1, 2. a) ¿Chúsiá echi apóstol Pablo anili japi galéami niya “ne wabé simírami galá ju”? b) ¿Chu iyiri náriwami binepo?

 JAPALÍ echi apóstol Pablo anili japi ta bichíyami nísaré, buwésaré japi ikimea pe aminana alí galéami nísaré, echi ko anili japi “ne wabé simírami galá ju máputa echirigá wabé galéami níibo” (1 Cor. 13:13). ¿Chúsiá echi riká anili? Jiti pe aminana ma ti ke newalebo bichiwia japi Onorúami we baʼóami niwama jenaʼí Wichimóbachi, jiti echalí echi namuti japi ta buwea pireili ma echi riká ikimea. We be nalí, sinibí ti newalebo galea Jeobá alí echi pagótami, alí sinibí rawé aminabi ti wabé galéami nílisipo.

² Jiti ta sinibí néwariwélitisaré japi ta galéami ju, binepo bikiá náriwami. Bilé, ¿chúsiá ti galésaré anakupi niraa? Okuá, ¿chúriká ti néwariwélitipo japi ta galé anakupi niraa? Alí bikiá, ¿piri ti nokiboa jiti aminabi we galepo anakupi niraa?

3. ¿Chúsiá ti galéami nísaré anakupi niraa?

³ ¿Chúsiá we natéami ju galéami niya anakupi niraa? Jiti japalí ti echi riká noká, ati néwariwéliti japi ta ne bichíwali cristianos ju. Jesús jériká aneli echi apóstoles:  “Jenaʼí wichimóbachi piréami pagótami galá machimea mapu Nijeni ʼyemi mi binérali, átamo echirigá aʼnagupi galésagá” (Juan 13:35). Ayénachó, ati galéami nísaká, ati napawíkami nipo. Jiti la echi apóstol Pablo anili japi galéami niya anakupi niraa tamó iʼwírima jiti ta we napawíkami nipo (Col. 3:14). Alí nirú bilecho namuti si japi jitra we natéami ju japi ta galéami nipo. Echi apóstol Juan jériká osélili echi cristianos: “Mapu ne siʼnéami mapu ikí galeko Riosi, ayénachó galema echi auché jaré ritémtami galá bichíyami” (1 Juan 4:21). Jiti la, japalí ti galé echi hermanos, ayénachó ti néwariwéliti japi ta galé Jeobá.

4, 5. Néeka bilé ejemplo, ruyé chúsiá japalí ti galé Jeobá ayénachó ti galé echi hermanos.

⁴ ¿Chúsiá japalí ti galé Jeobá ayénachó ti galé echi hermanos? Ma inepo bilé ejemplo, natabo chúriká echi sulala alí suwaba echi ripokala napawika nocha. Bilé doctor omeri machiyá achi nayúami ju bilé pagótami sulala, japalí chapiká iné echoná sikala japoná rominí. ¿Piri ta biné jepuná ejemplo jitra?

⁵ Japi riká echi doctor japi sikala chapiká ineka machí achi bilé pagótami sulala nayúami ju o ke, echi riká cho tamujé ayénachó omeri machiyá achi ti galéami ju Jeobá, ineka chu yena ti galé jarecho. Ati níliaká japi ta ma ke me galé echi hermanos, a keʼré japi ayénachó ma ti ke me galé Jeobá. Nalí be, ati sinibí néwariwélitisaká echi hermanos japi ta we galé, jepuná newaré japi ayénachó ti we galé Jeobá.

6. Ati níliaká japi ta ma ke me galé echi hermanos, ¿chúsiá ke aʼlá ju? (1 Juan 4:7-9, 11).

⁶ Ati níliaká japi ta ma ke me galé echi hermanos, ke aʼlá ju. ¿Chúsiá? Jiti jepuná ko aniwáami ju japi ta ma ke me aʼlá amigos ju Jeobá yúa. Echi apóstol Juan aʼlá ruyeli jepuná jitra japalí jéanili: “A bilé ketasi galésagá binói rijimala mapu binói galá ritiwá, échiko ketasi omero galéa echi Walubela Riosi mapu binói ke siné riwali” (1 Juan 4:20). ¿Piri ta biné? Japi ta kanílitipo Jeobá ati galésaká anakupi niraa (leeri 1 Juan 4:7-9, 11).

