼwírili Esdras jiti anachama pe aminana alí jiti aminabi we bichíwima japi Jeobá ko a omeri tibúa binoy puéblowala. d

14. ¿Piri bineli bilé hermana japalí ma ke olali nóchali?

¹⁴ Japalí ti iné chúriká Jeobá tamó tibú japalí ti ikí namuti we jilírami, ati aminabi we bichiwi echi. Ma binepo bilé hermana jitra Anastasia riwéami, japi bité echomí Europa del Este. Echi compañeros japi echi yúa nochie, iʼwérili anéi jiti iʼwírima echi política, jiti la echi ko riweli echi nóchali. Anastasia jéaní: “Ke ni siné echi riká ripili ke winomiwa”. Ayénachó jéaní: “Ani raʼíchiki Jeobá yúa echi namuti jitra alí ni ineki chúriká echi we simárika tamí tibuli. Ani che siné ke olásaká nóchali, ke ni majama. Japi riká isimí Jeobá jipi tamí tibúa, ani machí japi pe aminana echi riká cho isima”.

15. ¿Piri isili Esdras jiti aminabi bichíwima Jeobá? (Esdras 7:27, 28).

¹⁵ Esdras ko sinibí ineli chúriká Jeobá  echi iʼwírili. Jiti echi ko nátili chúriká Jeobá iʼwírili chabé, echi namuti isili japi aminabi we bichíwima echi. Natabo jepuná raʼíchali japi anili Esdras: “Jiti Jeobá nijé Onorúamiwala tamí yúa asali”, japi chukú echoná Esdras 7:27, 28 (leeri). Echoná libro japi binoy riwalá chukúami ju, Esdras ko néeli echi raʼíchali japi ne sojí chopi iyiri ju aminabi malisa niraa (Esd. 7:6, 9; 8:18, 22, 31).

16. ¿Chu kabú ati aminabi inéporé japi Jeobá tamó iʼwiri? (Ayénachó iné echi fotos).

¹⁶ Jeobá ko a omeri tamó iʼwiria japalí ti ikí namuti we jilírami. Japi riká, a keʼré japi ta newalebo risensia tania echi patrón jiti simabo echoná waʼlú napawíliwachi o japi tamó riwema jiti kuabi horas nóchipo jiti ta oméripo simíaya echoná napawíliwachi sinibí tarali. Japalí echi iyiri namuti ikisaa, ati oméripo inea chúriká Jeobá tamó iʼwiri. Jeobá ko isímiré namuti japi ta ke mayé alí jepuná tamó iʼwírima aminabi we bichiwia echi.

17. ¿Chúriká ta machí japi Esdras ke niráami nili japalí ikili namuti we jilírami? (Iné echi bachá dibujo japi chukú jena oselí).

¹⁷ Esdras ke niráami nili alí iʼwírili tánili Jeobá. Sinibí japalí echi ko nilie japi ma ke omérili isiá echi nóchali japi olali, echi ko sinibí raʼichie Jeobá yúa (Esd. 8:21-23; 9:3-5). Japalí jarecho ineli japi Esdras we bichiwie Jeobá, ayénachó echi riká nokali alí iʼwírili echi (Esd. 10:1-4). Japalí ti we natasa chúriká olabo japi ta newalé o chúriká tibupo tamujé téemala, ata raʼichásaré Jeobá yúa bichíwika japi echi tamó iʼwírima.

18. ¿Piri tamó iʼwírima aminabi we bichiwia Jeobá?

¹⁸ Ati aminabi we bichíwipo Jeobá ati ke niráami nísaká, iʼwírili tánisaká echi alí ti riwésaká japi echi hermanos tamó iʼwírima. Erika, bilé hermana japi bikiá ranéami ju, ke riweli bichiwia Jeobá tákoré ikili namuti we jilírami. Japalí mukuli echi ranala japi kecho ochérili, ke wilí simírili japalí ayénachó mukuli echi kunala. Nátika suwaba echi namuti japi ikili, echi ko jéaní: “Tamujé ke ti oméripo machiyá chúriká tamó iʼwírima Jeobá. Echi ko tamó iʼwírima japi riká ti ke mayeli. Wisabé niraa ni inéi japi riká nokali alí anili nijé amígowala, nili japi riká Jeobá tamí iʼwirie. Ani ruyésaká nijé amígowala japi ni ikí, echi ko ke me jilí niraa tamí iʼwiria”.

19, 20. ¿Piri ta biné echi judíos jitra japi ke omérili ku simíaya echomí Jerusalén?

¹⁹ Ati omeri binea bilé namuti we natéami echi judíos jitra japi ke omérili ku simíaya echomí Jerusalén jiti ma ochérami nili, jaré nayúami nili o jiti olali téemala japi tibuma. Tákoré echi riká nili, echi ko we kanila iʼwírili echi judíos japi ku simíali echomí Jerusalén iyayá echi namuti japi newaleli (Esd. 1:5, 6). Alí pe aminana, ma 19 bamíali simírisa, echi judíos japi ripili echoná Babilonia, a bijí iyayé winomí echi japi muchuwi echoná Jerusalén (Zac. 6:10).

²⁰ Tákoré ti ke omeri nokayá suwaba namuti japi ta nokinali nóchilia Jeobá, ati we aʼlá machí japi Jeobá ko we natéami niraa iné japi ta noká echi jitra. ¿Chúriká ti machí? Bilé namuti jitra japi Jeobá aneli echi Zacarías. Echi ko nuleli Zacarías japi niwama bilé corona echi oro alí plata jitra japi júali echi judíos japi ripili echoná Babilonia (Zac. 6:11). Jepuná we semati corona newalárima japi echi ko we simárika nokali nijía japi olali (Zac. 6:14, notas). Jiti la ti we bichíwisaré japi Jeobá ko ke siné wikawama japi ta iʼwérili noká echi nóchilia tákoré ti ikí namuti we jilírami (Heb. 6:10).

21. ¿Piri tamó iʼwírima jiti ke majabo japi ikimea pe aminana?

²¹ Ati machí japi jipi kuwachimi rawé, ati aminabi ikísipo namuti we jilírami (2 Tim. 3:1, 13). Nalí ke ti riwésaré japi echi namuti isima japi ta siwepo. Newalabo japi Jeobá aneli echi judíos japalí echi Ageo biteili: “Nijé ko emi yúa atí [...]. Kiti majasi” (Ageo 2:4, 5). Tamujé ayénachó bichiwi japi Jeobá tamujé yúa asimea, ati iʼwérili nokisáaká bachá nokayá japi echi nakí. Ati nokisáaká japi riká ti bineli echi profecías jitra japi anili Ageo alí Zacarías, alí japi riká isili Esdras, ati sinibí we bichíwipo Jeobá tákoré ti ikiyé chuwé namuti.