1. ¿Piri ruyeli echi profeta Isaías echi israelitas?

 ECHI profeta Isaías aneli Jeobá “echi Onorúami ne bichíwali”. Echi raʼíchali “bichíwali” hebreo niraa aniwáami ju “amén” (Is. 65:16; nota). Alí amén aniwáami ju “echi riká nima” o “echi riká ikimea”. Echoná Biblia wisabé niraa néeliwa echi raʼíchali amén ruyemia japi Jeobá alí Jesús anijó o noká ne bichíwali ju. Jiti la, japi Isaías ruyeli echi israelitas ko nili, japi suwaba japi Jeobá aní sinibí ne echi riká ikí. Jeobá ma néwariwélitili japi echi riká ju isika suwaba japi anili.

2. ¿Chúsiá ti bichíwisaré japi anili Jeobá japi isima a echi riká ikimea? ¿Chu iyiri náriwami binepo jenaʼí binelíwami?

² ¿Alí tamujé ru? ¿Achi ti omeri bichiwia japi Jeobá anili japi isima pe aminana a echi riká ikimea? Ma simírisa ne sojí 800 bamíali japalí jonsa biteili echi profeta Isaías, echi apóstol Pablo ruyeli chúsiá ta bichíwisaré japi Jeobá aní a echi riká ikimea. Echi ko anili: “Riosi ketasi bilé ikaléami ju” (Heb. 6:18). Japi riká echoná bilé bajichi ke siné machínima baʼwí ratáami alí ruláami, echi riká cho Jeobá —japi sinibí bichíwali aní— ke siné ikaleka raʼichama. Jiti la, ati omeri bichiwia japi suwaba japi Jeobá aní ne bichíwali ju, japi riká echi namuti japi anili japi ikimea pe aminana. Jenaʼí binelíwami ata binepo jepuná okuá náriwami: ¿piri anili Jeobá japi isima pe aminana? Alí, ¿chúriká ti machí japi echi anili ne bichíwali ikimea?

3. a) ¿Piri namuti we natéami niraa iné echi Onorúami siérvowala? (Apocalipsis 21:3, 4). b) ¿Chu aní jaré pagótami japalí ti ruyé japi Jeobá isima?

³ Echi namuti japi ta jitra raʼichabo jipi, we natéami ju echi Onorúami siérvowala jitra omáana Wichimóbachi piréami (leeri Apocalipsis 21:3, 4). Jeobá ko aní japi “echi pagótami ma ketasi suwimea, nibilé auché nalákama, nibilé auché risúu animea, ni bilé auché okoma”. Japalí ti nawesa tamujé ko nee jepuná versículos jiti kanílitipo echi pagótami alí ruyemia japi jena Wichimoba we baʼóami nima. Jaré japalí ti ruyé japi Jeobá isima, jéaní: “We baʼóami ju echi namuti, nalí ke ni mayé japi bichíwali ju”.

4. a) ¿Piri okuá namuti anili Jeobá japi isima? b) ¿Piri isili Jeobá jiti bichíwipo japi echi aní?

⁴ Japalí Jeobá néeli echi apóstol Juan jiti osimea japi chúriká nima echoná Wichimóbachi we baʼóachi, echi ko aʼlá machili japi jipi rawé echi ta néepo japalí ta nawisasia simía. Ayénachó machili japi wiká pagótami we jilí nirama bichiwia japi a ikimea echi namuti (Is. 42:9; 60:2; 2 Cor. 4:3, 4). Jiti la, ¿chúriká iʼwíripo jarecho pagótami jiti bichíwima japi a ne bichíwali ikimea japi aní Apocalipsis 21:3, 4? Alí, ¿chúriká ti nokiboa jiti aminabi bichíwipo Jeobá alí echi namuti japi isima? Jeobá ko ke bi anili echi namuti japi isima, ayénachó osaká riweli jaré namuti japi ta jitra bichíwipo japi ne bichíwali echi riká ikimea. ¿Chu iyiri ju echi namuti?