7, 8. ¿Chúriká ti néwariwélitipo japi ta galé anakupi niraa?

⁷ Echoná Biblia wisabé niraa chukú jepuná nulalíwami: “Anakupi ne wabé [galesi]” (Juan 15:12, 17; Rom. 13:8; 1 Tes. 4:9; 1 Ped. 1:22; 1 Juan 4:11). Japalí ti galé, echi ko ju japi ta inili sulachí niraa alí ke bilé omeri machiyá japi ta nili. Jiti la, ¿chúriká nokiboa jiti néwariwélitipo jarecho japi ta galéami ju ne sulachí niraa? Echi namuti jitra japi ta aní alí japi ta noká.

⁸ A nirú wiká namuti japi ta jitra omero néwariwélitia echi hermanos japi ta we galé echi. Echoná Biblia ruyé jaré namuti japi ta nokisáré, japi riká jepuná: “Ne bichíwika raʼichia anakupi niraa” (Zac. 8:16). “Kilí rijóilasi aʼnagupi” (Mar. 9:50). “ʼYemi ibili niráa nakisá mapu echi auché jaré ritémtami ne bachá oʼwéalatami níima” (Rom. 12:10). “Galá galigá naresi aʼnagupi” (Rom. 15:7). “Aʼnagupi ku wikawasi” (Col. 3:13). “Sinibí kuʼwírasi echi auché jaré mapu ikí risúu olárami ju” (Gál. 6:2). “Aʼnagupi wabé kanílasi” (1 Tes. 4:18). “Aʼnagupi waminabi galá bichíilatasi” (1 Tes. 5:11). “Tansi Riosi aʼnagupi rugá” (Sant. 5:16).

9. ¿Chúsiá japalí ti iʼwiri jarecho jiti ku kanílima ati néwariwéliti japi ta we galé echi? (Ayénachó iné echi imágenes).

 ⁹ Jipi ko ma aʼlá binepo chúriká newariwélitipo japi ta galéami ju japi riká ti ma bineki echoná párrafo 8. Pablo jéanili: “Aʼnagupi wabé kanílasi”. ¿Chúsiá japalí ti iʼwiri jarecho jiti ku kanílima, néwariwéliti japi ta galé echi? Bilé libro japi ruyé echi Biblia jitra, aní japi echi raʼíchali griego niraa “kanílasi” japi Pablo néeli, aniwáami ju “wiliyá mulipi bilé pagótami yúa alí iʼwiria japalí ikí namuti we jilírami”. Jiti la, japalí ti iʼwérili iyá bilé hermano japi risoa ikí, ati iʼwiri jiti aminabi simea echoná buwérili japoná simía echi japi sinibí pirélinali. Sinibí japalí ti iʼwiri bilé hermano o bilé hermana japi risoa nili, ata néwariwéliti japi ta we galé echi (2 Cor. 7:6, 7, 13).

10. ¿Chúsiá ti aní japalí ti natimá ati ku kanílitipo jarecho?

¹⁰ Japalí ti natimá, ati ku kaníliti jarecho. ¿Chúsiá? Jiti japalí bilé pagótami we natimá bilecho japi risoa ikí, echi ko ku kanílitinali alí isimí bilé namuti echi iʼwírimia. Echi riká ju, bachá ko ti we natimá bilecho alí miná ko ti we inili ku kanílitinalia. Echi riká cho ju Jeobá yúa. Pablo ko ruyeli japi Onorúami we natimá echi pagótami, jiti la iʼwírinali jiti ku kanílima. Echi ko anili japi Jeobá ju “mapu tamujé tamí ne wabé natimá, ayénachó Binói sinibí tamujé tamí ku kanílata mapalita oʼmona” (2 Cor. 1:3). Pablo ko anili japi Jeobá ju “mapu tamujé tamí ne wabé natimá” jiti echi ju japi wabé natimáami ju, jiti la echi ko tamó “wabé galá ku kanílata mapalita wabé risúu olárami ju” (2 Cor. 1:4). Japi riká echi baʼwí japi machina echoná bajichi isimí japi echi pagótami ma ke balámima, Jeobá ayénachó ku kilí níliti alí kaníliti japi risoa nilia muchuwi. Nalí, ¿piri tamó iʼwírima jiti natimabo jarecho alí ku kanílitipo japi risoa nilia muchuwi japi riká isimí Jeobá? Ati iʼwérili nokisáré olayá echi cualidades japi tamó iʼwírima natimáami niya alí ku kanílitia jarecho. Ma binepo jaré echi jitra.