5. ¿Chu iyiri ju jaré versículos japi ta jitra bichíwipo japi Jeobá anili ne echi riká ikimea, alí chu aní?

⁵ Jena versículos ata inepo jaré namuti japi ta jitra bichíwipo japi echi Wichimóbachi we baʼóami nima japi riká anili Jeobá. Jériká aní: “Echi japi asali echoná trono anili: ‘¡Nibí! Ani kulíwami niwásimi suwaba namutiʼ. Ayénachó anili: ‘Osá, jiti jepuná raʼíchali ne bichíwali juʼ. Alí tamí jéaneli: ‘¡Suwaba ma echi riká ikili! Nijé ju echi Alfa alí echi Omega, echi chokichí jonsa alí suníachiʼ” (Apoc. 21:5, 6a, TNM).

6. Japi riká aní Apocalipsis 21:5, 6, ¿chúsiá tamó iʼwiri jiti bichíwipo japi Jeobá aní?

⁶ ¿Chúsiá japi aní echi versículos tamó iʼwiri aminabi bichiwia japi a ikimea japi riká anili Jeobá? Japi riká aní echoná versículos ju japi riká ko Jeobá osaká riwea binoy riwalá echoná bilé oselí jiti ta bichíwipo japi echi namuti japi anili a ne bichíwali isima. Echoná Apocalipsis 21:3, 4 ata leeri japi Jeobá anili, alí miná ko echoná versículos 5 alí 6 ju japi riká ko Jeobá osaká riwea binoy riwalá echoná oselichi japoná anili japi isima, alí echi riká echi ko aní japi a isima japi echi anili. Ma binepo ibili echi raʼíchali japi Jeobá aní echoná versículos.

7. ¿Jépuká chotasi raʼichia echoná versículo 5, alí chúsiá we natéami ju?

⁷ Kulí chotasia echi versículo jériká aní: “Echi japi asali echoná trono anili” (Apoc. 21:5a, TNM). Echoná libro Apocalipsis Jeobá ko bisiá niraa binoy raʼíchili, alí jepuná ju ne bacháwala japi echi anili, jiti la we natéami ju. Jepuná ko aniwáami ju japi jena raʼíchali echi binoy anili, ke ko nuleli japi animea bilé ángel we jiwérami alí ke cho Jesús. Jepuná tamó iʼwiri aminabi bichiwia echi jaréala raʼíchali. ¿Chúsiá? Jiti Jeobá “tarapé ikaléami ju” (Tito 1:2). Jiti la, we ti bichiwi echi raʼíchali japi aní Apocalipsis 21:5, 6, (TNM).

8. ¿Piri aní Jeobá jiti ta bichíwipo japi echi aní a echi riká ikimea? (Isaías 46:10).

⁸ Jipi ko binepo piri aniwáami ju echi raʼíchali “¡Nibí!” (Apoc. 21:5, TNM). Echi raʼíchali griego niraa japi traducíriwa “¡Nibí!”, wisabé niraa néeliwa echoná libro Apocalipsis. Bilé oselí japi raʼicha echi Apocalipsis jitra, aní japi jepuná raʼíchali néeliwa jiti echi leériami aminabi machinálima japi oserúa chukú bacháami. Alí, ¿piri ju japi aní bacháami? Onorúami ko aní: “Ani kulíwami niwásimi suwaba namuti”. Tákoré Jeobá raʼicha echi namuti jitra japi ikimea pe aminana, echi ko machí japi a echi riká ikimea, jiti la raʼicha japi riká ko ma echi riká isiá (leeri Isaías 46:10).

9. a) ¿Piri tamó natari echi raʼíchali “kulíwami niwásimi suwaba namuti”? b) ¿Piri olárami nima “echi ripá siyona” alí “echi kawí” japi jipi nirú?

⁹ Ayénachó inepo bilecho namuti japi aní Apocalipsis 21:5: “Kulíwami niwásimi suwaba namuti”. Jenaʼí capítulo 21, echi raʼíchali tamó newalari okuá namuti japi isimí Jeobá: nakuliwia alí atewia. Bachá raʼichabo echi namuti jitra japi Jeobá nakulíwima. Apocalipsis 21:1 (TNM) aní: “Echi ripá siyona chabé nirúami alí echi kawí chabé nirúami ma ke newa ikili”. “Echi ripá siyona chabé nirúami” aniwáami ju suwaba echi gobiernos japi Satanás alí demonios jitra nulérami ju (Mat. 4:8, 9; 1 Juan 5:19). Isini kaachi echoná Biblia, japalí aní kawí echi ko ruyá aní echi pagótami japi piré jenaʼí Wichimóbachi (Gén. 11:1; Sal. 96:1). Jiti la, “echi kawí chabé nirúami” aniwáami ju echi pagótami chati japi jipi piré. Echi jitra ta machí japi Jeobá ke bi kuabi namuti atéwima “echi ripá siyona” alí “echi kawí”, nalí echi ko suwábima alí nakulíwima “bilé kulíwami ripá siyona alí bilé kulíwami kawí” jitra; echi ko aniwáami ju bilé kulíwami gobierno alí japi pirélima echi pagótami bi japi nijéwami ju Jeobá.

10. ¿Chúriká ayénachó Jeobá “kulíwami niwásimi suwaba namuti”?

¹⁰ ¿Chúriká ayénachó Jeobá “kulíwami niwásimi suwaba namuti”? (Apoc. 21:5, TNM). Jeobá ko we aʼlá atéwima echi kawí alí isima japi echi pagótami sébali aʼlá nokáami nima. Japi riká anili Isaías, omáana jenaʼí kawichí we baʼóami nima, japi riká nili echoná Edén. Tamujé ayénachó ibili niraa bukulíwami ku niwárami nipo. ¿Chu aniwáami ju jepuná? Japi Jeobá ku saʼwema echi pagótami japi ke omeri iyenia, japi busukachi ju, japi ke omeri kipúa, alí ayénachó isima japi ma suwili checho ku pirélima (Is. 25:8; 35:1-7).

11. ¿Piri nuleli Jeobá echi Juan, alí chúsiá?

¹¹ ¿Piri ju echi jaréala raʼíchali we natéami japi Jeobá aní? Jeobá ko aneli Juan: “Osá, jiti jepuná raʼíchali ne bichíwali ju” (Apoc. 21:5, TNM). Jeobá ke bi aneli Juan japi osimea echi raʼíchali, nalí ayénachó aneli chúsiá echi riká isima. Jéaneli: “Jiti jepuná raʼíchali ne bichíwali ju”. Echi ko aniwáami ju japi ne bichíwali ikimea japi echi aní. ¡We aʼlá nili japi Juan a nijéwili japi Jeobá nuleli alí osali! Jiti echi riká isili, jipi rawé ata omeri leeria alí natia japi Jeobá we baʼóami niwama jenaʼí Wichimóbachi alí narepo wiká namuti aʼláala pe aminánami.

12. ¿Chúsiá Jeobá omeri aniyá “¡Suwaba ma echi riká ikili!”?

¹² ¿Piri aní Jeobá miná ko? “¡Suwaba ma  echi riká ikili!” (Apoc. 21:6, TNM). Jeobá ko raʼicha japi riká ko echi Wichimóbachi we baʼóami alí jarecho si namuti, ma echi riká ikila. Alí echi riká ju jiti ke nirú bilé namuti japi chéwima Jeobá jiti isima japi echi ma anili. ¿Piri aní Jeobá miná ko jiti aminabi we bichíwipo japi echi aní?

13. ¿Chúsiá Jeobá aní “Nijé ju echi Alfa alí echi Omega”?