11. Japi riká aní Colosenses 3:12 alí 1 Pedro 3:8, ¿chu iyiri cualidades tamó iʼwírima galea jarecho alí ku kanílitia?

¹¹ ¿Piri tamó iʼwírima aminabi anakupi niraa galea alí ku kanílitia? Natia japi nili echi biléala, anakupi galea japi riká téemala alí aʼláala niya jarecho yúa (leeri Colosenses 3:12; 1 Pedro 3:8). Japalí ti natimáami ju alí ti olá jarecho cualidades, ati ke jilí nirabo ku kanílitia echi japi ikí namuti we jilírami. Jesús ko jériká ruyeli: “Ibili rijói chopi raʼicha achigórigá mapurigá binói ʼnata echoʼná binói sulálachi niráa. Echi we galabé oláami rijói we raʼicha echi we galabé raʼíchali mapujiti galabé suléami ju” (Mat. 12:34, 35). Echi riká ju, ati néwariwéliti echi hermanos japi ta we galé echi, japalí ti iʼwérili noká ku kanílitia.

12. a) ¿Chúsiá ti aʼlá tibuka nokisáré? b) ¿Piri náriwami binepo jipi ko?

¹² Sinéami ti nijéwinali jepuná nulalíwami: “Aʼnagupi ne wabé [galesi]” (1 Juan 4:7). Nalí ke ti wikawásaré japi Jesús anili japi “wikabé pagótami ma ketasi ʼme kalema” (Mat. 24:12). Jepuná jitra Jesús ko ke ruyá anili japi wikabé echi discípulowala riwema galea anakupi niraa. Nalí be, ati we aʼlá tibuka nokisáré jiti ke nipo  japi riká echi pagótami japi ke galéami ju. Jiti la, jipi ko binepo jepuná náriwami jitra: ¿piri tamó iʼwírima machiyá achi ti ne bichíwali we galé echi hermanos?

13. ¿Chúriká ti machiboa achi ti ne bichíwali we galé jarecho?

¹³ Bilé namuti japi ta jitra omeri machiyá achi ti ne bichíwali we galé echi hermanos, echi ko ju ineka piri ti noká japalí ti ikí namuti jilírami (2 Cor. 8:8). Bilé namuti jilírami ko ju japi jitra raʼíchili echi apóstol Pedro, japalí anili jepuná: “Arigá ʼwérali ju máputamo aʼnagupi ne wabé galebo, mapujiti átamo echirigá aʼnagupi galésagá echalí ʼyémitamo wisabé aʼnagupi ku wikáwabo” (1 Ped. 4:8). Echi riká ju, japi ta noká japalí echi hermanos ke tamó kaníliti o noká jaré namuti japi tamó omonáriti, néwariwélitima achi ti we galé echi.

14. Japi riká aní 1 Pedro 4:8, ¿chu yena ti galéami nísaré? Ruyé bilé ejemplo.

¹⁴ Ati aminabi aʼlá binepo echi raʼíchali japi anili Pedro. Kulí chotasia echoná versículo 8, ruyé japi ti “ne wabé galebo”. Echi raʼíchali griego niraa “ne wabé” japi Pedro néeli, aniwáami ju “japi raʼlaní”. Miná ko echi versículo aní japi ati wabé  galésaká echi hermanos, ati ku wikáwipo echi namuti japi ke aʼlá noká echi. Natá bilé mesa jitra japoná we chónami ju, ati omeri raʼlachia echi chiní echoná mesa póolimia, ke uchíi bi, nalí omáana japoná chónami ju. Echi riká cho, ati we galésaká echi hermanos ati ku wikáwipo o “póolipo” ke uchíi bi, nalí suwaba japi tamó cha olá.