¹³ Japi riká ti ma anili, Jeobá bisiá niraa raʼíchili echoná visiones japi Juan riwali (Apoc. 1:8, TNM; 21:5, 6, TNM; 22:13, TNM). Suwaba echoná Jeobá anili: “Nijé ju echi Alfa alí echi Omega”. Alfa ko ju echi bacháwala letra japi olá echi alfabeto griego, alí omega echi upáwala. Jiti la, japalí binoy riwá “echi Alfa alí echi Omega”, Jeobá ko ruyá aní japalí chotasi isiá bilé namuti, echi ko a suní.

14. a) Ruyé bilé ejemplo japi chu kabú Jeobá anili “Alfa” alí chu kabú animea “Omega”. b) ¿Piri tamó ané Jeobá echoná Génesis 2:1-3?

¹⁴ Japalí Jeobá niwali Adán alí Eva, echi ko aneli piri nakili echi jitra alí echi Wichimóbachi jitra. Echi Biblia aní: “Onorúami ko nakiyé japi we kanílika pirélima alí jéaneli: ‘Wiká kúuchisi jiti wiká pirélima echoná wichimóbachi, alí aʼlá tibusi echi weʼé alí aʼlá nulesiʼ” (Gén. 1:28). Japalí Jeobá anili japi echi nakiyé, echi ko nili japi riká ko aniyá “Alfa”. Siné rawé sebama riweili japalí echi Adán alí Eva kúchuwala sébali aʼlá nokáami alí nijéwami, omáana Wichimóbachi pirélima alí we simá rikáachi niwama. Ma sebasa echalí rawé, Jeobá ko aniyá riwélima “Omega”. Japalí ma sunili niwayá “echi ripá siyona, echi wichimoba alí suwaba japi ikí nirú echoná”, Jeobá ko anili bilé namuti japi newariwéliti japi echi ko a  isima japi echi anili. Echi namuti oserúa chukú echoná Génesis 2:1-3 (leeri). Jeobá ko anili japi echi kichao rawé we natéami ju. ¿Piri aniwáami ju echi? Japi Jeobá ko a isima japi echi nakili echi pagótami jitra alí jena Wichimoba. Alí suwaba sébali echi riká ikimea ma suníachi echi kichao rawé.

15. ¿Chúsiá Satanás mayéliré japi Jeobá ma ke omérima isiá japi riká anili?

¹⁵ Japalí Adán alí Eva ke nijéwili, ma ke sébali aʼlá nokáami nili alí suwili, alí nokali japi echi kúchuwala echi riká cho ikimea (Rom. 5:12). Jaré ko natámiré japi Jeobá ma ke omérima isiá japi echi pagótami nijéwami alí sébali aʼlá nokáami, pirélima jenaʼí Wichimóbachi. Ayénachó natámiré japi Jeobá ke siné omérima aniyá “Omega” jiti Satanás cha isili. A keʼré japi echi Satanás nátili japi Jeobá ma ke omérima isiá japi riká anili ne chokichí jonsa. Echi ko mayéliré japi Jeobá miʼlimea Adán alí Eva alí niwama jarecho pagótami jiti omérima isiá japi riká ma anili. Nalí, Jeobá echi riká isílaká, Satanás animeli japi Jeobá ikaléami ju. ¿Chúsiá? Jiti echoná Génesis 1:28, Jeobá ko aneli Adán alí Eva japi echi kúchuwala wiká muwema alí pirélima omáana Wichimóbachi.

16. ¿Piri bilecho namuti jitra Satanás animeli japi Jeobá ke omérili isiá japi echi anili?

¹⁶ ¿Piri bilecho namuti nátiliré Satanás? A keʼré japi echi ko nátili japi Jeobá ko riwema japi Adán alí Eva olama kúchuwala, nalí japi echi ko ke siné aʼlá sébali nokáami nima (Ecl. 7:20; Rom. 3:23). Echi riká ikílaká, echi Satanás animeli japi Jeobá ke omérili isiá japi echi anili. ¿Chúsiá? Jiti jenaʼí Wichimóbachi ke siné pirélimili pagótami sébali aʼlá nokáami.

17. ¿Piri isili Jeobá jiti a ikimea japi echi anili tákoré Satanás, Adán alí Eva ke nijéwili, alí piri ikimea pe aminana? (Ayénachó iné echi imagen).

¹⁷ Satanás ke siné mayeli japi chúriká isima Jeobá jiti ikimea japi riká echi binoy anili tákoré Adán alí Eva ke nijéwili (Sal. 92:5). Japalí Jeobá riweli japi Adán alí Eva olama kúchuwala, echi ko néwariwélitili japi ke ikaléami ju alí japi echi aní sinibí echi riká ikí. Ayénachó néwariwélitili japi ke bilé namuti chéwima jiti ikimea japi riká echi anili. ¿Chúriká isili? Echi ko isili japi bilé “mukí kúchuwala” niyúbima echi Adán alí Eva kúchuwala japi nijéwami  ju, alí echi riká ikimea japi riká anili (Gén. 3:15; 22:18). Satanás ke siné mayeli japi Jeobá nijima binoy nolá Jesús jiti niyúbima echi pagótami. ¿Chúsiá? Jiti Jeobá echi riká isili jiti we galéami ju (Mat. 20:28; Juan 3:16, TNM). Alí Satanás ke siné galéami ju, echi ko sinibí binoy bi jitra nati. Alí, ¿piri ikimea jiti Jeobá nijili binoy nolá Jesús? Ma suníachi echi mili bamíali, echi Adán alí Eva kúchuwala japi ma sébali aʼlá nokáami nima alí nijéwami, sinibí pirélima echoná Wichimóbachi we baʼóami japi riká Jeobá nakili ne chokichí jonsa. Echalí, Jeobá ko ma omérima aniyá “Omega”.

18. ¿Chu iyiri ju echi bikiá namuti japi ta jitra bichiwi japi a ikimea japi Jeobá anili? (Ayénachó iné echi recuadro “ Bikiá namuti japi ta jitra bichiwi japi a ikimea japi Jeobá anili”).

¹⁸ Jenaʼí binelíwami ata bineli jaré namuti japi néwariwéliti japi a ne bichíwali we baʼóami nima jenaʼí Wichimóbachi. ¿Piri ti omeri anea jarecho jiti bichíwima japi Onorúami a isima japi echi anili? Bachá, japi Jeobá binoy ju japi aní japi isima echi namuti. Apocalipsis aní: “Echi japi asali echoná trono anili: ‘¡Nibí! Ani kulíwami niwásimi suwaba namutiʼ”. Jeobá ko a isínali japi echi anili alí a omérima echi riká isiá jiti echi ko we omérami ju alí we machíami. Okuá, Jeobá ko we aʼlá machí japi a ikimea japi echi anili, jiti la aní japi riká ko ma ikila echi namuti. Echi ko jéaní: “Osá, jiti jepuná raʼíchali ne bichíwali ju”. Ayénachó jéaní: “¡Suwaba ma echi riká ikili!”. Bikiá, japalí Jeobá chotasi isiá bilé namuti, echi ko a suní. Alí echi ruyá aní echi raʼíchali “Nijé ju echi Alfa alí echi Omega”. Jeobá ko néwariwélitima Satanás japi echi ko we ikaléami ju alí japi ke omeri isiá japi echi aní.

19. ¿Piri mi isima bilé ke bichíwisaká japi Jeobá a isima japi echi anili?

¹⁹ Newalá japi mi aminabi we bichíwima japalí mi ruyesa bilecho japi Jeobá a isima japi riká ma anili. Jiti la, ami léerisaká bilé pagótami japi aní Apocalipsis 21:4 alí echi mi anesa “We baʼóami ju echi namuti, nalí ke ni mayé japi bichíwali ju”, ¿piri mi anema? Aʼlá nima japi mi leérima alí ruyema echi versículos 5 alí 6. Riwiri echi pagótami japi Jeobá ma anili jaré namuti japi jitra bichíwima japi a ikimea japi riká echi anili alí japi echi ko ju japi riká ko Jeobá ma binoy riwalá osali echoná oselichi (Is. 65:16).