15. ¿Piri ti nokiboa ati ne wabé galésaká jarecho? (Efesios 4:32).

¹⁵ Ati ne wabé galésaká echi hermanos, ati ku wikáwipo japi ke aʼlá noká, tákoré ti jilí niraa (leeri Efesios 4:32). Japalí ti ku wikawi jarecho, ati néwariwéliti japi ta we galé echi alí ti ayénachó kanílitinali Jeobá. ¿Piri bilecho namuti tamó iʼwírima jiti ku wikáwipo japi ke aʼlá noká jarecho alí ke sapú naʼáwipo echi namuti jitra japi echi noká?

16, 17. ¿Piri bilecho namuti tamó iʼwírima jiti ku wikáwipo echi hermanos? Ruyé bilé ejemplo. (Ayénachó iné echi imágenes).

¹⁶ Iné echi namuti aʼláala japi noká jarecho alí ke ko echi japi ke aʼlá noká. Natá japi mi we kanila simiri jaré hermanos yúa, alí miná ko timí machibú bilé foto sinéami ka napawika. Jiti mi nakí japi sinéami aʼlá machínima, mujé ko bikiá fotos machibú. Nalí mi iné japi echoná bilé foto, bilé hermano ke aʼlá machínili. ¿Piri mi olama echi foto? Mujé ko  borrárima alí mi riwema echi okuá fotos japoná sinéami aʼlá machínali.

¹⁷ Echi fotos japi ta baʼori ju japi ta jariwé, jiti tamó iʼwiri néwalayá japalí ti kanila simárili echi hermanos yúa. Nalí natá japi bilé echalí rawé, bilé hermano isili o anili bilé namuti japi ke aʼlá nili. ¿Piri mi isima? ¿Chúsiá mi ke wikawi echi namuti japi riká mi isimí borraria bilé foto japi ke aʼlá machínali? (Prov. 19:11). Jiti ta wisabé niraa we kanila simárili echi hermano yúa, ati wikawi echi namuti japi ke aʼlá isili. Echi ko ju japi riká jariwea “echi fotos japi ta we baʼori”.

18. ¿Chu iyiri ju echi namuti wabé natéami japi ta bineli jena binelíwami?

¹⁸ ¿Chúsiá ti ke riwénali galéami niya anakupi niraa? Japi riká ti ma bineki, jiti japalí ti galé echi hermanos, ayénachó ti néwariwéliti japi ta galé Jeobá. ¿Chúriká ti néwariwéliti japi ta we galé echi hermanos? Bilé namuti ko ju japalí ti ku kaníliti echi hermanos. Alí jiti aminabi echi riká nokiboa, ati natimáami nísaré. ¿Piri ti nokiboa jiti aminabi we galepo anakupi niraa? Ati iʼwérili nokiboa ku wikawia echi namuti japi aʼlá noká jarecho.

19. ¿Chúsiá we natéami ju japi ta galéami nipo jipi rawé?

¹⁹ ¿Chúsiá wabé natéami ju japi ta galéami nipo jipi rawé? Ma inepo japi anili Pedro: “Ke ʼme ayó suwibama suwaba namuti. Echijiti [...] aʼnagupi ne wabé galebo” (1 Ped. 4:7, 8). Jiti ta machí japi ma mulipi suwábitami nima suwaba echi chati namuti, ¿piri ta buwé japi ikimea? Jesús jériká anili echi discípulowala jitra: “Siʼnéami echi auché jaré pagótami ʼyemi mi echirigá ne wabé kichima mapujítitamo tamí bichíyami ju” (Mat. 24:9). Jiti ta aminabi nóchilipo Jeobá tákoré jarecho tamó kichíe, ati napawíkami nísaré. Ati we galésaká echi hermanos, Satanás ko ke omérima isiá japi ta ke napawíkami nipo (Col. 3:14; Filip. 2:1, 2).